1-3. (a) Nama kebuah bala rasul dibai ngagai Raban Kunsil Orang Judah, lalu nama deka digaga sida ketegal nya? (b) Nama kebuah kitai keran amat deka nemu pasal bala rasul ke bediri teguh?

 BALA hakim ba Raban Kunsil Orang Judah majak ringat. Diatu, bala rasul Jesus benung bediri kena pechara ba Mahkamah Tinggi. Nama kebuah? Peratika utai ke disebut Joseph Kaiapas. Iya imam besai sereta ketuai Raban Kunsil Orang Judah. Enggau tegas iya madah ngagai sida: “Kami udah bebendar nagang kita ngajar orang dalam nama orang nya.” Kaiapas kelalu balat ringat nyentukka iya enda ulih nyebut nama Jesus. Ku Kaiapas agi: “Tang kita udah ngerembaika utai ke diajar kita ngagai serata Jerusalem, lalu kita bebendar deka nyalahka kami atas pemati orang nya.” (SKR. 5:28) Jaku ari Kaiapas nya terang nunjukka, sida rasul patut badu nginjil. Enti enda, sida deka diukum!

² Nyadi, nama reaksi bala rasul enggau jaku Kaiapas nya? Perundingka tu, Jesus ke ngasuh sida nginjil, lalu kuasa Jesus nya datai ari Petara. (Mat. 28:18-20) Kati bala rasul tu deka alah laban takutka mensia lalu badu nginjil? Tauka sida deka berani bediri teguh sereta neruska pengawa nginjil? Nya alai nama deka digaga sida: Kati sida deka ngasika Petara tauka takutka mensia? Saut rasul Peter ti ngarika bala rasul ke bukai chukup terang, lalu nya nunjukka, iya enda kakang ati sereta amat berani.

³ Ketegal kitai orang Kristian ti bendar, kitai amat deka nemu baka ni reaksi bala rasul lebuh sida kena ugut Raban Kunsil Orang Judah. Tu ketegal kitai pan sama diasuh nginjil. Pengawa nginjil kitai datai ari Petara. Lalu lebuh kitai deka ngereja nya, kitai mega deka disakal. (Mat. 10:22) Sida ke ngelaban engka deka ngachau tauka nagang pengawa nginjil kitai. Enti pia, nama deka digaga kitai? Kitai tau bulih penguntung enti kitai belajar pasal bala rasul ke udah bediri teguh, lalu meresa pasal situasi ke ngasuh sida dipechara ba Raban Kunsil Orang Judah. a

4, 5. Nama kebuah Kaiapas enggau raban pengarap Saduki “balat chemburu”?

⁴ Kati nuan agi ingat, lebuh bala rasul keterubah kali diasuh badu nginjil, Peter enggau John nyaut: “Kami enda ulih ngetu bejaku pasal utai ke udah dipeda sereta didinga kami.” (SKR. 4:20) Tang pengudah sida dipechara ba Raban Kunsil Orang Judah, Peter enggau John sereta bala rasul ke bukai terus nginjil ba rumah sembiang Jehovah. Bala rasul terus ngaga mayuh kereja ajih. Sida ngeraika orang ke sakit enggau orang ke dirasuk melikat ti jai. Indah ayuk Peter pan ulih ngeraika sida ke sakit! Bala rasul ngereja semua nya “ba Serambi Solomon.” Nya endur orang bejalai ke bisi atap sereta mayuh tiang. Endur nya bisi ba begian timur di Rumah Sembiang, alai mayuh orang Judah deka begelumu. Maya nya orang ukai semina digeraika ari sakit, tang sida mega nerima pemendar ari Jaku Petara. Asil iya “penyampau sida majak nambah, laban mayuh sida ke lelaki enggau ke indu arapka Tuan Jesus.”—SKR. 5:12-15.

⁵ Kaiapas enggau raban pengarap Saduki “balat chemburu,” lalu ngurung bala rasul ba rumah jil. Kebendar iya, Kaiapas sebagi ari raban pengarap Saduki. (SKR. 5:17, 18) Nama kebuah raban pengarap Saduki amat ringat? Tu ketegal bala rasul ngajar pasal Jesus udah diangkatka idup baru. Tang raban pengarap Saduki enda pechayaka ajar pengangkat ari mati. Bala rasul mega madahka, orang ulih diselamatka enti iya arapka Jesus. Tang raban pengarap Saduki takut perintah Rome deka nyerang Jerusalem enti orang Judah nerima Jesus nyadika ketuai sida. (Jhn. 11:48) Nya meh kebuah iya, raban pengarap Saduki bebendar deka nagang pengawa nginjil bala rasul!

6. Kemayaharitu sapa orang utama ke balat nyakal nembiak Jehovah, lalu nama kebuah tu enda ngasuh kitai tekenyit?

⁶ Kemayaharitu, orang utama ke balat nyakal nembiak Jehovah nya sida ke begedika bala Saksi Jehovah. Sida orang ke bepengaruh ngagai bala pemerintah enggau media rama. Ketegal nya, sida bisi peluang ngetuka pengawa nginjil kitai. Kati kitai tekenyit enggau nya? Enda. Pesan kitai terang nunjukka ajar pengarap ti pelesu nya salah. Enggau nya, orang ke baruh ati bisi peluang nerima ajar Bup Kudus. Nya alai, sida ulih dilepaska ari adat sereta pengawa ti enda sejalai enggau ajar Bup Kudus. (Jhn. 8:32) Nyadi kitai enda berasai iran ke bala tuai pengarap ti balat chemburu enggau ringat ngagai pesan ke dibai kitai.

7, 8. Baka ni jaku ari melikat Jehovah nulung bala rasul, lalu nama tanya ke ulih ditanya kitai empu?

⁷ Seraya sida nganti dipechara, bala rasul engka berunding sekalika sida deka diukum bunuh tauka enda. (Mat. 24:9) Tang maya malam nya, bisi siti utai ke enda dijangka nyadi. Malam nya “melikat Jehovah muka  pintu rumah jil.” b (SKR. 5:19) Udah nya melikat meri iring tu ngagai sida: “Bediri ba Rumah Sembiang lalu majak madah.” (SKR. 5:20) Jaku ari melikat nya ngasuh bala rasul yakin, sida endang ngereja utai ti betul. Pia mega, jaku melikat nya ngeringka sida ngambika sida mengkang tegap enda ngira nama utai ke deka nyadi. Nya alai enggau penuh pemerani sereta pengarap ti tegap, bala rasul nya “tama ngagai Rumah Sembiang lebuh hari nyau tawas lalu belabuh ngajar.”—SKR. 5:21.

⁸ Tiap iku kitai patut nanya diri empu: ‘Kati aku bisi pengarap sereta pemerani kena terus nginjil enti aku napi penanggul ti sama baka bala rasul nya?’ Kitai tentu deka bulih pengering lebuh nemu pengawa ti penting, iya nya “meri saksi enggau silik pasal Perintah Petara” bisi disukung enggau diiring bala melikat.—SKR. 28:23; Pem. 14:6, 7.

9-11. Nama reaksi bala rasul lebuh Raban Kunsil Orang Judah mejal sida badu nginjil, lalu nama teladan ke udah ditetapka bala rasul ngagai orang Kristian ti bendar?

⁹ Kaiapas enggau bala hakim ke bukai besedia deka ngatur pechara enggau bala rasul, tang sida enda nemu utai ke udah nyadi ba jil. Sida pan ngasuh bala jejaga mai bala rasul ngagai sida. Gambarka reaksi bala jejaga nya lebuh sida datai ba rumah jil. Sida tekenyit lebuh meda bala rasul nadai agi ba dia. Tang, sida iran amat meda pintu rumah jil “dikunchi enggau manah, lalu bala jejaga bediri ba mua pintu.” (SKR. 5:23) Enda lama udah nya, ketuai jejaga Rumah Sembiang nemu bala rasul benung meri saksi pasal Jesus ba Rumah Sembiang. Baka ni utai tu tau nyadi taja pan sida udah bebendar ngejil bala rasul nya? Ketegal nya, ketuai jejaga Rumah Sembiang sereta jejaga ke bukai enggau jampat nangkap bala rasul nya, lalu mai sida ngagai Raban Kunsil Orang Judah.

 ¹⁰ Baka ke dipadah ba pun pelajar tu, bala tuai pengarap udah terang madahka, bala rasul patut badu nginjil. Tang, nama reaksi bala rasul nya? Peter bejaku ngarika bala rasul enggau berani, lalu nyaut bala tuai pengarap nya: “Kami patut ngasika Petara, ke nyadi pemerintah kami, ukai mensia.” (SKR. 5:29) Enggau tu, bala rasul udah netapka teladan ti manah ke orang Kristian ti bendar. Kemayaharitu, bala pemerintah mensia nagang peneka Petara sereta ngasuh kitai ngereja utai ke ditagang Petara. Enti pia, sida udah lenyau hak ke diberi Petara kena kitai ngasika sida. Nyadi, enti bisi ‘kuasa perintah’ nagang pengawa nginjil kitai, kitai enda ulih badu ngereja pengawa ke diasuh Petara kereja kitai, iya nya nginjil Berita Manah. (Rom. 13:1) Tang, kitai deka terus tetemuka chara ti bejimat agi sereta ke enda ditemu orang kena terus meri saksi enggau silik pasal Perintah Petara.

¹¹ Maya nya, bala hakim udah amat begedika bala rasul. Nambahka nya, saut ari bala rasul tu ngasuh bala hakim majak ringat agi. Nya alai, sida keran deka “munuh” bala rasul nya. (SKR. 5:33) Bala rasul tentu deka diukum bunuh. Taja pia, sida terus nginjil enggau berani sereta ransing. Tang, Jehovah deka meri bantu ngagai sida dalam chara ti luar biasa!

12, 13. (a) Nama jaku lalau ke diberi Gamaliel ngagai bala hakim ke bukai, lalu nama utai ke dikereja sida ba mahkamah? (b) Baka ni Jehovah deka nulung nembiak Iya kemayaharitu, lalu nama ulih dipechayaka kitai enti kitai ditejuka napi ‘pemerinsa ketegal ngereja utai ti lurus’?

¹² Gamaliel, siku “pengajar Adat ti amat dipebasa semua orang.” Iya madahka penemu iya bekaul enggau utai tu. c Iya mega landik ba undang-undang. Nya alai, iya amat dipebasa bala hakim ke bukai, laban iya ketuai sida. Iya indah “ngasuh orang mai bala rasul nya pansut enda lama.” (SKR. 5:34) Maya nya, Gamaliel nyebut pasal utai ke kala nyadi suba. Tu ketegal, suba mega bisi orang ke nitihka orang bukai nyadika tuan sida. Tang pengudah tuan sida mati, orang ke nitihka iya pan pambar lalu lenyau. Nya alai, Gamaliel ngasuh orang ba mahkamah sabar sereta betolak ansur enggau bala rasul, laban Tuan sida, Jesus, baru udah mati. Peratika utai ke disebut Gamaliel: “Anang masuk champur dalam hal sida. Enti pelan enggau pengawa sida nya datai ari mensia, tentu semua nya enda ulih mujur. Tang enti semua nya datai ari Petara, tentu kita enda ulih ngalahka sida. Anang-anang nyau kita empu ke ngelaban Petara.” (SKR. 5:38, 39) Nyadi, bala hakim ke bukai nitihka jaku lalau iya. Taja pia, sida agi ngukum bala rasul tu enggau chara disipat, lalu ngasuh sida “badu bejaku dalam nama Jesus.”—SKR. 5:40.

¹³ Kemayaharitu, Jehovah ulih ngena orang ke bisi kuasa, baka Iya ke kala ngena Gamaliel kena nulung nembiak Iya. (J-lam. 21:1) Jehovah ulih ngasuh bala pemerintah ti bekuasa, bala hakim sereta sida ke ngaga  undang-undang kena ngereja utai nitihka peneka Iya. (Neh. 2:4-8) Taja pia, bisi dua iti utai ke ulih dipechayaka kitai enti Jehovah nejuka kitai “merinsa ketegal ngereja utai ti lurus.” (1 Pet. 3:14) Kesatu, Petara ulih meri kitai pengering kena nulung kitai tan natka pemerinsa. (1 Kor. 10:13) Kedua, ingat meh, orang ke ngelaban “enda ulih ngalahka” pengawa ke deka dikereja Petara.—Isa. 54:17.

14, 15. (a) Nama reaksi bala rasul pengudah sida disipat, lalu nama kebuah? (b) Padahka siti pengalaman pasal nembiak Jehovah ke betan enggau gaga ati taja pan sida diperinsa.

¹⁴ Kati bala rasul lemi semengat? Tauka kati pengeransing sida nyau majak lemi pengudah sida disipat? Tentu enda! Bup Kudus madahka, sida “pan mupuk ari Raban Kunsil Orang Judah. Sida gaga ati.” (SKR. 5:41) Nama kebuah sida “gaga ati”? Tu tentu ukai ketegal pemedis ke diasaika sida lebuh sida disipat. Tang, sida gaga ati laban sida diperinsa ketegal ngetanka penetap ati ngagai Jehovah sereta nitihka singkang Jesus, ti udah nyadi teladan ti manah ke sida.—Mat. 5:11, 12.

¹⁵ Baka bala menyadi Kristian kitai ba abad keterubah, kitai mega ulih tan ngenatka pemerinsa ketegal Berita Manah enggau gaga ati. (1 Pet. 4:12-14) Kitai tentu enda rindu diugut, diperinsa sereta dijil. Tang kitai puas ati enti kitai mujur ngetanka penetap ati kitai. Peratika teladan Henryk Dornik. Pemerintah amat jai enggau iya. Tang iya betaun-taun tan ngenatka nya enggau liat ati. Iya agi ingat ba bulan lapan kena taun 1944, bala pemerintah nganjung iya, enggau menyadi lelaki iya ke tuai ngagai kem alai ngetanka orang tangkap. Sida ke ngelaban madahka: “Kami langsung enda mujur ngasuh sida ngereja nama-nama. Sida diukum bunuh ketegal pengarap sida, tang nya ngasuh seduai iya gaga ati.” Menyadi Dornik madahka: “Aku nadai pengingin deka diukum bunuh ketegal pengarap aku. Tang, aku berani sereta udah setia ngagai Jehovah. Lalu taja pan aku merinsa, nya ngasuh aku gaga ati.”—Jas. 1:2-4.

16. Baka ni bala rasul nunjukka sida keran deka meri saksi enggau silik, lalu baka ni kitai ulih nunda chara bala rasul nginjil?

 ¹⁶ Bala rasul enda masau jam lalu sida neruska pengawa nginjil. Bup Kudus madahka, “ninting hari sekalika ba Rumah Sembiang tauka ari rumah ke rumah,” sida enda ngetu ngajar sereta “nusui Berita Manah pasal Jesus, iya nya Kristus.” Sida ngereja tu enggau berani. d (SKR. 5:42) Sida ransing nginjil sereta keran deka meri saksi enggau silik. Peratika mega, sida nginjil ngagai rumah orang, baka ke diasuh Jesus Kristus kereja sida. (Mat. 10:7, 11-14) Nya meh kebuah iya, sida mujur ngemenuhka Jerusalem enggau ajar sida. Kemayaharitu, Saksi-Saksi Jehovah mega dikelala ketegal nitihka chara bala rasul nginjil. Ketegal kitai nginjil ari rumah ke rumah ba kandang endur kitai nginjil, kitai nunjukka diri deka meri saksi enggau silik. Kitai mega deka meri semua orang peluang kena ninga Berita Manah. Kati Jehovah udah merekatka pengawa nginjil kitai ari rumah ke rumah? Au. Bejuta iku orang nerima Berita Manah pasal Perintah Petara ba hari ti penudi tu. Pia mega, mayuh orang kebendar iya keterubah kali ninga Berita Manah lebuh bala saksi nginjil ngagai rumah sida.

17-19. Nama penanggul ke nyadi ti ulih ngachau penyerakup, lalu nama iring ke diberi bala rasul kena mutarka penanggul nya?

¹⁷ Bisi siti penanggul ke ulih ngachau raban gempuru ti baru ditumbuhka. Nama penanggul nya? Lebuh maya nya, mayuh ari bala murid ke dibaptisa enda diau ba Jerusalem. Sida datai ke Jerusalem laban deka  belajar mayuh agi sebedau pulai ngagai menua asal sida. Bala murid ke diau ba Jerusalem enggau sukarela meri duit kena nulung nyediaka pemakai sereta utai ke diguna kena beridup besehari-hari ngagai sida nya. (SKR. 2:44-46; 4:34-37) Nya alai, bisi siti situasi ke nyadi ti ulih ngasuh orang enda nyamai ati. Peratika utai ke dipadah Bup Kudus: “Lebuh pemakai disadung ninting hari,” bala indu balu ke bejaku ngena jaku Gerika “enda dikeibuhka.” (SKR. 6:1) Tang bala indu balu ke ngena bansa jaku Hebrew diintu enggau manah. Nyadi, penanggul iya diatu bekaul enggau ulah ti bepilih mata. Enti dibandingka enggau penanggul ke bukai, penanggul ke nyadi ketegal ulah ti bepilih mata tu, senang agi deka ngasuh bala menyadi Kristian bepechah-belah tauka enda beserakup.

¹⁸ Maya nya, bala rasul ke nyadi raban ti ngiring. Sida sedar, enda manah enti “ngetu ngajar jaku Petara, semina ketegal deka nyadung pemakai.” (SKR. 6:2) Kena mutarka penanggul tu, sida meri iring ngagai bala murid kena ngiga tujuh iku lelaki “ke penuh laban kuasa kudus Petara, sereta ke bepenemu dalam.” Sida tu dipilih bala rasul kena bejalaika “pengawa ke beguna.” (SKR. 6:3) Sida menyadi lelaki ke layak tu amat diguna laban pengawa tu ukai semina bekaul enggau nyadung pemakai aja. Tang pengawa tu bekaul enggau ngemataka duit, meli utai ke diguna sereta nulis rikut enggau silik. Semua bala menyadi lelaki ke dipilih tu bisi nama Gerika. Nya alai, tu deka ngasuh bala indu balu ke pedis ati nya senang agi nerima sida ngereja pengawa nya. Pengudah bebendar berunding sereta besampika pekara tu enggau silik agi, bala rasul milih tujuh iku menyadi lelaki kena ngemataka “pengawa ke beguna” tu. e

¹⁹ Tujuh iku menyadi lelaki ke layak tu dipilih kena nyadung pemakai. Tang kati tu reti iya, semua sida enda ibuh agi nginjil pasal Berita Manah? Tentu enda! Entara sida ke tujuh iku nya, bisi Stepen ke dipilih nyadung pemakai. Iya udah nunjukka diri meri saksi enggau berani sereta landik amat bejaku. (SKR. 6:8-10) Philip mega dipilih kena ngereja pengawa tu, lalu iya dikumbai siku “penginjil.” (SKR. 21:8) Nya alai, tu terang nunjukka semua tujuh iku lelaki ke dipilih nya terus nginjil Berita Manah enggau ransing.

20. Baka ni nembiak Petara kemayaharitu nitihka utai ke digaga bala rasul suba?

 ²⁰ Sekeda menyadi lelaki engka layak nyadi penulung gempuru tauka tuai gempuru. Tang sida patut nunjukka diri bisi penemu-dalam ari Petara, sereta nunjukka kuasa kudus bekereja ba sida. Bup Kudus bisi nyebut utai ke patut digaga menyadi lelaki enti sida deka nyadi tuai gempuru tauka penulung gempuru. Nya alai dibaruh iring Raban ti Ngiring, semina sida ke nitihka utai ke dipinta Bup Kudus aja ulih layak megai tanggungjawap ke baka tu. f (1 Tim. 3:1-9, 12, 13) Nyadi, sida ke layak tu ulih dikumbai dipilih nengah kuasa kudus. Bala menyadi lelaki ke bagas gawa tu ngemataka mayuh “pengawa ke beguna.” Ambika chunto, bala tuai gempuru engka ngaga atur kena nulung menyadi ke udah tuai ti tetap ati. (Jas. 1:27) Sekeda tuai gempuru nulung ba pengawa nirika Palan Gempuru. Ke bukai nulung ngatur pengawa kena konvensyen tauka ngereja pengawa ba Komiti Besilih Penemu Sepital. Pia mega, bala penulung gempuru ngereja mayuh pengawa ti kesuah iya enda dipeda, tauka secara enda langsung bekaul enggau pengawa datai meransang bala menyadi sereta pengawa ngajar. Taja pia, semua bala menyadi lelaki ke dipilih tu patut seimbang enggau pengawa ba raban gempuru sereta gerempung, ngambika ulih neruska pengawa nginjil Berita Manah pasal Perintah Petara.—1 Kor. 9:16.

21, 22. Nama utai ke nunjukka Jehovah udah merekatka raban gempuru ke baru ditumbuhka maya abad keterubah?

²¹ Enggau sukung ari Jehovah, raban gempuru ke baru ditumbuhka ba abad keterubah udah mujur mutarka penanggul baka disakal sereta penanggul ti tau ngasuh sida enda beserakup. Kitai ulih meda bukti Jehovah udah merekatka raban gempuru nya. Bup Kudus bisi madahka: “Jaku Petara majak ngelekai, lalu penyampau murid Jesus ba Jerusalem ngenyit nambah. Indah mayuh bala imam mega arap.” (SKR. 6:7) Bup Surat Kereja Rasul mayuh madahka pemansang pasal raban gempuru ba abad ti keterubah. Lalu utai ke dibacha kitai tadi nya semina siti ari iya. (SKR. 9:31; 12:24; 16:5; 19:20; 28:31) Kemayaharitu, endaka kitai berasai diperansang lebuh ninga pengawa nginjil Berita Manah pasal Perintah Petara di serata dunya majak mansang?

²² Ba abad keterubah suba, bala tuai pengarap ti ringat enda ngetu-ngetu nguji nagang pengawa nginjil. Baka ke deka dipelajarka kitai pengudah tu, bala menyadi Kristian ba abad ti keterubah deka napi sakal ke balat agi. Ketegal nya, Stepen mega nyadi taget laban balat disakal.