Musin bungai udah datai. Tu meh maya Josep mai ruang bilik iya ngagai Jerusalem. Sida mansang kin begulai enggau bala kaban sereta kaban belayan sida. Ninting taun, sida ngagai Jerusalem laban deka nyambut Pengerami Paska, nitihka utai ke diasuh dalam Adat Petara. (Ulang Adat 16:16) Pejalai ari Nasaret ngagai Jerusalem kira-kira 120 kilometer. Semua sida tentu amat kisuk sereta gaga ati. Diatu Jesus beumur 12 taun, lalu iya enda sabar deka mansang ngagai Rumah Sembiang sereta nyambut Pengerami Paska nya.

Jesus enggau sida sebilik ukai semina deka ngintu Pengerami Paska aja. Pengudah Pengerami Paska, sida deka ngintu Pengerami Roti ti Enda Beragi pengelama tujuh hari. (Mark 14:1) Pengerami Roti ti Enda Beragi sebagi ari pengawa ke diintu maya musin Pengerami Paska. Kesuah iya, pejalai ari Nasaret, diau ba Jerusalem, sereta pulai baru ngagai rumah sida, begunaka awak kira-kira dua minggu. Tang ba taun tu, pejalai sida nyadi panjai agi ketegal bisi utai ti enda dijangka nyadi maya sida pulai ari Jerusalem.

Lebuh sida bejalai pulai, Josep enggau Maria ngumbai Jesus nitihka orang mayuh ke benung bejalai enggau sida. Lebuh sida deka ngetu bemalam, sida ngiga iya ba bala kaban belayan sereta orang ke dikelala sida, tang sida enda tetemuka iya. Anak seduai iya udah lenyau! Nya alai, seduai iya nikal baru ngagai Jerusalem lalu ngiga iya enggau bebendar.

Pengelama dua hari, Josep enggau Maria ngiga Jesus. Tang sida enda tetemuka iya. Ba hari ketiga, sida tetemuka Jesus ba Rumah Sembiang. Iya benung duduk begulai enggau bala pengajar Adat orang Judah. Iya mendingka sida, sereta betanyaka utai ngagai sida. Semua orang ke ninga balat alit ati pasal iya ke ulih meretika mayuh utai.

“Anak, nama kebuah nuan ngasuh kami irau?” ku Maria nanya. “Bendar amat kami duai apai nuan begigaka nuan.”—Luke 2:48.

Jesus tekenyit lalu nyaut, “Nama kebuah seduai begigaka aku? Endaka seduai nemu, aku patut ba rumah Apai aku?”—Luke 2:49.

Jesus nitihka apai indai iya pulai ke Nasaret. Iya mega terus ngasika apai indai iya. Jesus terus mansang besai lalu penemu-dalam iya majak nambah. Taja pan iya agi biak, tang iya majak dikerinduka Petara enggau mensia. Jesus netapka teladan ti manah laban iya ukai semina ngenuluka pengawa rohani, tang iya mega bebasaka apai indai iya.