Lebuh lemai Hari Satu, Jesus mupuk ari Jerusalem lalu pulai ngagai Betani ke bisi ba begian timur Bukit Kana. Iya engka bemalam ba rumah bala kaban iya, iya nya Lasarus, Maria sereta Marta.

Ba pagi hari siti, 11 Nisan, Jesus enggau bala murid iya benung mupuk pulai ngagai Jerusalem. Nya meh kali ti penudi Jesus deka ngagai Rumah Sembiang ba Jerusalem, lalu nya mega hari ke penudi iya nginjil. Pengudah nya, iya deka ngintu Pengerami Paska sereta ngepunka pengawa ngingatka pemati iya. Pengujung iya, Jesus deka dipechara lalu diukum bunuh.

Lebuh sida deka ngagai Jerusalem, sida patut bejalai nengah Bukit Kana. Ba dia, Peter tepedaka pun kayu ara ti disumpah Jesus ba pagi hari sebedau nya. Ku Peter madah ngagai Jesus: “Rabbi, peda nya! Pun kayu ara ti disumpah nuan udah mati.”—Mark 11:21.

Tang nama kebuah Jesus nyumpah pun kayu nya? Ku iya madah kebuah nya: “Enggau bendar aku madah ngagai kita, enti kita arap lalu enda kakang ati, kita ulih ngereja utai ti udah dikereja aku ngagai pun kayu ara tu. Indah, enti kita bejaku ngagai bukit tu, ‘Angkat nuan lalu buai diri empu ngagai tasik,’ lalu utai nya deka nyadi. Enti kita arap, kita deka nerima sebarang utai ti dipinta kita dalam sampi.” (Matthew 21:21, 22) Sebedau tu, Jesus kala madah indah orang ke bisi pengarap ti mit pan ulih mindah bukit.—Matthew 17:20.

Enggau nyumpah pun kayu nya, Jesus ngajar kebuah orang patut arapka Petara. Iya madahka: “Sebarang utai ti dipinta kita ngena sampi, kita patut arap kita deka nerima utai nya. Enggau nya, kita tentu deka nerima iya.” (Mark 11:24) Ajar tu penting ke semua murid Jesus, kelebih agi ke bala rasul laban sida deka napi penguji ti besai enda lama da agi. Tang bisi siti da agi utai ke ulih dipelajarka kitai pasal arapka Petara ari pun kayu ara ti mati laban disumpah Jesus.

Bansa Israel baka pun kayu ara nya, ke bisi daun tang enda ngasilka buah. Sida udah ngaga sempekat enggau Petara, lalu nyadi nembiak Iya. Nya alai, sida ngumbai diri nitihka Adat Petara. Tang kebendar iya, sida enda arapka Petara lalu enda ngasilka buah ti manah. Sida indah nulak Anak Petara! Nya kebuah Jesus ngasuh pun kayu ara mati kena ngambarka utai ke deka nyadi ngagai bansa Israel ke enda arap nya.

Udah nya, Jesus enggau bala murid iya datai ba Jerusalem. Baka biasa, Jesus ngagai Rumah Sembiang lalu ngajar orang. Bala tuai imam enggau bala tuai bansa orang Judah datai ngagai Jesus. Sida engka ingatka utai ke digaga iya ngagai orang ke penukar duit sehari sebedau nya. Nyadi sida nanya Jesus: “Ari ni nuan bulih kuasa? Sapa ke meri nuan kuasa ngereja utai tu?”—Mark 11:28.

Jesus nyaut sida: “Aku bisi siti tanya ke kita. Saut aku, lalu aku deka madah ngagai kita sapa ke meri aku kuasa ngereja semua utai tu. Sapa ke nganjung John maptisa orang? Petara ke ba serega tauka mensia? Saut aku.” Nyadi, bala imam enggau bala tuai bansa orang Judah berandau enggau pangan diri, ku sida: “Enti kitai nyebut, ‘Petara,’ iya deka nyebut ngagai kitai, ‘Enti pia, nama kebuah kita enda arapka iya deh?’ Tauka kati kitai berani deka nyebut, ‘Mensia?’ Tang sida takut nyebut munyi nya laban orang mayuh ngumbai John nya endang nabi.”—Mark 11:29-32.

Sida ke ngelaban enda ulih nyaut Jesus. Nya alai sida madah: “Enda kami nemu.” Jesus lalu bejaku ngagai sida: “Enti pia, aku pan enggai madah ngagai kita sapa ke meri aku kuasa ngereja semua utai tu.”—Mark 11:33.