PELAJAR 25
“Aku Deka Minta Raja Rome Ngakim Aku!”
Paul netapka teladan ti manah bekaul enggau ngetanka Berita Manah
Bepelasarka Surat Kereja Rasul 25:1–26:32
1, 2. (a) Nama nyadi ba Paul? (b) Ketegal Paul minta diakim Raja Besai Rome, nama tanya ke ulih diperundingka kitai ba senentang tu?
BA KAISARIA, bala soldadu nyaga Paul enggau terit. Dua taun sebedau nya, iya pulai baru ngagai Judea. Lebuh maya nya dalam timpuh beberapa hari aja, orang Judah nguji deka munuh iya kira-kira 3 kali. (SKR. 21:27-36; 23:10, 12-15, 27) Taja pan bala munsuh enda mujur munuh Paul, tang sida enda putus asa. Ketegal Paul nemu sida agi nguji deka munuh iya, nya alai iya madah ngagai Gabenor Rome ke benama Festus: “Aku deka minta raja Rome ngakim aku!”—SKR. 25:11.
2 Kati Jehovah nyukung pemutus Paul ke minta diakim raja Rome? Saut iya amat penting ke kitai, laban kitai benung meri saksi enggau silik pasal Perintah Petara ba hari ti penudi tu. Kitai patut nemu chara Paul “bebendar ngulihka hak ari perintah ngambika ulih ngerembaika Berita Manah.” Enggau nya, kitai deka nemu baka ni kitai ulih neladan iya.—Plp. 1:7.
“Benung Bediri ba Mua Kerusi Hakim” (Surat Kereja Rasul 25:1-12)
3, 4. (a) Nama kebuah orang Judah minta Paul dibai ngagai Jerusalem, lalu baka ni iya ulih tetap selamat sereta enda dibunuh sida? (b) Baka ni Jehovah nulung bala nembiak Iya kemayaharitu baka Iya ke kala nulung Paul suba?
3 Tiga hari pengudah Festus nyadi gabenor Rome ke merintah atas Judea, iya ngagai Jerusalem. a Ba dia, Festus ninga bala tuai imam enggau bala tuai bansa orang Judah mantaika jaku tuduh sida kena ngelaban Paul. Sida nemu Festus ke baru nyadi gabenor ngasaika tekanan laban deka ngetanka kaul ti manah enggau sida, sereta enggau semua orang Judah. Nya alai, sida minta Festus mai Paul ngagai Jerusalem lalu pechara kes Paul ba dia. Taja pia, sida ngaga pelan ti jai deka munuh Paul ba siti jalai ari Kaisaria ke nuju ngagai Jerusalem. Tang, Festus enda setuju enggau peminta sida. Ku iya madah ngagai sida: “Manah agi enti bala tuai kita mupuk enggau aku [ngagai Kaisaria] lalu mantaika jaku tuduh kita pasal iya enti iya amat udah ngereja penyalah.” (SKR. 25:5) Nya alai, Paul agi tetap selamat sereta enda dibunuh bala munsuh.
4 Sekumbang Paul napi semua penusah tu, Jehovah ngena Jesus Kristus ngeringka iya. Ambika chunto dalam siti genera, Jesus madah ngagai rasul Paul: “Anang takut!” (SKR. 23:11) Kemayaharitu, nembiak Petara mega napi penusah sereta diperinsa ketegal nginjil Berita Manah. Endang amat, Jehovah enda ngelindung kitai ngambika enda kena penusah. Taja pia, Iya meri kitai penemu-dalam enggau pengering ngambika ulih tan ngenatka semua penusah ke nuntung kitai. Kitai pechaya Jehovah tentu deka meri kitai “kuasa ke ngelui ari pengering mensia” napi semua penusah nya.—2 Kor. 4:7.
5. Baka ni chara Festus ngaduka kes Paul?
5 Beberapa hari pengudah nya, Festus “duduk ba kerusi hakim” ba Kaisaria. b Ba mua iya, bisi Paul sereta sida ke nuduh Paul. Kena nyaut jaku tuduh bala sida ke ngelaban nya, Paul madahka: “Aku nadai ngelanggar Adat orang Judah, lalu aku mega nadai ngereja nama-nama penyalah ke ngelaban raja Rome tauka Rumah Sembiang.” Paul bejaku munyi nya laban bala penuduh nadai bukti kena nyukung utai ke disebut sida. Reti iya, rasul Paul nadai ngereja nama-nama penyalah lalu iya patut dilepaska ari jil. Nya alai, nama pemutus ke deka digaga Festus? Ketegal iya deka ngambi ati orang Judah, iya pan nanya Paul: “Kati nuan deka kes nuan dipechara ba Jerusalem?” (SKR. 25:6-9) Cadangan Festus enda manah! Enti Paul dianjung baru ngagai Jerusalem, sida ke nuduh iya deka ngaga diri nyadi hakim, lalu tentu deka munuh Paul. Ba senentang tu, Festus enda ngakim enggau adil. Iya semina deka ngagaka ati orang Judah ngambika iya bulih penguntung ke diri empu ari segi politik. Sebedau tu, bisi gabenor ke bukai, iya nya Pontius Pilate mega enda adil lebuh pechara kes Jesus. (Jhn. 19:12-16) Kemayaharitu bala hakim mega engka alah ditekan ketegal politik. Nya alai, kitai enda tekenyit enti sema bala hakim ba mahkamah ngaga pemutus ti enda sejalai enggau bukti ti betul pasal nembiak Petara.
6, 7. Nama kebuah Paul minta diakim raja Rome, lalu nama ulih dipelajarka kitai ari teladan iya?
6 Pengingin Festus ke deka ngagaka ati orang Judah ulih ngasuh Paul mati dibunuh bala munsuh. Nya alai, Paul ngena hak iya ke nyadi orang peranak Rome kena ngetanka diri empu. Ku iya madah ngagai Festus: “Aku benung bediri ba mua kerusi hakim raja Rome, lalu ba ditu meh aku patut dipechara. Tuan, nuan empu nemu, aku enda besalah ngagai orang Judah. . . . Aku deka minta raja Rome ngakim aku!” Peminta ke baka nya enda tau enda dititihka. Nyadi Festus madahka tu ngagai Paul: “Nuan minta raja Rome ngakim nuan, nya alai raja Rome meh ke deka ngakim nuan.” (SKR. 25:10-12) Lebuh Paul minta diakim Raja Besai Rome, iya netapka teladan ti manah ngagai kitai kemayaharitu. Lebuh bala munsuh “ngaga atur ti jai” ngelaban kitai, kitai suah ngena undang-undang ngambika ulih ngetanka hak kitai ngerembaika Berita Manah. c—Mas. 94:20.
7 Pengujung iya, pengudah dijil lebih ari 2 taun taja pan enda ngereja penyalah, Paul diberi peluang mai kes iya ngagai Rome. Tang sebedau iya mupuk kin, Raja Agripa deka betemu enggau iya.
Lebuh mahkamah ngaga pemutus ti enda nyukung kitai, kitai deka minta mahkamah tinggi meresa baru pemutus nya
“Aku Ngasi” (Surat Kereja Rasul 25:13–26:23)
8, 9. Nama kebuah Raja Agripa datai ngagai Kaisaria?
8 Nama nyadi beberapa hari pengudah Festus ninga pasal peminta Paul ke minta diakim Raja Besai Rome? Maya nya, Raja Agripa enggau menyadi indu iya Bernis “datai ba Kaisaria deka meri basa” ngagai Gabenor Festus ke baru aja dipilih. d Ba jeman Rome suba, bala pemerintah wajib betemu enggau gabenor ke baru dipilih. Enggau nya, Agripa deka bisi kaul ti manah enggau Gabenor Festus. Semua nya deka meri penguntung ngagai Agripa sebagai siku raja.—SKR. 25:13.
9 Festus madah ke Raja Herod Agripa pasal Paul. Ketegal nya, Agripa madahka diri deka betemu enggau Paul. Ba hari siti, Festus enggau Agripa duduk ba kerusi hakim. Seduai iya amat bekuasa. Taja pia, jaku Paul ngagai seduai iya jauh manah agi ari kuasa ke dikembuan seduai iya ba perintah.—SKR. 25:22-27.
10, 11. Baka ni Paul nunjukka basa ngagai Agripa, lalu nama dipadahka Paul pasal pengidup iya ke suba ngagai Raja Agripa?
10 Paul nunjukka basa sereta meri terima kasih ngagai Raja Agripa laban diberi peluang bejaku kena ngetanka diri. Paul mega madahka, Raja Agripa amat nemu gaya orang Judah sereta kelikuh sida. Nyadi, tu meh utai ke dipadah Paul pasal pengidup iya ke suba: “Aku ke kala nyadi orang Parisi. Nya raban pengarap ke pemadu terit.” (SKR. 26:5) Lebuh Paul nyadi orang Parisi suba, iya pechayaka semaya Petara bekaul enggau penatai Messiah ke Disemaya. Tang pengudah iya nyadi Kristian, iya enggau berani madahka Jesus Kristus meh Messiah ke dianti. Ba senentang tu, bisi utai ti sama ke dipechaya Paul enggau bala munsuh iya. Sida sama nganti Petara ngamatka semaya ke kala dipadah Iya ngagai aki ini sida suba. Taja pia, Paul dipechara ketegal semaya Petara nya. Situasi tu ngasuh Raja Agripa majak agi bisi minat enggau jaku Paul. e
11 Ku Paul ngenang baru chara iya kala balat jai ngelayan orang Kristian: “Suba aku empu pan ngasaika diri patut bebendar ngelaban nama Jesus, orang Nasaret nya. . . . Aku amat begedika sida [bala murid Kristus] nyentukka aku sanggup merinsaka sida indah ba nengeri bukai.” (SKR. 26:9-11) Paul enda ngaga cherita ngapa. Mayuh orang nemu pasal penyai ke kala digaga iya ngagai orang Kristian. (Gal. 1:13, 23) Nya alai, Agripa engka berunding: ‘Nama utai ke ngasuh Paul berubah?’
12, 13. (a) Baka ni Paul nyeritaka pasal iya ngubah pengarap nyadi orang Kristian? (b) Baka ni Paul suba “majak ngelaban”?
12 Jaku Paul pengudah nya meri saut ngagai Raja Herod Agripa, ku iya madah: “Aku mansang ngagai Damaskus pengudah nerima kuasa enggau pesan ari bala tuai imam. Tuan, maya tengah hari lebuh ba rantau jalai, bisi penampak ari langit ke terang agi ari mata panas manchar ngelingi aku sereta orang ke enggau aku. Kami lalu rebah ke tanah. Udah nya, aku bisi ninga nyawa bejaku enggau aku dalam jaku Hebrew: ‘Saul, Saul, nama kebuah nuan merinsaka aku? Enti nuan majak ngelaban aku, nuan deka ngemediska diri empu.’ Aku lalu nanya: ‘Sapa nuan, Tuan?’ Tuan pan nyaut: ‘Aku tu Jesus, orang ke diperinsaka nuan.’” f—SKR. 26:12-15.
13 Sebedau nerima genera nya, Paul suba “majak ngelaban.” Iya baka siku jelu ke majak nendang kayu ti tajam ke dikena ngiring iya. Enggau nya, Paul nagang diri bisi kaul ti manah enggau Petara laban iya majak nulak peneka Petara. Nyadi lebuh Jesus ke udah diangkatka idup baru pegari ngagai Paul ba rantau jalai ke Damaskus, Jesus nulung iya ngubah runding diri empu.—Jhn. 16:1, 2.
14, 15. Nama dipadah Paul pasal semua ubah ke digaga iya dalam pengidup?
14 Paul udah ngaga mayuh ubah ti besai ba pengidup iya. Tu meh utai ke dipadah iya ngagai Agripa: “Nya meh kebuah aku ngasika genera ke datai ari serega nya. Aku nusui berita manah ti madahka, orang patut nesal ati sereta nguingka diri ngagai Petara, lalu ngereja pengawa ke nunjukka sida udah nesal ati. Aku nusui berita nya berengkah ari Damaskus. Udah nya, Jerusalem, lalu ba serata Judea sereta ngagai bansa bukai.” (SKR. 26:19, 20) Suba, Jesus pegari ba mua Paul ba jalai ke nuju ngagai Damaskus. Kenyau ari hari nya, Paul betaun-taun ngereja pengawa ke diberi Jesus Kristus ngagai iya. Nama asil iya? Sida ke ningaka Berita Manah ke ditusui Paul nesal ati. Sida badu agi ngereja pengawa ti enda menuku sereta enda jujur, lalu berengkah ngereja peneka Petara. Sida mega nyadi rayat ti manah agi laban sida ngasika undang-undang, lalu meransang orang diau bebaik enggau pangan diri.
15 Taja pia, semua ubah tu nadai reti ba orang Judah ke ngelaban Paul. Nya alai Paul madah: “Nya meh kebuah orang Judah nangkap aku lebuh aku ba Rumah Sembiang, lalu sida nguji deka munuh aku. Taja pia, ketegal bantu ari Petara, nyentukka seharitu aku terus meri saksi ngagai semua orang, enda ngira ngagai orang biasa tauka ngagai orang ke tinggi pangkat.”—SKR. 26:21, 22.
16. Baka ni kitai ulih neladan Paul lebuh bejaku pasal pengarap kitai ngagai bala hakim sereta piak bekuasa?
16 Ketegal kitai orang Kristian ti bendar, kitai mesti “seruran besedia nyaut” orang pasal pengarap kitai. (1 Pet. 3:15) Kitai ulih neladan chara Paul lebuh iya bejaku ngagai Agripa sereta Festus, enti sema kitai patut bejaku ngagai bala hakim sereta piak bekuasa pasal pengarap kitai. Enggau basa, kitai ulih madah baka ni ajar Bup Kudus udah ngemanahka pengidup kitai sereta pengidup orang ke nerima pesan kitai. Enggau nya, kitai ulih negu ati bala pemerintah tu.
‘Enti Aku Majak Ningaka Nuan, Aku ke Nyau Nyadi Orang Kristian’ (Surat Kereja Rasul 26:24-32)
17. Nama reaksi Festus pengudah ninga jaku Paul ke ngetanka diri empu, lalu baka ni mayuh orang kemayaharitu bisi reaksi ti sama baka Festus?
17 Pengudah seduai iya ningaka jaku Paul ke ngetanka diri empu, Festus enggau Agripa tetap keras enggau penemu seduai iya. Tu meh utai ke nyadi: “Pengudah Paul nyebut utai nya kena ngetanka diri, Festus lalu bejaku enggau nyawa ti inggar: ‘Nuan tu udah gila, Paul! Penemu nuan ke mayuh nya udah ngasuh nuan gila!’” (SKR. 26:24) Iya ke amat, reaksi ke ditunjukka Festus sama enggau chara orang kemayaharitu. Nama kebuah? Mayuh orang kemayaharitu ngumbai sida ke ngajar orang Bup Kudus nya fanatik enggau agama. Pia mega, orang ke dikumbai pintar ba dunya tu tusah deka nerima ajar Bup Kudus pasal pengangkat ari mati.
18. Baka ni Paul nyaut Festus, lalu nama utai ke diperundingka Agripa pengudah nya?
18 Tang Paul nyaut Gabenor Festus: “Enda aku gila deh, Tuan Festus ti Bemulia. Semua utai ke disebut aku nya amat, lalu ukai datai ari runding ti enda betul. Kebendar iya, aku ulih bejaku terus terang ngagai Raja Agripa laban iya udah nemu pasal pekara tu. . . . Tuan Raja Agripa, kati nuan pechayaka utai ke ditulis bala nabi? Aku nemu nuan sigi pechaya.” Ku Agripa nyaut Paul: “Landik amat nuan bejaku, Paul. Enti aku majak ningaka nuan, enda lama agi aku ke nyau nyadi orang Kristian.” (SKR. 26:25-28) Kitai enda nemu sekalika jaku Agripa nya endang datai ari ati iya tauka iya bejaku ngapa. Tang tu nunjukka, Agripa berunding enggau dalam pasal jaku Paul ke udah meri saksi ngagai iya.
19. Nama pemutus ke digaga Festus enggau Agripa pasal Paul?
19 Pengudah nya Agripa enggau Festus bediri. Reti iya, pengawa pechara nya udah abis. Bup Kudus madahka: “Lebuh sida mupuk, sida bejaku enggau pangan diri: ‘Orang tu nadai ngereja nama-nama utai ke tau ngasuh iya diukum bunuh tauka dijil.’ Udah nya, Raja Agripa bejaku enggau Festus: ‘Kebendar iya, orang tu ulih dilepaska enti iya enda minta diakim raja Rome.’” (SKR. 26:31, 32) Seduai iya nemu, Paul langsung nadai ngereja nama-nama penyalah. Nya alai pengudah tu, seduai iya engka deka ngintu orang Kristian enggau chara ti manah agi.
20. Nama asil ti manah ketegal Paul udah nginjil ngagai piak ti bekuasa?
20 Festus enggau Agripa enda nyadi orang Kristian pengudah Paul nginjil ngagai sida. Taja pia, bisi asil ti manah ke diulih ketegal Paul udah ngetanka diri ba mua sida. Nama nya? Suba, pengawa meri saksi ngagai piak ti bekuasa ba Rome baka ke enda ulih dikereja. Tang ketegal Paul udah “dibai ngagai raja enggau gabenor” ba Judea, iya bisi peluang sereta udah mujur meri saksi ngagai piak ti bekuasa ba perintah Rome. (Luk. 21:12, 13) Pia mega, pengalaman sereta penetap ati iya taja pan diperinsa udah meransang sereta negapka pengarap bala menyadi Kristian.—Plp. 1:12-14.
21. Enti kitai terus nginjil taja pan disakal, nama asil ti manah ke deka diulih kitai?
21 Utai ti sama mega nyadi kemayaharitu. Enti kitai terus nginjil taja pan disakal sereta diperinsa, kitai deka nerima mayuh asil ti manah. Ambika chunto, kitai engka ngumbai diri nadai peluang nginjil ngagai piak ti bekuasa. Tang enti kitai disakal, peluang kena nginjil ngagai sida engka dibuka. Kelimpah ari nya, penetap ati sereta pengeliat ati kitai deka meransang bala menyadi Kristian. Enggau nya, sida deka nyadi berani agi ngereja pengawa meri saksi enggau silik pasal Perintah Petara.
a Peda kutak “ Porkius Festus Gabenor Rome.”
b “Kerusi hakim” diengkah ba atas pentas. Endur iya tinggi agi ari kerusi ke bukai. Tu nunjukka, pemutus ke digaga hakim nya patut dipebasa sereta enda ulih diubah. Suba, Pilate pan duduk ba kerusi hakim tu lebuh iya pechara kes Jesus.
d Peda kutak “ Raja Herod Agripa II.”
e Ketegal Paul siku orang Kristian, iya nerima Jesus nyadi Messiah. Taja pia, orang Judah nulak Jesus, nyadi sida ngumbai Paul orang ke limpang ari pengarap.—SKR. 21:21, 27, 28.
f Bup Kudus madahka, Paul bejalai “maya tengah hari.” Ba senentang tu, siku pakar Bup Kudus madahka: “Orang ke bejalai suah belelak maya tengah hari laban nya maya ti pemadu angat dalam sehari. Tang enti iya enda ngereja nya, reti iya, iya bisi pengawa ti amat penting ke patut digaga enggau jampat. Ketegal nya, kitai ulih meda Paul amat keran deka merinsaka orang Kristian.”
