1, 2. Nama kereja ajih ke digaga Peter enggau John ba semak pintu rumah sembiang Jehovah?

 MATA panas manchar enggau terang ngagai bala orang mayuh ba Rumah Sembiang. Lebuh ngalih hari, mayuh orang Judah sereta bala murid Jesus datai kia. Enda lama udah nya, “maya alai besampi.” a (SKR. 2:46; 3:1) Maya nya mega bisi Peter enggau John. Seduai iya mansang semak ngagai pintu Rumah Sembiang ke dikumbai Pintu Manah. Maya nya, bisi mayuh orang bejalai kin kia sereta ulih ninga orang mayuh bejaku enggau pangan diri. Ba dia mega bisi siku lelaki ke beumur lebih ari 40 taun. Iya mati kaki kenyau ari ada, lalu iya deka minta sedekah.—SKR. 3:2; 4:22.

² Lebuh Peter enggau John bejalai mansang semak ngagai pintu Rumah Sembiang, bisi siku lelaki ke minta sedekah baka ke biasa digaga iya. Bala rasul tu ngetu bejalai lebuh sida tepedaka lelaki nya. Lelaki nya amat ngarapka seduai iya deka meri duit ngagai iya. Taja pia ku Peter: “Aku nadai pirak enggau emas. Tang aku deka meri nuan utai ke dikemisi aku. Dalam nama Jesus Kristus, orang Nasaret, bejalai meh nuan!” Naka meh pengalit ati orang mayuh meda Peter megai jari kanan lelaki nya! Tu meh keterubah kali sepemanjai pengidup iya, lelaki nya ulih bediri! (SKR. 3:6, 7) Ulih nuan ngambarka lelaki nya meda kaki iya empu udah digeraika, lalu iya nyingkang belubah-lubah sereta nguji deka bejalai? Nya alai, kitai tentu ulih meretika kebuah lelaki nya engkejuk lalu muji Petara enggau nyawa ti inggar!

3. Nama pemeri ti berega ke ulih diterima lelaki ke kala mati kaki nya, enggau bala orang mayuh ba Rumah Sembiang maya nya?

³ Bala orang mayuh maya nya balat gagit ati. Nya alai, semua orang ba dia beguai mansang ngagai Peter seduai John ba Serambi Solomon. Jesus kala ngajar ba endur nya, lalu Peter madah ngagai semua sida  kebuah kereja ajih tu tau nyadi. (Jhn. 10:23) Iya madah ngagai orang mayuh enggau lelaki ke kala mati kaki nya, pasal sida ke bisi peluang nerima pemeri ti berega agi ari pirak sereta emas. Pemeri tu ukai semina bekaul enggau digeraika ari sakit, tang bisi agi utai bukai kelimpah ari nya. Semua sida bisi peluang nesal ati, nerima pengampun dosa lalu nyadi murid “Ketuai ke Dipilih Meri Pengidup,” ke udah dipilih Jehovah, iya nya Jesus Kristus.—SKR. 3:15.

4. (a) Nama utai ke deka nyadi ari kereja ajih nya? (b) Nama dua iti tanya ke deka disaut kitai?

⁴ Endaka nya hari ti manah amat? Siku lelaki udah digeraika lalu diatu iya ulih bejalai. Beribu iku orang bisi peluang ngulihka penemu sereta meretika Jaku Petara ngambika sida ulih diterima Jehovah. (Kol. 1:9, 10) Taja pia, utai ke nyadi ba hari nya deka ngasuh penanggul nyadi. Bala murid Kristus ke setia deka napi penanggul ke datai ari sida ke bisi kuasa ba perintah. Sida tu deka nagang bala murid nitihka pesan Jesus ke ngasuh nginjil pasal Perintah Petara. (SKR. 1:8) Nama ulih dipelajarka kitai ari chara sereta ulah ke diayanka Peter enggau John sebagai “orang biasa aja sereta ukai orang ke bepelajar” seraya sida meri saksi ngagai orang mayuh? b (SKR. 4:13) Lalu baka ni kitai ulih neladan chara seduai iya sereta bala murid Jesus ke bukai lebuh disakal?

5. Nama ulih dipelajarka kitai ari chara Peter bejaku ngagai orang mayuh maya nya?

⁵ Peter enggau John bediri ba mua bala orang mayuh. Seduai iya nemu, sekeda ari orang ba dia bisi ngasuh Pilate ngukum bunuh Jesus. (Mrk. 15:8-15; SKR. 3:13-15) Perundingka meh pemerani ke diayanka Peter lebuh iya enggau berani madahka, lelaki ke kala mati kaki nya udah digeraika dalam nama Jesus. Peter enda ngelalaika pekara nya. Tang iya terus terang madah ngagai orang mayuh pasal sida betanggungjawapka pemati Jesus. Taja pia Peter enda terus ringat ngagai sida, laban sida “enda sedarka utai ke udah digaga diri.” (SKR. 3:17) Iya ngumbai sida baka bala menyadi iya, lalu befokus ba pekara ti manah bekaul enggau pesan Perintah Petara. Enti sida nesal ati lalu arapka Kristus, Jehovah deka meri sida “pengering baru.” (SKR. 3:19) Kemayaharitu, kitai mega patut berani sereta beterus terang nusui pasal Petara ti deka ngakim enda lama da agi. Ba maya ti sama, kitai enggai kasar tauka ngakim orang. Tang kitai deka ngumbai sida bisi potensi nyadi bala menyadi Kristian kitai. Lalu baka Peter, kitai deka fokus ba pekara manah ke bekaul enggau pesan Perintah Petara.

6. Baka ni Peter enggau John nunjukka pemaruh ati sereta nemu tatak diri?

 ⁶ Bala rasul Jesus nemu tatak diri. Sida enggai nerima puji ari kereja ajih ke digaga sida. Ku Peter madah ngagai orang mayuh nya: “Nama kebuah kita merening ngagai kami baka nya? Baka meh kami tu ke bisi kuasa ulih ngasuh orang tu bejalai?” (SKR. 3:12) Peter enggau bala rasul ke bukai nemu, semua utai ti manah ke dijapai sida ba pengawa nginjil nya ulih nyadi ketegal kuasa Petara, ukai ketegal pengering diri empu. Ketegal nya, sida enggau baruh ati meri puji ngagai Jehovah enggau Jesus.

7, 8. (a) Nama pemeri ke ulih diberi kitai ngagai orang? (b) Baka ni semaya “semua utai diaduka baru” benung dikeamatka kemayaharitu?

⁷ Kitai mega patut nemu tatak diri lebuh nusui pesan pasal Perintah Petara. Endang amat, kuasa kudus ari Petara enda ulih nulung orang Kristian kemayaharitu ngeraika sida ke sakit. Taja pia, kitai ulih nulung orang ngemansangka pengarap ngagai Petara enggau Jesus Kristus, sereta nerima pemeri ti sama baka ke diberi Peter. Pemeri nya pasal semua orang bisi peluang nerima pengampun dosa sereta dikeringka Jehovah. Tiap taun, beratus ribu iku orang nerima pemeri tu lalu nyadi murid Kristus ti dibaptisa.

⁸ Baka ke dipadah Peter, kitai benung idup ba maya “semua utai diaduka baru.” Tu nunjukka, jaku Bup Kudus ti madahka utai “ke udah dipadah Petara nengah bala nabi ti kudus kelia menya” udah dikeamatka lebuh Perintah Petara ditumbuhka ba serega kena taun 1914. (SKR. 3:21; Mas. 110:1-3; Dan. 4:16, 17) Enda lama udah nya, Jesus pan berengkah ngemataka pengawa ngaduka baru semua utai secara rohani. Asil iya, bejuta iku orang dibai ngagai Paradais rohani, lalu sida nyadi rayat Perintah Petara. Sida ngereja tu enggau chara muai pendiau ti lama, ke enda sejalai enggau peneka Petara lalu “ngerasukka pendiau ti baru ke digaga nitihka peneka Petara.” (Eps. 4:22-24) Lelaki ke mati kaki nya ulih gerai ketegal kuasa kudus Petara, ukai ketegal pengering mensia. Nya alai baka Peter, kitai patut berani sereta landik ngena Bup Kudus ngajar orang bukai. Semua utai ke ulih dijapai kitai ba pengawa ngajar orang nyadi murid Jesus semina ulih mujur ketegal kuasa Petara, ukai diri empu.

9-11. (a) Nama reaksi bala tuai orang Judah ngagai pesan Peter enggau John? (b) Nama utai ke deka digaga bala rasul?

⁹ Orang mayuh begau pengudah sida ninga pesan ari Peter, sereta pengudah meda lelaki ke mati kaki nya engkejuk lalu manjung gaga ati. Ketegal nya, ketuai jejaga Rumah Sembiang, iya nya, orang ke dipilih kena nyaga keselamatan ba rumah sembiang Jehovah, sereta bala imam  enggau jampat datai kena nasat utai ke nyadi. Sida engka orang Saduki lalu amat kaya, sereta numbuhka parti politik ti bekuasa ngambika ulih bisi kaul ti manah enggau Perintah Rome. Sida nulak Adat ke ditambah orang Parisi kediri empu. Orang Saduki mega ngeleseka ajar pasal pengangkat ari mati. c Nya alai, sida tentu berasai amat ringat lebuh meda Peter enggau John ngajar orang enggau berani ba Rumah Sembiang pasal Jesus ke udah diangkatka idup baru!

¹⁰ Sida ke ngelaban berasai amat ringat nyentukka sida nangkap Peter seduai John lalu ngejil seduai iya. Ba hari siti, sida mai Peter seduai John ngagai Mahkamah Tinggi Orang Judah. Ba mata bala pemerintah ke ngasaika diri amat bekuasa, Peter enggau John nya semina “orang biasa aja sereta ukai orang ke bepelajar.” Ba sida, Peter seduai John nadai hak ngajar ba Rumah Sembiang. Seduai iya mega enda kala belajar ba nama-nama sekula pengarap ti tebilang. Tang, pemerani sereta keyakinan Peter seduai John ngasuh orang ba mahkamah iran amat ati. Nama kebuah Peter enggau John amat landik meri saksi? Siti ari kebuah iya, laban “seduai iya kala begulai enggau Jesus.” (SKR. 4:13) Tuan sida, Jesus ngajar bepelasarka ajar ti datai ari Petara, ukai baka bala penulis adat.—Mat. 7:28, 29.

¹¹ Orang ke bisi kuasa ba mahkamah ngasuh bala rasul ngetu nginjil. Ba masyarakat orang Judah maya nya, mahkamah bisi mayuh kuasa. Kebendar iya, beberapa minggu sebedau nya, Jesus udah dipechara ba mua bala hakim ti sama dalam mahkamah tu. Sida mega madahka iya “patut mati.” (Mat. 26:59-66) Taja pia, Peter enggau John enda takut. Ba mua sida ke kaya, bepelajar enggau ke bepengaruh ba masyarakat, Peter seduai John berani madahka tu enggau chara ti bebasa: “Ba mata Petara, sekalika kami patut ngasika kita ari ke ngasika Petara, barang ku kita meh berundingka nya. Tang kami enda ulih ngetu bejaku pasal utai ke udah dipeda sereta didinga kami.”—SKR. 4:19, 20.

12. Nama ulih nulung kitai yakin sereta berani agi?

¹² Kati nuan ulih nyadi berani baka bala rasul nya? Nama asai ati nuan lebuh nuan bisi peluang nginjil ngagai orang ke kaya, bepelajar tauka orang ti bepengaruh ba masyarakat? Baka ni enti ruang bilik nuan, orang ke sama sekula tauka sama gawa bejaika nuan ketegal pengarap nuan? Kati nuan takut? Enti pia, nuan ulih mutarka asai ati ke baka nya. Lebuh Jesus ba bumi, iya ngajar bala rasul chara ngetanka pengarap sida enggau yakin sereta enggau chara ti bebasa. (Mat. 10:11-18) Pengudah iya diangkatka idup baru, Jesus besemaya enggau bala murid iya, iya deka terus enggau sida “nyentuk ngagai pengujung dunya.” (Mat. 28:20) Kemayaharitu dibaruh iring Jesus, “ulun ke tetap ati sereta bepenemu-dalam” ngajar kitai chara ngetanka pengarap  kitai. (Mat. 24:45-47; 1 Pet. 3:15) Sida ngereja tu enggau meri iring ba gempuru Kristian. Ambika chunto, nengah program Pengidup enggau Pengawa Kristian Kitai sereta nengah litaricha Bup Kudus, baka siri artikel “Saut Ngagai Tanya Pasal Bup Kudus” ba laman web jw.org. Kati nuan ngena semua tu enggau manah? Enti pia, pemerani enggau keyakinan nuan deka majak nambah-menambah. Lalu baka bala rasul, nadai utai ulih nagang nuan ari terus madahka pemendar ke udah dipeda sereta didinga nuan.

13, 14. Nama patut digaga enti kitai disakal?

¹³ Enda lama pengudah seduai iya dilepaska ari jil, Peter enggau John betemu enggau bala menyadi ba raban gempuru. Semua “sida begulai besampi enggau nyawa ti inggar ngagai Petara” lalu minta Jehovah nulung sida berani kena terus nginjil. (SKR. 4:24) Peter nemu, enda manah enti bepanggai ba pengering diri empu lebuh deka ngereja peneka Petara. Tu ketegal beberapa minggu sebedau nya, Peter udah kelalu andalka diri empu. Ku iya madah ngagai Jesus: “Taja pan semua sida ke bukai deka ninggalka nuan, ketegal utai ke deka nyadi ba nuan, tang aku enda sekali-kali deka ninggalka nuan!” Tang baka ke udah dipadah Jesus, Peter alah laban iya takut ke mensia. Nya alai, iya nyangkal Jesus ke udah nyadi kaban sereta pengajar iya. Taja pia, Peter belajar ari penyalah iya empu.—Mat. 26:33, 34, 69-75.

¹⁴ Nuan engka bisi pengeran ti kuat deka ngereja pengawa kena nyadi saksi ke Jesus Kristus. Tang, pengeran aja enda chukup. Tunda meh teladan Peter seduai John lebuh orang ke nyakal deka ngerusakka pengarap nuan sereta nekan nuan ngambika badu nginjil. Nuan mega ulih besampi minta pengering ari Jehovah sereta giga sukung ari bala menyadi Kristian. Pia mega, nuan ulih madah ngagai bala tuai gempuru sereta menyadi Kristian ke matang pasal penanggul ke ditapi nuan. Ingat meh, sampi ari orang bukai amat bekuasa lalu ulih nulung nuan tan ngenatka penanggul.—Eps. 6:18; Jas. 5:16.

15. Nama kebuah sida ke kala ngetu ngereja pengawa nginjil enda ibuh lemi semengat?

 ¹⁵ Enti nuan kala alah ditekan nyentukka nuan ngetu nginjil ba siti timpuh ti enda lama, anang meh lemi semengat. Ingat meh, semua bala rasul kala ngetu nginjil enda lama pengudah Jesus mati. Lalu enda lama udah nya, sida ransing baru. (Mat. 26:56; 28:10, 16-20) Ari ke berasai lemi semengat ketegal penyalah nuan suba, endaka manah agi enti nuan belajar ari pengalaman nya, lalu ngena utai ke dipelajar nuan kena ngeringka orang bukai?

16, 17. Nama ulih dipelajarka kitai ari sampi bala murid Jesus ba Jerusalem?

¹⁶ Nama patut disampika kitai lebuh piak bekuasa nekan kitai? Peratika bala murid Jesus, lebuh sida besampi, sida enda minta ngambika sida enda dituntung penguji. Sida ingat jaku Jesus ti madahka: “Enti sida udah merinsaka aku, sida mega deka merinsaka kita.” (Jhn. 15:20) Tang, bala murid Jesus ti tetap ati minta Jehovah “dingaka” jaku ugut ari sida ke ngelaban. (SKR. 4:29) Sida sedar, sakal ke ditapi sida nya nunjukka jaku benabi dikeamatka. Sida mega nemu, Jesus kala ngajar sida besampi minta peneka Petara nyadi ba dunya. Ketegal nya, nadai siku pan pemerintah mensia ulih nagang utai tu nyadi.—Mat. 6:9, 10.

¹⁷ Kena terus ngereja peneka Petara, bala murid Jesus besampi munyi tu ngagai Jehovah: “Tulung meh ulun Nuan ngambika terus nusui jaku Nuan enggau berani.” Baka ni Jehovah nyaut sampi sida maya nya? Bup Kudus madahka: “Endur sida begempuru nya lalu berenyang. Semua sida penuh laban kuasa kudus Petara, lalu sida belabuh nusui jaku Petara enggau berani.” (SKR. 4:29-31) Nya alai, nadai nama-nama utai ulih nagang peneka Petara dikeamatka. (Isa. 55:11) Kemayaharitu, kitai engka ngasaika peneka Petara nya baka ke enda ulih dikereja, lalu orang ke ngelaban baka ke amat kering. Tang enti kitai besampi ngagai Petara, kitai pechaya, Iya tentu deka ngeringka kitai kena terus nginjil enggau berani.

18. Nama utai ke digaga bala menyadi ba raban gempuru di Jerusalem kena nyukung pangan diri?

¹⁸ Taja pan raban gempuru ba Jerusalem baru ditumbuhka, tang maya nya udah bisi lebih ari lima ribu iku bala menyadi ke  tegap ba pengarap. d Sida datai ari bemacham latar belakang, tang sida tu “sama seati enggau sama runding.” Reti iya, sida amat beserakup ba runding. (SKR. 4:32; 1 Kor. 1:10) Bala murid besampi minta Jehovah merekatka usaha sida. Taja pia, sida ngereja utai lebih agi ari nya. Sida nyukung pangan diri ba pengarap, sereta meri utai ke diguna kena beridup ngagai menyadi ke begunaka bantu. (1 Jhn. 3:16-18) Ambika chunto, siku murid ke benama Joseph udah nyual tanah iya. Kebendar iya, bala rasul mega ngumbai iya Barnabas. Iya ngena duit nya kena nulung menyadi Kristian ke datai ari menua ti jauh, lalu diau ba Jerusalem kena belajarka mayuh agi pasal pengarap Kristian ke baru ditemu sida.

19. Nama kebuah Jehovah ngukum bunuh Ananias enggau Safira?

¹⁹ Bisi sepasang laki bini ke benama Ananias enggau Safira mega nyual tanah sida, lalu meri duit nya kena nulung orang Kristian ba Jerusalem. Taja pia, seduai iya madahka diri meri semua duit nya, tang kebendar iya “belalai nyimpan sebagi ari duit nya.” (SKR. 5:2) Nya alai, Jehovah ngukum bunuh seduai iya. Jehovah ngereja tu ukai ketegal sida meri mimit aja duit. Tang laban sida bisi tuju ati ti jai sereta nipu orang. Nyadi, sida “ukai ngemulaka mensia, tang ngemulaka Petara.” (SKR. 5:4) Jesus ngutuk sida ke nulung orang laban deka pengawa nya dipeda orang bukai. Baka nya mega, Ananias enggau Safira deka agi minta dipuji orang, ari ke berunding sekalika Petara deka nerima pengawa seduai iya tauka enda.—Mat. 6:1-3.

20. Nama ulih dipelajarka kitai pasal meri pemeri ngagai Jehovah?

²⁰ Orang Kristian di Jerusalem ba abad keterubah amat gerah jari. Baka nya mega, bejuta iku bala Saksi-Saksi Jehovah meri duit pemeri enggau sukarela kena nyukung pengawa nginjil. Nadai siku pan orang dipejal kena meri masa tauka duit nyukung pengawa nginjil. Nya alai, Jehovah enggai kitai nyembah Iya enggau ati ti lembau tauka ketegal dipejal. (2 Kor. 9:7) Ingat meh, ba Jehovah, penyampau duit ke diberi kitai nya ukai utai ti pemadu penting. Tang Iya beratika tuju ati kitai. (Mrk. 12:41-44) Kitai enggai sekali-kali nyadi baka Ananias enggau Safira. Kitai enggai berundingka diri empu tauka deka minta puji lebuh ngereja pengawa ke Jehovah. Tang baka Peter, John enggau Barnabas, arapka pengawa kitai ke Jehovah seruran diperansang ari pengerindu kitai ti dalam ngagai Jehovah sereta orang bukai.—Mat. 22:37-40.