1-3. Baka ni Jesus beserara sereta mupuk ari bala rasul iya, lalu nama sekeda tanya ke deka disaut?

 BALA rasul enggai beserara ari Jesus, laban pengelama 40 hari tu, sida udah sama begulai enggau iya. Sebedau tu, sida balat tusah ati ketegal Jesus dibunuh. Tang pengudah Jesus diidupka baru, sida berasai amat gaga ati. Pengelama 40 hari tu, Jesus suah mandangka diri ngagai sida. Tiap kali Jesus ngereja nya, iya deka selalu ngajar sereta meransang bala murid iya. Tang maya udah datai, alai Jesus deka mandangka diri kali ke penudi iya ngagai bala murid iya.

² Ba Bukit Kana, bala rasul betemu enggau Jesus. Sida bebendar mendingka semua utai ke dipadah Jesus. Lebuh iya badu bejaku, Jesus ngangkatka jari iya lalu merekatka sida. Udah nya, Jesus dibai niki ke serega! Ba maya ti sama nya, bala rasul terus merening ngagai iya. Pengujung iya, remang ngelindung Jesus, lalu iya enda ulih dipeda agi.  Jesus udah nadai agi enggau sida ba dia. Taja pia, sida terus merening ke langit.—Luk. 24:50; SKR. 1:9, 10.

³ Utai ke nyadi tu udah ngubah pengidup bala rasul Jesus. Pengudah Tuan sida, Jesus Kristus niki ke serega, nama deka digaga sida diatu? Kitai ulih yakin, Jesus udah nyikap sida kena neruska pengawa nginjil. Baka ni Jesus nyikap bala rasul iya ke pengawa ti penting tu? Nama reaksi sida? Lalu nama kaul iya enggau orang Kristian kemayaharitu? Aram meh kitai ngiga semua saut iya ba Surat Kereja Rasul bagi 1.

4. Baka ke ditulis ba bup Surat Kereja Rasul, baka ni Luke ngepunka surat iya?

⁴ Luke ngepunka surat tu enggau ngangauka siku lelaki ke benama Teopilus. Surat tu dituju ngagai iya. Sebedau tu, Luke nulis bup Injil. Lalu, bup nya mega dituju ngagai Teopilus. a Luke deka iya nemu, surat tu besambung ari bup Injil ke sebedau tu. Nya alai, Luke ngepunka surat iya enggau ngelansa sekeda utai ke nyadi ti bisi ditulis ba ujung bup Injil nya. Ba surat tu, Luke ngena sekeda leka jaku ti bebida sereta nambahka sekeda penerang ke bukai.

5, 6. (a) Nama deka nulung bala murid Jesus mengkang tegap ba pengarap? (b) Baka ni pengarap orang Kristian kemayaharitu bepelasarka “mayuh bukti ti terang”?

⁵ Nama deka nulung bala murid Jesus mengkang tegap ba pengarap? Tu meh utai ke dipadah Surat Kereja Rasul 1:3 pasal Jesus: “Iya meri sida mayuh bukti ti terang ke nunjukka iya udah idup.” Ba Bup Kudus, semina Luke aja ke ngena rambai jaku “mayuh bukti ti terang.” Tu ketegal, iya siku “lutur ke dikerinduka.” (Kol. 4:14) Rambai jaku tu selalu dikena bala lutur kena nerangka pengawa ti bekaul enggau pengawa berubat. Nya alai lebuh Luke ngena rambai jaku tu, iya deka nunjukka, bukti pasal Jesus udah idup baru ulih dipechaya sereta tau dikearapka. Ba pekara tu, Jesus udah nunjukka mayuh bukti. Jesus udah mayuh kali mandangka diri ba mua bala murid iya. Kekadang, iya mandangka diri ngagai siku tauka dua iku orang. Bisi maya iya, Jesus mandangka diri ba mua semua bala rasul iya. Lalu bisi sekali, iya mandangka diri ngagai lebih ari 500 iku bala murid serentak. (1 Kor. 15:3-6) Endaka semua tu bukti ti amat terang?

 ⁶ Sama mega, pengarap orang Kristian ti bendar kemayaharitu bepelasarka “mayuh bukti ti terang.” Kati bisi bukti ke nunjukka Jesus kala idup ba dunya, mati ke dosa kitai sereta udah diangkatka idup baru? Au, tentu bisi! Ba Bup Kudus, bisi mayuh saksi ke ulih dipechaya meri penerang sereta bukti ke diguna kitai. Pengarap kitai ulih ditegapka enti kitai belajar pasal utai ke nyadi ti bisi dipadah ba Bup Kudus. Kitai mega ulih besampi minta tulung ari Jehovah ngambika kitai ulih nitihka utai ke dipelajarka kitai. Ingat meh, bisi bida entara bisi pengarap ti bendar sereta semina pechaya aja. Pengarap ti bendar bepelasarka bukti ti kuat. Lalu, pengarap ti bendar amat penting kena ngulihka pengidup ti meruan belama iya.—Jhn. 3:16.

7. Nama teladan ke ditetapka Jesus ngagai bala murid iya bekaul enggau pengawa nginjil sereta ngajar?

⁷ Jesus mega “bejaku pasal Perintah Petara.” Ambika chunto, Jesus nerangka jaku benabi ke nunjukka Messiah patut diperinsa lalu mati. (Luk. 24:13-32, 46, 47) Lebuh Jesus madahka pengawa iya ke nyadi Messiah, iya ngemeratka tema pasal Perintah Petara. Tu ketegal, iya udah dipilih nyadi raja ba Perintah nya. Nya alai, pengawa nginjil Jesus seruran bepelasarka tema Perintah Petara. Lalu, bala murid iya kemayaharitu mega nginjil pasal tema ti sama nya.—Mat. 24:14; Luk. 4:43.

8, 9. (a) Nama dua iti runding ti salah ke bisi ba bala murid Jesus? (b) Baka ni Jesus ngemetulka runding bala rasul iya, lalu nama ulih dipelajarka orang Kristian kemayaharitu?

⁸ Lebuh bala rasul begelumu ba Bukit Kana, nya meh maya ke penudi sida betemu enggau Jesus ba dunya. Enggau gagit ati, sida nanya: “Tuan, kati nuan deka mulaika baru Perintah Petara ngagai Israel diatu?” (SKR. 1:6) Tanya bala rasul tu nunjukka sida bisi dua iti runding ti salah. Kesatu, sida ngumbai Perintah Petara deka dipulaika baru ngagai bansa Israel ba maya nya. Kedua, sida ngarapka Perintah Petara deka merintah tekala nya. Baka ni Jesus ngemetulka runding sida?

⁹ Jesus nemu, runding sida ti kesatu ke salah nya, enda lama agi deka dikemetulka. Kebendar iya, bala murid Jesus deka meda siti bansa baru diadaka 10 hari pengudah nya! Bansa ti baru tu ukai amat-amat bansa Israel. Tang, sida dikumbai Israel rohani, iya nya, orang ke dipilih Petara ngarika nama Iya. Tu ketegal, kaul Jehovah ti istimewa enggau bansa Israel nyau deka abis maya nya. Bekaul enggau runding kedua sida ti salah, Jesus ngingatka sida: “Semina Apai aja ke bisi hak nentuka maya enggau jam iya. Kita enda ibuh nemu pasal tu.” (SKR. 1:7) Ba senentang tu, Jehovah dikumbai Penjaga Masa. Nyadi, sebedau Jesus mati, iya kala madah, indah Anak pan enda nemu “hari enggau jam” lebuh pengujung dunya datai. Tang, “semina Apai aja” nemu.  (Mat. 24:36) Kemayaharitu, orang Kristian enda ibuh irau pasal kemaya pengujung dunya deka datai. Kebendar iya, kitai enda ibuh irau, laban nya ukai pengawa kitai, tang pengawa Jehovah.

10. Nama ulah bala rasul ke patut ditunda kitai, lalu nama kebuah?

¹⁰ Taja pia, kitai patut bejimat ngambika kitai enda ngemaruhka bala rasul Jesus. Sida bisi pengarap ti amat tegap. Lebuh Jesus ngemetulka runding sida, sida enggau baruh ati nerima nya. Taja pan tanya sida datai ari runding ti salah, tang kebendar iya, sida nunjukka diri bisi ulah ti manah. Jesus udah bekali-kali ngasuh bala murid iya: “Seruran bejaga.” (Mat. 24:42; 25:13; 26:41) Nya alai tanya sida nunjukka, sida benung bejaga. Sida enda sabar deka nemu utai ke deka digaga Jehovah pengudah nya. Kitai patut nunda ulah sida kemayaharitu. Kebendar iya, kitai patut majak agi seruran bejaga ba “hari ti penudi” tu.—2 Tim. 3:1-5.

11, 12. (a) Nama pengawa ke diberi Jesus ngagai bala murid iya? (b) Nama kebuah Jesus nyebut kuasa kudus bisi kaul enggau pengawa nginjil?

¹¹ Jesus ngingatka bala rasul pasal utai ke patut dikenuluka sida. Ku iya: “Kita deka bulih pengering lebuh kuasa kudus Petara datai ngagai kita, lalu kita deka nyadi saksi aku ba Jerusalem, ba serata Judea enggau Samaria, sereta nyentuk ngagai ujung dunya.” (SKR. 1:8) Ba Jerusalem, Jesus udah diukum bunuh. Nya alai, berita pasal iya ke diangkatka idup baru patut ditusui ba dia dulu. Pengudah nya, berita tu deka ditusui ngagai serata Judea. Lalu dikerembaika ngagai Samaria sereta nyentuk ke ujung dunya.

¹² Jesus semina nyebut pasal pengawa nginjil pengudah iya besemaya baru deka meri kuasa kudus ngagai bala murid iya. Lalu, nya ulih nulung sida ba pengawa nginjil. Nya alai, amat ngena iya nyebut kuasa kudus bekaul enggau pengawa nginjil. Rambai jaku “kuasa kudus” bisi disebut lebih ari 40 kali dalam bup Surat Kereja Rasul. Lalu kuasa kudus ke disebut Jesus nya, disengkaum enggau nya. Ba senentang tu, bup Surat Kereja Rasul suah nyebut pasal kuasa kudus. Tu kena nerangka enggau silik pasal kitai ke enda ulih ngereja peneka Jehovah enti nadai kuasa kudus. Nya meh kebuah iya, kitai patut seruran besampi minta kuasa kudus ari Jehovah! (Luk. 11:13) Kemayaharitu, kitai lebih agi begunaka bantu ari kuasa kudus.

13. Berapa besai pengawa nginjil ke diberi ngagai nembiak Petara kemayaharitu, lalu nama kebuah kitai patut enggau ransing ngereja nya?

¹³ Reti “nyentuk ngagai ujung dunya” udah berubah kenyau ari Jesus niki ke serega. Baka ke dipadah pelajar sebedau tu, Saksi-Saksi Jehovah nerima pengawa kena meri saksi. Sida nemu, Petara deka semua macham orang nemu Berita Manah pasal Perintah Petara. (1 Tim. 2:3, 4) Kati nuan mengkang sibuk enggau pengawa tu? Pengawa tu  ulih nyelamatka mayuh nyawa orang. Nuan nadai ulih tetemuka nama-nama pengawa ke ulih ngasuh nuan puas ati, baka pengawa nginjil. Jehovah deka meri nuan pengering kena ngereja pengawa tu! Bup Surat Kereja Rasul deka madahka nuan, pasal chara ti betul kena nginjil sereta ulah ke patut dikemansangka ngambika nuan ulih ngereja pengawa nginjil enggau manah agi.

14, 15. (a) Nama utai ke dipadah bala melikat pasal Jesus ke deka datai baru, lalu nama reti ku sida nya? (Peda mega nota kaki.) (b) Baka ni Jesus deka datai baru “enggau chara ti sama” baka iya mupuk?

¹⁴ Baka ke dipadah ba pun pelajar tu, Jesus dibai niki ke serega lalu iya enda ulih dipeda agi. Taja pia, 11 iku rasul Jesus terus bediri ba dia seraya sida merening ke langit. Udah nya, dua iku melikat datai lalu ngerara sida enggau nelap. Ku bala melikat nya: “Orang Galili, nama kebuah kita bediri malik ke langit? Jesus ke udah dibai niki ke langit deka datai enggau chara ti sama baka ke dipeda kita lebuh iya niki ke langit.” (SKR. 1:11) Kati reti ku bala melikat nya, Jesus deka datai baru enggau tubuh ti sama, baka ke diajar sekeda pengarap? Enda. Baka ni kitai nemu?

¹⁵ Bala melikat madah pasal Jesus deka datai baru. Taja pia, ukai enggau tubuh ti sama, tang “enggau chara ti sama.” b Enggau chara nama iya mupuk? Jesus nadai agi ulih dipeda lebuh bala melikat bejaku. Maya nya, semina beberapa iku orang aja, iya nya, bala rasul nemu Jesus udah ninggalka dunya lalu pulai baru ke serega. Nya meh chara Jesus deka datai baru. Lalu kebendar iya diatu, Jesus udah datai baru. Semina orang ke berundingka pekara rohani aja nemu pasal penatai iya, sereta iya ke benung merintah nyadi raja ba Perintah Petara. (Luk. 17:20) Kitai patut ngiga bukti ke nunjukka Jesus udah datai. Kitai mega deka madah ngagai orang bukai ngambika sida mega ulih seruran bejaga, kelebih agi ba jeman kitai diatu.

16-18. (a) Nitihka Surat Kereja Rasul 1:13, 14, nama ulih dipelajarka kitai pasal pengawa begempuru orang Kristian kena nyembah Jehovah? (b) Nama ulih dipelajarka kitai ari teladan ke ditunjukka indai Jesus, iya nya Maria? (c) Nama kebuah gempuru Kristian kemayaharitu amat penting?

¹⁶ Bala rasul tentu “pulai baru ngagai Jerusalem enggau ati ti balat gaga.” (Luk. 24:52) Tang baka ni reaksi sida pasal iring sereta utai ke diasuh Jesus kereja sida? Surat Kereja Rasul 1:13, 14 madahka, sida begelumu ba siti “bilik” ba atas sebuah rumah. Lalu ari utai ke nyadi nya, kitai ulih belajar sekeda penerang. Suba, rumah ba Palestin selalu  bisi bilik ba atas. Orang ulih ngagai bilik nya nengah siti tangga ba luar. Kati bilik tu sama enggau bilik ke dipadah ba Surat Kereja Rasul 12:12, iya nya bilik enggi indai Mark? Enda ngira nama saut iya, bilik tu tentu siti bilik ke biasa aja, lalu ulih dikena bala murid Jesus begempuru. Tang, sapa begempuru ba dia? Lalu nama utai ke digaga sida?

¹⁷ Peratika, ukai semina bala rasul sereta sida ke lelaki aja ke enggau gempuru nya. Bisi “beberapa iku orang indu” ba dia, nyengkaum indai Jesus, Maria. Lalu tu meh kali ke penudi iya, Bup Kudus nyebut pasal Maria. Iya enggau gempuru nya ukai ketegal deka nunjukka diri pama agi ari orang bukai. Tang iya enggau baruh ati deka nyembah Jehovah begulai enggau bala menyadi Kristian iya. Maria tentu berasai gaga ati laban empat iku anak lelaki iya ke bukai berengkah nyadi murid Jesus. (Mat. 13:55; Jhn. 7:5) Sida berubah pengudah menyadi tiri sida, Jesus, mati lalu diangkatka idup baru.—1 Kor. 15:7.

¹⁸ Peratika mega kebuah bala murid Jesus begempuru. Bup Kudus madahka: “Enggau siti tuju, sida bebendar besampi.” (SKR. 1:14) Kenyau ari suba, pengawa begempuru amat penting ba sembah orang Kristian. Kitai begempuru ketegal deka meransang pangan diri, nerima iring sereta jaku lalau. Lalu ke pemadu penting nya, kitai datai begempuru ketegal deka nyembah Jehovah. Kitai besampi sereta belagu kena muji Jehovah. Tu tentu ngelantangka ati Iya. Arapka semua kitai enda ngelengkaka pengawa begempuru laban nya pengawa ti kudus sereta meransang kitai!—Heb. 10:24, 25.

19-21. (a) Nama ulih dipelajarka kitai ari ungkup Peter ba raban gempuru Kristian? (b) Nama kebuah Judas patut diganti, lalu nama ulih dipelajarka kitai ari chara penanggul tu diputarka?

¹⁹ Bala murid Jesus maya nya patut mutarka siti penanggul, lalu nya enda tau enda diputarka. Ba senentang tu, rasul Peter ngiring kena ngatur pekara tu. (Ayat 15-26) Taja pia perundingka tu: Beberapa minggu sebedau tu, Peter udah nyakal Jesus tiga kali. Tang, endaka tu meransang kitai lebuh meda Peter enda ngetu ngaga pemansang taja pan udah ngereja penyalah? (Mrk. 14:72) Semua kitai enda ulih rari ari ngereja dosa. Nya alai semua kitai patut dikingatka pekara tu: Jehovah ‘manah sereta ngampunka’ orang ke bebendar nesal ati.—Mas. 86:5.

²⁰ Peter sedar, Judas, iya nya rasul ke udah nyual Jesus patut diganti. Tang sapa ke ulih nganti Judas? Rasul baru ke deka nganti Judas patut kala enggau Jesus ba pengawa nginjil. Iya mega patut udah besaksika pengangkat Jesus ari mati. (SKR. 1:21, 22) Tu sejalai enggau semaya ke udah disebut Jesus: “Kita ke udah nitihka aku deka mega duduk ba 12 iti kerusi diraja, lalu ngakim 12 raban bansa orang Israel.” (Mat. 19:28) Jehovah deka 12 iku rasul ke kala enggau Jesus nginjil ba dunya kena numbuhka “12 iti batu ke nyadi pugu” ba Jerusalem ti  Baru. (Pem. 21:2, 14) Jehovah nulung Peter meretika jaku benabi pasal Judas, iya nya “awakka orang bukai ngambi pengawa iya.”—Mas. 109:8.

²¹ Baka ni pengawa milih rasul ti baru nya dipejalaika? Enggau chara bechabut undi. Maya jeman Bup Kudus, tu pengawa ti biasa digaga. (J-lam. 16:33) Taja pia, tu meh kali ke penudi iya Bup Kudus madahka pengawa bechabut undi bisi digaga. Pengawa tu enda agi dikena pengudah bala murid Jesus nerima kuasa kudus Petara. Peratika kebuah bala murid Jesus bechabut undi maya nya. Ku bala rasul besampi: “O Jehovah, Nuan nemu ati semua orang. Tunjukka meh ni bagi seduai tu ke udah dipilih Nuan.” (SKR. 1:23, 24) Enggau tu, sida dekaka Jehovah milih rasul ke baru nya nitihka peneka Iya. Pengujung iya, Matias dipilih nyadi rasul kena nganti Judas. Iya engka siku ari 70 iku bala murid ke kala dianjung Jesus ngereja pengawa nginjil. Nya alai, Matias nyadi siku ari “12 iku rasul.” c—SKR. 6:2.

22, 23. Nama kebuah kitai patut nunduk sereta ngasika sida ke ngiring ba raban gempuru kemayaharitu?

²² Utai ke nyadi tu ngingatka kitai pasal siti pekara ti penting iya nya, kebuah nembiak Petara patut diatur enggau manah. Kemayaharitu, mayuh bala menyadi lelaki dipilih kena ngiring raban gempuru. Lebuh bala tuai gempuru deka milih menyadi lelaki ke bukai kena ngiring raban gempuru, sida enggau bejimat beratika ayat Bup Kudus. Lalu sida mega besampi minta iring ari kuasa kudus Petara. Nya alai, bala menyadi ba raban gempuru deka ngumbai menyadi lelaki ke dipilih nya, udah dipilih nengah kuasa kudus. Lalu kitai mega deka nunduk sereta ngasika sida ke ngiring. Enggau nya, kitai deka ngemansangka penyerakup ba raban gempuru.—Heb. 13:17.

²³ Bala murid Jesus udah dikeringka ketegal sida udah meda Jesus diidupka baru. Sida mega ditegapka laban udah meda chara raban gempuru diatur enggau manah. Sida tentu udah disikap enggau manah kena napi utai ke deka nyadi pengudah nya. Pelajar pengudah tu deka bejuraika utai ke nyadi nya.