Maya nya, udah jauh malam. Lalu, bala imam udah besetuju deka meri 30 singkap duit pirak ngagai Judas ngambika iya nyerahka Jesus ngagai sida. Nya alai, Judas nguluka bala tuai imam enggau orang Parisi ngiga Jesus. Sida mega mai siku ketuai soldadu sereta seraban soldadu enggau sida.

Sebedau nya, maya sida ngintu Pengerami Paska, Jesus ngasuh Judas mupuk. Udah nya, Judas betemu enggau bala tuai imam. (John 13:27) Lalu sida ngempuruka bala jejaga sereta seraban soldadu. Keterubah iya, Judas engka mai sida ngagai bilik alai Jesus enggau bala rasul iya ngintu Pengerami Paska. Tang pengudah nya, sida bejalai nengah Lebak Kidron lalu ngagai Taman Getsemani. Sida ukai semina mai senyata aja, tang sida mega mai sempun api enggau lampu kelita.

Lebuh Judas nguluka sida niki Bukit Kana, iya engka udah nemu dini alai ngiga Jesus. Tu ketegal sepemanjai minggu nya, Jesus enggau bala rasul iya suah ngetu ba Taman Getsemani lebuh sida pulai mansang ari Betani enggau Jerusalem. Tang maya nya udah malam. Nyadi Jesus enda entu ulih dipeda ketegal dilindung pun kayu kana ke bisi ba taman nya. Nyadi baka ni bala soldadu ke engka enda kala meda Jesus ulih ngelala iya? Judas deka meri sida siti tanda. Ku iya: “Orang ke disium aku, nya meh iya. Tangkap iya. Bai iya lalu tentuka iya enda ngerarika diri.”—Mark 14:44.

Lebuh sida datai ba taman nya, Judas tepedaka Jesus enggau bala rasul iya. Udah nya, Judas mansang ngagai Jesus lalu madah: “Tabi, Rabbi!” lalu nyium Jesus. Ku Jesus nanya Judas: “Nama kebuah nuan kitu?” (Matthew 26:49, 50) Ku Jesus agi: “Judas, kati nuan nyium Anak Mensia kena nyerahka iya ngagai munsuh?” (Luke 22:48) Tang Jesus enda ibuhka Judas agi laban iya amat jai!

Pengudah nya, Jesus mansang ke mua lalu nanya: “Sapa orang ke digiga kita?” Ku sida ari raban nya nyaut: “Jesus orang Nasaret.” Enggau berani Jesus nyaut sida: “Aku meh orang ke digiga kita.” (John 18:4, 5) Sida tekenyit ninga saut Jesus ti amat berani. Ketegal nya, sida surut lalu labuh ke tanah.

Ari ke ngerarika diri, Jesus nanya baru sapa ke digiga sida. Ku sida nyaut iya sekali agi: “Jesus orang Nasaret.” Enggau tenang iya nyaut sida: “Aku udah madah ngagai kita, aku meh orang ke digiga kita. Enti aku orang ke digiga kita, lepaska sida tu.” Nya maya ti amat tusah ba Jesus. Taja pia, sebedau tu Jesus kala besampi madah, iya enda tau lenyau siku pan ari bala murid iya. (John 6:39; 17:12) Jesus udah bebendar nyaga bala rasul iya ti setia ngambika nadai siku ari sida dipunaska, kelimpah ari ‘iya ke deka dipunaska,’ iya nya Judas. (John 18:7-9) Nya alai, iya minta bala munsuh ngelepaska bala murid iya.

Lebuh bala soldadu angkat lalu mansang ngagai Jesus, bala rasul nyau sedar utai ke benung nyadi. Nyadi sida nanya iya: “Tuan, patut kami nyerang sida ngena pedang?” (Luke 22:49) Sebedau Jesus sempat nyaut sida, Peter dulu agi nyintak siti ari pedang ti dibai sida rasul. Iya nyerang ulun imam besai ke benama Malkus, lalu mutuska pending kanan iya.

Taja pia, Jesus negu pending Malkus lalu ngeraika iya. Udah nya, Jesus ngajar siti utai ti penting. Ku iya madah ngagai Peter: “Selitka pedang nuan. Semua orang ke ngena pedang deka mati laban pedang.” Taja pia, Jesus sanggup nejuka diri ditangkap laban iya madah: “Enti pia, baka ni ku ayat Bup Kudus ti madahka  utai tu patut nyadi, deka dikeamatka?” (Matthew 26:52, 54) Ku iya agi: “Endaka aku patut ngirup ari mangkuk ke diberi Apai ngagai aku?” (John 18:11) Jesus sanggup ngereja peneka Petara, taja pan iya patut mati.

Jesus lalu nanya raban orang mayuh ke nyerang iya: “Kati aku tu perumpak alai kita bebaika pedang enggau pemalu mansang nangkap aku? Tiap hari aku duduk ngajar dalam Rumah Sembiang, tang enda ga kita nangkap aku. Taja pia, semua utai tu nyadi kena ngamatka jaku ti udah ditulis bala nabi.”—Matthew 26:55, 56.

Pengudah nya, raban soldadu, ketuai soldadu, enggau bala jejaga orang Judah nangkap Jesus lalu nanchang iya. Lebuh bala rasul meda tu, sida pan ngerarika diri. Tang, “siku lelaki ti agi biak” nitihka Jesus enda jauh ari belakang. Lelaki tu engka Mark. (Mark 14:51) Taja pia, orang mayuh meda utai ke digaga Mark lalu nguji deka nangkap iya. Ketegal nya, iya ngerarika diri ari sida, lalu ninggalka gari luar iya ti digaga ari kain linin.