PELAJAR 21
“Aku Enda Besalah atas Pemati Semua Orang”
Paul ransing ba pengawa nginjil sereta jaku lalau iya ngagai bala tuai gempuru
Bepelasarka Surat Kereja Rasul 20:1-38
1-3. (a) Padahka utai ke nyadi ba malam Eutikus mati. (b) Nama digaga Paul, lalu nama ulih dipelajarka kitai pasal Paul ari utai ke nyadi ba malam nya?
PAUL ba siti bilik atas begulai enggau bala menyadi ba Troas. Tu meh malam ti penudi iya begulai enggau sida ba dia. Nya alai, iya mayuh bejaku enggau sida. Maya nya udah tengah malam. Bisi mayuh lampu kelita ba bilik nya, nyentukka bilik nya angat sereta kurang udara segar. Maya nya, bisi siku nembiak lelaki, iya nya Eutikus duduk ba siti jenila di bilik nya. Lebuh Paul benung bejaku, Eutikus telelap tinduk lalu labuh ari tingkat tiga!
2 Ketegal Luke siku lutur, iya engka jampat pansut kena meresa gaya Eutikus. Tang, maya nya Eutikus “udah mati.” (SKR. 20:9) Taja pia, bisi kereja ajih ti ngalitka ati nyadi. Paul ningkapka diri ba atas Eutikus lalu merap iya. Udah nya, Paul madahka: “Anang tusah ati. Iya udah idup baru.” Paul ngangkatka Eutikus idup baru!—SKR. 20:10.
3 Utai ke nyadi malam nya nunjukka pemesai kuasa ari kuasa kudus Petara. Paul enda besalah ketegal pemati Eutikus. Taja pia, Paul enggai pemati Eutikus ngachau pengawa ti penting malam nya, tauka ngasuh orang bukai labuh ba pengarap. Ketegal Paul ngangkatka Eutikus idup baru, bala menyadi tentu berasai lantang ati sereta diperansang neruska pengawa nginjil. Utai ke nyadi ba malam nya terang nunjukka, Paul beberatka nyawa orang. Kitai tentu agi ingatka jaku Paul ke madahka: “Aku enda besalah atas pemati semua orang.” (SKR. 20:26) Nya alai, aram kitai bejuraika baka ni teladan Paul ulih nulung kitai ba senentang tu.
Iya “Mupuk Ngagai Masedonia” (Surat Kereja Rasul 20:1, 2)
4. Nama pengalaman ti enda manah ke kala ditapi Paul?
4 Baka ke udah dikerandauka ba pelajar sebedau tu, Paul kala napi pengalaman ti enda manah ba Epesus. Pengawa nginjil iya udah ngasuh orang ba dia begau. Nambahka nya, bala tukang pirak ke ngulihka untung ari pengawa nyembah petara Artemis mega sama enggau orang begau! Nama nyadi pengudah nya? Surat Kereja Rasul 20:1 madah: “Pengudah orang nyau enda entu agi begau, Paul ngangauka bala murid, lalu meransang sida. Udah nya, iya meri selamat tinggal, lalu mupuk ngagai Masedonia.”
5, 6. (a) Berapa lama Paul diau ba Masedonia, lalu nama digaga iya enggau bala menyadi ba dia? (b) Nama ulah ke diayanka Paul ngagai bala menyadi Kristian iya?
5 Ba pejalai ngagai Masedonia, Paul ngetu ba Troas lalu diau dia enda lama. Paul ngarapka diri ulih betemu enggau Titus ba Troas. Tang ba maya ti sama, Titus udah dianjung ngagai Korint. (2 Kor. 2:12, 13) Nyadi maya nya, Titus enda datai betemu enggau Paul. Ketegal nya, Paul mupuk ke Masedonia lalu diau ba din kira-kira setaun. Ba dia, Paul “meransang bala murid.” a (SKR. 20:2) Pengujung iya, Titus betemu enggau Paul ba Masedonia. Titus mai berita ti manah pasal reaksi bala menyadi ba Korint pengudah nerima surat Paul ti keterubah. (2 Kor. 7:5-7) Nya alai, Paul deka nulis siti agi surat ngagai sida. Surat nya dikumbai 2 Korint.
6 Lebuh Paul ngabas bala menyadi ba Epesus enggau Masedonia, Luke mayuh ngena leka jaku “diperansang” sereta “meransang.” Leka jaku nya nunjukka ulah ke diayanka Paul ngagai bala menyadi Kristian ba Epesus sereta Masedonia. Tu terang nunjukka Paul amat sayauka bala menyadi Kristian iya! Paul nunjukka ulah ti bebida ari orang Parisi, laban sida suah ngemaruhka orang bukai. Tang ba Paul, bala menyadi Kristian nya orang ke sama begulai gawa enggau iya. (Jhn. 7:47-49; 1 Kor. 3:9) Bisi maya iya, Paul patut meri jaku lalau ti berat ngagai bala menyadi. Tang, Paul tetap ngetanka ulah iya ti manah lebuh begulai enggau bala menyadi.—2 Kor. 2:4.
7. Baka ni bala menyadi lelaki ke ngiring kemayaharitu ulih nunda teladan Paul?
7 Kemayaharitu, bala tuai gempuru enggau tuai ti ngabas bebendar nunda teladan Paul. Bisi maya iya, sida patut meri jaku lalau ngagai bala menyadi. Tang, sida ngereja nya laban deka ngeringka pengarap bala menyadi ke begunaka bantu. Bala menyadi lelaki ke ngiring bebendar nunjukka penyiru enggau chara meransang bala menyadi Kristian. Sida mega enda nganu bala menyadi Kristian. Siku tuai ti ngabas ke mayuh pengalaman madahka: “Mayuh menyadi Kristian kitai deka ngereja utai ti betul. Taja pia sida engka asa ati, takut, sereta nadai daya deka nulung diri empu.” Nya alai, bala menyadi lelaki ke ngiring patut ngeringka bala menyadi ke baka tu.—Heb. 12:12, 13.
“Ngiga Chara Kena Munuh Iya” (Surat Kereja Rasul 20:3, 4)
8, 9. (a) Nama utai ke ngachau pelan Paul ke deka belayar ngagai Siria? (b) Nama kebuah orang Judah bedendam enggau Paul?
8 Ari Masedonia, Paul ngagai Korint. b Pengudah Paul diau ba dia pengelama tiga bulan, iya keran deka mupuk ngagai Kenkria. Nyadi, iya ngaga pelan deka ngena kapal ngagai Siria. Ari Siria, iya ulih ngagai Jerusalem kena nganjung duit pemeri ngagai bala menyadi ke begunaka bantu. c (SKR. 24:17; Rom. 15:25, 26) Taja pia, bisi utai ke nyadi ke ngasuh Paul ngubah pelan iya. Nama nya? Surat Kereja Rasul 20:3 madahka: “Orang Judah ngiga chara kena munuh iya”!
9 Orang Judah bedendam enggau Paul laban sida ngumbai iya orang ke limpang ari pengarap. Sebedau tu, pengawa nginjil Paul udah ngasuh Krispus nyadi orang Kristian. Lalu Krispus siku orang ti tebilang ba balai gempuru di Korint. (SKR. 18:7, 8; 1 Kor. 1:14) Pia mega, orang Judah ba Korint kala nuduh Paul ba mua Galio, iya nya gabenor Akaya. Tang, Galio nutup kes nya laban orang Judah nadai bukti kena nyukung jaku tuduh sida. Pemutus Galio ngasuh bala munsuh Paul balat amat ringat. (SKR. 18:12-17) Maya nya, orang Judah ba Korint engka nemu, tauka ngumbai Paul deka belayar ari Kenkria. Nya alai, sida ngaga pelan deka nyerang Paul ba dia. Nama deka digaga Paul?
10. Kati Paul enggai datai ke Kenkria laban iya takut? Terangka.
10 Paul deka nyaga pengelikun diri sereta nyaga duit pemeri ke deka dibai iya ngagai Jerusalem. Nya alai, Paul milih enda ngagai Kenkria, tang mupuk baru ngagai Masedonia. Endang amat, pejalai ba darat pan bedau tentu selamat. Maya jeman nya suba, bala perumpak suah bisi ba rantau jalai. Pia mega, rumah numpang pan enda selamat. Taja pia, Paul sanggup ngambi risiko bejalai nengah semua nya ari ke betemu enggau bala munsuh iya ba Kenkria. Maya nya, Paul enda bejalai kediri laban bisi bala menyadi enggau iya, iya nya Aristarkus, Gaius, Sekundus, Sopater, Timoti, Tropimus, sereta Tikikus.—SKR. 20:3, 4.
11. Kemayaharitu, nama utai ke digaga orang Kristian kena nyaga pengelikun diri, lalu nama teladan ke ditunjukka Jesus ba senentang tu?
11 Baka Paul, orang Kristian kemayaharitu bebendar deka nyaga pengelikun diri empu lebuh nginjil. Ba sekeda endur, sida nginjil nitihka raban, tauka paling kurang pan mesti bisi 2 iku sama bejalai ba sesiti endur. Tang, baka ni enti bisi orang merinsaka kitai? Kitai sedar pekara tu enda ulih diseliahka. (Jhn. 15:20; 2 Tim. 3:12) Taja pia, kitai enggai sengaja ngereja utai ti ulih nganu nyawa kitai empu. Ba senentang tu, peratika teladan Jesus. Bisi sekali, orang ke ngelaban ba Jerusalem berengkah ngambi batu laban deka nuku Jesus ngena batu. Maya nya “Jesus belalai lalu pansut ari Rumah Sembiang.” (Jhn. 8:59) Udah nya, lebuh orang Judah ngaga pelan deka munuh iya, “Jesus enda agi ngayanka diri ba mua orang Judah lebuh iya bejalai. Tang iya mupuk ari endur nya ngagai . . . menua puang.” (Jhn. 11:54) Jesus ngiga chara kena nyaga pengelikun diri empu. Iya ngereja nya seagi-agi pengawa ke digaga iya enda ngelanggar peneka Jehovah. Nya alai, orang Kristian kemayaharitu patut ngereja utai ti sama.—Mat. 10:16.
Sida “Berasai Lantang Amat” (Surat Kereja Rasul 20:5-12)
12, 13. (a) Nama asai ati bala menyadi pengudah Eutikus diangkatka idup baru? (b) Nama harapan ari Bup Kudus ke ulih ngelantangka ati sida ke udah lenyau orang ke dikesayau?
12 Paul enggau bala ke enggau iya sama bejalai nengah Masedonia, lalu udah nya sida iya bepechah. Taja pia, sida betemu baru ba Troas. d Bup Kudus madahka: “Lima hari udah nya, kami betemu enggau sida ba Troas.” e (SKR. 20:6) Baka ke udah dipadah ba pun tadi, Eutikus diangkatka idup baru ba Troas. Uji gambarka asai ati bala menyadi Kristian lebuh sida meda Eutikus diangkatka idup baru! Baka ke dipadah ba ayat 12, sida “berasai lantang amat.”—SKR. 20:12.
13 Kemayaharitu, nadai kereja ajih kena ngangkatka orang ari mati. Taja pia, sida ke lenyau orang dikesayau ulih “berasai lantang amat,” laban Bup Kudus madahka harapan pasal pengangkat ari mati. (Jhn. 5:28, 29) Maya nya, Eutikus enda sempurna. Nya alai, iya tentu deka mati sekali agi. (Rom. 6:23) Tang, orang ke diangkatka idup baru ba Paradais ulih idup belama iya! Lalu, sida ke bisi peluang sama merintah enggau Jesus ba serega ke diangkatka idup baru deka diberi tubuh ti enda nemu mati. (1 Kor. 15:51-53) Ketegal nya, semua orang Kristian kemayaharitu enda ngira sida ke dipilih ke serega, tauka “bedus ti bukai” ulih “berasai lantang amat” ati.—Jhn. 10:16.
“Ba Mua Orang Mayuh sereta ari Rumah ke Rumah” (Surat Kereja Rasul 20:13-24)
14. Nama dipadah Paul ngagai bala tuai gempuru ari Epesus lebuh betemu enggau sida ba Miletus?
14 Paul enggau sida ke enggau iya mupuk ari Troas ngagai Asos. Udah nya, sida mupuk ngagai Mitilin, Khios, Samos, sereta Miletus. Kebendar iya, Paul deka ngagai Jerusalem ba maya Pengerami Pentikos. Nya alai ba pejalai pulai ke Jerusalem, Paul nepan kapal ke enda sangkai ba Epesus. Tang ketegal Paul deka bejaku enggau bala tuai gempuru ari Epesus, iya minta sida betemu enggau iya ba Miletus. (SKR. 20:13-17) Lebuh bala tuai gempuru ari Epesus datai ba Miletus, Paul madah ngagai sida: “Kita empu nemu, baka ni gaya pengidup aku sekumbang aku begulai enggau kita, kenyau ari keterubah iya aku datai ba Asia. Aku seruran gawa nyadi ulun Tuan enggau ati ti baruh. Aku gawa enggau ai mata lalu balat merinsa, ketegal orang Judah bebendar ngiga chara kena munuh aku. Aku enda nagang diri madah ngagai kita pasal semua pekara ke meri penguntung ngagai kita tauka ngajar kita ba mua orang mayuh sereta ari rumah ke rumah. Tang aku meri saksi enggau silik ngagai orang Judah enggau ngagai orang Gerika, pasal sida ke patut nesal ati nyembah Petara sereta arapka Tuan kitai, Jesus.”—SKR. 20:18-21.
15. Nama sekeda penguntung ke diulih ketegal nginjil ari rumah ke rumah?
15 Kemayaharitu, bisi mayuh chara nusui Berita Manah ngagai orang. Baka Paul, kitai ngagai endur ke bisi mayuh orang. Ambika chunto, ba endur nganti bas, ba rantau jalai sereta ba pasar. Tang, nginjil ari rumah ke rumah nya chara utama ke agi digaga Saksi-Saksi Jehovah. Nama kebuah? Pengawa nginjil ari rumah ke rumah meri mayuh peluang ngagai semua orang ngambika sida selalu ulih ningaka pesan pasal Perintah Petara. Pengawa tu nunjukka Petara enda bepilih mata. Pia mega, tu nulung orang ngambika ulih nerima bantu ke diguna sida. Nambahka nya, pengawa nginjil meri penguntung ngagai semua penginjil. Tu ketegal, pengawa nginjil nulung negapka pengarap sereta nulung kitai terus nginjil enggau liat ati. Endang amat, pengawa nginjil “ba mua orang mayuh sereta ari rumah ke rumah” nyadi tanda ti nunjukka kitai orang Kristian ti bendar.
16, 17. Baka ni Paul nunjukka pemerani, lalu baka ni orang Kristian kemayaharitu nunda teladan Paul?
16 Paul madah ngagai bala tuai gempuru ari Epesus, iya enda nemu nama utai ke deka ngagai iya ba Jerusalem. Ku Paul, “Taja pia, nyawa aku enda berega. Tang utai ke berega agi nya, aku ulih belanda nyentukka ujung sereta nembuka pengawa ari Tuan Jesus, iya nya pengawa meri saksi enggau silik pasal Berita Manah ke bekaul enggau pemanah ati Petara ti besai.” (SKR. 20:24) Paul amat berani. Iya enggai nejuka nama-nama utai, nyengkaum penyakit sereta sakal ari orang nagang iya nembuka pengawa nginjil iya.
17 Orang Kristian kemayaharitu mega napi mayuh macham penusah. Ambika chunto, sekeda perintah nagang pengawa Kristian kitai, lalu balat nyakal sereta merinsaka bala menyadi kitai. Sekeda menyadi mega balat sakit, lalu sekeda ari sida sakit ari segi emosi. Kelimpah ari nya, bala nembiak napi tekanan ari bala ke serambau ba sekula. Enda ngira nama-nama penusah ke ditapi, semua bala menyadi deka mengkang tegap baka Paul. Sida deka terus “meri saksi enggau silik pasal Berita Manah.”
“Jaga Diri Empu sereta Raban Bedus Petara” (Surat Kereja Rasul 20:25-38)
18. Nama kebuah Paul enda besalah atas pemati semua orang, lalu baka ni bala tuai gempuru ari Epesus ulih nunda Paul?
18 Paul meri jaku lalau enggau terus terang ngagai bala tuai gempuru ari Epesus. Iya madahka teladan diri empu lebuh bejaku enggau sida. Terubah iya, Paul madahka engka nya kali ti penudi sida ulih betemu enggau iya. Udah nya, iya madahka: “Aku enda besalah atas pemati semua orang. Aku enda nagang diri ari madah ngagai kita pasal semua tuju Petara.” Baka ni bala tuai gempuru ari Epesus ulih nunda teladan Paul ngambika enda besalah atas pemati semua orang? Paul madah ngagai sida chara iya: “Jaga diri empu sereta raban bedus Petara, laban kita udah dipilih kuasa kudus Petara kena ngibun raban gempuru Iya baka siku pengibun bedus. Sida udah dibeli Iya ngena darah Anak Iya Empu.” (SKR. 20:26-28) Pia mega, Paul meri jaku tangkan pasal “serigala ti mangah” ke deka tama ngagai raban gempuru orang Kristian, lalu “nyebut pasal ajar ti tesat ke ngasuh bala murid limpang lalu nitihka sida.” Nama patut digaga bala tuai gempuru nya? Paul nangkan sida: “Seruran bejaga. Anang enda ingat, pengelama tiga taun, siang enggau malam, aku enda ngetu meri jaku ajar ngagai tiap iku kita enggau ai mata.”—SKR. 20:29-31.
19. Nama ajar ti limpang ari pengarap ke majak dikerembaika ba pengujung abad keterubah, lalu nama kesan iya ngagai abad ke bukai?
19 Ba pengujung abad keterubah, “serigala ti mangah” tama ngagai raban gempuru Kristian. Kira-kira ba taun 98 M., rasul John nulis: “Munsuh Kristus udah mayuh; . . . Sida udah ninggalka kitai laban sida ukai bala kitai. Enti sida bala kitai, sida tentu terus begulai enggau kitai.” (1 Jhn. 2:18, 19) Ba abad ketiga, raban orang ke limpang ari pengarap nyadi pengajar ke ngiring ba gerija. Lalu ba abad keempat, sida diiktiraf secara rasmi laban Raja Besai Constantine nerima sida, lalu ngumbai sida “Kristian.” Sida ngaga adat orang kapir nyadi pengarap “Kristian.” Enggau tu, bala tuai pengarap gerija “nyebut pasal ajar ti tesat.” Nyentukka kemayaharitu, kesan ari ajar ti limpang agi ulih dipeda nengah ajar sereta adat ke digaga orang gerija.
20, 21. Baka ni Paul nunjukka diri enda berundingka diri empu aja, lalu baka ni bala tuai gempuru Kristian kemayaharitu ulih ngereja utai ti sama?
20 Chara pengidup Paul amat bebida enggau bala tuai pengarap kemayaharitu. Bala tuai pengarap ngambi ulih ba nembiak sida. Tang, Paul bebendar gawa ngambika ulih ngidupka diri empu. Enggau nya, iya enda nating bala menyadi ba raban gempuru. Paul bebendar deka nulung bala menyadi Kristian, tang tuju iya ukai deka ngulihka penguntung ke diri empu. Nya alai, Paul meransang bala tuai gempuru ari Epesus ngayanka ulah ti sama. Ku Paul madah ngagai sida: “Kita mega patut bebendar gawa ngambika nulung sida ke lemi. Kingatka jaku Tuan Jesus: ‘Orang ke meri deka gaga agi ati ari orang ke nerima.’”—SKR. 20:35.
21 Baka Paul, bala tuai gempuru kemayaharitu nunjukka ulah ti enda berundingka diri empu. Kemayaharitu, bala tuai pengarap gerija ngambi ulih ari orang ke nitihka sida. Tang, bala tuai gempuru enda baka nya. Petara meri tanggungjawap ngagai bala tuai gempuru kena ngibun bala menyadi Kristian. Lalu, Iya deka sida ngereja pengawa sida enggau enda berundingka diri empu. Nadai orang ulih nyadi sumbung tauka bisi pengingin deka nyadi orang ti penting ba raban gempuru. Nyau kelama, orang ke “kelalu balat minta puji” deka labuh ba pengarap. (J-lam. 25:27) Penyumbung deka mai ngagai pengujung ti ngemaluka diri empu.—J-lam. 11:2.
“Semua sida bendar amat nyabak.”—Surat Kereja Rasul 20:37
22. Nama kebuah bala tuai gempuru ari Epesus amat sayauka Paul?
22 Bala menyadi Kristian amat sayauka Paul laban pengerindu iya ti dalam ngagai sida. Lebuh Paul deka mupuk, “semua sida bendar amat nyabak lebuh sida merap lalu nyium Paul.” (SKR. 20:37, 38) Kemayaharitu, bala menyadi Kristian mega amat beterima kasih sereta sayauka menyadi ke baka Paul, ke sanggup meri awak, pengering sereta bekunsika utai ti dikemisi sida enggau orang bukai. Kitai udah beratika teladan Paul. Nya alai, kitai tentu setuju Paul enda nunjukka diri sumbung tauka minta diri dipuji lebuh iya madahka: “Aku enda besalah atas pemati semua orang.”—SKR. 20:26.
a Peda kutak “ Surat Paul ari Masedonia.”
b Engka lebuh Paul ba Korint maya nya, iya nulis surat ngagai orang Kristian ba Rome.
c Peda kutak “ Paul Nganjung Duit Pemeri.”
d Luke ngena leka jaku “kami” ba Surat Kereja Rasul 20:5, 6. Tu ketegal, Luke enggau Paul betemu baru ba Pilipi. Sebedau nya, Luke diau enda lama ba Pilipi.—SKR. 16:10-17, 40.
e Pejalai ari Pilipi ngagai Troas ngambi masa lima hari, engka ketegal bisi ribut. Sebedau tu, pejalai nya semina ngambi masa dua hari aja.—SKR. 16:11.
