Semua Bup Kudus nya siti pesan ari Petara. Apai kitai ti di serega udah nyediaka Bup Kudus kena ngiring kitai. Taja pia, peratika dua iti pesan ti istimewa ke udah dipadah lebih ari 2,000 taun menya. Dua iti pesan tu dipadahka siku melikat ke benama Gabriel, ti “bediri ba mua Petara.” (Luke 1:19) Aram kitai meda utai ke nyadi lebuh Gabriel madahka pesan nya.

Kira-kira ba taun 3 S.M., Gabriel ngagai Jerusalem kena madahka pesan ari Petara ngagai siku imam ke benama Sekariah. Ba Judea, Sekariah enggau bini iya, Elisabet diau ba endur ti bebukit. Seduai iya udah tuai sereta nadai anak. Lebuh maya nya, Sekariah gawa nyadi imam ba rumah sembiang Jehovah di Jerusalem. Enggau enda dijangka, Gabriel ayan ba mua Sekariah lebuh iya deka nunu menyan ba Rumah Sembiang.

Sekariah amat takut tang melikat Gabriel madah ngagai iya: “Anang takut, Sekariah, laban sampi nuan udah didinga Petara. Lalu bini nuan Elisabet deka ngadaka siku anak lelaki, lalu nuan deka meri nama iya John.” Gabriel mega madahka John “deka nyadi orang ti bekuasa ba mata Jehovah,” lalu “deka ngempuruka orang ti udah sedia deka nyembah Jehovah.”—Luke 1:13-17.

Sekariah enda pechayaka jaku Gabriel laban iya enggau bini iya udah tuai. Nya alai Gabriel madah ngagai iya: “Ketegal nuan enda arapka jaku aku, nuan deka nyadi bisu. Nuan enda ulih bejaku nyentuk ngagai semua utai nya nyadi.”—Luke 1:20.

Maya nya, orang mayuh ba luar berunding nama kebuah Sekariah lama amat ba Rumah Sembiang. Lebuh iya pansut, iya enda ulih bejaku. Iya semina ulih bejaku enggau sida ngena jari. Nya alai, sida ngumbai iya tentu udah meda utai ti nyelai ba Rumah Sembiang.

Pengudah Sekariah nembuka pengawa iya ba Rumah Sembiang, iya pulai ke rumah. Enda lama pengudah nya, Elisabet ngandung! Lalu pengelama lima bulan, Elisabet enda pansut ari rumah.

Sekali agi, Gabriel dianjung ngenataika pesan ari Petara. Ngagai sapa? Ngagai siku indu dara ke benama Maria, ke diau ba Nasaret di Galili. Ku Gabriel madah ngagai iya: “Petara gaga ati ke nuan. Nuan deka ngandung lalu ngadaka siku anak lelaki. Nuan patut meri iya nama Jesus.” Ku Gabriel agi: “Iya deka nyadi orang ti bemulia, lalu dikumbai Anak Petara ti Pemadu Tinggi. . . . Iya deka nyadi Raja ti merintah peturun Jakop belama iya. Lalu Perintah iya enda nemu abis.”—Luke 1:30-33.

Gabriel tentu berasai gaga ati laban diberi basa ti besai ngenataika dua iti pesan nya. Seraya kitai belajar mayuh agi pasal John enggau Jesus, kitai deka faham kebuah dua iti pesan nya amat penting.