PELAJAR 8
Raban Gempuru Ngasaika ‘Timpuh Pengelikun’
Saul ke kala balat merinsaka orang Kristian, berubah nyadi penginjil ti ransing
Bepelasarka Surat Kereja Rasul 9:1-43
1, 2. Nama deka digaga Saul ba Damaskus?
SAUL bejalai mansang ngagai Damaskus. Maya nya, bisi orang enggau iya. Sida tu amat ringat. Ba Damaskus, sida ngaga pelan deka ngereja utai ti balat jai. Bala munsuh tu deka ngagai rumah tiap iku bala murid Jesus. Udah nya sida deka nanchang lalu ngemaluka bala murid tu. Bala munsuh tu mega deka mai bala murid tu ngagai Raban Kunsil Orang Judah ba Jerusalem.
2 Saul meh ke ngulu bala munsuh ba pengawa nyerang murid Jesus. Kebendar iya, Saul udah kala munuh murid Jesus. a Enda lama sebedau nya, Saul meda bala munsuh munuh Stepen. (SKR. 7:57–8:1) Maya nya, Saul balat merinsaka bala murid Jesus ke diau di Jerusalem. Taja pia, iya agi enda puas ati. Nya alai, Saul nyadi batu api ngambika ulih ngerembaika pengawa merinsaka bala murid Jesus ba endur bukai. Pia mega, Saul deka ngerusakka siti raban pengarap ke dikumbai “Jalai Tuan.”—SKR. 9:1, 2; peda kutak “ Kuasa ke Dikembuan Saul ba Damaskus.”
3, 4. (a) Nama utai ke nyadi ba Saul? (b) Nama sekeda tanya ke deka dipejuraika kitai?
3 Enda mukai-mukai, bisi penampak ari langit manchar ngelingi Saul. Orang ke enggau Saul ulih meda penampak nya. Sida kelalu tekenyit nyentukka enda ulih tersebutka nama-nama agi. Ketegal penampak nya, Saul rebah ke tanah sereta nyadi buta. Lalu Saul ninga nyawa bejaku ari langit: “Saul, Saul, nama kebuah nuan merinsaka aku?” Saul tekenyit lalu nanya: “Sapa nuan, Tuan?” Disaut nyawa nya: “Aku Jesus, orang ke diperinsaka nuan.” Naka meh pengenyit ati Saul lebuh ninga saut nya!—SKR. 9:3-5; 22:9.
4 Nama ulih dipelajarka kitai ari saut Jesus ngagai Saul? Nama penguntung ke deka diulih kitai lebuh meresa ubah ke digaga Saul dalam pengidup iya? Pengudah Saul berubah, raban gempuru ngasaika siti timpuh alai sida bisi pengelikun. Lalu nama ulih dipelajarka kitai ari chara bala menyadi Kristian ba raban gempuru ngena timpuh nya?
“Nama Kebuah Nuan Merinsaka Aku?” (Surat Kereja Rasul 9:1-5)
5, 6. Nama ulih dipelajarka kitai ari jaku Jesus ngagai Saul?
5 Jesus nagang Saul lebuh Saul nyauka datai ba Damaskus. Peratika utai ke dipadah Jesus. Iya enda nanya: “Nama kebuah nuan merinsaka bala murid aku?” Tang Jesus nanya: “Nama kebuah nuan merinsaka aku?” (SKR. 9:4) Lebuh bala murid diperinsa, ba Jesus, nya pan sama baka iya empu kena perinsa.—Mat. 25:34-40, 45.
6 Enti nuan diperinsa ketegal ngetanka pengarap ngagai Kristus, pechaya meh Jehovah enggau Jesus amat nemu pasal situasi ke ditapi nuan. (Mat. 10:22, 28-31) Ke diatu, Jehovah engka enda muai penusah nya. Ingat meh, suba Jesus pan meda lebuh Saul nyukung pengawa munuh Stepen. Lalu Jesus mega meda, Saul ngirit bala murid ke setia ari rumah sida ngagai Jerusalem. (SKR. 8:3) Tang, Jesus enda muai penusah sida tekala nya. Taja pia nengah Jesus, Jehovah udah ngeringka Stepen sereta bala murid ke bukai ngambika sida ulih mengkang tetap ati.
7. Nama patut digaga nuan ngambika ulih tan lebuh disakal?
7 Lebuh disakal, nuan mega ulih tan ngenatka nya enti nuan nitihka empat iti chara tu: (1) Ngemansangka pengeran deka setia, enda ngira nama utai ke deka nyadi. (2) Pinta meh tulung ari Jehovah. (Plp. 4:6, 7) (3) Awakka Jehovah Empu ke malas penyai ke dikereja orang ngagai kitai. (Rom. 12:17-21) (4) Pechaya meh, Jehovah deka meri nuan pengering kena betan nyentukka Iya muai penusah nya ba maya ti ngena.—Plp. 4:12, 13.
‘Saul, Menyadi Aku, Tuan Jesus Udah Nganjung Aku ngagai Nuan’ (Surat Kereja Rasul 9:6-17)
8, 9. Nama utai ke engka diasaika Ananias pasal tugas ke diberi ngagai iya?
8 Jesus nyaut tanya Saul ke nanya: “Sapa nuan, Tuan?” Udah nya, Jesus madah ngagai iya: “Angkat lalu tama ngagai nengeri nya. Ba dia, bisi orang deka madah utai ke patut digaga nuan.” (SKR. 9:6) Saul enda ulih meda maya nya. Iya dibai ngagai siti rumah ba Damaskus. Ba dia, iya enda makai sereta ngirup lalu terus besampi pengelama tiga hari. Ba maya ti sama, Jesus madah ngagai siku murid ke benama Ananias pasal Saul. Ananias diau ba Damaskus, lalu iya “dipuji semua orang Judah ke diau ba dia.”—SKR. 22:12.
9 Maya nya, Ananias engka ngasaika mayuh emosi ba maya ti sama! Jesus ke udah diangkatka idup baru sereta nyadi Kepala raban gempuru, benung bejaku ngagai iya. Jesus meri iya siti pengawa ti istimewa. Nya basa ti besai ba Ananias. Taja pia, pengawa tu enda senang dikereja! Lebuh iya diasuh Jesus betemu enggau Saul, Ananias lalu madah: “Tuan, aku udah ninga mayuh orang bejaku pasal lelaki tu sereta semua utai ke jai ke digaga iya ngagai nembiak nuan ti kudus ba Jerusalem, lalu bala tuai imam udah meri iya kuasa kena nangkap semua orang ba ditu ke ngangauka nama nuan.”—SKR. 9:13, 14.
10. Nama ulih dipelajarka kitai pasal Jesus ari chara iya nulung Ananias?
10 Jesus enda ngerara Ananias laban madahka pengirau iya pasal tugas ke diterima. Taja pia, Jesus meri penerang pasal utai ke patut digaga Ananias. Jesus nerangka kebuah iya milih Ananias ngereja pengawa tu. Lalu, tu nunjukka Jesus ibuhka asai ati Ananias. Tu meh utai ke dipadah Jesus pasal Saul: “Aku udah milih lelaki tu kena nusui nama aku ngagai bala raja, bansa Israel, enggau bansa bukai. Aku deka nunjuk ngagai iya semua pemerinsa ke patut ditapi iya ketegal nama aku.” (SKR. 9:15, 16) Ananias lalu ngasika Jesus. Iya betemu enggau Saul lalu madah: “Saul, menyadi aku, Tuan Jesus ke mandangka diri ngagai nuan lebuh nuan mansang kitu, udah nganjung aku ngagai nuan, ngambika nuan ulih meda baru lalu penuh laban kuasa kudus Petara.”—SKR. 9:17.
11, 12. Nama ulih dipelajarka kitai ari utai ke ngasuh Saul berubah?
11 Bisi utai ke ulih dipelajarka kitai ari kebuah Saul berubah. Ambika chunto kitai ulih belajar, Jesus ngiring pengawa nginjil, baka ke udah disemaya iya. (Mat. 28:20) Kemayaharitu, Jesus enda bejaku ngagai kitai secara langsung. Taja pia, Jesus ngena ulun ke tetap ati kena ngiring pengawa nginjil. Jesus milih sida kena nyaga nembiak iya. (Mat. 24:45-47) Ba jeman kitai diatu, bala penginjil sereta bala pengerintis, dianjung kena ngiga orang ke deka nemu mayuh agi pasal Kristus. Semua bala penginjil sereta bala pengerintis nitihka iring Raban ti Ngiring. Pia mega, baka ke dikerandauka kitai ba pelajar sebedau tu, mayuh orang ke ditemu kitai ba pengawa nginjil udah besampi ngagai Petara minta tulung. Lalu udah nya, bala Saksi datai nginjil ngagai sida.—SKR. 9:11.
12 Ananias nerima tugas ke diberi Jesus lalu diberekat. Nuan engka berasai irau deka meri saksi enggau silik. Tang, kati nuan bebendar deka ngasika pesan Jesus ke ngasuh nginjil? Sekeda orang berasai balat irau lebuh nginjil ari rumah ke rumah, sereta betemu enggau orang ke enda dikelala. Bisi mega, sekeda menyadi berasai tusah deka nginjil ngagai orang ba endur bisnis, orang ke ditemu ba rantau jalai, nengah talipun tauka surat. Suba, Ananias udah mutarka asai ati iya ti takut. Ketegal nya, iya nerima basa ti besai ulih meri kuasa kudus ngagai Saul. b Ananias ulih mujur laban iya pechayaka Jesus. Pia mega, iya ngumbai Saul bisi potensi nyadi menyadi Kristian iya. Baka Ananias, kitai mega ulih mutarka asai ati ti takut enti kitai pechaya, Jesus ngiring pengawa nginjil. Kitai mega deka ibuhka orang ke ditemu kitai ba pengawa nginjil. Kekadang kitai engka betemu enggau orang ke bisi gaya ti ngenakutka kitai. Tang, kitai deka ngumbai orang nya bisi potensi nyadi menyadi Kristian kitai.—Mat. 9:36.
‘Iya Ngerembaika Berita pasal Jesus’ (Surat Kereja Rasul 9:18-30)
13, 14. Enti nuan diatu benung belajarka Bup Kudus tang bedau agi dibaptisa, nama ulih dipelajarka nuan ari teladan Saul?
13 Saul terus nitihka utai ke dipelajarka iya. Pengudah iya udah ulih meda baru, iya lalu dibaptisa. Nambahka nya, Saul begulai rapat enggau bala murid Jesus ke bukai ba Damaskus. Saul mega ngereja lebih agi ari nya. Iya “terus ngagai balai gempuru ngerembaika berita pasal Jesus nya Anak Petara.”—SKR. 9:20.
14 Enti nuan diatu benung belajarka Bup Kudus tang bedau agi dibaptisa, ulih nuan nitihka teladan Saul? Titihka meh utai ke dipelajarka nuan ari Bup Kudus lalu ngaga meh pemutus deka dibaptisa. Endang amat, Saul deka dibaptisa laban iya empu udah meda kereja ajih ke digaga Jesus. Lalu, tu tentu meransang Saul deka nitihka utai ke dipelajar iya. Tang, orang bukai mega meda kereja ajih ke digaga Jesus. Ambika chunto, seraban orang Parisi meda Jesus ngeraika siku lelaki ke mati jari sepiak. Pia mega, mayuh orang Judah nemu Jesus udah ngangkatka Lasarus ari mati. Taja pia, mayuh ari sida mengkang enggai kiruh, lalu indah sekeda ari sida ngelaban Jesus. (Mrk. 3:1-6; Jhn. 12:9, 10) Taja pia, Saul enda sama baka semua sida nya. Iya ngaga ubah. Nama kebuah Saul ulih berubah, tang orang bukai enda ulih? Tu ketegal, Saul lebih agi nangika Petara ari takutka mensia. Pia mega, Saul amat beterima kasihka pengasih ke diayanka Jesus ngagai iya. (Plp. 3:8) Enti nuan nitihka teladan Saul, nuan tentu enda ngelakka nama-nama utai nagang nuan nginjil sereta dibaptisa.
15, 16. Nama utai ke digaga Saul ba balai gempuru, lalu nama reaksi orang Judah ba Damaskus enggau nya?
15 Bala orang mayuh ba balai gempuru tentu berasai tekenyit sereta ringat lebuh ninga Saul nginjil pasal Jesus. Sida nanya: “Endaka iya orang ke merinsaka sida ba Jerusalem ke ngangauka nama nya?” (SKR. 9:21) Lebuh Saul nerangka kebuah iya berubah, iya “enggau terang nunjukka bukti Jesus nya Kristus.” (SKR. 9:22) Taja pan bisi bukti ti terang, tang orang Judah agi enggai nerima nya. Sida kelalu deka nitihka adat sida empu. Lalu, sida enda ulih berubah laban sida sumbung. Taja pia, Saul agi enda putus asa.
16 Tiga taun pengudah nya, orang Judah ba Damaskus agi nyakal Saul nyentukka sida deka munuh iya. (SKR. 9:23; 2 Kor. 11:32, 33; Gal. 1:13-18) Lebuh pelan nya ditemu Saul, iya enggau chara ti bejimat sereta belalai ngerarika diri ari nengeri nya. Saul diulurka ngena bakul nengah jenila ba dinding kuta nengeri nya. Luke nerangka, sida ke nulung Saul ngerarika diri maya nya dikumbai “bala murid Saul.” (SKR. 9:25) Tu nunjukka, engka bisi orang nerima Berita Manah lebuh Saul nginjil ba Damaskus, lalu nyadi murid Kristus.
17. (a) Nama reaksi sekeda orang pasal ajar Bup Kudus? (b) Nama utai ke patut terus digaga kitai, lalu nama kebuah?
17 Kati nuan agi ingat, maya nuan keterubah kali bekunsika ajar Bup Kudus ngagai ruang bilik, bala kaban sereta orang bukai? Nuan engka ngarapka sida deka nerima ajar Bup Kudus enggau manah. Sekeda orang engka deka nerima, tang mayuh orang enggai. Indah, engka sekeda ari ruang bilik nuan ngumbai nuan nyadi munsuh sida. (Mat. 10:32-38) Taja pia, nuan patut terus ngemansangka pengelandik nerangka ayat Bup Kudus sereta nunjukka sifat Kristian ti manah. Enti nuan ngereja nya, nyau kelama, sida ke nyakal tentu deka berubah.—SKR. 17:2; 1 Pet. 2:12; 3:1, 2, 7.
18, 19. (a) Nama penguntung ke diulih lebuh Barnabas nulung bala menyadi Kristian ke bukai nerima Saul ba raban gempuru? (b) Baka ni kitai ulih neladan Barnabas enggau Saul?
18 Lebuh Saul datai ba Jerusalem, bala murid Jesus kakang ati lalu tusah deka pechaya iya nyadi murid Jesus. Taja pia Barnabas nulung Saul. Barnabas madahka, Saul amat udah nyadi murid Jesus. Nya alai bala rasul nerima Saul, lalu iya diau enggau sida ba siti timpuh. (SKR. 9:26-28) Taja pan Saul nginjil enggau chara ti bejimat agi, tang iya enda malu ke Berita Manah. (Rom. 1:16) Iya enggau berani nginjil ba Jerusalem, iya nya endur alai iya balat merinsaka bala murid Jesus Kristus. Orang bansa Judah ke bukai ba Jerusalem amat tekenyit meda Saul nginjil. Tu ketegal, suba Saul nguluka sida sama merinsaka orang Kristian ba Jerusalem. Tang diatu Saul nyadi sebagi ari murid Jesus. Nya alai, bala orang Judah tu bebendar deka munuh iya. Nyadi nama utai ke deka digaga menyadi Krstian maya nya? Bup Kudus madahka: “Lebuh bala menyadi nemu pasal tu, sida mai [Saul] ngagai Kaisaria, lalu nganjung iya ngagai Tarsus.” (SKR. 9:30) Saul ngasika iring ke diberi Jesus nengah raban gempuru. Enggau nya, Saul sereta bala menyadi ke bukai ba raban gempuru nerima penguntung.
19 Barnabas ngambi peluang kena nulung Saul. Ketegal pemanah ke diayanka Barnabas, nya alai iya enggau Saul ulih nyadi kaban ti rapat. Kati nuan ulih neladan Barnabas enggau chara nulung sida ke baru ba raban gempuru? Ulih nuan mega sama nginjil enggau sida sereta terus nulung sida mansang ba pengarap? Enti nuan ngereja nya, nuan tentu deka bulih mayuh berekat. Enti nuan baru nyadi penginjil Berita Manah, kati nuan deka nyadi baka Saul, ke deka nerima tulung ari bala menyadi Kristian? Enti nuan suah bekerejasama enggau bala penginjil ke bukai ke bisi mayuh agi pengalaman, nuan deka landik agi ba pengawa nginjil. Nambahka nya mega, nuan deka gaga agi ati, lalu ngemansangka kaul ti rapat ti tan belama iya enggau bala menyadi ba raban gempuru.
“Mayuh Orang Nyadi Murid” (Surat Kereja Rasul 9:31-43)
20, 21. Baka ni nembiak Petara kelia menya enggau kemayaharitu ngena ‘timpuh pengelikun’ enggau manah?
20 Pengudah Saul berubah sereta mupuk enggau selamat ngagai Tarsus, “raban gempuru ba serata menua Judea, Galili, enggau Samaria ngasaika pengelikun.” (SKR. 9:31) Baka ni bala murid Jesus ngena “maya ti senang” enggau manah? (2 Tim. 4:2) Bup Kudus madahka bala menyadi Kristian “nyadi tegap.” Bala rasul enggau bala menyadi lelaki ngiring sereta negapka pengarap bala murid. Enggau nya, semua ba raban gempuru “nangika Jehovah sereta idup sejalai enggau peransang ke diterima nengah kuasa kudus Petara.” Ambika chunto, Peter bebendar ngeringka bala murid ke diau ba Lida di Emperan Saron. Ketegal usaha iya, mayuh orang ke diau ba dia “nyadi murid Tuan.” (SKR. 9:32-35) Maya nya, bala murid enda dilimpangka enggau pekara ba dunia. Tang sida bebendar ibuhka pangan diri sereta nginjil Berita Manah. Asil iya, penyampau orang ba raban gempuru “majak nambah.”
21 Ba pengujung abad ke-20, Saksi-Saksi Jehovah ba mayuh menua mega ngasaika ‘timpuh pengelikun.’ Perintah ke nyakal nembiak Petara pengelama betaun-taun badu ngereja nya. Pia mega, bisi menua ti nagang pengawa nginjil kitai, udah ngemendarka bala Saksi ke diau ba dia bibas agi nginjil. Bepuluh ribu iku bala Saksi ngambi peluang nya kena nginjil ngagai mayuh agi orang. Ketegal nya, bisi asil ti manah.
22. Baka ni nuan ulih ngena peluang bibas nginjil enggau manah?
22 Kati nuan ngena peluang bibas nginjil enggau manah? Diatu nuan engka diau ba menua ti enda nagang orang ngereja pengawa ti bekaul enggau pengarap. Ketegal nya, Sitan deka ngasuh nuan ngenuluka pengawa deka ngiga mayuh agi duit, ukai ngenuluka Perintah Petara. (Mat. 13:22) Anang meh dilimpangka. Tang kena meh enggau manah semua peluang ke bisi ba maya tu. Nuan ulih ngumbai maya tu nyadika peluang ulih meri saksi enggau silik sereta nulung negapka bala menyadi ba raban gempuru. Ingat meh, situasi nuan diatu ulih berubah enggau jampat ba sebarang maya.
23, 24. (a) Nama ulih dipelajarka kitai ari utai ke nyadi ba Tabita? (b) Nama utai ke keran deka digaga semua kitai?
23 Peratika utai ke nyadi ba siku murid Jesus ke benama Tabita, ke mega dikumbai Dorkas. Iya diau ba Jopa, iya nya siti endur ke enda jauh ari Lida. Iya ngena masa enggau utai ke dikemisi iya enggau manah. Bup Kudus madahka, Tabita “ngereja mayuh utai manah sereta selalu nulung orang ke seranta.” Tang sayau amat, iya ngenyit sakit lalu mati. c Ketegal nya, bala murid ba Jopa berasai balat tusah ati, kelebih agi bala indu balu ke suah ditulung iya. Lebuh Peter datai ngagai rumah Dorkas, iya meda bangkai Dorkas udah sedia deka dikuburka. Taja pia, Peter ngereja kereja ajih ke enda kala dikereja bala rasul Jesus ke bukai. Peter besampi, lalu Tabita diangkatka idup baru! Udah nya, Peter ngangauka bala indu balu sereta bala murid ke bukai kena nunjukka Tabita udah idup baru. Ulih nuan ngambarka pengaga ati sida maya nya? Utai ke nyadi tu tentu ngeringka bala murid kena napi penguji ke bukai! Nambahka nya, berita pasal Tabita ke udah diangkatka ari mati “ngelekai ba serata Jopa, lalu mayuh orang nyadi murid Tuan.”—SKR. 9:36-42.
Baka ni nuan ulih neladan Tabita?
24 Bisi dua iti utai ke ulih dipelajarka kitai ari utai ke nyadi ba Tabita. (1) Pengidup kitai enda panjai. Nya alai, semua kitai patut bebendar deka ngulihka nama ti manah ba mua Petara! (P-jar. 7:1) (2) Harapan pengangkat ari mati tentu deka nyadi. Jehovah meda semua pemanah ke diayanka Tabita lalu merekatka iya. Sama mega, Jehovah ingatka semua pengawa ke dikereja kitai enggau bebendar. Enti kitai mati sebedau Armagedon, Iya deka ngangkatka kitai idup baru. (Heb. 6:10) Nyadi, enda ngira sekalika kitai diatu benung napi “maya ti tusah,” tauka ba ‘timpuh pengelikun,’ arapka semua kitai terus keran deka meri saksi enggau silik pasal Kristus.—2 Tim. 4:2.
a Peda kutak “ Saul Siku Orang Parisi.”
b Suba, semina bala rasul aja ulih meri kuasa kudus ngagai orang. Taja pia ba situasi tu, bisi utai ti nyelai mimit. Tu ketegal, Jesus ngasuh Ananias meri kuasa kudus ngagai Saul. Pengudah Saul berubah, iya enda betemu enggau 12 iku rasul Jesus ba siti timpuh ti lama. Tang, lebuh maya nya, iya mengkang ransing nginjil. Nya alai, Jesus ngumbai Saul bisi pengering kena tan ngenatka nama-nama penanggul ke ditapi ba pengawa nginjil.
c Peda kutak “ Tabita—‘Iya Ngereja Mayuh Utai Manah.’”
