PELAJAR 6
Stepen—“Penuh Laban Kuasa Petara Sereta Amat Dikerinduka Petara”
Belajar ari Stepen ti berani meri saksi ba mua Raban Kunsil Orang Judah
Bepelasarka Surat Kereja Rasul 6:8–8:3
1-3. (a) Nama situasi ti ngenakutka ke ditapi Stepen, lalu nama reaksi iya? (b) Nama tanya ke deka dipejuraika kitai?
STEPEN bediri ba mua semua orang dalam mahkamah. Dewan nya amat besai, lalu engka semak enggau Rumah Sembiang ba Jerusalem. Ba dewan nya, bisi 71 iku lelaki ke duduk nitihka penuduk sida ke udah diatur, lalu ngemenuhka setengah ari dewan nya. Ba hari nya, di mahkamah, iya nya Raban Kunsil Orang Judah, semua orang ari raban nya datai kena ngatur pechara enggau Stepen. Bala hakim ba raban nya bisi kuasa ti besai ba perintah. Sida mega orang ke amat bepengaruh ba masyarakat. Mayuh ari sida mega enda bebasaka Stepen. Maya nya, Imam Besai Kaiapas ke ngiring pengawa ngatur pechara ba mahkamah enggau Stepen. Kebendar iya, beberapa bulan sebedau utai tu nyadi, iya mega ngiring lebuh Raban Kunsil Orang Judah madahka Jesus Kristus patut diukum bunuh. Nya alai, kati semua pekara tu ngasuh Stepen berasai takut?
2 Maya nya, bisi utai ke ngalitka ati nyadi. Bala hakim meda Stepen “baka mua melikat.” (SKR. 6:15) Nama reti nya? Lebuh bala melikat mai pesan ari Petara Jehovah, sida enda berasai takut. Tang sida amat tenang. Nya meh utai ke nyadi ba Stepen maya nya. Indah bala hakim ti amat begedika iya pan ulih meda utai nya ba Stepen. Tang baka ni Stepen ulih nyadi amat tenang?
3 Orang Kristian kemayaharitu ulih mayuh belajar ari saut ba tanya di genteran sebedau tu. Kitai mega patut nemu, kebuah Stepen ulih napi situasi ke baka nya. Baka ni Stepen kala ngetanka pengarap iya sebedau tu? Lalu nama sekeda chara kitai ulih neladan iya?
‘Sida Ngasut Orang Mayuh’ (Surat Kereja Rasul 6:8-15)
4, 5. (a) Nama kebuah Stepen amat berega ba raban gempuru? (b) Nama kebuah Stepen dikumbai “penuh laban kuasa Petara sereta amat dikerinduka Petara”?
4 Lebuh raban gempuru Kristian baru ditumbuhka, Stepen amat berega ba bala menyadi Kristian. Ba pelajar sebedau tu kitai nemu, iya disengkaum dalam tujuh iku menyadi lelaki ke baruh ati, ke sanggup meri tulung lebuh bala rasul minta sida ngereja nya. Pia mega, iya baruh ati taja pan iya bisi nerima mayuh pemeri ari Petara. Surat Kereja Rasul 6:8 madahka, Stepen ulih ngereja mayuh “kereja ajih enggau tanda,” baka ke dikereja sekeda bala rasul. Nambahka nya, Bup Kudus madahka, Stepen “penuh laban kuasa Petara sereta amat dikerinduka Petara.” Nya alai nama reti semua nya?
5 Stepen orang ke manah sereta nelap. Nya alai, orang berasai senang deka begulai enggau iya. Chara Stepen bejaku mega ulih narit minat bala peninga lalu ngasuh sida yakin, iya bisi tuju ati ti manah ke deka nulung sida. Lalu chara iya ngajar nulung orang nemu, ajar jaku Petara nya amat manah sereta berega. Kuasa kudus Jehovah bekereja ba Stepen. Tu ketegal, iya enggau baruh ati nitihka iring kuasa kudus. Ari ke nyadi sumbung ketegal iya bisi mayuh pemeri sereta pengelandik, Stepen meri semua puji ngagai Jehovah. Lalu iya nunjukka pengerindu sereta pengibuh ngagai semua orang. Nya meh kebuah iya, orang ke ngelaban enda rindu meda Stepen, laban sida ulih ngasaika iya bisi sukung ari kuasa kudus ke enda ulih dialahka!
6-8. (a) Nama dua iti jaku tuduh ke dikena orang ngelaban Stepen, lalu nama kebuah? (b) Nama kebuah teladan Stepen ulih nulung orang Kristian kemayaharitu?
6 Mayuh orang bekelikuh enggau Stepen. “Sida enda ulih nyangkal jaku iya, laban iya diiring kuasa kudus Petara lalu bejaku enggau penemu-dalam.” a Nya alai sida asa ati. Tang sida “enggau chara ti belalai” ngasuh orang nuduh Stepen taja pan iya enda besalah. Sida tu mega “ngasut orang mayuh.” Tu nyengkaum bala tuai orang Judah sereta bala penulis adat. Ketegal nya, Stepen enggau ngenyit dibai ngagai Raban Kunsil Orang Judah. (SKR. 6:9-12) Sida ke ngelaban meri dua iti jaku tuduh kena nyalahka Stepen, iya nya Stepen bejaku ngelaban Petera sereta Moses. Tang nama kebuah iya dikumbai ngereja nya?
7 Sida nuduh Stepen betenahka Petara. Sida madah, iya bejaku ngelaban “endur ti kudus” iya nya Rumah Sembiang ba Jerusalem. (SKR. 6:13) Sida mega nuduh iya betenahka Moses. Sida madah iya ngelaban Adat Moses, lalu madah Stepen udah ngubah Adat nya. Nya jaku tuduh ti amat berat! Tu ketegal, orang Judah maya nya amat bebasaka rumah sembiang Jehovah. Sida mega amat ngemeratka tiap iti utai ke ditulis ba Adat nya sereta nambah kediri empu utai ke ditulis ba Adat. Nya alai, jaku tuduh ke dikena ngelaban Stepen nya ngasuh iya dikumbai orang ke bahaya sereta endang patut diukum mati!
8 Sayau amat, chara tu meh ke suah dikena bala tuai pengarap ngambika ulih ngenusahka nembiak Petara. Nyentukka kemayaharitu, orang ke ngelaban pengarap kekadang ngasuh bala pemerintah nyakal Saksi-Saksi Jehovah. Nyadi, nama patut digaga kitai enti sema kitai dipetenah sereta dituduh enggau salah? Aram meh kitai belajar mayuh agi ari Stepen.
Berani Meri Saksi pasal “Petara ti Bemulia” (Surat Kereja Rasul 7:1-53)
9, 10. Nama utai ke dipadah orang ke ngelaban pasal penerang ari Stepen ba Raban Kunsil Orang Judah, lalu nama patut dikingatka kitai?
9 Ba pun pelajar tu kitai nemu, lebuh Stepen ningaka semua jaku tuduh ke dikena ngelaban iya, mua iya tetap tenang baka mua melikat. Pengudah nya, Kaiapas nanya iya: “Kati semua utai tu amat?” (SKR. 7:1) Nya meh maya iya, Stepen diberi peluang bejaku, lalu peluang nya dikena Stepen enggau manah!
10 Orang ke ngelaban ngiga penyalah ba utai ke disebut Stepen. Sida madah, Stepen nadai meri penerang pasal jaku tuduh ke dikena ngagai iya taja pan saut iya panjai. Ba senentang tu, Stepen udah netapka teladan ti manah pasal chara “nyaut” orang ke ngelaban ngambika ulih ngetanka Berita Manah. (1 Pet. 3:15) Ingat meh, Stepen dituduh betenahka Petara enggau chara enda bebasaka Rumah Sembiang. Iya mega dituduh betenahka Moses laban iya dikumbai ngelaban Adat Moses. Lebuh nyaut sida, Stepen ngelansa tiga iti jeman ti bebida dalam timpuh sejarah orang Israel. Iya enggau bejimat nekanka sekeda poin ti penting. Nama poin nya? Diatu aram meh kitai berandauka tiga iti jeman ti bebida dalam sejarah orang Israel. Kitai deka belajarka siti poin ngagai poin ke bukai enggau belubah-lubah.
11, 12. (a) Baka ni Stepen nerangka teladan Abraham enggau manah? (b) Nama kebuah Stepen bejaku pasal Josep?
11 Maya jeman sida ke tetap ati kelia menya. (SKR. 7:1-16) Stepen nyebut pasal Abraham, laban orang Judah amat bebasaka iya ketegal pengarap iya. Tu topik ke disetuju semua sida. Nya alai, Stepen madahka Jehovah nya “Petara ti bemulia,” ke udah ngayanka Diri ngagai Abraham ba Mesopotamia. (SKR. 7:2) Kebendar iya, Abraham nyadi orang asing ba Menua ti Udah Disemaya. Maya nya, bedau agi bisi Rumah Sembiang sereta Adat Moses. Nya alai kati tu reti iya, penetap ati sesiku orang semina bepanggai ba dua iti pekara tu?
12 Stepen mega bejaku pasal Josep, iya nya peturun Abraham. Sida ke ningaka Stepen ba Raban Kunsil Orang Judah maya nya amat bebasaka Josep. Tang Stepen ngingatka sida siti fakta tu. Bala menyadi Josep ke nyadi ketuai raban bansa Israel udah merinsaka Josep sereta nyual iya nyadi ulun. Taja pia, Josep dikena Petara nyelamatka bansa Israel ari lapar pungkang. Nya alai, Stepen tentu ulih meretika enggau terang pasal utai ti sama entara Josep enggau Jesus Kristus. Tang Stepen nadai nyebut nama utai ti sama nya ngambika orang ba dia deka terus mendingka iya.
13. Baka ni randau pasal Moses nyaut jaku tuduh ke ngelaban Stepen, lalu ketegal jaku Stepen tu, nama topik ti penting ke patut diperundingka sida ke ngelaban?
13 Maya jeman Moses. (SKR. 7:17-43) Stepen nyebut mayuh utai pasal Moses. Tu siti langkah ti amat pintar. Tu ketegal, bisi mayuh orang Saduki ba Raban Kunsil Orang Judah. Sida tu nulak semua jaku Petara ke bukai lalu semina nerima utai ke ditulis Moses aja. Bekaul enggau pekara tu, kati nuan agi ingat, Stepen kala dituduh betenahka Moses? Nya alai, saut ari Stepen terang nunjukka jaku tuduh nya enda betul, laban iya amat bebasaka Moses enggau Adat Moses. (SKR. 7:38) Iya madah Moses mega deka nyelamatka orang. Tang orang nulak Moses lebuh iya beumur 40 taun. Lebih ari 40 taun pengudah nya, sida mantah chara Moses ngiring sida. Lalu utai tu nyadi beberapa kali. b Enggau tu, Stepen ngasuh sida ke ngelaban berunding siti pekara ti penting tu: Nembiak Petara suah nulak orang ke udah dipilih Petara ngiring sida.
14. Baka ni utai ke digaga Moses suba ulih nyukung penerang ari Stepen?
14 Stepen ngingatka bala peninga iya, pasal Moses ke kala madah, deka bisi siku nabi baka iya ti datai ari Israel. Sapa nabi nya, lalu baka ni chara orang deka nerima iya? Stepen enda nyaut tanya nya nyentukka begian penudi ba jaku iya. Iya mega nyebut poin penting ti bukai: Moses nemu, dini-dini alai pan ulih nyadi kudus. Ambika chunto, bisi sekali Jehovah bejaku enggau Moses ba siti babas. Ketegal nya, endur nya nyadi kudus. Nya alai, kati tu reti iya kitai semina ulih nyembah Jehovah ba siti endur tauka bengunan aja, baka rumah sembiang Jehovah ba Jerusalem? Aram meh kitai ngiga saut iya.
15, 16. (a) Nama kebuah topik pasal langkau sembiang amat penting kena nyukung utai ke disebut Stepen? (b) Baka ni chara Stepen ngena chunto pasal Rumah Sembiang ke digaga Solomon?
15 Langkau sembiang sereta rumah sembiang Jehovah. (SKR. 7:44-50) Sebedau bisi rumah sembiang Jehovah ba Jerusalem, Petara ngasuh Moses ngaga langkau sembiang. Stepen ngingatka bala hakim pasal utai tu. Tu ketegal, langkau sembiang nya ulih dibai pindah kin kia. Nambahka nya, langkau sembiang digaga nitihka bentuk khemah. Perundingka tu: Moses selalu nyembah Jehovah ba langkau sembiang nya. Nya alai, sapa ke berani madahka langkau sembiang nya enda semanah rumah sembiang Jehovah ba Jerusalem?
16 Beberapa lama udah nya, Solomon nirika rumah sembiang Jehovah ba Jerusalem. Ba sampi Solomon, kuasa kudus Petara ngiring iya nyebut utai tu. Kitai ulih belajar mayuh ari utai ke disebut iya. Ku Stepen nandu baru utai ke disebut Solomon, “Petara ti Pemadu Tinggi enda diau ba rumah ke digaga mensia.” (SKR. 7:48; 2 Ban. 6:18) Jehovah engka ngena Rumah Sembiang kena ngamatka tuju Iya, tang Iya pan enda terikat enggau nya. Enti pia, kati bala penyembah Iya patut ngasaika sembah ti bendar nya semina bepanggai ba bengunan ke digaga mensia aja? Stepen ngujungka jaku iya nitihka utai ke ditulis ba bup Isaiah ti terang madahka: “Serega nya kerusi diraja Aku, lalu dunya nya pelasar kaki Aku. Rumah ke baka ni ti deka digaga kita ke Aku? Ba dini endur Aku belelak. Endaka Aku ke ngaga semua utai nya?”—SKR. 7:49, 50; Isa. 66:1, 2.
17. Baka ni utai ke disebut Stepen nunjukka (a) sida ke ngelaban iya bisi runding ti salah (b) iya nyaut jaku tuduh ke dikena ngelaban iya?
17 Naka ke diatu, nuan udah belajar pasal utai ke udah disebut Stepen ngagai Raban Kunsil Orang Judah. Endaka nuan setuju, iya amat landik madahka enggau terang pasal runding ti salah ke bisi ba bala orang ke nuduh iya? Jaku Stepen nunjukka, pengawa Jehovah seruran mansang, lalu Jehovah sanggup ngaga ubah ti patut kena nyapai tuju Iya. Sida ke ngelaban kelalu ngemeratka rumah sembiang Jehovah ba Jerusalem sereta Adat Moses. Taja pia, sida enda meretika tuju Jehovah ti dikereja nengah Adat sereta Rumah Sembiang. Ketegal nya, jaku Stepen ngasuh semua orang berundingka tanya ti penting tu: Enti nuan deka bebasaka Adat sereta rumah sembiang Jehovah, endaka nuan deka ngereja nya enggau chara ngasika semua pesan Jehovah? Nya alai, utai ke dipadah Stepen nunjukka iya ngetanka diri enggau chara ti betul, laban iya seruran ngasika Jehovah enggau naka ulih.
18. Nama sekeda chara kitai ulih neladan Stepen?
18 Nama ulih dipelajarka kitai ari utai ke disebut Stepen? Iya amat nemu pasal jaku Petara. Baka Stepen, kitai mega patut bagas belajarka Bup Kudus laban kitai deka “ngena jaku Iya [Petara] enggau betul.” (2 Tim. 2:15) Kitai mega ulih belajar ari chara Stepen bejaku enggau chara ti ngenyamaika ati sereta bebasaka orang. Maya nya, bala peninga Stepen amat begedika iya. Tang Stepen bebendar deka ngiga utai ti sama entara iya enggau sida nya. Stepen bejaku pasal utai ke dipebasa semua orang ba Raban Kunsil Orang Judah. Maya nya mega, Stepen ngangauka sida ke bisi kuasa sereta sida ke tuai ari iya, nya “apai.” (SKR. 7:2) Baka nya mega, kitai patut mandangka ajar Bup Kudus enggau chara ti “nelap sereta penuh enggau basa.”—1 Pet. 3:15.
19. Baka ni Stepen enggau berani madahka pesan pasal Jehovah ke deka ngakim bala sida ba Raban Kunsil Orang Judah?
19 Kitai enggai kakang ati bejaku pasal ajar Bup Kudus ketegal takut deka ngemediska ati orang bukai. Pia mega, lebuh kitai nusui pesan pasal Jehovah ti deka ngakim, kitai enggai ngenataika pesan nya enggau chara ti ngasuh orang ngumbai pesan nya enda penting. Ba pekara tu, Stepen nyadi teladan ti manah ke kitai semua. Stepen ulih meda, taja pan iya udah bebendar meri penerang sereta bukti ngagai Raban Kunsil Orang Judah, tang ati sida agi kieh. Nya alai, ketegal iya diiring kuasa kudus, Stepen enggau berani madah ulah sida ba Raban Kunsil Orang Judah sama enggau aki ini sida sebedau tu, ke udah nulak Josep, Moses sereta bala nabi ke bukai. (SKR. 7:51-53) Lalu taja pan Moses enggau bala nabi ke bukai udah madah Messiah deka datai, tang bala hakim ba Raban Kunsil Orang Judah udah munuh Messiah. Enggau nya, sida udah balat ngelanggar Adat Moses.
“Tuan Jesus, Aku Nyerahka Nyawa Aku ngagai Nuan” (Surat Kereja Rasul 7:54–8:3)
“Lebuh sida ninga nya, sida balat pedis ati sereta begerit ngeli lebuh merening Stepen.”—Surat Kereja Rasul 7:54
20, 21. Nama reaksi Raban Kunsil Orang Judah ngagai utai ke disebut Stepen, lalu baka ni chara Jehovah ngeringka iya?
20 Bala hakim enda ulih nyangkal utai ke disebut Stepen laban semua nya betul magang. Nya alai, sida balat ringat nyentukka sida begerit ngeli lebuh merening Stepen. Ketegal nya, sida ngereja utai ti balat jai, sereta enggau enda berunding. Maya nya Stepen nemu, tuan iya Jesus deka kasihka iya, tang semua ba Raban Kunsil Orang Judah enda kasihka iya.
21 Stepen begunaka pemerani kena napi utai ke deka nyadi pengudah nya. Lalu iya tentu bulih peransang ari genera ke diberi Jehovah ngagai iya. Stepen meda mulia Petara sereta Jesus bediri ba sepiak kanan Iya. Lebuh Stepen nerangka genera nya ngagai sida, bala hakim mampul pending sida! Nama kebuah sida ngereja nya? Laban sebedau tu, Jesus mega kala madah ngagai bala hakim ti sama pasal iya endang Messiah, lalu iya deka duduk ba sepiak kanan Apai iya enda lama agi. (Mrk. 14:62) Nyadi kebendar iya, Raban Kunsil Orang Judah udah ngereja utai ti balat jai ngagai Messiah lalu munuh iya! Nya alai, semua sida maya nya terus munuh Stepen enggau chara nuku iya ngena batu. c
22, 23. Baka ni chara pemati Stepen nya sama enggau Tuan iya, lalu baka ni orang Kristian kemayaharitu ulih yakin baka Stepen?
22 Chara Stepen mati sama enggau Tuan iya, Jesus. Lebuh iya nemu diri deka mati, iya berasai amat tenang. Iya mega arapka Jehovah enggau pengabis ati lalu ngampunka semua orang ke munuh iya. Iya madah: “Tuan Jesus, aku nyerahka nyawa aku ngagai nuan.” Stepen engka ulih bejaku munyi nya laban iya agi ulih meda genera pasal Jesus enggau Jehovah. Lalu Stepen tentu nemu jaku Jesus ke madah: “Aku meh pengidup enggau pengangkat ari mati.” (Jhn. 11:25) Pengujung iya, Stepen besampi ngagai Petara enggau nyawa ti inggar: ‘O Jehovah, anang ngukum sida ketegal dosa ke digaga sida.’ Pengudah iya nyebut nya, iya pan tinduk dalam pemati.—SKR. 7:59, 60.
23 Nya alai, entara semua bala murid Jesus, Stepen nyadi orang ti keterubah ke dibunuh ketegal pengarap. (Peda kutak “ Nama reti ‘Martir’?”) Tang sayau amat, bala murid Jesus ke bukai deka napi utai ti sama baka Stepen. Nyentukka jeman kitai kemayaharitu, sekeda nembiak Jehovah ti setia mega udah dibunuh sida ke ari pengarap bukai ke begedika kitai, tuai politik ti jai sereta orang ke ngelaban ti balat ringat. Taja pia, kitai ulih yakin baka Stepen. Tu ketegal Jesus benung merintah nyadi Raja diatu, lalu iya benung ngena kuasa ke diberi Jehovah ngagai iya. Nya alai, nadai nama-nama utai ulih nagang Jesus ari ngangkatka semua murid iya ke tetap ati ari pemati.—Jhn. 5:28, 29.
24. Baka ni Saul masuk champur enggau pemati Stepen, lalu nama kesan ti manah ke nyadi ketegal pemati Stepen?
24 Maya nya, bisi siku lelaki ti biak ke benama Saul ti beratika semua utai ke nyadi. Iya nyukung pengawa munuh Stepen. Indah iya mega nyaga gari bala orang ke nuku Stepen ngena batu. Enda lama pengudah nya, Saul ngiring pengawa merinsaka orang Kristian. Taja pia, beberapa lama udah nya, pemati Stepen deka meri kesan ti manah ngagai mayuh orang. Teladan iya ngeringka bala menyadi Kristian ke bukai kena mengkang setia sereta mujur ngetanka pengarap baka Stepen. Beberapa taun udah nya, Saul, ke pengudah nya dikumbai Paul, balat ngesalka pengawa diri ti udah nyukung orang munuh Stepen. (SKR. 22:20) Nyau kelama iya sedar lalu madah: “Aku bejaku ngelaban Petara, merinsaka bala nembiak Iya sereta enda bebasaka orang.” (1 Tim. 1:13) Tu terang nunjukka, Paul mengkang ingat ngagai Stepen sereta utai ke disebut iya. Kebendar iya, utai ke dipadah sereta utai ke ditulis Paul ngerembaika agi poin ke disebut Stepen. (SKR. 7:48; 17:24; Heb. 9:24) Pengujung iya, Paul mayuh belajar ari teladan pengarap sereta pemerani Stepen ke “bisi kuasa Petara sereta amat dikerinduka Petara.” Tang diatu bisi siti tanya ngagai semua kitai: Ulih kitai neladan Stepen?
a Sekeda orang ke ngelaban datai ari “raban Orang ke Udah Dilepaska.” Sida engka kala ditangkap orang Rome, lalu pengudah nya dilepaska. Tauka sida mega engka ulun ke udah bibas, lalu sida nyadi orang ke megai pengarap Judah. Sekeda ari sida tu datai ari Kilikia, baka Saul ke datai ari Tarsus. Kebendar iya, Tarsus tu indu nengeri menua Kilikia. Taja pia Bup Kudus nadai meri penerang sekalika Saul bisi enggau sida ke datai ari Kilikia tu, lebuh sida enda ulih nyangkal utai ke disebut Stepen lebuh sida bekelikuh.
b Stepen nyebut pasal penerang ke enda ulih ditemu kitai ba bup mit bukai dalam Bup Kudus. Ambika chunto, fakta pasal pelajar Moses nitihka chara orang Ejip, umur iya lebuh iya terubah kali rari ari Ejip, lalu berapa lama iya diau ba Midian.
c Nitihka undang-undang orang Rome, nadai bukti ti nunjukka Raban Kunsil Orang Judah bisi kuasa kena ngukum bunuh orang. (Jhn. 18:31) Kebendar iya, sida udah ngereja jenayah lebuh sida munuh Stepen. Utai ke dikereja sida salah sereta enda nitihka undang-undang.
