1-4. Nama kebuah Paul ngagai Jerusalem, lalu nama deka nyadi ngagai iya ba dia?

 BALA menyadi ba Miletus balat tusah ati laban Paul enggau Luke deka ninggalka endur nya. Seduai iya amat sayauka bala tuai gempuru ba Epesus. Nya alai, tentu enda senang ke seduai iya deka beserara ari sida! Paul enggau Luke bediri ba atas dek kapal nya. Beg seduai iya penuh enggau utai ke deka diguna ba pejalai sida. Sida mega mai duit pemeri ari bala menyadi, lalu duit nya deka diberi ngagai bala menyadi Kristian ba Judea ke begunaka bantu. Paul enggau Luke enda sabar deka meri duit pemeri nya ngagai bala menyadi ba Judea.

² Kapal Paul enggau Luke ninggalka pelabuhan nya. Seduai iya, enggau tujuh iku bala menyadi ke nitihka seduai iya meda bala menyadi ba tebing tasik. Bala menyadi ba dia berasai amat tusah ati. (SKR. 20:4, 14, 15) Paul enggau sida ke bukai ba kapal terus ngepaika jari meri selamat tinggal ngagai bala menyadi ke ba tebing tasik, nyentukka sida udah nadai agi meda pangan diri.

³ Pengelama kira-kira tiga taun, Paul udah begulai gawa enggau bala tuai gempuru ba Epesus. Tang ketegal iring kuasa kudus, Paul patut ngagai Jerusalem. Taja pan Paul enda nemu enggau silik pasal nama deka nyadi ngagai iya ba Jerusalem, tang iya mega nemu pasal sekeda utai. Ku iya madah ngagai bala tuai gempuru ari Epesus: “Taja pan aku enda nemu nama utai ke deka nyadi ngagai aku ba Jerusalem, tang aku deka mansang kin nitihka iring kuasa kudus Petara. Aku semina nemu, lebuh ba tiap iti nengeri, kuasa kudus Petara suah nangkan aku pasal aku ke deka dijil sereta napi pemerinsa.” (SKR. 20:22, 23) Paul deka napi situasi ke bahaya ba Jerusalem. Taja pia, iya mesti “nitihka iring kuasa kudus.” Tang ba maya ti sama, Paul mega sanggup deka ngereja nya. Paul tentu ngumbai nyawa iya amat berega, tang utai ke pemadu penting ba Paul nya ngereja peneka Petara.

⁴ Kati nuan bisi asai ati ti sama baka Paul? Lebuh kitai nyerahka diri ngagai Jehovah, kitai besemaya deka ngenuluka peneka Iya ba  pengidup. Rasul Paul udah nunjukka teladan ti manah. Enti kitai beratika teladan iya, kitai deka bulih penguntung.

5. Lebuh deka ngagai Tirus, nama jalai ke ditengah Paul enggau sida ke enggau iya?

⁵ Kapal ke ditepan Paul sereta sida ke bukai ke enggau iya belayar ngagai Kos. Ketegal gaya angin hari nya manah, kapal nya ulih terus belayar sereta enda ngetu nyentukka sida datai ba Kos. Sida engka datai ba dia maya hari udah lemai. (SKR. 21:1) Kapal nya engka ngetu ba Kos semalam sebedau sida belayar ngagai Rodes enggau Patara. Ba Patara, di begian selatan Asia Minor, sida nepan kapal kargo ti besai. Kapal kargo nya terus mai sida ngagai Tirus ke bisi ba Finisia. Udah nya, sida mansa “Pulau Saiprus” ke bisi ba “sepiak kiba.” (SKR. 21:3) Nama kebuah Luke ke nyadi penulis bup Surat Kereja Rasul nulis semua utai tu enggau silik?

6. (a) Nama kebuah Paul berasai diperansang lebuh iya meda Pulau Saiprus? (b) Lebuh nuan berundingka baru chara Jehovah kala merekat sereta nulung nuan, nama utai ke ulih disimpulka nuan?

 ⁶ Ari kapal nya, Paul engka nunjukka Pulau Saiprus ngagai bala kaban iya, lalu madahka pengalaman iya ba pulau nya. Kira-kira 9 taun sebedau nya, Paul ngereja pengawa nginjil iya ti keterubah sama enggau Barnabas sereta John Mark. Ba dia, sida tiga betemu enggau siku dukun ke benama Elimas ke balat nyakal pengawa nginjil sida. (SKR. 13:4-12) Lebuh Paul meda Pulau Saiprus lalu berundingka baru utai ke kala nyadi dia, iya berasai amat diperansang. Pia mega, pengingat nya ngeringka iya ngambika ulih napi penusah ke deka nyadi ngagai iya. Sama mega, kitai deka bulih penguntung enti kitai berundingka baru chara Jehovah kala merekatka kitai sereta nulung kitai tan ngenatka penguji. Kitai engka ngasaika utai ti sama baka David ke nulis: ‘Orang ke badas natka mayuh macham penusah, tang Jehovah ngelepaska sida ari semua penusah nya.’—Mas. 34:19.

7. Nama utai ke digaga sida Paul lebuh datai ba Tirus?

⁷ Ba Paul, begulai enggau bala menyadi Kristian amat penting. Lalu iya rindu deka begulai enggau sida ke sepengarap enggau iya. Nya alai, lebuh datai ba Tirus, Luke nulis “kami ngiga bala murid.” (SKR. 21:4) Sida Paul nemu bisi bala menyadi Kristian ba Tirus. Nyadi, sida Paul ngiga bala menyadi Kristian lalu engka diau enggau sida. Kemayaharitu, siti ari berekat ke diulih kitai ketegal bisi pemendar nya, enda ngira dini alai kitai, kitai ulih tetemuka bala menyadi Kristian ke gaga ati deka ngelaluka kitai. Ketegal kitai rinduka Petara sereta nitihka sembah ti bendar, kitai bisi mayuh kaban ba serata dunya.

8. Baka ni kitai ulih meretika ayat ba Surat Kereja Rasul 21:4?

⁸ Sida Paul diau ba Tirus seminggu. Maya nya, Luke nulis siti ayat ke ulih ngasuh saru. Ayat nya madahka: “Nitihka iring kuasa kudus, sida [bala menyadi ba Tirus] suah nagang Paul mupuk ngagai Jerusalem.” (SKR. 21:4) Kati Jehovah ngubah runding Iya? Kati Jehovah benung ngiring Paul ngambika enda ngagai Jerusalem? Enda. Kuasa kudus udah madahka Paul deka diperinsa ba Jerusalem, ukai madahka Paul enda patut ngagai Jerusalem. Ketegal iring kuasa kudus, bala menyadi ba Tirus nemu Paul deka napi penusah ba Jerusalem. Nya alai ketegal sida ibuhka Paul, sida nagang iya ngagai Jerusalem. Kitai meretika pengingin bala menyadi deka nyaga Paul ari penusah. Tang Paul keran deka ngereja peneka Jehovah. Nyadi, iya neruska pejalai ngagai Jerusalem.—SKR. 21:12.

9, 10. (a) Pengudah ninga pasal pengirau bala menyadi ba Tirus, nama situasi ke sama ke engka diperundingka Paul? (b) Dunya kemayaharitu meransang ulah ke baka ni, lalu baka ni ulah nya enda sejalai enggau jaku Jesus?

 ⁹ Bala menyadi madahka sida amat irauka Paul. Pengudah ninga jaku sida, Paul engka berunding pasal Jesus ke kala napi situasi ti sama. Suba, Jesus madah ngagai bala murid pasal iya patut ngagai Jerusalem, diperinsa lalu dibunuh. Maya nya, Peter tusah ati lalu iya madah ngagai Jesus: “Anang munyi nya, Tuan. Utai nya enda sekali-kali nyadi ba nuan. Tang Jesus nguing lalu bejaku ngagai Peter: ‘Rari ari aku, Sitan! Nuan ngempang jalai aku, laban nuan nitihka runding mensia, ukai runding Petara.’” (Mat. 16:21-23) Taja pan enda senang, Jesus keran deka ngereja pengawa ke udah diberi Petara. Paul pan berasai baka nya. Taja pia, bala menyadi ba Tirus bisi asai ati ti sama baka rasul Peter. Taja pan tuju ati sida manah, tang sida enda meretika peneka Petara ba senentang tu.

¹⁰ Dunya kemayaharitu meransang ulah kasihka diri empu, tauka milih jalai pengidup ti senang. Orang kemayaharitu suah milih jalai pengarap ti pemadu senang dititihka, sereta pengarap ti nadai minta nembiak sida ngereja mayuh utai. Tang, Jesus meransang ulah ti jauh bebida ari chara orang dunya berunding. Ku iya madahka ngagai bala murid: “Barang sapa deka nitihka aku, awakka iya nulak pengingin diri empu, ngesan tiang perinsa iya, lalu enda ngetu nitihka aku.” (Mat. 16:24) Enti kitai nitihka Jesus, nya jalai pengidup ti manah. Taja pia, tu enda senang.

11. Baka ni bala murid ba Tirus nunjukka sida rindu sereta nyukung Paul?

¹¹ Maya udah datai alai Paul, Luke enggau bala menyadi ke bukai neruska pejalai sida ngagai Jerusalem. Bala menyadi ba Tirus amat rinduka Paul, lalu sida nunjukka diri nyukung pengawa nginjil iya. Bup Kudus madahka utai ke nyadi lebuh sida Paul mupuk, lalu semua penerang nya amat negu ati. Bala menyadi lelaki, menyadi indu sereta bala anak mit nganjung sida Paul ngagai tebing tasik. Ba dia, sida besugang sereta besampi begulai, lalu meri selamat tinggal ngagai pangan diri. Pengudah nya, Paul, Luke sereta bala menyadi ke  enggau seduai iya nepan kapal ke bukai, lalu neruska pejalai ngagai Pitolemais. Ba dia, sida Paul betemu bala menyadi, lalu diau dia sehari.—SKR. 21:5-7.

12, 13. (a) Nama pengawa ke kala digaga Philip ke nunjukka iya udah gawa ke Jehovah enggau setia? (b) Baka ni Philip nyadi teladan ti manah ngagai sida ke apai kemayaharitu?

¹² Pengudah nya, sida Paul ngagai Kaisaria. Pengudah datai dia, sida “tama ngagai rumah Philip lalu diau enggau iya. Iya siku penginjil.” a (SKR. 21:8) Semua sida gaga ati betemu enggau Philip. Kira-kira 20 taun sebedau nya ba Jerusalem, bala rasul milih Philip nulung ba pengawa nyadung pemakai ngagai bala menyadi Kristian. Maya nya, raban gempuru Kristian baru aja ditumbuhka. Kelimpah ari nya, Philip siku penginjil ti amat ransing. Suba, lebuh bala murid disakal lalu sida pambar, Philip ngagai Samaria lalu nginjil dia. Pengudah nya, iya nginjil ngagai siku pegawai tinggi ari Etiopia lalu maptisa pegawai nya. (SKR. 6:2-6; 8:4-13, 26-38) Semua pengawa ke udah digaga Philip nunjukka iya endang udah gawa ke Jehovah enggau setia!

¹³ Philip nadai kala lenyau pengeransing ba pengawa nginjil. Taja pan iya pindah lalu diau ba Kaisaria, tang iya agi kisuk ngereja pengawa nginjil. Nya meh kebuah Luke ngumbai Philip siku “penginjil.” Kitai mega belajar, Philip bisi 4 iku anak indu ke benabi. Tu reti iya, bala anak indu iya nitihka teladan Philip. b (SKR. 21:9) Philip tentu udah ngereja mayuh utai kena ngeringka ruang bilik iya ba pengarap. Kemayaharitu, bala apai ulih nitihka teladan Philip enggau chara ngiring ba pengawa nginjil. Pia mega, tulung meh bala anak rinduka pengawa nginjil.

14. Nama asil ke diulih ketegal Paul ngabas bala menyadi, lalu nama peluang ti sama ke bisi kemayaharitu?

 ¹⁴ Ari endur siti ngagai endur siti, Paul ngiga bala menyadi lalu begulai enggau sida. Bala menyadi tentu gaga ati deka ngelaluka penatai Paul sereta sida ke enggau iya. Asil iya, semua sida “bela diperansang.” (Rom. 1:11, 12) Peluang ti sama mega bisi kemayaharitu. Enda ngira sekalika rumah nuan besai tauka mit, nuan bisi peluang ngelaluka penatai tuai ti ngabas enggau bini iya. Enti nuan ngereja nya, nuan tentu deka bulih mayuh penguntung.—Rom. 12:13.

15, 16. Nama pesan ke dipadahka Agabus, lalu nama reaksi sida ke ningaka pesan nya?

¹⁵ Lebuh Paul diau enggau Philip, siku lelaki ke benama Agabus datai ngagai rumah nya. Iya siku orang ke amat dipebasa. Semua orang ba rumah Philip nemu Agabus siku nabi. Suba, iya kala benabi pasal lapar pungkang ke deka nyadi lebuh Raja Besai Klaudius merintah. (SKR. 11:27, 28) Maya nya, sida ba rumah Philip engka berunding: ‘Nama kebuah Agabus datai? Nama pesan ke deka dipadahka iya?’ Sida meda Agabus ngambi belulang Paul. Belulang nya baka siti kain ti panjai ke dikena ba punggung kena nyimpan duit sereta utai bukai. Enggau belulang nya, Agabus nanchang kaki enggau jari iya empu. Udah nya, iya madahka pesan iya. Pesan nya amat berat, ku Agabus madahka: “Tu utai ke disebut kuasa kudus, ‘Baka tu ku orang Judah ba Jerusalem deka nanchang orang ke ngempu belulang tu, lalu sida deka nyerahka iya ngagai orang bansa bukai.’”—SKR. 21:11.

¹⁶ Jaku benabi ari Agabus nunjukka Paul enda tau enda ngagai Jerusalem. Reti iya, pengawa nginjil Paul ngagai orang Judah ba Jerusalem deka ngasuh iya diserah “ngagai orang bansa bukai.” Nama reaksi orang ba rumah Philip pengudah ninga jaku benabi nya? Luke nulis: “Pengudah kami ninga jaku iya, kami enggau semua orang ba dia bebendar enda ngasuh Paul ngagai Jerusalem. Tang Paul madahka: ‘Nama kebuah kita nyabak lalu nguji deka ngelemika ati aku? Anang irau. Aku ukai semina sedia deka ditanchang, tang aku mega sedia deka mati ba Jerusalem ketegal nama Tuan Jesus.’”—SKR. 21:12, 13.

17, 18. Baka ni Paul nunjukka iya keran deka ngereja peneka Petara, lalu nama reaksi bala menyadi?

¹⁷ Uji gambarka situasi maya nya. Semua bala menyadi, nyengkaum Luke nagang Paul ngagai Jerusalem. Sekeda sida nyabak. Sida ngereja tu laban sida balat amat sayau sereta ibuhka Paul. Tang Paul madahka sida “ngelemika ati” iya. Sekeda terjemahan dalam jaku Gerika  madahka sida “nganchurka ati [iya].” Taja pia, Paul keras deka ngagai Jerusalem. Suba, bala menyadi ba Tirus mega enda ngasuh iya ngagai Jerusalem. Taja pia, Paul enda ngelakka jaku sida tauka ai mata sida nagang iya ngereja peneka Petara. Tang iya nerangka kebuah iya patut kin. Naka meh pemerani sereta pengeran ati ke diayanka Paul! Baka Jesus, Paul keran deka ngagai Jerusalem. (Heb. 12:2) Paul tentu enggai mati dibunuh. Tang enti nya meh utai ke nyadi, Paul deka ngumbai nya siti basa ti besai ulih mati sebagai siku murid Jesus Kristus.

¹⁸ Nama reaksi bala menyadi pengudah ninga jaku Paul? Sida bebasaka pemutus iya. Bup Kudus madahka: “Ketegal Paul enggai mendingka kami, kami badu agi nguji nagang iya lalu madahka: ‘Awakka peneka Jehovah nyadi.’” (SKR. 21:14) Sida ke kala nguji nagang Paul ngagai Jerusalem badu agi mejal iya nitihka peneka sida. Sida ningaka jaku Paul lalu nerima pemutus iya. Sida sedar pasal peneka Jehovah, sereta nerima nya taja pan enda senang ba sida. Nya alai, Paul pan berengkah nuju ngagai pejalai ke deka ngujungka ngagai pemati iya. Tang semua nya deka nyadi senang agi ba Paul, enti sida ke sayauka iya nyukung utai ke digaga iya.

19. Nama ulih dipelajarka kitai ari utai ke nyadi ba Paul?

 ¹⁹ Nama ulih dipelajarka kitai ari utai ke nyadi ba Paul? Kemayaharitu, mayuh bala menyadi deka ngelengkaka mayuh utai ngambika ulih gawa mayuh agi ke Jehovah. Tang kitai enggai nagang sida ngereja nya. Kitai ulih ngena tu ba mayuh macham situasi, ukai semina situasi ke bekaul enggau idup enggau mati aja. Chunto iya, mayuh apai indai Kristian berasai tusah meda anak sida ninggalka rumah, lalu gawa ke Jehovah ba endur ti jauh. Tang bala apai indai tu enggai ngelemika pengeran anak sida. Ambika chunto, Phyllis ke diau ba England madahka asai ati iya lebuh anak indu iya dianjung ngerintis ba Afrika. Nya meh siku aja anak indu iya. Ku Phyllis madahka: “Aku balat amat tusah ati, lalu enda senang deka nerima laban anak aku deka diau jauh ari aku. Tang ba maya ti sama, aku temegah ati ke pemutus iya. Aku mayuh kali besampika pekara tu. Tang nya meh pemutus iya, lalu aku enggai sekali-kali nagang iya. Aku pan udah ngajar iya ngenuluka peneka Perintah Petara! Iya udah 30 taun gawa ke Jehovah ba menua bukai, lalu tiap hari aku beterima kasihka Jehovah laban anak aku udah setia gawa ke Iya.” Nya alai, kitai patut meransang bala menyadi ke udah ngelengkaka mayuh utai ngambika ulih gawa mayuh agi ke Jehovah.

20, 21. Baka ni kitai nemu Paul keran deka begulai enggau bala menyadi, lalu nama kebuah iya amat rindu deka begulai enggau sida ke sepengarap enggau iya?

²⁰ Pengudah nyediaka semua utai ke diguna, Paul ngagai Jerusalem. Maya nya, bisi beberapa iku menyadi lelaki nitihka iya. Tu nunjukka, sida nyukung pemutus Paul enggau pengabis ati. Lebuh sida ba pejalai ngagai Jerusalem, Paul sereta sida ke enggau iya selalu ngiga bala menyadi Kristian lalu begulai enggau pangan diri. Ambika chunto ba Tirus, sida betemu enggau beberapa iku murid lalu diau seminggu enggau sida. Ba Pitolemais, sida betemu enggau bala menyadi dia lalu begulai enggau sida sehari. Ba Kaisaria, sida diau ba rumah Philip beberapa hari. Pengudah nya, sekeda bala murid ari Kaisaria nitihka Paul enggau sida ke enggau iya ngagai Jerusalem. Ba dia, Manason iya nya siku ari bala murid ke terubah nyadi orang Kristian ngelaluka penatai sida. Kepenudi iya, lebuh semua sida datai ba Jerusalem, Luke madahka “bala menyadi nerima penatai kami enggau gaga ati.”—SKR. 21:17.

²¹ Paul keran deka begulai enggau bala menyadi Kristian ke sepengarap enggau iya. Baka kitai kemayaharitu, rasul Paul tentu berasai amat diperansang lebuh begulai enggau bala menyadi. Peransang ke diterima Paul ngeringka iya ngambika ulih napi sakal ari orang ke keran deka munuh iya.