PELAJAR 7
Nusui ‘Berita Manah pasal Jesus’
Philip nyadi teladan ti manah sebagai siku penginjil
Bepelasarka Surat Kereja Rasul 8:4-40
1, 2. Taja pan orang bebendar ngelaban nembiak Petara nginjil Berita Manah, tang baka ni nya mai asil ti manah ba abad keterubah?
ORANG Kristian balat diperinsa, lalu Saul berengkah “balat nyerang” raban gempuru. (SKR. 8:3) Ketegal nya, bala murid pambar ngagai serata endur. Nya alai sekeda orang ngumbai, tuju Saul ke deka ngemunaska pengarap Kristian nyauka mujur. Taja pia, bisi asil ti manah ke enda dijangka nyadi. Nama asil nya?
2 Bala murid ke pambar “nusui Berita Manah pasal jaku Petara ngagai serata endur.” (SKR. 8:4) Pengawa sakal ke nyadi enda ulih nagang Berita Manah. Kebendar iya, Berita Manah majak agi dikerembaika! Enggau nya, sida ke ngelaban enda sengaja nulung ngerembaika Berita Manah ngagai endur ti jauh agi. Baka ke deka dikerandauka kitai ba pelajar tu legi, utai ti sama mega nyadi kemayaharitu.
“Bala Murid ke Pambar” (Surat Kereja Rasul 8:4-8)
3. (a) Sapa Philip? (b) Nama kebuah pengawa nginjil enda digaga ba Samaria, tang nama utai ke dipadah Jesus pasal Samaria?
3 Philip siku ari “murid ke pambar.” a (SKR. 8:4; peda kutak “ Philip ‘Siku Penginjil.’”) Iya ngagai Samaria, alai mayuh orang bedau ninga Berita Manah. Tu ketegal, Jesus kala madahka iring tu ngagai bala rasul: ‘Anang ngagai menua orang Samaria. Tang kita patut ngagai orang Israel ke baka bedus ti tesat.’ (Mat. 10:5, 6) Taja pia Jesus nemu, nyau kelama, bala murid deka meri saksi enggau silik ba Samaria. Sebedau Jesus niki ke serega, iya madah: “Kita deka nyadi saksi aku ba Jerusalem, ba serata Judea enggau Samaria, sereta nyentuk ngagai ujung dunya.”—SKR. 1:8.
4. Nama asai ati orang Samaria ngagai pesan ke dibai Philip, lalu nama utai ke ngasuh sida berasai baka nya?
4 Ba Philip, Samaria nya baka “ladang udah mansau.” (Jhn. 4:35) Pesan ke dibai Philip ngasuh orang Samaria berasai lantang ati. Nama kebuah? Tu ketegal, orang Judah enggai begulai sereta amat enda rindu meda orang Samaria. Pesan ari Philip meri harapan ngagai semua orang, enda ngira nama penuduk sida ba masyarakat. Lalu, tu bebida enggau sikap orang Parisi ke bepilih mata. Pia mega, Philip ransing nginjil sereta enda bepilih mata enggau orang Samaria. Maya nya, mayuh orang ngemaruhka orang Samaria. Tang Philip enda baka nya. Nya alai, kitai ulih meretika kebuah mayuh orang Samaria rindu ati ningaka pesan Philip.—SKR. 8:6.
5-7. Padahka sekeda chunto ti nunjukka Berita Manah terus dikerembaika taja pan orang Kristian dijil, tauka patut rari ngagai menua bukai.
5 Baka orang Kristian ba abad keterubah, orang Kristian kemayaharitu mega enda badu nginjil taja pan diperinsa. Mayuh orang Kristian dijil tauka patut rari ngagai menua bukai. Tang, utai ke nyadi ba sida udah nulung ngerembaika Berita Manah ngagai endur bukai. Ambika chunto, lebuh maya Perang Dunya Kedua, bisi bala Saksi kena tan ba kem alai ngetanka orang tangkap dibaruh Perintah Nazi. Tang sida udah mujur meri saksi ngagai mayuh orang ba kem nya. Siku lelaki ke bebansa Yahudi betemu enggau bala Saksi ba kem nya madahka: “Saksi-Saksi Jehovah ke dijil amat berani sereta liat ati. Tu ngasuh aku pechaya, pengarap sida sigi amat bepelasarka ajar Bup Kudus. Nya alai, aku pan nyadi Saksi Jehovah.”
6 Bisi mega, sida ke nyakal bala Saksi udah nerima Berita Manah. Ambika chunto, siku menyadi lelaki ke benama Franz Desch dianjung ngagai kem alai ngetanka orang tangkap di Gusen ba menua Austria. Ba dia, iya mujur ngepunka pengawa belajarka Bup Kudus enggau siku pegawai polis ke bepangkat tinggi ti dikumbai SS. Betaun-taun udah nya, seduai iya betemu baru enggau pangan diri ba siti konvensyen Saksi-Saksi Jehovah. Naka meh pengaga ati seduai iya maya nya! Diatu, seduai iya sama nyadi penginjil Berita Manah!
7 Utai ti sama nyadi lebuh orang Kristian patut rari ngagai menua bukai lebuh balat diperinsa. Ambika chunto, kena taun 1970-an, bala Saksi ari Malawi patut rari ngagai Mozambique. Tang situasi nya udah ngasuh sida mujur meri saksi ngagai orang ba Mozambique. Taja pan sida mega disakal ba dia, tang pengawa nginjil sida agi ulih dipejalaika. Francisco Coana madahka: “Sekeda ari kami bisi ditangkap polis beberapa kali ketegal nginjil. Taja pia, mayuh orang nerima pesan Perintah Petara. Nya alai kami pechaya, Petara meh ke nulung kami, baka Iya ke udah nulung orang Kristian ba abad keterubah.”
8. Baka ni ubah ba politik enggau ekonomi udah ngemansangka agi pengawa nginjil?
8 Kelimpah ari disakal pemerintah, bisi kebuah bukai pengarap Kristian majak dikerembaika ba endur bukai. Ubah ba politik sereta ekonomi udah muka peluang ngambika pesan Perintah Petara ulih ditusui ngagai orang ke datai ari bemacham bansa, sereta ke ngena mayuh macham bansa jaku. Sekeda orang ngerarika diri ari endur perang, sereta pindah ari nengeri ti miskin ngagai endur ti manah agi. Nya alai, ba endur baru sida diau, sida berengkah belajarka Bup Kudus. Pia mega, penyampau orang ke nyadi pelarian majak mayuh. Nyadi, tu muka peluang ngambika bala Saksi ulih nginjil ngagai orang bansa bukai. Nya alai, kati nuan deka bebendar agi meri saksi ngagai orang ke “datai ari semua menua, raban bansa, bansa, enggau jaku” ba endur nuan?—Pem. 7:9.
“Beri meh Kuasa tu ngagai Aku Mega” (Surat Kereja Rasul 8:9-25)
“Lebuh Simon meda kuasa kudus Petara diberi nengah bala rasul maya sida ngengkahka jari ba atas orang, iya pan meri duit ngagai bala rasul.”—Surat Kereja Rasul 8:18
9. Sapa Simon, lalu nama utai ke ngasuh iya deka nitihka Philip?
9 Philip mayuh ngereja kereja ajih enggau tanda ba Samaria. Iya ngeraika sida ke sakit sereta ke dirasuk melikat ti jai. (SKR. 8:6-8) Bisi siku lelaki ke balat alit ati enggau kereja ajih Philip. Lelaki nya benama Simon. Iya mayuh ngereja pengawa magik, sereta dipebasaka mayuh orang. Nya alai, orang madah: “Lelaki tu nerima kuasa ti besai ari Petara.” Tang Simon meda kuasa ti amat-amat datai ari Petara pengudah iya meda kereja ajih ke digaga Philip. Nya alai, Simon nyadi orang ke arap sereta dibaptisa. (SKR. 8:9-13) Taja pia pengudah nya, tuju ati Simon diuji. Baka ni?
10. (a) Nama digaga Peter enggau John ba Samaria? (b) Nama utai ke digaga Simon lebuh iya meda Peter seduai John ulih meri kuasa kudus ngagai bala murid ke baru?
10 Lebuh bala rasul nemu bisi pemansang ba Samaria, sida nganjung Peter enggau John kia. (Peda kutak “ Peter Ngena ‘Kunchi Perintah.’”) Lebuh seduai iya datai kia, seduai ngengkahka jari ba atas bala murid ke baru. Ketegal nya, tiap iku bala murid ke baru nerima kuasa kudus Petara. b Lebuh Simon meda tu, iya amat alit ati. Ku iya madah ngagai bala rasul: “Beri meh kuasa tu ngagai aku mega, ngambika orang bukai bulih kuasa kudus Petara lebuh aku ngengkahka jari aku ba atas sida.” Simon indah sanggup meri duit laban iya deka meli peluang ti kudus tu!—SKR. 8:14-19.
11. Nama jaku lalau ke diberi Peter ngagai Simon, lalu nama reaksi Simon pengudah nya?
11 Jaku lalau Peter ngagai Simon amat tegas. Ku Peter: “Awakka nuan dipunaska sama enggau duit pirak nuan, laban nuan ngumbai diri ulih ngena duit meli pemeri Petara ti diberi enggau pechuma. Nuan nadai kaul ba pekara tu, laban ba mata Petara, ati nuan enda betul.” Peter ngasuh Simon nesal ati sereta besampi minta pengampun. Peter madahka: “Besampi lalu minta ngagai Jehovah, ngarapka Iya deka ngampunka pengingin ti jai dalam ati nuan.” Kebendar iya, Simon ukai orang ke jai. Iya deka ngereja utai ti betul, tang iya nadai chukup penemu kena ngereja nya. Nya alai, Simon minta ngagai bala rasul: “Besampi meh ke aku, lalu bebendar minta ngagai Jehovah ngambika utai ke disebut kita nya enda nyadi ba aku.”—SKR. 8:20-24.
12. Naka ni pemalat orang sanggup nyual tauka meli penuduk sereta pangkat ti tinggi ba gerija?
12 Jaku lalau Peter ti tegas ngagai Simon nyadika amaran tauka tangkan ngagai semua orang Kristian kemayaharitu. Tu bekaul enggau pengawa “meli tauka nyual pangkat ba gerempung Kristian.” Tu ketegal, sejarah orang ba gerija nunjukka pengawa ke baka tu suah digaga. Kebendar iya, edisi ke-9 bup The Encyclopædia Britannica (1878) madahka: “Lebuh orang mansik chara pope dipilih, sida ke mansik tu amat-amat pechaya, pengawa milih orang nyadi pope suah digaga enggau chara nyual tauka meli pangkat. Sida terang-terang ngereja pengawa tu enggau enda belalai sereta nadai berasai malu.”
13. Nama sekeda chara orang Kristian nunjukka diri nyeliahka sikap deka meli tauka nyual pangkat, sereta peluang ti istimewa ba raban gempuru?
13 Orang Kristian patut bejimat ngambika enda meli tauka nyual pangkat, sereta peluang ti istimewa ba raban gempuru. Ambika chunto, sesiku orang Kristian engka inginka hak istimewa. Iya enda patut ngereja utai enggau tuju ati ti deka minta puji ba mua menyadi ke ulih meri hak istimewa. Menyadi ke amat inginka hak istimewa engka ngereja nya enggau chara meri mayuh hadiah, tauka kelalu balat muji menyadi ke bisi tanggungjawap nya. Pia mega, menyadi ke bisi tanggung pengawa ulih meri hak istimewa ngagai menyadi bukai patut bejimat enggau ulah bepilih mata, enggaika iya milih menyadi ke bisi pengaya aja. Dua-dua situasi nunjukka sikap deka meli tauka nyual pangkat, sereta peluang ti istimewa ba raban gempuru. Nya alai, semua nembiak Petara patut “ngemaruhka diri,” lalu nganti kuasa kudus Jehovah ke milih sida megai tanggung pengawa ti istimewa. (Luk. 9:48) Ba gerempung Jehovah, nadai orang ulih “kelalu balat minta puji orang.”—J-lam. 25:27.
“Kati Nuan Meretika Utai ke Dibacha Nuan?” (Surat Kereja Rasul 8:26-40)
14, 15. (a) Sapa “pegawai tinggi ari Etiopia,” lalu baka ni Philip betemu enggau iya? (b) Nama reaksi lelaki ari Etiopia ngagai pesan ke dibai Philip lalu, nama kebuah pengawa maptisa iya enda dikereja enggau beguai-guai? (Peda nota kaki.)
14 Melikat Jehovah ngasuh Philip bejalai tunga ke selatan ngagai jalai nuju ngagai Gasa ari Jerusalem. Philip engka bisi berundingka kebuah iya diasuh ngereja nya. Iya tetemuka saut lebuh iya betemu enggau siku pegawai tinggi ari Etiopia. Lelaki nya benung “macha bup Nabi Isaiah enggau nyawa ti inggar.” (Peda kutak “ Nama Reti ‘Sida-Sida’?”) Kuasa kudus Jehovah meransang Philip datai semak ngagai kerita kuda lelaki nya. Iya belanda sepiak kerita kuda lalu nanya pegawai tinggi nya: “Kati nuan meretika utai ke dibacha nuan?” Pegawai tinggi nya madah: “Baka ni ku aku ulih meretika nya enti nadai orang ngajar aku?”—SKR. 8:26-31.
15 Orang Etiopia nya mai Philip nepan kerita kuda iya. Uji pikirka utai ti dikerandauka sida maya nya. Dalam jaku benabi Isaiah, bisi nyebut pasal “anak domba” enggau “nembiak.” Lalu, reti nya bedau agi ditemu. (Isa. 53:1-12) Tang seraya seduai iya bejalai, Philip nerangka, jaku benabi nya dituju ngagai Jesus lalu deka dikeamatka nengah Jesus. Kebendar iya, lelaki Etiopia tu megai pengarap orang Judah. Nya alai, baka sida ke dibaptisa ba Pentikos 33 M., iya mega nemu diri patut dibaptisa. Iya madah ngagai Philip: “Peda nuan, ba ditu bisi ai. Nama agi utai ke ulih nagang aku ari dibaptisa?” Tekala nya, Philip lalu maptisa lelaki Etiopia nya! c (Peda kutak “ Dibaptisa—Diselam ‘dalam Ai.’”) Udah nya, kuasa kudus ngiring Philip ngereja pengawa ti baru ba Ashdod. Ba dia, iya terus nusui Berita Manah.—SKR. 8:26-40.
16, 17. Baka ni bala melikat nulung ba pengawa nginjil kemayaharitu?
16 Orang Kristian kemayaharitu bisi peluang ngereja pengawa nginjil baka Philip. Lalu, sida tetemuka chara nginjil enggau enda formal, baka lebuh maya sida raun ngagai endur bukai. Kesuah iya, sida selalu betemu enggau orang ke bisi minat ngagai Berita Manah. Lalu, tu enda nyadi baka nya aja. Tu enda ngasuh kitai tekenyit laban Bup Kudus madah enggau terang, bala melikat bisi ngiring pengawa nginjil kitai ngambika pesan Berita Manah ulih nyapai orang ke “datai ari tiap iti menua, raban bansa, jaku, enggau bansa.” (Pem. 14:6) Jesus mega nerangka, bala melikat bisi ngiring pengawa nginjil. Dalam sempama Jesus pasal gandum enggau lalang, iya madahka lebuh maya ngetau, iya nya ba hari ti penudi, “orang ke ngetau nya, bala melikat.” Jesus mega madahka, bala melikat “deka muai ari Perintah Petara, semua orang ti ngasuh orang bukai bedosa, enggau semua orang ke ngereja penyai.” (Mat. 13:37-41) Ba maya ti sama, bala melikat deka ngempuruka sida ke dipilih ke serega. Udah nya, sida mega deka mai “seraban orang ti mayuh” tauka sida ke ari “bedus ti bukai.” Jehovah mai semua sida tu ngagai gerempung Iya.—Pem. 7:9; Jhn. 6:44, 65; 10:16.
17 Kemayaharitu, bisi bukti ti nunjukka bala melikat ngiring pengawa nginjil. Tu ketegal, sekeda orang ke ditemu kitai lebuh nginjil madahka, sida udah besampi minta tulung ari Petara. Peratika siti pengalaman. Bisi sekali, dua iku menyadi ngereja pengawa nginjil enggau siku anak mit. Lebuh dua iku menyadi nya deka ngetu nginjil, anak mit ke enggau seduai iya tiba-tiba deka amat ngagai siti agi rumah. Iya enda sabar nganti dua iku menyadi nya. Iya dulu bejalai kia lalu terus ngetuk pintu rumah nya! Pengudah nya, siku indu ke biak muka pintu. Nya alai, dua iku menyadi nya mansang ke rumah nya kena berandau enggau indu nya. Indu nya madah, iya baru besampi minta Petara nganjung orang nulung iya meretika ajar Bup Kudus. Gambarka asai ati dua iku menyadi nya. Seduai iya tentu berasai amat tekenyit! Pengujung iya, sida ngaga atur kena belajarka Bup Kudus enggau indu nya.
“O Petara, enda ngira sapa nuan, tulung meh aku”
18. Nama kebuah kitai patut bebendar ngereja pengawa nginjil?
18 Semua kitai sebagi ari raban gempuru Kristian. Nuan bisi peluang istimewa ulih besaup gawa enggau bala melikat. Kemayaharitu, pengawa nginjil udah nyapai mayuh orang ari ke suba. Nya alai, bebendar meh ngereja pengawa nginjil. Anang meh ngumbai pengawa nginjil nya enda penting. Enti nuan ngereja pengawa nginjil enggau naka ulih, nuan deka tetemuka pengaga ati seraya nuan terus nusui “Berita Manah pasal Jesus.”—SKR. 8:35.
a Philip ke disebut ditu ukai rasul ke enggau Jesus suba. Tang baka ke udah dipelajarka kitai ba Pelajar 5, Philip tu bisi disengkaum dalam ‘tujuh iku lelaki ke ngembuan nama ti manah.’ Sida ke tujuh iku tu dipilih kena nyadung pemakai ninting hari ngagai indu balu ke ngena bansa jaku Gerika sereta Hebrew ba Jerusalem.—SKR. 6:1-6.
b Maya nya, bala murid ke baru kesuah iya dipilih ke serega sepengudah sida dibaptisa. Nya alai, sida bisi peluang sama merintah enggau Jesus nyadi raja enggau imam ba serega. (2 Kor. 1:21, 22; Pem. 5:9, 10; 20:6) Tang ba senentang tu, bala murid ke baru nya enda dipilih ke serega sepengudah sida dibaptisa. Bala murid ke baru dibaptisa tu nerima kuasa kudus sereta pemeri ke bukai semina pengudah Peter seduai John ngengkahka jari seduai iya ba sida.
c Pengawa maptisa lelaki Etiopia tu ukai pengawa ti dikereja enggau beguai-guai. Ketegal iya megai pengarap orang Judah, iya bisi penemu pasal jaku Petara. Tu nyengkaum jaku benabi pasal Messiah. Diatu, iya udah nemu ungkup Jesus kena ngamatka tuju Petara. Nya alai, iya ulih dibaptisa tekala nya.
