Ba Rumah Sembiang, Jesus udah nyaut bala tuai imam sereta bala ketuai bansa orang Judah ke nanya pasal ari ni iya bulih kuasa ngereja utai. Saut Jesus ngasuh sida enda bemunyi agi. Udah nya, iya meri siti jaku sempama kena nunjukka sapa sida kebendar iya.

Jesus madahka: “Siku lelaki bisi dua iku anak lelaki. Iya mansang ngagai anak iya ke tuai agi, lalu bejaku, ‘Anak, alai nuan gawa ba kebun anggur seharitu.’ Lalu ku anak tuai iya nyaut, ‘Enggai.’ Tang udah nya, iya nesal, lalu nurun gawa. Udah nya, apai nya mansang ngagai anak iya ke biak, lalu bejaku munyi nya mega enggau iya. ‘Au, apai,’ ku anak iya nya nyaut, tang iya enda nurun gawa. Ni bagi seduai nya ke ngereja utai ti dikedekaka apai seduai iya?” (Matthew 21:28-31) Saut ari tanya Jesus nya tentu merujuk ngagai anak ke tuai nya, laban iya ngereja peneka apai iya.

Jesus lalu bejaku ngagai sida: “Enggau bendar aku madah ngagai kita: Bala pengumpul chukai enggau bala indu sundal deka tama dulu agi ari kita ke dalam Perintah Petara.” Keterubah iya, bala pengumpul chukai enggau bala indu sundal enda nyembah Petara. Taja pia baka anak ke tuai nya, sida nesal ati lalu nyembah Petara. Tang, bala tuai pengarap baka anak ke biak nya, laban sida ngaku diri nyembah Petara tang sida enda bebendar ngereja utai ke diasuh Petara. Jesus madah: “John [Pemaptisa] udah datai ngagai kita nunjukka jalai ngagai pengelurus, tang kita enda arapka iya. Enda baka kita, bala pengumpul chukai enggau bala indu sundal arapka iya. Taja pan kita meda utai nya nyadi, kita agi enda nesal ati ke dosa diri lalu arapka iya.”—Matthew 21:31, 32.

Udah nya, Jesus madahka siti da agi jaku sempama. Sempama tu nunjukka bala tuai pengarap ukai aja enda nyembah Petara, tang sida nya amat jai. Jesus madah: “Siku orang nanam anggur lalu nirika pagar ngelingi kebun nya. Iya numbak lubang endur nganchurka buah anggur, lalu ngaga sebuah menara. Udah nya, iya nyua kebun anggur nya ngagai orang, lalu bejalai ngagai menua bukai. Lebuh musin ngumpul buah anggur datai, iya ngasuh siku ulun iya mansang ngagai bala orang ke nyua kebun anggur nya, ngambi buah ke endang sigi ungkup iya ari sida. Tang sida nangkap ulun nya, malu iya, lalu ngasuh iya pulai nadai mai utai. Udah nya, iya ngirumka siku agi ulun ngagai sida. Tang sida malu pala ulun nya lalu ngeleseka iya. Iya ngirumka siku da agi ulun, lalu siku nya dibunuh sida. Iya ngirumka mayuh agi ulun, tang sekeda ulun nya dipalu, lalu sekeda nya dibunuh sida.”—Mark 12:1-5.

Kati orang ba dia ulih faham sempama Jesus? Sida engka ingat jaku ke disebut Isaiah: ‘Israel nya meh kebun anggur Jehovah ti Pemadu Bekuasa. Orang Judah nya meh batang anggur ti ditanam Iya. Iya ngadang sida deka ngereja utai ti manah, tang sida bebunuhka orang.’ (Isaiah 5:7) Sempama Jesus nyauka sama enggau ayat ba Isaiah nya. Orang ke bempu kebun anggur nya Jehovah, lalu kebun anggur nya bansa Israel. Sida baka ke dipagar laban Adat Petara ngelindung sida. Lalu Jehovah udah ngirumka bala nabi Iya kena ngajar nembiak Iya lalu nulung sida ngasilka buah ti manah.

Taja pia, “bala orang ke nyua kebun” malu sereta munuh “bala ulun” ke dianjung ngagai sida. Ku Jesus nerangka: “Bisi siku da agi orang ke ulih dikirumka [orang ke bempu kebun anggur] iya nya anak lelaki ke dikesayauka iya. Ke pengujung iya, iya ngirumka anak iya nya. Ku iya, ‘Sida tentu deka bebasaka anak aku.’ Tang bala orang ke nyua kebun nya bejaku enggau pangan diri, ‘Tu orang ke deka bempu kebun anggur tu. Aram kitai munuh iya, ngambika semua reta pesaka iya diempu kitai.’ Nya alai sida nangkap iya, munuh iya.”—Mark 12:6-8.

 Jesus lalu nanya: “Nama deka dikereja orang ke bempu kebun anggur nya?” (Mark 12:9) Bala tuai pengarap nyaut: “Iya tentu deka munuh orang nya ketegal sida jai. Udah nya, iya ngasuh orang bukai nyua kebun nya, iya nya orang ke deka meri iya buah lebuh musin ngumpul buah anggur datai.”—Matthew 21:41.

Kebendar iya, bala tuai pengarap nya enda sedar sida benung ngakim diri empu, laban sida nya meh “bala orang ke nyua kebun” ba “kebun anggur” Jehovah, iya nya bansa Israel. Jehovah, ke bempu kebun anggur deka sida ngasilka buah ti manah. Reti iya, sida patut arapka Anak Iya, iya nya Messiah. Ketegal nya, Jesus merening ngagai bala tuai pengarap lalu madahka: “Kati kita nadai kala macha dalam Bup Kudus: ‘Batu ti dibuai tukang rumah udah nyadi batu sukut ti pemadu beguna. Batu tu datai ari Jehovah, lalu manah amat dipeda mata kitai’?” (Mark 12:10, 11) Udah nya, Jesus madah: “Nya alai, aku madah ngagai kita, Perintah Petara deka diambi ari kita, lalu diberi ngagai siti bansa ke deka ngereja peneka Petara.”—Matthew 21:43.

“Bala penulis Adat enggau bala tuai imam nemu Jesus bejaku pasal sida ngena jaku sempama nya.” (Luke 20:19) Nya alai, sida keran deka munuh Jesus, iya nya “orang ke deka bempu kebun anggur.” Tang sida takutka orang mayuh, ke ngumbai Jesus nya siku nabi. Nyadi, sida enda nguji munuh iya ba maya nya.