1, 2. Nama utai ti ngerinduka ati pasal pejalai nginjil Barnabas enggau Saul, lalu baka ni pengawa nginjil seduai iya ngamatka jaku ba Surat Kereja Rasul 1:8?

 BALA menyadi ba raban gempuru Antiok amat gagit ati. Taja pan bisi mayuh nabi sereta pengajar ba raban gempuru nya, tang Barnabas seduai Saul dipilih kuasa kudus kena nginjil ba endur ti jauh. a (SKR. 13:1, 2) Suba, bisi mega bala menyadi lelaki dianjung nginjil, tang ngagai endur alai mayuh orang udah nerima Berita Manah. (SKR. 8:14; 11:22) Taja pia, pengawa Barnabas seduai Saul kali tu bebida, laban seduai iya deka dianjung ngagai endur alai orang bedau agi nemu Berita Manah. Maya nya, John Mark enggau seduai iya lalu nyadi penulung.

² Kira-kira 14 taun sebedau nya, Jesus kala madahka utai tu ngagai bala murid iya. Ku iya: “Kita deka nyadi saksi aku ba Jerusalem, ba serata Judea enggau Samaria, sereta nyentuk ngagai ujung dunya.” (SKR. 1:8) Nya alai, lebuh Barnabas seduai Saul dipilih nginjil ngagai endur bukai, nya ngamatka jaku benabi Jesus! b

3. Nama kebuah pejalai ti jauh amat tusah dikereja ba abad keterubah?

³ Kemayaharitu, orang ulih bejalai jauh ngena kerita sereta bilun. Lalu enda ibuh ngena masa ti lama, tang semina 1 tauka 2 jam aja. Taja pia, situasi kemayaharitu enda sama baka ba abad keterubah. Maya nya, orang patut bejalai kaki. Lalu, jalai ke ditengah sida amat jai. Dalam sehari, sida semina ulih bejalai penyauh 30 kilometer. Tu tentu ngasuh sida berasai amat lelak! c Nya alai, taja pan Barnabas  seduai Saul gagit ati deka ngereja pengawa sida, tang seduai iya tentu sedar pejalai sida enda senang dikereja.—Mat. 16:24.

4. (a) Baka ni Barnabas seduai Saul dipilih ngereja pengawa nya, lalu nama reaksi bala menyadi Kristian? (b) Baka ni kitai ulih nyukung sida ke nerima pengawa ba gerempung Jehovah?

⁴ Kuasa kudus milih Barnabas seduai Saul ngereja “pengawa” nya. Nama kebuah? (SKR. 13:2) Bup Kudus nadai meri saut. Taja pia, Bup Kudus nadai madahka bala nabi enggau pengajar ba raban gempuru di Antiok mantah pemutus tu. Tang sida enggau pengabis ati nyukung pemutus ke udah digaga. Uji ngambarka asai ati Barnabas seduai Saul lebuh meda bala menyadi Kristian enda kepapaska seduai iya. Bup Kudus madahka, bala menyadi Kristian “bepasa sereta besampi, sida ngengkahka jari ba atas Barnabas enggau Saul, lalu ngasuh seduai iya mupuk.” (SKR. 13:3) Kitai mega patut nyukung sida ke dipilih ngereja pengawa ba gerempung Jehovah. Ambika chunto, kitai deka nyukung bala tuai gempuru. Ari ke nyadi kepapas enggau sida ti bisi hak istimewa tu, kitai patut “rinduka sida ketegal pengawa ke digaga sida.”—1 Tes. 5:13.

5. Padahka utai ke patut digaga Barnabas seduai Saul lebuh nginjil ba Pulau Saiprus.

⁵ Pengudah bejalai ngagai Seleusia, iya nya penyangkai kapal semak Antiok, Barnabas seduai Saul belayar ngagai Pulau Saiprus. Pejalai nya kira-kira 200 kilometer. d Ketegal Barnabas nya orang Saiprus, iya tentu enda sabar deka nginjil Berita Manah enggau orang ke datai ari menua ti sama enggau iya. Pengudah nya, Barnabas seduai Saul datai ba Salamis. Salamis nya siti bandar ba begian timur Pulau Saiprus. Maya nya, Barnabas seduai Saul enda masau jam. Bup Kudus madahka: “Seduai iya berengkah nusui jaku Petara ba balai gempuru orang Judah.” e (SKR. 13:5) Barnabas seduai Saul nginjil ba serata endur di Pulau Saiprus. Seduai iya engka nginjil ba bandar ti besai ba pulau nya. Enda ngira sekalika seduai iya ngena kapal tauka bejalai kaki, Barnabas seduai Saul engka udah bejalai penyauh 160 kilometer!

6, 7. (a) Sapa Sergius Paulus, lalu nama kebuah Bar-Jesus enggai iya ningaka Berita Manah? (b) Baka ni Saul mutarka sakal ari Bar-Jesus?

⁶ Ba abad keterubah, Pulau Saiprus penuh enggau sembah ti pelesu. Penanggul tu ulih terang dipeda lebuh Barnabas seduai Saul datai ngagai begian pantai barat Pulau Saiprus, iya nya Papos. Ba  dia, seduai iya betemu enggau “siku lelaki ke benama Bar-Jesus. Iya orang Judah. Iya siku dukun sereta nabi pelesu. Iya bekereja ke Sergius Paulus, siku lelaki ke pintar.” Ba abad keterubah, mayuh orang Rome ke bisi tikas sosial ti tinggi ba masyarakat, indah sida “ke pintar” baka Sergius Paulus suah minta tulung ngagai dukun, tauka orang ke nemu nujum ngambika ulih ngaga pemutus ti penting. Taja pia, Sergius Paulus alit ati enggau pesan Perintah Petara sereta “keran deka ninga jaku Petara.” Ketegal nya, Bar-Jesus enda rindu enggau utai ke nyadi tu. Kebendar iya, Bar-Jesus mega dikumbai Elimas, ke mai reti “Dukun.”—SKR. 13:6-8.

⁷ Bar-Jesus enda rindu enggau pesan Perintah Petara. Tu ketegal, iya gawa nyadi orang ke meri lalau ngagai Sergius Paulus. Nya alai, iya “nguji nagang gabenor nya ari arapka Tuan Jesus” laban iya deka ngetanka pengawa iya. (SKR. 13:8) Tang, Saul enggai ngelakka Bar-Jesus ngelimpangka Sergius Paulus. Nyadi, nama utai ke digaga Saul? Bup Kudus madahka: “Saul, ke mega dikumbai Paul, penuh laban kuasa kudus Petara. Iya bendar amat merening ngagai dukun nya [Bar-Jesus], lalu bejaku: ‘Nuan, ke penuh laban semua macham pemula enggau penyai, nuan anak Sitan sereta munsuh ke semua utai ti lurus. Nama kebuah nuan enda badu ngalihka jalai Jehovah ti bendar? Peda nuan! Jari Jehovah deka ngukum  nuan. Ba siti timpuh, nuan deka nyadi buta lalu enda ulih meda penampak mata panas.’ Maya nya mega, utai ke dipeda iya nyadi kabur lalu petang. Iya bejalai gama-gama ngiga orang ngiring iya.” f Nama nyadi pengudah nya? Bup Kudus madahka: “Pengudah gabenor ba endur nya meda utai ke nyadi, iya lalu arap laban iya balat alit ati enggau ajar ari Jehovah.”—SKR. 13:9-12.

8. Baka ni kitai ulih neladan pemerani Paul kemayaharitu?

⁸ Paul enda takutka Bar-Jesus. Penanggul ti sama mega ulih nyadi kemayaharitu. Sida ke ngelaban engka nguji ngelimpangka orang ke nunjukka minat ngagai pesan Perintah Petara. Tang, kitai enda patut takut ngagai sida. Endang amat, jaku kitai patut “seruran ngelantangka ati, baka pemakai ke dichampur garam.” (Kol. 4:6) Tang ba maya ti sama, kitai enggai nagang pemansang orang ke bisi minat ngagai Berita Manah ketegal deka nyeliah ari penanggul. Kitai mega enda patut takut nunjukka ajar pengarap pelesu nya salah. Tu ketegal, ajar ke baka nya “ngalihka jalai Jehovah ti bendar” baka ke kala digaga Bar-Jesus suba. (SKR. 13:10) Baka Paul, kitai patut berani madahka pemendar, lalu terus nulung sida ke bisi pengingin deka belajar mayuh agi. Bisi maya iya, sukung ari Petara engka enda terang dipeda. Tang kitai ulih pechaya, Jehovah deka terus ngena kuasa kudus Iya mai orang ngagai pemendar.—Jhn. 6:44.

9. Baka ni teladan Paul seduai Barnabas ulih nulung sida ke ngiring ba raban gempuru kemayaharitu?

⁹ Bisi ubah ti nyadi lebuh Paul seduai Barnabas mupuk ari Papos, lalu belayar ngagai Perga. Penyauh sida belayar nya kira-kira 250 kilometer. Surat Kereja Rasul 13:13 madahka: “Paul enggau bala kaban iya” ke belayar. Tu nunjukka, Paul ke ngiring pengawa sida. Taja pia, Bup Kudus nadai madahka Barnabas kepapaska Paul. Tang seduai iya terus bekerejasama enggau pangan diri kena ngereja peneka Petara. Nya alai, Paul seduai Barnabas ulih nyadi teladan ti manah ngagai sida ke ngiring ba raban gempuru kemayaharitu. Ari ke nguji deka bepekit enggau pangan diri, orang Kristian ti bendar patut ingat jaku Jesus ke madahka: “Semua kita diri menyadi magang.” Jesus mega madahka: “Barang sapa ke ngeninggika diri, deka dikemaruhka, lalu barang sapa ke ngemaruhka diri, deka ditinggika.”—Mat. 23:8, 12.

10. Padahka gaya pejalai sida ari Perga ngagai Pisidia ba Antiok.

¹⁰ Lebuh sida datai ba Perga, John Mark ninggalka Paul seduai Barnabas lalu pulai ngagai Jerusalem. Bup Kudus nadai madah pasal kebuah iya. Taja pia, Paul seduai Barnabas neruska pengawa sida lalu bejalai ari Perga nyentukka ngagai Antiok ba Pisidia, iya nya siti nengeri ba Galatia. Pejalai sida maya nya enda senang. Tu ketegal, peninggi Pisidia ba Antiok nya kira-kira 1,100 meter ari paras laut. Sida mega patut nengah jalai ti bebukit sereta mayuh perumpak. Ba maya nya mega, Paul bisi napi penanggul ba pengerai iya. g

11, 12. Baka ni Paul narit minat bala peninga iya lebuh bejaku ba balai gempuru di Antiok ba Pisidia?

¹¹ Ba Antiok di Pisidia, Paul seduai Barnabas ngagai balai gempuru maya Hari Sabat. Bup Kudus madahka: “Pengudah Adat enggau  Ajar Sida Nabi dibacha ba mua orang mayuh, bala tuai balai gempuru nganjung orang bejaku ngagai sida: ‘Bala menyadi, enti kita bisi jaku ti meransang, padahka meh ngagai semua orang ba ditu.’” (SKR. 13:15) Paul bediri lalu bejaku.

¹² Paul lalu berengkah ngangauka bala peninga iya: “Dinga kita, orang Israel enggau kita ke nangika Petara.” (SKR. 13:16) Maya nya, bisi mayuh orang Judah enggau orang ke megai pengarap Judah. Sida enda nemu pengawa Jesus dalam ngereja peneka Petara. Nyadi, baka ni Paul ulih narit minat sida iya? Keterubah, Paul ngelansa sejarah orang Israel. Iya nerangka baka ni Jehovah “ngeninggika sida lebuh sida diau nyadi orang asing ba menua Ejip.” Lalu, pengudah sida dilepaska ari menua Ejip, Paul mega madah, Petara “sabar enggau sida ba menua puang” pengelama 40 taun. Paul mega madah pasal sida ke nerima Menua ti Udah Disemaya, lalu pasal Jehovah “magi menua nya nyadika pesaka sida.” (SKR. 13:17-19) Maya nya, lebuh ngintu Hari Sabat, kesuah iya orang deka macha ayat Bup Kudus enggau nyawa ti inggar. Nya alai, sekeda orang ngumbai, Paul mega ngereja utai ti sama. Enti nya amat, tu nunjukka Paul nemu chara “nulung semua macham orang.”—1 Kor. 9:22.

13. Baka ni kitai ulih narit minat bala peninga kitai lebuh nginjil?

¹³ Kitai mega deka uji enggau naka ulih kena narit minat orang ke ditemu kitai ba pengawa nginjil. Ambika chunto, enti kitai nemu pengarap ke dipegai sesiku orang ke ditemu kitai, kitai ulih milih topik ke dikerinduka iya. Pia mega, kitai ulih nyebut sekeda ayat Bup Kudus ke ditemu peninga kitai nya. Manah agi enti kitai meransang orang nya macha ayat ari Bup  Kudus iya empu. Nya alai, giga meh mayuh macham chara ngambika ulih meransang peninga nuan deka belajar mayuh agi pasal Jehovah.

14. (a) Baka ni Paul madahka Berita Manah pasal Jesus, lalu nama jaku tangkan ke diberi iya ngagai bala orang mayuh? (b) Nama reaksi orang mayuh lebuh ninga utai ke disebut Paul?

¹⁴ Pengudah nya, Paul madahka baka ni garis peturun bala raja Israel mai ngagai siku ‘penyelamat, iya nya Jesus.’ Sebedau Jesus datai, bisi John Pemaptisa ngereja pengawa ti sama. Udah nya, Paul nerangka baka ni Jesus diukum bunuh lalu diangkatka ari mati. (SKR. 13:20-37) Rasul Paul mega madah: “Nya alai, bala menyadi, aku madah ngagai kita, Petara deka ngampunka dosa kita nengah lelaki tu. . . Barang sapa ke arap, deka dikumbai enda besalah.” Rasul Paul mega meri jaku tangkan tu ngagai bala peninga iya: “Bejimat meh ngambika utai ke disebut ba Ajar Sida Nabi tu enda nyadi ba kita, ‘Dinga kita, orang ke rindu ngelese. Kita deka iran ati lalu kita deka dibuai, laban taja pan bisi orang madah ngagai kita enggau silik pasal utai ke deka digaga Aku ba jeman kita, kita tentu enda arapka nya.’” Baka ni reaksi orang mayuh pengudah ninga jaku Paul? Bup Kudus madahka: “Orang mayuh minta seduai iya bejaku pasal pekara nya baru ba Hari Sabat ti deka datai.” Nambahka nya, pengudah randau sida ba balai gempuru udah abis, “mayuh orang Judah enggau orang ke megai pengarap Judah, ke nyembah Petara, nitihka Paul enggau Barnabas.”—SKR. 13:38-43.

15. Maya Hari Sabat ba minggu siti, nama nyadi pengudah Paul bejaku ba mua orang mayuh?

¹⁵ Maya Hari Sabat ba minggu siti, “nyauka semua orang ba nengeri nya” begelumu kena ningaka Paul. Taja pia, sekeda orang Judah enda rindu enggau utai ke nyadi. Sida “belabuh ngelaban jaku Paul.” Tang, Paul seduai Barnabas enggau berani madah ngagai sida: “Jaku Petara endang patut ditusui ngagai kita dulu. Tang ketegal kita enggai nerima jaku Petara, kita ngasuh diri empu enda layak nerima pengidup ti meruan belama iya. Nya alai, kami nguing ngagai bansa bukai. Laban tu meh pesan ke diberi Jehovah ngagai kami: ‘Aku udah milih nuan nyadi penampak ke bansa bukai lalu nuan deka mai penyelamat nyentuk ngagai ujung dunya.’”—SKR. 13:44-47; Isa. 49:6.

16. Nama reaksi orang Judah enggau utai ke disebut Paul seduai Barnabas, lalu nama utai ke digaga seduai iya lebuh disakal?

¹⁶ Orang bansa bukai ke ningaka Paul amat gaga ati, lalu “semua  orang ke bisi pengingin deka nengah jalai ke nuju ngagai pengidup ti meruan belama iya, lalu nyadi murid Jesus.” (SKR. 13:48) Enggau nya, jaku Jehovah ngerembai ba serata menua nya. Taja pia, reaksi orang Judah bebida ari orang bansa bukai. Kebendar iya, Paul seduai Barnabas madah ngagai orang Judah, taja pan pesan Berita Manah dulu agi dipadah ngagai bansa sida, tang sida milih deka nulak Messiah. Nya alai, Petara deka ngakim sida. Ketegal nya, orang Judah lalu ngasut bala pemerintah enggau bala indu ke tinggi pangkat. Lalu semua “sida belabuh merinsaka Paul enggau Barnabas, lalu muai seduai iya ari nengeri nya.” Nama utai ke digaga Paul seduai Barnabas? Sida ‘nesai debu ari kaki seduai iya, lalu udah nya, seduai iya mupuk ngagai Ikonium.’ Kati tu reti iya, pengarap Kristian ba Antiok di Pisidia udah nadai agi? Enda! Bala murid ke bisi ba dia “majak penuh laban pengaga ati sereta kuasa kudus Petara.”—SKR. 13:50-52.

17-19. Baka ni kitai ulih neladan Paul seduai Barnabas, lalu nama kebuah ngereja nya ulih nambahka pengaga ati kitai?

¹⁷ Kitai ulih belajar ari utai ke digaga Paul enggau Barnabas lebuh seduai iya disakal. Baka sida, kitai pan enda ngetu nginjil taja pan orang ke bekuasa ba dunya tu deka nagang pengawa nginjil kitai. Peratika mega, lebuh orang ba Antiok nulak pesan Berita Manah, Paul enggau Barnabas “nesai debu ari kaki seduai iya.” Paul enggau Barnabas enda ringat ngagai sida. Tang tu reti iya, seduai iya enda agi betanggungjawapka utai ke deka nyadi ngagai sida ba jemah ila. Paul seduai Barnabas sedar, seduai iya enda ulih ngawal reaksi orang lebuh ninga pasal Berita Manah. Tang seduai iya ulih milih neruska pengawa nginjil. Lalu Paul enggau Barnabas terus nginjil nyentukka seduai iya datai ba Ikonium!

¹⁸ Baka ni enggau bala murid ke bukai ba Antiok? Endang amat, orang ba endur sida kasar ngagai sida. Tang, pengaga ati sida enda bepanggai ba chara orang deka nerima Berita Manah. Jesus kala madah: ‘Gaga ati orang ke ninga sereta ngasika jaku Petara!’ (Luk. 11:28) Nya alai, bala murid ba Pisidia di Antiok nitihka jaku Jesus nya.

¹⁹ Baka Paul enggau Barnabas, ingat meh, kitai bisi tanggungjawap nginjil Berita Manah. Lalu bala peninga kitai bisi hak ngaga pemutus sekalika sida deka nerima Berita Manah tauka enda. Enti sida nulak pesan ke dibai kitai, belajar meh ari teladan bala murid ba abad keterubah. Enti kitai ngumbai pemendar nya amat berega, lalu ngelakka kuasa kudus ngiring kitai, kitai pan ulih gaga ati taja pan disakal.—Gal. 5:18, 22.