1-3. Nama genera ke diterima Peter, lalu nama kebuah kitai patut belajar ari reti genera nya?

 BISI sekali, lebuh musin ruruh ba taun 36 M., Peter besampi ba atas perabung rumah. Rumah nya ba tebing tasik di Jopa, lalu udah beberapa hari Peter diau dia. Kebendar iya, lebuh Peter sanggup diau ba rumah nya, tu nunjukka iya enda bepilih mata. Tu ketegal, siku orang ke benama Simon, bempu rumah nya. Iya gawa nyadi tukang samak. Lalu ukai semua orang Judah sanggup deka diau enggau Simon ketegal pengawa iya. a Tang ba maya nya, Peter deka belajar utai ti penting pasal Jehovah ke enda bepilih mata.

² Lebuh Peter benung besampi, iya nerima siti genera. Genera ke dipeda Peter engka deka ngasuh orang Judah enda nyamai ati. Peter meda siti kain nurun ari langit. Dalam kain nya, bisi semua bansa jelu ti dikumbai enda tuchi dalam Adat. Lalu bisi nyawa bejaku ke ngasuh Peter nyayat sereta empa jelu nya. Ku Peter nyaut: “Aku enda kala makai utai ti kamah tauka enda tuchi.” Ukai sekali nyawa nya ngasuh Peter ngereja nya, tang tiga kali nyawa nya madahka: “Badu agi ngumbai utai ti udah dituchi Petara nya, enda tuchi.” (SKR. 10:14-16) Taja pia, Peter enda meretika genera nya. Tang enda lama pengudah nya, iya deka nemu reti genera nya.

³ Nama reti genera ke diterima Peter? Kitai patut nemu reti genera nya, laban nya bisi kaul enggau chara Jehovah meda orang. Enti kitai nadai bisi runding ti sama baka chara Petara meda orang, kitai  enda ulih meri saksi enggau silik pasal Perintah Petara. Nya alai, aram meh kitai meresa utai ke nyadi ba maya ti sama Peter nerima genera nya. Tu amat penting laban kitai deka nemu nama reti genera ke diterima Peter.

4, 5. Sapa Kornelius, lalu nama nyadi lebuh iya besampi?

⁴ Peter enda nemu bisi utai ke nyadi di Kaisaria sehari sebedau iya nerima genera nya. Kaisaria nya 50 kilometer ari Jopa. Lalu ba Kaisaria, siku lelaki ke benama Kornelius mega nerima siti genera ari Petara. Kornelius siku pemesai soldadu dalam raban soldadu Rome, lalu iya “nyembah Petara.” b Iya mega nyadi teladan ti manah sebagai tuai bilik, laban Bup Kudus madahka iya ‘nangika Petara sama enggau semua sida sebilik.’ Kornelius enda megai pengarap Judah. Iya datai ari bansa bukai sereta enda besunat. Taja pia, iya ibuhka orang Judah ke seranta enggau chara meri utai ke diguna sida beridup besehari-sehari. Pia mega, Kornelius “seruran bebendar besampi ngagai Petara.”—SKR. 10:2.

⁵ Maya nya pukul 3 lemai, Kornelius benung besampi. Ba maya nya, iya nerima siti genera. Siku melikat madah ngagai iya: “Petara udah ningaka sampi nuan, lalu Iya rinduka nuan. Iya udah meda baka ni nuan nulung orang ke seranta.” (SKR. 10:4) Kornelius nitihka utai ke diasuh melikat nya, lalu nganjung beberapa iku orang ngagai rasul Peter. Taja pan Kornelius datai ari bansa bukai sereta enda besunat, tang iya  deka nerima peluang ke enda kala dibuka ngagai orang bansa bukai. Iya bisi peluang nerima Berita Manah.

6, 7. (a) Padahka siti pengalaman ti nunjukka Petara nyaut sampi orang ke bebendar ngiga Iya? (b) Nama ulih dipelajarka kitai ari pengalaman ke baka nya?

⁶ Kati Petara nyaut sampi orang ke bebendar ngiga Iya? Peratika siti pengalaman. Siku indu ba Albania nerima siti majalah. Majalah nya bisi ngundan artikel pasal chara ngemesaika anak. c Peratika utai ke dipadah iya ngagai menyadi Kristian ke datai ngagai rumah iya: “Kati nuan pechaya enti aku madah, aku baru udah besampi ngagai Petara nulung aku nemu chara ngemesaika bala anak indu aku? Petara nganjung nuan ngagai aku, lalu meri semua penerang ke diguna aku.” Indu nya enggau bala anak indu iya berengkah belajarka Bup Kudus. Lalu udah nya, laki iya pan sama belajar enggau sida.

⁷ Kati siti tu aja pengalaman ke nunjukka Petara nyaut sampi orang ke bebendar ngiga Iya? Enda. Pengalaman ke baka tu suah nyadi ba serata dunya. Semua tu enda nyadi pia aja. Nya alai nama ulih dipelajarka kitai? Kesatu, Jehovah nyaut sampi orang ke bebendar ngiga Iya. (1 Raj. 8:41-43; Mas. 65:2) Kedua, bala melikat nyukung pengawa nginjil kitai.—Pem. 14:6, 7.

8, 9. Nengah kuasa kudus, Jehovah nulung Peter nemu pasal nama, lalu nama reaksi Peter?

⁸ ‘Peter charut runding’ enggau reti genera ke diterima iya. Ba maya ti sama, orang ke dianjung Kornelius nyauka datai ba rumah nya. (SKR. 10:17) Maya nya, Peter udah tiga kali madahka diri enggai makai pemakai ti enda tuchi dalam Adat. Kati Peter sanggup enggau sida ke dianjung Kornelius, lalu tama ngagai rumah Kornelius ke datai ari bansa bukai? Nengah kuasa kudus, Jehovah nulung Peter nemu peneka Iya ba senentang tu. Kuasa kudus Petara madah ngagai Peter: “Peda nuan! Bisi tiga iku orang benung ngiga nuan. Angkat lalu nurun ke baruh. Titihka sida. Anang kakang ati. Aku meh ke nganjung sida.” (SKR. 10:19, 20) Nya alai, genera pasal kain ke nurun ari langit tentu nyikap Peter ngambika ulih nitihka iring kuasa kudus.

⁹ Peter nyau nemu, Petara ke ngasuh Kornelius nganjung orang ngagai iya. Nya alai, taja pan sida ke dianjung Kornelius datai ari  bansa bukai, tang Peter mai sida tama ngagai rumah alai iya diau. Bup Kudus madahka, Peter “ngasuh sida bemalam” ba rumah nya. (SKR. 10:23a) Peter ngasika iring Petara, lalu ngaga ubah ngambika ulih ngereja peneka Iya.

10. Baka ni chara Jehovah ngiring nembiak Iya, lalu nama tanya ke ulih ditanya kitai ba diri empu?

¹⁰ Nyentuk ngagai kemayaharitu, Jehovah ngiring nembiak Iya enggau chara belubah-lubah mandangka pemendar. (J-lam. 4:18) Jehovah mega meri iring ngagai “ulun ke tetap ati sereta bepenemu-dalam” nengah kuasa kudus Iya. (Mat. 24:45) Kekadang, kitai engka nerima penemu ti baru bekaul enggau ajar Bup Kudus, tauka chara sekeda pengawa digaga dalam gerempung Jehovah berubah. Nyadi, kitai patut nanya diri empu: ‘Baka ni reaksi aku ngagai ubah ke digaga gerempung Jehovah? Kati aku nitihka iring kuasa kudus Petara bekaul enggau pekara ke baka tu?’

11, 12. Nama digaga Peter lebuh iya datai ba Kaisaria, lalu nama utai ke dipelajarka iya?

¹¹ Sehari pengudah iya nerima genera nya, Peter enggau 9 iku orang ke bukai ngagai Kaisaria. Maya nya, bisi 3 iku orang ke dianjung Kornelius enggau “enam iku menyadi” lelaki ke bebansa Judah ari Jopa. (SKR. 11:12) Kornelius nganti penatai Peter, sereta mai “kaban belayan enggau kaban rapat iya.” Semua orang ke dibai Kornelius pan datai ari bansa bukai. (SKR. 10:24) Udah nya, Peter datai ngagai rumah Kornelius. Iya tentu enda nyangka deka tama ngagai rumah orang bansa bukai ti enda besunat! Ku Peter madahka: “Kita endang udah nemu, orang Judah ngelanggar adat, enti sida nemuai tauka begulai enggau orang bansa bukai. Tang Petara udah nunjukka, aku enda tau ngumbai sapa-sapa pan kamah tauka enda tuchi.” (SKR. 10:28) Maya nya, Peter udah meretika reti genera ke diterima iya. Iya belajar, genera ke diterima iya ukai semina bekaul enggau pemakai ke ulih diempa aja. Tang Peter mega belajar, iya enda tau “ngumbai sapa-sapa pan [indah orang bansa bukai]” enda tuchi.

¹² Semua orang ke begelumu ba rumah Kornelius enda sabar deka ningaka utai ke deka diajar Peter ngagai sida. Kornelius madahka: “Semua kami begelumu ba mua Petara, ngambika ninga semua utai ke diasuh Jehovah sebut nuan ngagai kami.” (SKR. 10:33) Gambarka meh asai ati nuan enti bisi orang deka belajar pasal Jehovah nyebut munyi nya ngagai nuan! Maya nya, Peter madah ngagai sida ke ba rumah  Kornelius: “Diatu, baru aku amat nemu, Petara enda bepilih mata. Semua orang ke nangika Petara sereta ngereja utai ti ngena, enda ngira nama bansa sida, endang diterima Petara.” (SKR. 10:34, 35) Peter belajar, Jehovah enda meda bansa, menua asal sida, tauka bepelasarka utai bukai. Nya alai, Peter nginjil ngagai sida pasal pemati enggau pengangkat Jesus ari mati, sereta pasal pengawa nginjil ke dikereja Jesus.

13, 14. (a) Nama utai ke penting ti bekaul enggau ubah ke digaga Kornelius sereta orang bansa bukai ba taun 36 M.? (b) Nama kebuah kitai enda patut ngakim orang nitihka gamal sereta gaya sesiku orang?

¹³ Kena taun 36 M., bisi utai nyadi ke nadai kala nyadi sebedau tu. Bup Kudus madahka: “Lebuh Peter agi benung bejaku,” kuasa kudus diberi ngagai “orang ke ari bansa bukai.” (SKR. 10:44, 45) Semina tu aja penerang ari Bup Kudus ke madah kuasa kudus diberi ngagai orang sebedau dibaptisa. Ketegal tu, Peter sedar Petara udah nerima sida ke ari bansa bukai. Nya alai, iya “ngasuh sida [orang bansa bukai] dibaptisa.” (SKR. 10:48) Orang bansa bukai ke nyadi orang Kristian ba taun 36 M. nunjukka, Petara nadai agi milih bansa Judah nyadi nembiak Iya ti istimewa. (Dan. 9:24-27) Ketegal Peter ngiring pengawa nginjil, iya ngena “kunchi Perintah” ti ketiga sereta ke penudi iya. (Mat. 16:19) Nya alai, kunchi ke dikena Peter muka jalai ngambika orang bansa bukai ke enda besunat bisi peluang nyadi orang Kristian ke dipilih ke serega.

¹⁴ Ketegal kitai nyadi penginjil Perintah Petara, kitai nemu “Petara enda bepilih mata.” (Rom. 2:11) Iya deka “semua  macham orang diselamatka.” (1 Tim. 2:4) Nya alai, kitai enggai sekali-kali ngakim orang nitihka gamal sereta gaya sida. Kitai diberi pengawa kena meri saksi enggai silik pasal Perintah Petara. Nyadi pengawa tu nyengkaum, nginjil ngagai semua orang enda ngira bansa, menua alai sida diau, gamal sereta gaya, tauka jalai pengarap sida.

15, 16. Nama kebuah orang Kristian bansa Judah mantah Peter, lalu baka ni Peter nerang ngagai sida pasal pekara nya?

¹⁵ Peter mansang ngagai Jerusalem, lalu iya keran deka madahka ngagai orang Kristian ba dia pasal utai ke baru nyadi. Kebendar iya, orang Kristian ba Jerusalem dulu agi nemu pasal orang bansa bukai ke enda besunat “nerima jaku Petara” sebedau Peter madah ngagai sida. Pengudah Peter datai ba Jerusalem, “orang ke nyukung adat besunat belabuh mantah Peter.” Tu ketegal, sida enda nyamai ati laban Peter “tama ngagai rumah orang ke enda besunat lalu makai begulai enggau sida.” (SKR. 11:1-3) Penanggul iya ukai pasal orang bansa bukai ulih nyadi murid Jesus tauka enda. Tang, bala murid ke bebansa Judah amat deka sida ari bansa bukai nitihka Adat Moses, nyengkaum pengawa besunat. Orang Kristian ke bebansa Judah ngumbai pengawa tu penting ngambika ulih nyembah Jehovah enggau chara ti diterima Iya. Tu nunjukka sekeda orang Kristian ke bebansa Judah amat tusah deka ngelengkaka Adat Moses.

¹⁶ Baka ni Peter nerang ngagai orang Kristian ke bebansa Judah pasal utai ke digaga iya? Nitihka Surat Kereja Rasul 11:4-16, Peter nerangka empat iti bukti ke nunjukka iring ari Petara: (1) Peter bisi nerima genera ari Petara (Ayat 4-10); (2) iring ke diberi nengah kuasa kudus (Ayat 11, 12); (3) siku melikat ke datai ngagai rumah Kornelius (Ayat 13, 14); sereta (4) orang bansa bukai nerima kuasa kudus. (Ayat 15, 16) Peter ngujungka enggau siti tanya ti ngasuh semua orang berasai yakin agi. Iya nanya sida: “Nya alai, enti Petara udah meri sida [orang bansa bukai ke arap] pemeri ti pechuma [kuasa kudus] sama baka ke diberi Iya ngagai kitai [orang Kristian ke bebansa Judah] ke arapka Tuan Jesus Kristus, sapa aku tu nyentukka aku ulih nagang Petara?”—SKR. 11:17.

17, 18. (a) Nama penguji ke ditapi orang Kristian ke bebansa Judah ketegal utai ke dipadah Peter? (b) Nama kebuah enda senang nyaga penyerakup ba raban gempuru, lalu nama sekeda tanya ke ulih diperundingka kitai?

¹⁷ Utai ke dipadah Peter nyadi siti penguji ngagai orang Kristian bebansa Judah. Kati sida ulih muai ulah ti bepilih mata? Lalu ulih sida nerima orang bansa bukai nyadi menyadi Kristian? Bup Kudus madahka:  “Pengudah ninga nya, sida [bala rasul enggau orang Kristian bebansa Judah ke bukai] badu agi mantah. Sida ngemuliaka Petara lalu bejaku: ‘Enti pia, Petara mega meri peluang ngagai orang ari bansa bukai, ngambika sida nesal ati lalu bulih pengidup.’” (SKR. 11:18) Ulah sida ti manah udah nyaga penyerakup ba raban gempuru.

¹⁸ Kemayaharitu, enda senang deka ngetanka penyerakup ba raban gempuru. Tu ketegal, mayuh orang Kristian ti bendar datai “ari semua menua, raban bansa, bansa, enggau jaku.” (Pem. 7:9) Ba mayuh raban gempuru kemayaharitu, bisi mayuh menyadi Kristian ke datai ari bemacham bansa, budaya, sereta gaya pengidup. Nya alai, kitai ulih berundingka sekeda tanya tu: ‘Kati aku udah muai semua ulah bepilih mata? Kati aku keran deka nulak runding dunya ke meransang ulah bepechah-belah, baka temegahka menua diri, bansa, budaya, sereta begedika orang bansa bukai? Kati semua ulah nya ngachau chara aku begulai enggau bala menyadi Kristian?’ Ingat meh utai ke nyadi ba Peter (Kefas) beberapa taun pengudah raban keterubah orang bansa bukai nyadi orang Kristian. Ketegal ulah bepilih mata, iya “nyeliahka” diri ari orang bansa bukai ke udah nyadi orang Kristian. Ketegal nya, Paul ngerara iya. (Gal. 2:11-14) Nya alai, kitai patut bejimat ngambika enda sekali-kali ngembuan ulah ti bepilih mata.

19. Orang Kristian bansa Judah ba Antiok berengkah nginjil ngagai sapa, lalu nama asil iya?

¹⁹ Kati murid Jesus berengkah nginjil ngagai orang bansa bukai ke enda besunat? Peratika utai ke nyadi di Antiok ba Siria. d Ba Antiok, bisi mayuh orang Judah. Lalu ba dia, orang Judah enggau orang bansa bukai enda ulih begulai manah enggau pangan diri. Nyadi, Antiok nyadi endur ti manah alai ulih nginjil. Ba Antiok, bala murid Jesus ke bebansa Judah nusui Berita Manah ngagai “orang ke bejaku ngena jaku Gerika.” (SKR. 11:20) Maya nya, bala murid ukai semina nginjil ngagai orang Judah ke ngena bansa jaku Gerika aja. Tang sida mega nginjil ngagai orang bansa bukai ke enda besunat. Asil iya, Jehovah merekatka pengawa nginjil sida, lalu “mayuh orang arap.”—SKR. 11:21.

20, 21. Baka ni Barnabas nunjukka sifat nemu tatak diri, lalu baka ni kitai ulih nunjukka sifat ti sama ba pengawa nginjil?

²⁰ Raban gempuru ba Jerusalem nganjung Barnabas ngagai  Antiok. Mayuh orang ba Antiok bisi minat ngagai Berita Manah nyentukka Barnabas enda ulih nginjil kediri aja. Nyadi, sapa orang ke sesuai ulih nulung Barnabas kelimpah ari Saul? Tu ketegal, Saul nyadi rasul ke dianjung ngagai bansa bukai. (SKR. 9:15; Rom. 1:5) Kati Barnabas deka ngumbai Saul deka bepekit enggau iya? Enda. Barnabas nunjukka sifat nemu tatak diri. Iya ngagai Tarsus ngambika ulih ngiga Saul, lalu mai Saul ngagai Antiok kena nulung iya. Pengelama setaun Saul seduai Barnabas ba dia kena meransang bala menyadi ba raban gempuru di Antiok.—SKR. 11:22-26a.

²¹ Kemayaharitu, baka ni kitai ulih nunjukka sifat nemu tatak diri ba pengawa nginjil? Kitai patut nemu pasal utai ke enda ulih digaga diri. Semua kitai bisi pengering enggau pengelandik ti enda sama. Ambika chunto, sekeda menyadi Kristian engka nginjil enggau chara ti formal tauka ari rumah ke rumah. Tang, berasai tusah deka datai ngabas tauka ngepunka pengawa belajarka Bup Kudus. Enti nuan deka ngemansangka sekeda pengelandik ba pengawa nginjil, pinta meh tulung ari menyadi Kristian. Enggau ngereja nya, nuan deka landik agi ngereja pengawa nginjil sereta bulih mayuh agi pengaga ati.—1 Kor. 9:26.

22, 23. Baka ni bala menyadi Kristian ba Antiok ngayanka pengerindu, lalu baka ni nembiak Petara kemayaharitu ulih neladan sida?

²² Ba Antiok meh “bala murid Jesus keterubah iya dikumbai orang Kristian.” (SKR. 11:26b) Orang Kristian mai reti orang ke nitihka chara pengidup Jesus. Maya nya, mayuh orang ke datai ari bemacham bansa nyadi orang Kristian. Nya alai, baka ni kaul orang Kristian ke bebansa Judah enggau ke datai ari bansa bukai? Kati sida mujur ngemansangka kaul ti manah enggau pangan diri? Peratika utai ke nyadi kena taun 46 M. e lebuh bisi lapar pungkang balat nyadi. Maya jeman kelia, lapar pungkang mai penusah kelebih agi ngagai orang ke miskin. Maya nya, orang Kristian ke bebansa Judah ba Judea amat miskin. Sida amat begunaka pemakai sereta utai bukai ke diguna kena beridup. Bala menyadi Kristian ba Antiok nemu penusah ke ditapi orang Kristian ba Judea. Nyadi, bala menyadi ba Antiok nyengkaum menyadi Kristian ke datai ari bansa bukai, “meri tulung” ngagai sida ba Judea. (SKR. 11:29) Tu endang nunjukka pengerindu Kristian ti bendar!

 ²³ Kemayaharitu mega, bala nembiak Petara nitihka teladan menyadi Kristian ba Antiok. Lebuh kitai ninga bala menyadi Kristian kena penusah, kitai ngiga mayuh chara nulung sida. Tu enda ngira sekalika sida diau ba menua bukai tauka ba endur kitai empu. Komiti Pampang Opis enggau jampat ngatur Komiti Tulung Bencana Alam ngambika ulih meri bantu enti bala menyadi kena penusah ketegal bencana alam baka ribut taufan, tanah berenyang sereta tsunami. Semua pengawa meri tulung tu nunjukka pengerindu Kristian kitai ti bendar.—Jhn. 13:34, 35; 1 Jhn. 3:17.

24. Baka ni kitai ulih nunjukka diri amat meretika genera ke diterima Peter?

²⁴ Berapa taun ti udah Peter nerima genera lebuh iya ba perabung rumah di Jopa? Udah 1,900 taun. Tang, ketegal kitai orang Kristian ti bendar, kitai deka nunjukka diri meretika genera nya. Tu ketegal, kitai nyembah Petara ti enda bepilih mata. Iya deka kitai meri saksi enggau silik pasal Perintah Iya. Tu nyengkaum, nginjil ngagai semua macham orang enda ngira bansa, menua asal sida tauka penuduk sida ba masyarakat. Nya alai, aram meh kitai meri peluang ngagai semua ke deka ninga Berita Manah ngambika sida mega ulih nyadi orang ke arap!—Rom. 10:11-13.