Maya nya engka udah laun malam. Jesus udah bebendar meransang bala rasul iya ke tetap ati, lalu iya deka madahka siti da agi sempama.

Ku Jesus: “Aku meh pun anggur ti bendar, lalu Apai aku Orang ke nanam anggur.” (John 15:1) Jaku sempama Jesus nyauka sama enggau utai ke disebut beratus taun sebedau nya pasal bansa Israel ke dikumbai batang anggur Jehovah. (Jeremiah 2:21; Hosea 10:1, 2) Taja pia, Jehovah deka ninggalka bansa Israel. (Matthew 23:37, 38) Nya alai, Jesus ngajar utai ti baru. Jesus meh pun anggur ke ditanam Apai iya kenyau ari maya iya dipilih ngena kuasa kudus kena taun 29 M. Tang Jesus nunjukka pun anggur nya ukai semina ngambarka iya aja.

Ku iya: “[Apai aku] muai tiap iti dan ke enda bebuah ari aku, lalu Iya nyarau tiap iti dan ke bebuah ngambika dan nya bebuah lebat agi. . . . Dan ke enda mengkang bejantil ba pun iya, enda ulih bebuah. Pia mega, enti kita enda mengkang beserakup enggau aku, kita enda ulih bebuah. Aku meh pun anggur, lalu kita nya dan iya.”—John 15:2-5.

Jesus udah besemaya, pengudah iya mupuk, iya deka meri siku penulung ngagai bala murid iya, iya nya kuasa kudus. Lalu 51 hari pengudah nya, lebuh bala rasul enggau bala murid bukai nerima kuasa kudus, sida nyadi dan pun anggur nya. Nya alai, semua “dan” patut mengkang beserakup enggau Jesus. Nama kebuah?

Iya nerangka: “Barang sapa mengkang beserakup enggau aku, aku mega deka beserakup enggau iya. Enggau nya, iya deka mansutka mayuh buah. Kita enda ulih ngereja nama-nama utai, enti nadai aku.” “Dan” nya merujuk ngagai bala murid Jesus ke tetap ati sereta deka mansutka mayuh buah. Sida bebuah lebuh sida neladan sifat Jesus ransing madah ngagai orang bukai pasal Perintah Petara sereta nulung mayuh agi orang nyadi murid Jesus. Tang baka ni enti sesiku orang enda beserakup enggau Jesus lalu enda bebuah? Jesus madahka: “Barang sapa ke enda mengkang beserakup enggau aku nya, baka dan ke dibuai.” Pengudah nya, Jesus madah: “Enti kita mengkang beserakup enggau aku, lalu nyimpan jaku aku dalam ati kita, kita ulih minta nama-nama utai ke dikinginka kita, lalu utai nya deka nyadi.”—John 15:5-7.

Udah nya, Jesus madahka baru utai ke kala disebut iya sebedau tu, iya nya pasal ngasika pesan iya. (John 14:15, 21) Jesus madahka siti chara bala murid iya ulih ngereja nya: “Enti kita nitihka pesan aku, kita mengkang dalam pengerindu aku, baka aku ke udah nitihka pesan Apai lalu mengkang dalam pengerindu Iya.” Tang, bisi utai bukai ke patut digaga sida kelimpah ari rinduka Petara Jehovah enggau Jesus. Ku Jesus madah: “Tu meh pesan aku: Kita patut rinduka pangan diri, baka aku ke udah rinduka kita. Nadai orang bisi pengerindu ke besai agi ari orang ke sanggup nyerahka nyawa diri ke bala kaban iya. Kita kaban aku enti kita ngereja utai ke diasuh aku.”—John 15:10-14.

Beberapa jam pengudah nya, Jesus deka nunjukka pengerindu lebuh iya nyerahka nyawa diri ke semua orang ke arapka iya. Teladan Jesus patut meransang murid iya nunjukka pengerindu ti enda berundingka diri empu ngagai pangan diri. Pengerindu nya deka nyadi tanda ke nunjukka sida murid Jesus, baka ke kala disebut Jesus sebedau nya: “Enti kita rinduka pangan diri, semua orang deka nemu, kita meh murid aku.”—John 13:35.

Jesus madah bala rasul nya “kaban” iya. Ku Jesus madah kebuah iya: “Aku ngumbai kita kaban aku, laban aku udah madah ngagai kita semua  utai ke didinga aku ari Apai aku.” Tu tentu kaul ti amat berega ba bala rasul laban sida ulih nyadi kaban Jesus sereta nemu utai ke dipadahka Jehovah ngagai iya. Tang ngambika sida ulih mengkang bisi kaul nya, sida patut “terus mansutka buah.” Enti sida ngereja nya, Jesus madah: “Nama-nama utai ke dipinta kita ari Apai dalam nama aku deka diberi ngagai kita.”—John 15:15, 16.

Pengerindu ke diayanka entara bala murid Jesus deka nulung sida tan ngenatka penanggul ke deka ditapi sida. Jesus madah dunya deka begedika bala murid iya, tang iya ngelantangka ati sida enggau madah: “Enti dunya begedika kita, ingat meh dunya udah begedika aku sebedau iya begedika kita. Enti kita sebagi ari dunya, dunya deka rinduka kita laban kita enggi dunya. Tang . . . kita ukai sebagi ari dunya. Nya kebuah dunya begedika kita.”—John 15:18, 19.

Pengudah nya, Jesus nerangka kebuah bukai dunya deka begedika bala murid iya: “Sida deka ngereja semua tu ngagai kita ketegal nama aku, laban sida enda ngelala Iya ke ngirumka aku.” Jesus madah, taja pan iya udah ngereja mayuh pengawa ti luar biasa, tang orang agi enggai arapka iya. Nya alai sida udah bedosa. Ku iya: “Enti sida enda meda aku ngereja pengawa ke enda kala dikereja orang, sida enda bedosa. Tang diatu, sida udah meda aku lalu begedika aku sereta Apai aku.” Kebendar iya, utai ke digaga sida udah ngamatka jaku benabi dalam Bup Kudus.—John 15:21, 24, 25; Masmur 35:19; 69:4.

Sekali agi, Jesus besemaya iya deka meri penulung, iya nya kuasa kudus. Semua murid iya deka nerima kuasa kudus lalu nya deka nulung sida mansutka buah, iya nya “meri saksi” pasal Jesus.—John 15:27.