1, 2. (a) Nama bahaya ke ditapi Paul enggau bala kaban iya ba Epesus? (b) Nama deka dikerandauka kitai ba pelajar tu?

 PENYARUT ti besai nyadi ba Epesus! Bisi seraban besai orang deka nyerang Paul enggau bala kaban iya. Orang mayuh udah nangkap sereta ngirit dua iku kaban Paul. Pia mega, semua kedai ba Epesus nyadi kusung, laban orang mayuh beguai-guai ngagai stadium nitihka seraban orang ke pengachau nya. Stadium di Epesus amat besai, laban 25,000 orang ulih tama kia. Mayuh orang enda nemu nama kebuah penyarut nya nyadi. Tang sida engka ngumbai penanggul nya bisi kaul enggau petara indu Artemis. Nya alai sida balat manjung madahka: “Muliaka meh Artemis, petara orang Epesus!”—SKR. 19:34.

² Sekali agi, Sitan ngena orang mayuh ke nyadi pengachau ngetuka pengawa nginjil Berita Manah. Tang Sitan mega ngena chara bukai ngetuka pengawa nginjil. Ba pelajar tu, kitai deka berandauka beberapa iti chara ke dikena Sitan ngetuka pengawa nginjil, sereta ngachau penyerakup orang Kristian ba abad keterubah. Tang semua chara Sitan enda mujur, laban “enggau chara ti ngalitka ati, jaku Jehovah majak ngelekai sereta majak bekuasa.” (SKR. 19:20) Nama kebuah orang Kristian ba abad keterubah ulih mujur? Iya ke amat, Jehovah meh ke udah mujur mutarka semua penanggul. Utai ti sama mega nyadi ba kitai kemayaharitu. Ba senentang tu, kitai patut ngereja sekeda utai baka ke digaga orang Kristian ba abad keterubah. Enggau bantu ari kuasa kudus Jehovah, kitai ulih ngemansangka sifat manah ke ulih nulung ngemujurka agi pengawa nginjil. Aram meh kitai belajar ari teladan Apollos.

3, 4. Nama utai ti kurang ke bisi diperatika Akuila enggau Prisila ba Apollos, lalu nama digaga seduai iya kena nulung Apollos?

³ Paul benung ba pejalai nginjil iya ti ketiga nuju ngagai Epesus. Ba maya ti sama, Apollos ke bebansa Judah udah datai ba Epesus.  Iya datai ari Aleksandria, siti nengeri ti tebilang ba Ejip. Bisi mayuh pemanah ba Apollos. Ambika chunto, iya ulih bejaku enggau lanchar. Kelimpah ari nya, ‘iya amat meretika ayat Bup Kudus,’ sereta bisi “bantu ari kuasa kudus Petara.” Apollos ransing sereta berani bejaku ngagai orang Judah ba balai gempuru.—SKR. 18:24, 25.

⁴ Akuila enggau Prisila ningaka utai ke diajar Apollos. Seduai iya tentu gaga ati ninga Apollos ngajar “utai ti betul pasal Jesus.” Semua ke dipadahka Apollos pasal Jesus betul magang. Tang, Akuila enggau Prisila beratika penemu Apollos bisi kurang laban “iya semina nemu pasal baptisa John.” Taja pia, Akuila enggau Prisila orang ke biasa aja ke ngaga langkau kain, tang Apollos orang ti bepelajar sereta lanchar bejaku. Kati seduai iya takut deka nulung Apollos? Enda. Bup Kudus madahka: “Prisila enggau Akuila mai iya enggau seduai iya, lalu nerangka jalai Petara ti betul agi ngagai iya.” (SKR. 18:25, 26) Apollos baruh ati nerima bantu ari Akuila enggau Prisila. Iya ke amat, pemaruh ati amat penting, lalu nya siti sifat ke patut dikemansangka orang Kristian.

5, 6. Nama kebuah Apollos beguna ba Jehovah, lalu nama ulih dipelajarka kitai ari teladan Apollos?

⁵ Apollos nerima bantu ari Akuila enggau Prisila. Nya alai, iya ulih gawa mayuh agi ke Jehovah. Iya ngagai Akaya lalu “mayuh nulung” bala menyadi ba dia. Orang Judah ba Akaya bekeras madahka Jesus ukai Messiah ke disemaya. Tang, Apollos mujur meri saksi ti manah ngagai sida. Luke madahka: “Enggau ati ti ransing, iya mantaika bukti ti terang ngagai orang mayuh ke nunjukka utai ke diajar orang Judah nya salah. Iya mandangka ayat Bup Kudus ngagai sida kena nunjukka Jesus nya Kristus.” (SKR. 18:27, 28) Apollos nyadi berekat ngagai mayuh orang ba abad keterubah! Kebendar iya, Apollos nyadi siti ari kebuah “jaku Jehovah” majak dikerembaika. Nama ulih dipelajarka kitai ari teladan Apollos?

⁶ Orang Kristian patut baruh ati. Tiap iku kitai nerima pemeri ti enda sama ari Petara. Nya alai, semua kitai bisi pengelandik, pengalaman tauka penemu ti enda sebaka. Tang, kitai mesti nentuka pemaruh ati kitai tampak agi ari pengelandik kitai. Enti enda bejimat, pengelandik kitai ulih nyadi pengelemi kitai. Tu ketegal, pengelandik ulih ngasuh kitai temegah sereta sumbung. (1 Kor. 4:7; Jas. 4:6) Enti kitai baruh ati, kitai deka ngumbai orang bukai manah agi ari kitai. (Plp. 2:3) Ketegal nya, kitai deka nerima jaku lalau sereta sanggup diajar orang bukai. Enti sema penemu kitai enda sejalai enggau iring kuasa kudus, kitai enggai bekeras enggau penemu diri empu. Seagi-agi kitai baruh ati, kitai deka nyadi beguna agi ngagai Jehovah enggau Jesus.—Luk. 1:51, 52.

7. Baka ni Paul enggau Apollos netapka teladan ti manah nunjukka pemaruh ati?

 ⁷ Pemaruh ati nulung kitai ngambika enda bepekit enggau orang bukai. Sitan keran deka ngachau penyerakup orang Kristian ba abad keterubah. Nama kebuah? Tu ketegal Apollos enggau Paul sama-sama ransing. Uji perundingka: Nama deka nyadi enti Paul enggau Apollos bepekit sereta chemburu enggau pangan diri? Enti pia, seduai iya engka nguji deka nyadi orang ke pemadu penting ba raban gempuru. Enti utai tu amat nyadi, Sitan tentu gaga ati! Kebendar iya, amat mudah seduai iya ulih bepekit enggau pangan diri. Laban ba raban gempuru Korint, sekeda menyadi madah, “Aku nitihka Paul.” Bisi mega madah, “Aku nitihka Apollos.” Tang kati Paul enggau Apollos meransang ulah ti bepechah-belah? Enda! Paul enggau baruh ati ngaku utai ke digaga Apollos kena ngemansangka pengawa nginjil. Pia mega, Paul meri Apollos peluang istimewa ke bukai, lalu Apollos baruh ati nitihka iring Paul. (1 Kor. 1:10-12; 3:6, 9; Tit. 3:12, 13) Teladan Paul enggau Apollos ti bekerejasama enggau baruh ati nyadi teladan ti manah ke kitai kemayaharitu!

8. Ni jalai ke dikena Paul lebuh iya pulai baru ke Epesus, lalu nama kebuah?

⁸ Paul udah semaya deka pulai baru ke Epesus, lalu iya ngamatka semaya iya. a (SKR. 18:20, 21) Peratika baka ni iya pulai baru ngagai Epesus. Kali ke penudi kitai bisi berandau pasal Paul, iya agi ba Antiok di Siria. Kena datai ba Epesus, iya ulih ngena jalai ke lebih pandak agi. Iya ulih ngagai Seleusia, lalu ulih nepan kapal ari endur nya. Udah nya, iya ulih belayar terus ke Epesus. Tang iya enda ngereja nya. Kebendar iya, Paul “nengah jalai ke jauh ari tebing tasik.” Pejalai Paul ke ditulis ba Surat Kereja Rasul 18:23 ngagai 19:1 kira-kira 1,600 kilometer! Nama kebuah Paul milih jalai ti tusah? Laban iya bisi siti tuju, iya nya “ngeringka pengarap semua murid Jesus.” (SKR. 18:23) Semua pejalai nginjil Paul enda senang. Tang ba iya, semua nya enda lebu ngapa. Kemayaharitu, tuai ti ngabas enggau bini sida mega nunjukka pengeransing ti sama baka Paul. Endaka kitai beterima kasihka pengerindu sida ti enda berundingka diri empu?

9. Nama kebuah seraban murid dibaptisa kali kedua, lalu nama ulih dipelajarka kitai ari sida?

⁹ Lebuh Paul datai ba Epesus, iya betemu enggau seraban murid John Pemaptisa. Sida dibaptisa dibaruh atur John Pemaptisa. Tang atur nya enda agi dititihka orang Kristian ba abad keterubah. Sida murid tu langsung enda nemu, tauka bisi penemu ti kurang pasal kuasa kudus. Nya alai, Paul madahka sida patut dibaptisa dalam nama Jesus.  Baka Apollos, seraban murid tu nunjukka pemaruh ati. Pengudah dibaptisa dalam nama Jesus, sida nerima kuasa kudus sereta pemeri ke bukai. Nama ulih dipelajarka kitai ari bala murid tu? Pengawa ke dikereja Jehovah ba gerempung suah mansang. Enti kitai nitihka atur teokratik ari Jehovah, kitai deka nerima mayuh berekat.—SKR. 19:1-7.

10. Nama kebuah Paul ngubah endur iya nginjil ari balai gempuru ngagai diwan sekula, lalu nama ulih dipelajarka kitai ari teladan Paul?

¹⁰ Bisi siti agi teladan manah Paul ke bukai ba pengawa nginjil. Iya udah nginjil enggau berani ba balai gempuru pengelama tiga bulan. Iya udah “besilih penemu enggau orang ngambika sida andalka Perintah Petara.” Tang agi bisi sida ke kieh sereta nyakal pengawa Paul. Ketegal nya, Paul enda muai masa enggau sida ti “nyebut utai ti jai pasal Jalai Tuan.” Nyadi, Paul ngaga atur kena nginjil ba diwan sekula. (SKR. 19:8, 9) Sida ti deka ngaga pemansang ba pengarap patut nitihka Paul mindah ari balai gempuru ngagai diwan sekula. Baka Paul, kitai enggai neruska randau enggau orang ke enggai ninga tauka sengaja deka bekelikuh enggau kitai. Agi bisi mayuh orang ke baruh ati deka ningaka Berita Manah!

11, 12. (a) Baka ni Paul netapka teladan ti manah ngayanka pemagas sereta nelebaka diri nitihka situasi orang? (b) Baka ni Saksi-Saksi Jehovah nunjukka pemagas sereta nelebaka diri nitihka situasi orang ba pengawa nginjil?

¹¹ Paul engka bejaku ba diwan sekula tiap hari berengkah ari kira-kira pukul 11 pagi nyentuk ngagai pukul 4 lemai. (SKR. 19:9) Maya nya, mayuh orang ngetu gawa kena makai sereta belelak enda lama. Tang, timpuh nya mega maya ti pemadu angat dalam sehari. Enti Paul ngereja utai tu pengelama dua taun, iya engka ngena 3,000 jam ngajar orang. b Pengawa Paul ke baka tu pan udah nulung jaku Jehovah majak ngerembai. Tu  nunjukka, Paul bagas sereta nemu nelebaka diri nitihka situasi orang ba pengawa nginjil. Iya ngatur jadual ngambika ulih nitihka utai ke diguna orang ba endur nginjil. Nama asil iya? “Semua orang ba Asia, enda ngira orang Judah tauka orang Gerika, ninga jaku Petara.” (SKR. 19:10) Iya udah meri saksi enggau silik!

¹² Saksi-Saksi Jehovah kemayaharitu mega bagas sereta nelebaka diri nitihka situasi orang. Kelimpah ari nya, kitai deka ngiga orang, enda ngira dini endur sida ulih ditemu. Ambika chunto, kitai nginjil ba rantau jalai, pasar sereta endur parking kerita. Kitai ngena talipun tauka nulis surat lebuh kitai nginjil. Nambahka nya, lebuh nginjil ari rumah ke rumah, kitai nguji deka nginjil ba maya mayuh orang bisi ba rumah.

13, 14. (a) Jehovah ngasuh Paul ngereja nama? (b) Nama penyalah ke digaga bala anak lelaki Skeba, baka ni ke orang ba gerija kemayaharitu ngereja penyalah ti sama?

¹³ Luke madahka pengawa nginjil Paul mai asil ti manah. Nama kebuah? Jehovah ngasuh Paul ulih “ngaga pengawa ajih ti ngalitka ati.” Chunto iya, lebuh kain enggau perecha Paul dibai ngagai orang ke sakit, sida ulih digeraika sereta muru bala melikat ti jai pansut ari orang ke dirasuk. c (SKR. 19:11, 12) Pemujur kereja ajih Paul ngasuh orang meda kuasa Sitan majak alah. Tu udah narit minat mayuh orang. Tang, ukai semua orang ke tetarit bisi tuju ati ti manah.

¹⁴ Pengudah meda kereja ajih Paul, bisi orang nguji niru nya. Bup Kudus madahka “sekeda orang Judah ke bejalai ba serata endur” muru melikat ti jai. Sekeda ari sida nguji muru melikat ti jai enggau nyebut nama Jesus sereta Paul. Ambika chunto, Luke madah pasal tujuh iku anak lelaki tuai imam orang Judah ke benama Skeba. Sida tujuh iku tu nguji nitihka kereja ajih Paul. Tang melikat ti jai madah ngagai sida: “Aku ngelala Jesus. Aku mega ngelala Paul. Tang kita tu, sapa deh?” Udah nya, orang ke dirasuk nya nyerang sida ke tujuh iku nya. Lelaki ke dirasuk  nya merejuk ngagai sida baka jelu, lalu ngasuh sida rari lintang-pukang nyentukka sida nyau telanjai-lanjai sereta bakal. (SKR. 19:13-16) Tu meh pemenang ti besai ke “jaku Jehovah.” Tu terang nunjukka kuasa Paul datai ari Jehovah, lalu orang bukai langsung nadai kuasa. Endaka nya nunjukka bisi bida ti besai entara sida? Kemayaharitu, bejuta orang ngumbai, semina ngangauka nama Jesus tauka ngaku diri “Kristian” udah chukup. Taja pia, Jesus madahka semina orang ke ngereja peneka Apai iya deka nerima harapan ti bendar ba jemah ila.—Mat. 7:21-23.

15. Baka ni kitai ulih nunda teladan orang Epesus bekaul enggau pengawa magik sereta perengka ke bisi kaul enggau bala melikat ti jai?

¹⁵ Pengudah tujuh iku bala anak lelaki Skeba dikemaluka, majak mayuh orang bisi asai takut ke Petara. Ketegal nya, mayuh orang ba Epesus ninggalka pengawa magik, lalu nyadi orang ke arap. Ba pengidup mayuh orang Epesus, sida biasa ngereja pengawa magik. Maya nya, pengawa jampi enggau nyimpan perengka jimat, tauka pengaruh nyadi utai ti biasa ba orang Epesus. Semua leka jampi sida suah ditulis ba bup tauka keretas. Pengudah nemu pemendar, mayuh orang Epesus nunu bup sida ke bekaul enggau pengawa magik ba mua orang mayuh. Kebendar iya, semua rega bup tu amat mar. d Ba senentang tu, Luke nulis: “Jaku Jehovah majak ngelekai sereta majak bekuasa.” (SKR. 19:17-20) Tu nyadika pemenang ti besai ke nunjukka jaku Jehovah bekuasa agi ari pengawa magik! Sida ke setia ba Epesus nyadika teladan ti manah ke kitai kemayaharitu. Kemayaharitu, kitai dikelingi mayuh orang ke ngereja pengawa ke bekaul enggau bala melikat ti jai. Enti kitai nemu diri bisi perengka ti bekaul enggau melikat ti jai, kita patut muai semua nya enggau jampat baka ke digaga orang Kristian ba Epesus. Aram meh kitai ngenyauhka diri ari pengawa ti enda dikerinduka Petara taja pan nya enda senang dikereja.

16, 17. (a) Padahka chara Demetrius ngepunka pengawa ngelaban ba Epesus. (b) Baka ni orang ba Epesus nunjukka diri fanatik?

¹⁶ Luke madahka bisi “penyarut ti besai nyadi ke bekaul enggau Jalai Tuan.” Tu siti chara Sitan ngachau pengawa nginjil. e (SKR. 19:23)  Siku tukang ke nemu ngaga utai ari pirak ke benama Demetrius ngepunka pengawa ngelaban. Iya madahka, iya enggau sida ke betukang enggau iya kaya laban sida nyual engkeramba. Iya mujur nguingka ati orang bukai ke sama betukang enggau iya. Demetrius madahka pesan ke dibai Paul ngasuh bisnis sida rugi, laban orang Kristian enda nyembah engkeramba. Kebendar iya, Demetrius sengaja deka meransang ati bala peninga iya ngambika temegah enggau pengawa sida, sereta menua Epesus. Lalu, iya mega meri amaran ngagai bala peninga iya. Demetrius madah, petara indu Artemis enggau rumah sembiang Artemis ke tebilang deka nyadi “nadai guna.”—SKR. 19:24-27.

¹⁷ Jaku Demetrius mai asil ke dikedekaka iya. Bala tukang ke sama kereja enggau iya lalu manjung: “Muliaka meh Artemis, petara orang Epesus!” Nengeri Epesus nyadi charut. Baka ke dipadah ba pun pelajar tadi, bisi pengawa ngelaban ti besai nyadi. f Paul deka ngagai stadium betemu enggau orang mayuh din. Tang bala murid enda ngasuh laban endur nya enda selamat. Maya nya, siku lelaki ke benama Aleksander bediri ba mua orang mayuh ba stadium, lalu nguji bejaku enggau sida. Ketegal iya orang Judah, iya engka deka nerangka bida entara orang Judah enggau orang Kristian. Taja pia, orang ke ngelaban enda ibuhka penerang iya. Lebuh sida sedar iya orang Judah, sida enggai meri iya peluang bejaku lalu majak agi manjung madahka: “Muliaka meh Artemis, petara orang Epesus”! Sida ngereja tu pengelama 2 jam. Nyentukka kemayaharitu, agi bisi mayuh orang ke fanatik, iya nya kelalu balat deka ngetanka pengarap diri empu. Ulah ke baka tu ngasuh sida berunding enggau enda masuk akal.—SKR. 19:28-34.

18, 19. (a) Baka ni datuk bandar Epesus mujur ngasuh orang badu agi begau? (b) Baka ni nembiak Jehovah kekadang nerima jaga ari piak bekuasa, lalu nama patut digaga kitai ngambika terus nerima jaga sida?

¹⁸ Pengujung iya, datuk bandar Epesus mujur ngasuh orang badu agi begau. Iya madahka orang Kristian nadai ngachau rumah sembiang enggau petara Artemis. Pia mega, datuk bandar nya madah Paul enggau bala kaban iya enda ngereja pengawa jenayah ngagai rumah sembiang Artemis. Lalu iya madah, bisi chara bukai kena mutarka penanggul ke baka tu. Datuk bandar Epesus mega madah, orang ke ngelaban ulih dituduh salah laban enda nitihka undang-undang Rome lebuh ngaga pengawa ngelaban ti besai. Jaku datuk bandar nya nunjukka iya nemu berunding, sereta mansutka jaku enggau manah. Enggau nya, orang ke ngelaban nadai agi berasai ringat.—SKR. 19:35-41.

¹⁹ Tu ukai kali ti keterubah piak bekuasa nyaga bala  murid Jesus. Lalu piak bekuasa kemayaharitu mega agi nyaga bala murid Jesus. Ba senentang tu, rasul John nerima siti genera. Genera nya nunjukka ba hari ti penudi, bala murid Jesus deka dijaga ari serang Sitan. Dalam genera nya, dunya merujuk ngagai piak bekuasa ti nemu berunding enggau manah, lalu ai ti deras ngambarka serang Sitan. Nya alai, dunya deka nelan serang Sitan ke baka ai ti deras kena nyaga nembiak Jehovah. (Pem. 12:15, 16) Utai tu endang amat nyadi. Dalam mayuh kes, bala hakim ke ulih berunding enggau manah udah nyaga hak Saksi-Saksi Jehovah ngambika ulih begempuru sereta nginjil. Iya ke amat, kitai ulih menang ba kes mahkamah laban kitai bisi ulah ti manah. Ulah Paul ti manah udah ngasuh iya amat dipebasa mayuh pegawai perintah ba Epesus. Nya alai, sida keran deka nyaga Paul. (SKR. 19:31) Nyadi, arapka ulah kita ti jujur sereta bebasa ulih ngasuh orang bisi runding ti manah pasal kitai. Ulah kitai ti manah deka meri kesan ti positif ngagai orang bukai.

20. (a) Nama asai ati nuan lebuh nemu jaku Jehovah mujur ngelekai ba abad keterubah enggau kemayaharitu? (b) Nama utai ti keran deka digaga nuan ketegal bisi mayuh pemenang ari Jehovah kemayaharitu?

²⁰ Kitai berasai alit ati laban “jaku Jehovah majak ngelekai sereta majak bekuasa” ba abad keterubah. Kemayaharitu, kitai mega ngasaika utai ti sama lebuh meda jaku Jehovah majak dikerembaika. Kati nuan keran deka ngereja peranan nuan ngerembaika jaku Jehovah? Taja pan nuan engka ngasaika pengawa nuan mit aja, tang nya siti basa ti besai! Nya alai, belajar meh ari teladan ke udah dikerandauka kitai tadi. Terus meh baruh ati, lalu nitihka pemansang gerempung Jehovah. Pia mega, nuan patut bagas ngereja pengawa ke Jehovah. Kelimpah ari nya, tulak meh pengawa magik. Lalu, bebendar meh meri saksi ti manah ngagai orang nengah ulah ti jujur sereta bebasa.