PELAJAR 24
“Anang Takut!”
Orang Judah ngaga pelan deka munuh Paul, lalu iya ngetanka diri ba mua Feliks
Bepelasarka Surat Kereja Rasul 23:11–24:27
1, 2. Nama kebuah Paul enda tekenyit enggau pemerinsa ke ditapi iya ba Jerusalem?
PAUL diselamatka ari orang mayuh ke deka nyerang iya ba Jerusalem. Udah nya, Paul sekali agi dijil. Rasul Paul enda tekenyit enggau pemerinsa ke ditapi iya ba Jerusalem. Tu ketegal iya udah ditangkan pasal iya deka “dijil sereta napi pemerinsa” ba Jerusalem. (SKR. 20:22, 23) Taja pan Paul enda nemu enggau silik nama utai ke deka nyadi ngagai iya, tang Paul nemu diri deka terus diperinsa ketegal nama Jesus.—SKR. 9:16.
2 Bala nabi ari raban gempuru baka Agabus udah nangkan Paul, lalu madahka iya deka ditangkap sereta ‘diserahka ngagai orang bansa bukai.’ (SKR. 21:4, 10, 11) Bedau lama ti udah, mayuh orang Judah nguji deka munuh iya. Lalu enda lama udah nya, orang ba Raban Kunsil Orang Judah bekelikuh pasal utai ke disebut Paul nyentukka sida deka “munuh Paul.” Diatu, Paul dijil lalu dijaga bala soldadu Rome. Lalu iya deka dipechara mayuh kali sereta patut ngetanka diri ketegal jaku tuduh orang ke ngelaban iya. (SKR. 21:31; 23:10) Endang amat, rasul Paul begunaka pengering sereta jaku peransang!
3. Ari ni kitai nerima jaku peransang ngambika ulih terus ngereja pengawa nginjil?
3 Ba hari ti penudi tu, kitai nemu “semua murid Jesus Kristus ke ingin deka nyembah Petara enggau ati ti enda bebagi mega deka diperinsa.” (2 Tim. 3:12) Nya alai, kitai seruran begunaka jaku peransang ngambika ulih neruska pengawa nginjil. Kitai amat beterima kasih laban nerima jaku peransang ti negu ati sereta ba maya ti ngena! Kitai nerima tu nengah litaricha Kristian sereta pengawa gempuru ke diatur “ulun ke tetap ati sereta bepenemu-dalam.” (Mat. 24:45) Jehovah udah besemaya, bala munsuh enda ulih ngemunaska nembiak Iya, lalu sida enda ulih mujur ngetuka pengawa nginjil kitai. (Isa. 54:17; Jer. 1:19) Tang baka ni enggau rasul Paul? Kati iya bisi nerima jaku peransang ngambika ulih terus meri saksi taja pan disakal? Enti pia baka ni, enggau nengah sapa Paul bulih jaku peransang, lalu nama reaksi iya?
Ngasuh “Sumpah” nya Enda Mujur (Surat Kereja Rasul 23:11-34)
4, 5. Nama jaku peransang ke diterima Paul, lalu nama kebuah jaku peransang nya diberi ba maya ti ngena?
4 Ba malam pengudah rasul Paul diselamatka ari Raban Kunsil Orang Judah, iya amat begunaka jaku peransang. Bup Kudus madahka: “Tuan bediri ngimbai Paul lalu bejaku: ‘Anang takut! Nuan patut meri saksi pasal aku ba Rome, baka nuan ke udah meri saksi enggau silik pasal aku ba Jerusalem.’” (SKR. 23:11) Ketegal jaku peransang ari Jesus, Paul yakin iya tentu deka diselamatka. Lalu iya tentu deka ngagai Rome sereta bisi peluang meri saksi pasal Jesus ba dia.
“Lebih ari 40 iku orang deka ngenyit nyerang Paul.”—Surat Kereja Rasul 23:21
5 Paul nerima jaku peransang ba maya ti ngena. Tu ketegal sehari pengudah nya, lebih ari 40 iku lelaki orang Judah “ngaga pelan kena munuh Paul. Sida mega besumpah enda makai tauka ngirup nyentukka sida udah munuh iya.” “Sumpah” ke digaga sida nunjukka sida amat keran deka munuh Paul. Tang enti sida enda mujur munuh Paul, sida pechaya sida deka nerima tulah. (SKR. 23:12-15) Nama pelan sida? Sida deka mai Paul ngagai Raban Kunsil Orang Judah. Sida ngaga diri baka ke deka mansik kes iya enggau silik agi. Tang kebendar iya, sida deka nganti ba siti endur. Lalu sebedau Paul ulih datai ngagai Raban Kunsil Orang Judah, sida deka dulu agi nyerang sereta munuh iya ba endur nya. Nambahka nya, pelan sida disukung bala tuai imam enggau bala tuai bansa.
6. Nama kebuah pelan deka munuh Paul enda mujur, lalu nama ulih dipelajarka bala nembiak kemayaharitu ari anak menyadi indu Paul?
6 Taja pia, anak menyadi indu Paul ninga pasal pelan sida ke deka ngenyit nyerang Paul. Udah nya, iya terus madahka nya ngagai Paul. Lalu, rasul Paul ngasuh iya madahka nya ngagai siku pegawai soldadu Rome ke benama Klaudius Lisias. (SKR. 23:16-22) Kemayaharitu, Jehovah amat sayauka bala nembiak ti berani baka anak menyadi indu Paul. Sida amat berani nyentukka sanggup berambunka nyawa kena nulung bala menyadi Kristian. Sida mega bebendar ngenuluka Perintah Petara.
7, 8. Nama atur ke digaga Klaudius Lisias kena nyaga pengelikun Paul?
7 Nama atur ke digaga Klaudius Lisias pengudah nemu pelan orang ke deka munuh Paul? Iya ngasuh 1,000 iku pegawai sereta 470 iku bala soldadu ke bukai ngiring Paul ninggalka Jerusalem ba malam nya, sereta mai iya ngagai Kaisaria enggau selamat. Raban soldadu ke nganjung Paul nya nyengkaum raban soldadu ke biasa, raban soldadu ke megai sangkuh sereta raban soldadu ke nepan kuda. Lebuh sida datai ba Kaisaria, bala soldadu nya patut mai Paul ngagai Gabenor Feliks. a Iya ke amat, Kaisaria nya endur alai perintah Rome merintah Judea. Pia mega, Kaisaria alai indu opis perintah Rome ngatur pengawa soldadu ba Judea. Bisi mayuh orang Judah diau ba Kaisaria, tang orang bansa bukai ke mayuh agi diau dia. Situasi ba Kaisaria manah sereta tenang agi enti dibanding enggau Jerusalem. Tu ketegal, orang ba Jerusalem bepilih mata enggau pengarap bukai nyentukka sida kelalu nitihka asai ati deka ngetanka pengarap diri, sereta selalu nyerang orang enggau raban ti mayuh.
8 Ketegal Lisias nitihka undang-undang, iya nganjung surat ngagai Feliks kena nerangka kes rasul Paul. Lisias madah pengudah iya nemu Paul orang peranak Rome, iya nyelamatka Paul lebuh Paul “nyauka dibunuh” orang Judah. Lisias mega madahka, iya nadai tetemuka nama-nama penyalah Paul ke “patut ngasuh iya diukum mati tauka dijil.” Tang ketegal orang bisi pelan deka munuh Paul, Lisias patut nganjung Paul ngagai Feliks. Nya alai, Gabenor Feliks ke deka ningaka jaku tuduh ngagai Paul sereta ngakim kes nya.—SKR. 23:25-30.
9. (a) Baka ni hak Paul ke nyadi peranak Rome enda dipebasa Lisias? (b) Baka ni kitai ulih ngena hak kitai sebagai warganegara ba menua diri empu kena nyaga kitai?
9 Enda semua utai ke dipadah Lisias nya amat. Tu ketegal, iya deka nunjukka diri manah ba mua Gabenor Feliks. Taja pan Lisias nemu Paul nya orang peranak Rome, tang iya enda tekala nya nyelamatka Paul. Kelimpah ari nya, Lisias nadai madahka iya “nanchang Paul ngena dua iti rantai,” enggau ngasuh Paul “ditasat sereta disipat.” (SKR. 21:30-34; 22:24-29) Enggau nya, Lisias enda bebasaka hak Paul ke nyadi orang peranak Rome. Kemayaharitu, Sitan ngena orang ke fanatik enggau agama nyadi batu api ngambika orang balat agi merinsaka kitai. Lalu hak kitai ke nyadi warganegara engka enda dipebasa. Tang baka Paul, nembiak Petara ulih ngena hak sida sebagai warganegara kena bulih jaga ari undang-undang.
“Aku Lantang Ati Deka Bejaku Kena Ngetanka Diri” (Surat Kereja Rasul 23:35–24:21)
10. Nama jaku tuduh ti berat ke dikena ngelaban Paul?
10 Ba Kaisaria, sida patut nganti penatai orang ke ngelaban Paul ari Jerusalem. Lebuh maya nya, Paul “ditan ba istana Herod.” (SKR. 23:35) Lima hari pengudah nya, sida ke ngelaban Paul nya pan datai. Dalam raban nya, bisi Imam Besai Ananias, enggau siku luyar ke benama Tertulus sereta bala tuai raban bansa. Terubah iya, kena ngambi ati Feliks, Tertulus muji pengawa iya ke orang Judah. b Udah nya, iya lalu meri jaku tuduh kena ngelaban Paul. Tu meh utai ke dipadah Tertulus pasal Paul: “Lelaki tu mai penusah, lalu ngasut orang Judah ba serata dunya ngambika ngelaban perintah. Kelimpah ari nya, iya mega siku ketuai raban pengarap orang Nasaret. Iya mega nguji deka ngamahka Rumah Sembiang. Nya alai kami nangkap iya.” Lalu orang Judah ke bukai “mega bela nuduh Paul, lalu bebendar madahka utai ke disebut nya amat.” (SKR. 24:5, 6, 9) Nyadi, Paul dituduh ngelaban perintah. Iya mega dituduh ngiring raban pengarap ke dikumbai bahaya, sereta dituduh ngamahka Rumah Sembiang. Semua jaku tuduh tu amat berat nyentukka ulih ngasuh Paul diukum mati.
11, 12. Baka ni Paul ngetanka diri lebuh iya dituduh?
11 Lebuh Paul dikemendarka bejaku, iya madahka: “Aku lantang ati deka bejaku kena ngetanka diri.” Kelimpah ari nya, Paul madahka diri nadai ngereja penyalah nya. Lalu iya nadai ngamahka Rumah Sembiang, tauka mai orang ngelaban perintah Rome. Paul mega madahka, iya “betaun-taun” nadai ba Jerusalem, lalu iya datai “mai duit pemeri” ngagai orang Kristian ke miskin ketegal lapar pungkang sereta diperinsa. Nambahka nya, Paul madah sebedau iya tama ngagai Rumah Sembiang, iya udah “nuchi diri nitihka adat” lalu iya bebendar “ngetanka ati ti beresi ba mua Petara enggau ba mua mensia.”—SKR. 24:10-13, 16-18.
12 Taja pia, Paul ngaku iya nyembah Petara ke disembah aki ini iya empu “nitihka ajar raban pengarap ke disebut sida nya.” Tang iya mega madahka, iya arapka semua “utai ke ditulis ba Adat sereta Ajar Sida Nabi.” Lalu baka raban orang ke ngelaban iya, Paul mega “andal Petara deka ngidupka orang ke lurus enggau ke enda lurus.” Udah nya, Paul cabar sida ke nuduh iya ngambika mai bukti kena nyukung jaku tuduh sida. Ku Paul: “Enti sema aku besalah, sida semina ulih nuduh aku ketegal siti pekara aja. Lebuh aku dipechara, aku nyebut enggau inggar: ‘Seharitu aku dipechara ba mua kita, laban aku andal, orang mati deka diidupka baru!’”—SKR. 24:14, 15, 20, 21.
13-15. Nama kebuah kitai ulih ngumbai Paul teladan ti manah meri saksi enggau berani ba mua piak ti bekuasa?
13 Kitai engka dibai ngagai piak ti bekuasa ketegal pengawa sembah kitai ngagai Jehovah. Pia mega, kitai engka dituduh ngereja penyalah. Ambika chunto, orang engka nuduh kitai mai orang ngereja penyai, ngelaban perintah tauka enggau “raban pengarap ke dikumbai bahaya.” Ba senentang tu, kitai ulih neladan Paul. Paul nadai nguji deka ngambi ati gabenor baka ke digaga Tertulus. Paul mengkang tenang sereta nunjukka basa. Iya bejaku enggau bejimat, sereta meri penerang ti lurus enggau jujur. Nambahka nya, Paul madahka “sekeda orang Judah ari Asia” ke nuduh iya ngamahka Rumah Sembiang nadai bisi ba dia. Lalu nitihka undang-undang, Paul bisi hak bejaku ngagai sida sereta ningaka jaku dawa ke dibantaika sida ngagai iya.—SKR. 24:18, 19.
14 Tang ke pemadu penting nya, Paul enda takut deka madahka utai ke dipechaya iya. Enggau berani, Paul madahka diri arapka pengangkat ari mati. Taja pan isu nya udah kala ngasuh Raban Kunsil Orang Judah balat charut, tang Paul enda takut nyebut baru pasal pekara nya. (SKR. 23:6-10) Lebuh Paul ngetanka diri, iya nekanka poin pasal harapan pengangkat ari mati. Nama kebuah? Tu ketegal, Paul benung nginjil pasal Jesus sereta pengangkat Jesus ari mati. Lalu semua utai ti dipadah Paul enda ulih diterima orang ke ngelaban iya. (SKR. 26:6-8, 22, 23) Iya ke amat, semua penanggul tu nyadi ketegal Paul pechayaka harapan pengangkat ari mati. Tang ke silik agi, penanggul tu mega nyadi laban Paul arapka Jesus sereta pengangkat Jesus ari mati.
15 Baka Paul, kitai ulih meri saksi enggau berani. Kitai mega tau bulih pengering ari utai ke dipadah Jesus ngagai bala murid iya. Ku Jesus: “Semua orang deka begedika kita ketegal nama aku. Tang orang ke tan datai ke ujung, deka diselamatka.” Nya alai, kati kitai patut berasai irau enggau utai ke deka disebut kitai? Enda, laban Jesus udah besemaya: “Lebuh kita ditangkap lalu dibai ngagai kot, anang irauka utai ke deka disebut kita. Sebut aja nama-nama utai ke dipadah kuasa kudus Petara ngagai kita maya nya. Laban utai ke disebut kita ukai datai ari kita, tang ari kuasa kudus Petara.”—Mrk. 13:9-13.
“Feliks Nyadi Takut” (Surat Kereja Rasul 24:22-27)
16, 17. (a) Nama disebut sereta digaga Feliks lebuh Paul dipechara? (b) Nama utai ke ngasuh Feliks takut, lalu nama kebuah Feliks suah ngangauka Paul?
16 Tu ukai kali keterubah Gabenor Feliks ninga utai ke dipechayaka orang Kristian. Bup Kudus madahka: “Tang Feliks ke nemu mayuh pasal Jalai Tuan (nama ke dikena ngumbai bala murid Jesus sebedau sida dikumbai orang Kristian) nangguhka pechara nya. Ku iya madahka: ‘Lebuh ketuai soldadu ke benama Lisias datai, aku deka ngaga pemutus pasal pekara tu.’ Udah nya, iya ngasuh pegawai soldadu ngejil Paul. Tang Paul enda ibuh dijaga enggau terit. Lalu bala kaban iya dikemendarka meri utai ke diguna iya.”—SKR. 24:22, 23.
17 Beberapa hari pengudah nya, Feliks enggau bini iya, Drusila, iya nya siku indu bansa Judah, ngangauka Paul lalu “ningaka Paul nerangka nama patut digaga orang enti deka arapka Jesus Kristus.” (SKR. 24:24) Taja pia, lebuh Paul bejaku pasal “utai ti lurus, pasal ulah nagang diri, enggau pasal hari pechara ti deka datai, Feliks nyadi takut.” Feliks engka enda nyamai ati laban udah ngereja mayuh utai ti jai. Nyadi, iya madahka Paul: “Nuan ulih mupuk diatu. Lebuh bisi peluang, aku deka ngasuh orang ngangauka nuan baru.” Pengudah hari nya, Feliks mayuh kali ngangauka Paul. Taja pia, ukai ketegal iya deka ningaka pemendar, tang iya ngarapka Paul deka meri iya duit.—SKR. 24:25, 26.
18. Nama kebuah Paul bejaku ngagai Feliks enggau bini iya pasal “utai ti lurus, pasal ulah nagang diri, enggau pasal hari pechara ti deka datai”?
18 Nama kebuah Paul bejaku ngagai Feliks enggau bini iya pasal “utai ti lurus, pasal ulah nagang diri, enggau pasal hari pechara ti deka datai”? Sebedau nya, sida deka nemu nama utai ke patut digaga ngambika ulih “arapka Jesus Kristus.” Tang, Paul nemu seduai iya idup enggau chara ti enda menuku, jai, sereta enda adil. Nya alai, Paul nerang pasal utai ke dipinta Petara enti sesiku orang deka nitihka Jesus. Utai ke disebut Paul nunjukka bida entara standard pengelurus Petara enggau chara pengidup Feliks seduai bini iya. Jaku Paul patut udah nulung seduai iya nemu, orang deka betanggungjawap ngagai Petara bekaul enggau utai ti dirunding, disebut, sereta digaga sida. Tang ke pemadu penting nya, chara Feliks ngakim Paul deka diakim Petara mega. Nya meh kebuah Feliks “nyadi takut”!
19, 20. (a) Nama patut digaga kitai lebuh orang ke ditemu kitai ba pengawa nginjil baka ke nunjukka minat, tang iya enggai ngubah chara pengidup iya nitihka ajar Bup Kudus? (b) Nama kebuah kitai nemu Feliks ukai kaban Paul ti bendar?
19 Ba pengawa nginjil, kitai engka bisi tetemuka orang baka Feliks. Sida engka nunjukka diri baka ke minat enggau pemendar, tang sida enggai ngubah chara pengidup nitihka ajar Bup Kudus. Nyadi, kitai patut bejimat lebuh deka nulung orang ke baka nya. Tang baka Paul, kitai ulih bejaku enggau bejimat ngagai sida. Kitai ulih madah ngagai sida pasal standard pengelurus Petara. Pemendar nya engka deka negu ati sida. Taja pia, enti sida nunjukka diri nadai pengingin deka ngubah chara pengidup sida ti bedosa, kitai enda ibuh nguji deka nulung sida agi. Tang, kitai patut ngiga orang ke amat-amat bisi pengingin deka belajarka pemendar.
20 Bekaul enggau Feliks, tuju ati iya ulih dipeda ari ayat tu: “Pengudah dua taun, Porkius Festus nganti Feliks nyadi gabenor. Maya nya, Paul agi dijil, laban Feliks keran deka ngambi ati orang Judah.” (SKR. 24:27) Feliks ukai kaban Paul ti bendar. Tu ketegal, Feliks nemu sida ke nitihka “Jalai Tuan” ukai orang ke ngelaban perintah. (SKR. 19:23) Iya mega nemu, Paul nadai ngelanggar sebarang undang-undang Rome. Tang, Feliks terus ngejil Paul ketegal iya deka “ngambi ati orang Judah.”
21. Nama nyadi ngagai Paul pengudah Porkius Festus nyadi gabenor, lalu nama utai ke terus ngeringka Paul?
21 Baka ke dipadah ba ayat ti penudi dalam Surat Kereja Rasul bagi 24, Paul agi dijil lebuh Porkius Festus nganti Feliks nyadi gabenor. Nya alai, Paul mayuh kali dipechara. Lalu Paul mega mayuh kali dibai ngagai mayuh pemerintah. Endang amat, rasul Paul ti berani “dibai ngagai raja enggau gabenor.” (Luk. 21:12) Baka ke deka dipelajarka kitai pengudah tu, iya deka meri saksi ngagai pemerintah ti pemadu bekuasa ba jeman nya. Taja pan Paul napi mayuh macham penusah, tang pengarap iya nadai kala lemi. Paul terus bulih pengering ari jaku Jesus ke madahka: “Anang takut!”
a Peda kutak “ Feliks—Gabenor Judea.”
b Tertulus beterima kasihka Feliks. Ku iya madah: “Ketegal nuan, kami ulih idup lantang.” Taja pia, lebuh Feliks nyadi gabenor, menua Judea enda entu selamat. Tu ketegal, chara Feliks merintah enda manah enti dibanding enggau gabenor bukai sebedau tu, sereta enggau pemerintah bukai ke merintah nyentuk ngagai maya orang Judah ngelaban perintah Rome. Nya alai, Tertulus benung bebula lebuh iya madah orang Judah “seruran beterima kasihka” pengawa ke udah digaga Feliks. Kebendar iya, mayuh orang Judah begedika Feliks laban iya udah ngenusahka pengidup sida. Lalu lebuh orang Judah angkat ngelaban perintah Rome, Feliks ngelayan sida enggau chara ti amat jai.—SKR. 24:2, 3.
