1, 2. Nama kebuah Paul ngagai Jerusalem, lalu nama sekeda penanggul ke deka ditapi iya ba dia?

 SEKALI agi, Paul bejalai nengah mayuh jalai ti mit sereta ke bisi mayuh amat orang ba Jerusalem. Ba dunya, nadai nengeri bukai ke penting agi sereta istimewa agi ari Jerusalem. Tu ketegal, bisi mayuh sejarah pasal chara Jehovah kala ngintu nembiak Iya ba dia. Ketegal nya, mayuh orang ke diau ba Jerusalem amat temegah enggau sejarah ke dikembuan sida ba nengeri nya. Nya alai, mayuh orang Kristian ba Jerusalem kelalu bepegai ba chara sembah ti lama ke dikena suba, nyentukka sida enda ulih nerima chara baru ke dikena Jehovah ba pengawa sembah. Sebedau tu Paul ba Epesus, lalu iya deka ngagai Jerusalem laban deka nulung bala menyadi ba dia. Tang diatu, iya ukai semina deka nganjung duit pemeri ngagai bala menyadi ba Jerusalem. Iya mega deka nulung sida ngubah chara sida berunding. (SKR. 19:21) Taja pan bahaya ke Paul deka pulai baru ngagai Jerusalem, tang iya tetap deka kin.

² Nama sekeda penanggul ke deka ditapi Paul ba Jerusalem? Siti ari penanggul Paul deka datai ari bala murid Jesus. Runding sekeda sida balat dikachau laban bisi ninga berita ti enda betul pasal Paul. Tang bisi penanggul ke besai agi deka datai ari bala munsuh. Sida deka nuduh Paul, malu iya, sereta ngugut deka munuh iya. Taja pia, semua penusah tu deka meri Paul peluang ngetanka pengarap iya. Paul ngayanka pemaruh ati, pemerani sereta pengarap lebuh napi semua situasi ke tusah tu. Lalu, teladan iya deka ngajar kitai chara ngereja utai ti sama kemayaharitu.

3-5. (a) Paul betemu enggau sapa ba Jerusalem, lalu nama utai ke dikerandauka sida? (b) Nama ulih dipelajarka kitai ari aum Paul ba Jerusalem?

³ Sehari pengudah sida datai ba Jerusalem, Paul sereta sida ke enggau  iya betemu enggau bala tuai gempuru ba dia. Maya nya, nadai siku pan bala rasul bisi disebut. Reti iya, sida engka pindah ngagai raban gempuru ba endur bukai. Taja pia, James iya nya menyadi Jesus agi bisi ba Jerusalem. (Gal. 2:9) Maya nya, “semua bala tuai gempuru mega bisi ba dia” enggau Paul. Pia mega, James ke engka ngiring aum nya.—SKR. 21:18.

⁴ Paul meri jaku tabi ngagai bala tuai gempuru “lalu belabuh nusui enggau silik pasal utai ke udah digaga Petara ba orang bansa bukai nengah pengawa nginjil ke digaga iya.” (SKR. 21:19) Randau nya tentu meransang semua ke bisi ba aum nya. Kemayaharitu, kitai mega berasai diperansang lebuh ninga pasal pemansang pengawa nginjil ba menua bukai.—J-lam. 25:25.

⁵ Paul engka bisi nyebut pasal pemeri ke dibai iya ari menua Eropah. Bala menyadi ba Jerusalem tentu gaga amat ati laban nemu bala menyadi sida ari endur bukai ibuhka sida. Nama reaksi sida pengudah ninga jaku Paul? Bup Kudus madahka: “Sida [bala tuai gempuru] ngemuliaka Petara.” (SKR. 21:20a) Kemayaharitu, bisi mayuh menyadi ke napi penusah ketegal bencana alam tauka penyakit. Ati sida mega tentu amat ditegu lebuh ninga jaku peransang sereta nerima tulung ba maya ti ngena.

6. Nama penanggul ke ditemu Paul ba Judea?

⁶ Bala tuai gempuru madahka, bisi berita ti enda betul ke dikerembaika orang pasal Paul ba Judea. Nya siti penanggul laban berita nya udah ngachau bala menyadi Kristian. Ku bala tuai gempuru bejaku enggau Paul: “Menyadi, bisi beribu-ribu iku orang Judah ke arap lalu semua sida ransing nitihka Adat. Tang sida ninga cherita pasal nuan ke ngajar semua orang Judah ke diau begulai enggau orang bansa bukai. Kenu ku cherita, nuan ngasuh sida ninggalka Adat Moses laban nuan enda ngasuh sida nyunat anak sida tauka enda ngasuh sida iya nitihka adat sida.” a—SKR. 21:20b, 21.

7, 8. (a) Nama penemu ti salah ke dikembuan mayuh orang Kristian ba Judea? (b) Kati runding ti salah ke dikembuan orang Kristian bansa Judah nunjukka sida udah limpang ari pengarap?

⁷ Maya jeman nya, Adat Moses udah diketuka lebih ari 20 taun. Nya alai, nama kebuah bisi mayuh orang Kristian agi ransing nitihka Adat Moses? (Kol. 2:14) Ba taun 49 M., bala rasul enggau bala tuai gempuru udah baum ba Jerusalem. Pengudah nya, sida nganjung surat ngagai  raban gempuru kena nerangka orang Kristian ari bansa bukai enda ibuh besunat, sereta enda ibuh nitihka Adat Moses. (SKR. 15:23-29) Taja pia, surat nya nadai nyebut pasal orang Kristian bansa Judah. Nya alai, mayuh ari sida enda meretika pasal sida pan enda ibuh nitihka Adat Moses.

⁸ Kati runding ti salah ke dikembuan orang Kristian bansa Judah nunjukka sida udah limpang ari pengarap? Enda. Sebedau sida nyadi Kristian, sida nadai kala nyembah petara pelesu. Nya alai pengudah sida nyadi Kristian, sida mega enda nitihka pengawa ke dikereja pengarap pelesu. Orang Kristian bansa Judah amat beberatka Adat Moses laban sida pechaya Adat nya datai ari Jehovah. Penemu nya enda salah, lalu nadai kaul enggau bala melikat ti jai. Taja pia, Adat Moses bisi kaul enggau Sempekat Lama. Tang maya nya, orang Kristian udah dibaruh Sempekat Baru. Nyadi, Jehovah enda agi minta sida ngasika Adat Moses. Taja pia, orang Kristian bansa Hebrew enda mereti pasal sida ke patut badu nitihka Sempekat Adat, laban diatu sida udah dibaruh Sempekat Baru. Ba senentang tu, orang Kristian bansa Judah ke agi mejal orang nitihka Adat Moses enda meretika atur baru ke digaga Jehovah bekaul ba pengawa sembah. Jehovah udah nunjukka chara ti baru kena nyembah Iya. Nya alai, sida patut ngubah runding ngambika sejalai enggau penemu ti baru nya. b—Jer. 31:31-34; Luk. 22:20.

9. Nama diajar Paul bekaul enggau Adat Moses?

⁹ Bisi cherita bula ke dikerembaika orang pasal Paul. Orang nemu Paul nginjil Berita Manah ngagai orang bansa bukai. Sida ninga iya madah ngagai orang bansa bukai ngambika “enda ngasuh sida nyunat anak sida tauka enda ngasuh sida iya nitihka adat.” Paul siku rasul ke dianjung nginjil ngagai orang bansa bukai. Lalu iya nerangka ngagai orang bansa bukai pasal sida enda ibuh nitihka Adat Moses. Iya mega madah, orang ke mejal orang bansa bukai disunat sereta nitihka Adat Moses nya salah. (Gal. 5:1-7) Paul mega bisi nginjil ngagai orang Judah ba endur ke dilawa iya. Iya tentu bisi madah ngagai sida ke deka ninga pasal pemati Jesus ke ngetuka Adat Moses. Lalu iya madah, orang tau dikumbai Petara lurus ketegal pengarap, ukai ketegal nitihka Adat Moses.—Rom. 2:28, 29; 3:21-26.

10. Baka ni Paul nunjukka ulah ti seimbang bekaul enggau pekara ke bekaul enggau Adat sereta pengawa besunat?

¹⁰ Bisi sekeda orang Kristian bansa Judah agi deka nitihka sekeda Adat orang Judah. Ambika chunto, sida engka enggai ngereja sekeda pengawa maya Hari Sabat, sereta milih enggai makai sekeda pemakai. Tang, Paul enda ngutuk sida. (Rom. 14:1-6) Pia mega, iya enda ngaga atur kediri empu pasal pengawa besunat. Endang amat, suba Paul ke nyunat Timoti. Tang nya ketegal orang nemu, apai Timoti nya orang Gerika. Nya alai, pengawa nya amat penting ngambika orang Judah enda nulak Timoti. (SKR. 16:3) Iya ke amat, pengawa besunat nya pemutus ke ulih digaga diri empu. Nyadi, Paul madah ngagai orang Kristian ari Galatia: “Sekalika besunat tauka  enda, nya enda penting. Utai ke penting nya, sida ngayanka diri arap nengah pengerindu.” (Gal. 5:6) Tang baka ni enti sesiku orang agi deka besunat ketegal deka ngasika Adat, tauka ngumbai pengawa besunat penting ngambika diterima Jehovah? Pengawa iya ke baka nya nunjukka, iya kurang pengarap.

11. Nama iring ke diberi bala tuai gempuru ngagai Paul, lalu nama utai ke disengkaum enti Paul deka ngereja pengawa nya? (Peda mega nota kaki.)

¹¹ Taja pan cherita ke ditusui orang pasal Paul nya enda betul, tang orang Kristian ke bebansa Judah agi berasai enda nyamai ati. Ketegal nya, bala tuai gempuru meri Paul iring tu: “Ba ditu bisi empat iku lelaki ke udah besumpah ngagai Petara. Bai sida iya lalu tuchi diri empu enggau sida nitihka adat. Bayar mega belanja sida ngambika sida ulih ngukur pala sida. Enggau nya, semua orang deka nemu, cherita pasal nuan nya semina cherita ngapa laban pendiau nuan manah, lalu nuan nitihka Adat.” c—SKR. 21:23, 24.

12. Baka ni Paul nunjukka diri nemu ngaga ubah nitihka situasi sereta bekerejasama lebuh nerima iring ari bala tuai gempuru ba Jerusalem?

 ¹² Kebendar iya, Paul ulih madah penanggul nyadi ukai ketegal cherita bula ke ditusui orang pasal iya. Tang, penanggul nyadi ketegal orang Judah ke udah nyadi Kristian agi mejal nitihka Adat Moses. Taja pia, Paul sanggup ngaga ubah nitihka situasi orang, lalu iya ngereja nya seagi-agi utai ke digaga iya enda ngelangar prinsip ari Petara. Sebedau nya Paul bisi nulis: “Taja pan aku empu enda ba baruh Adat, tang lebuh begulai enggau orang ke ba baruh Adat, aku nyadi baka orang ke ba baruh Adat, ngambika aku ulih nulung sida.” (1 Kor. 9:20) Paul sanggup ngereja utai ke dipinta bala tuai gempuru, lalu iya nyadi orang ke “ba baruh Adat.” Enggau nya, Paul nyadi teladan ti manah ke kitai kemayaharitu. Kitai pan patut bekerejasama enggau bala tuai gempuru, lalu enda mejal ngereja pengawa nitihka chara kitai empu.—Heb. 13:17.

13. (a) Nama kebuah sekeda orang Judah balat nyerang Paul ba Rumah Sembiang? (b) Baka ni nyawa Paul diselamatka maya nya?

¹³ Pengawa Paul ba Rumah Sembiang enda bejalai enggau lanchar. Maya nya, pengawa 4 iku lelaki ke deka ngamatka semaya sida ba Rumah Sembiang nyauka tembu. Ba maya nya mega, orang Judah ari Asia tepedaka Paul. Sida nuduh iya mai orang bansa bukai ngagai Rumah Sembiang. Ketegal nya, orang mayuh balat nyerang Paul. Enti ketuai soldadu Rome enda masuk champur, Paul engka deka dipalu orang nyentukka iya mati. Taja pia, ketuai soldadu nya agi nangkap iya. Berengkah ari hari nya, Paul dijil lebih ari 4 taun lalu udah nya dibibaska. Taja pia, nyawa Paul agi dalam bahaya. Lebuh ketuai soldadu nya nanya orang Judah kebuah sida nyerang Paul, bisi nya manjung munyi tu, lalu bisi nya manjung munyi nya. Ketegal nya, ketuai soldadu enda ulih meretika kebuah iya. Tang orang mayuh agi balat deka ngemediska Paul. Nya alai, bala soldadu patut ngangkatka iya ari endur nya. Lebuh Paul enggau bala soldadu nyauka datai ba endur soldadu diau, Paul madahka tu ngagai ketuai soldadu nya: “Aku minta nuan ngemendarka aku bejaku ngagai orang mayuh tu.” (SKR. 21:39) Ketuai soldadu nya ningaka peminta Paul. Lalu, Paul bejaku enggau berani kena ngetanka pengarap iya ba mua orang mayuh.

14, 15. (a) Nama utai ke diterangka Paul ngagai orang Judah? (b) Nama digaga ketuai soldadu Rome ngambika iya nemu kebuah orang Judah balat ringat enggau Paul?

¹⁴ Paul ngepunka jaku iya enggau madahka: “Dinga kita. Aku deka nerangka utai ke udah nyadi.” (SKR. 22:1) Paul bejaku ngagai sida  ngena jaku Hebrew. Nya alai, sida badu agi begau. Paul madah ngagai sida enggau terus terang kebuah iya nyadi murid Kristus. Enggau ngereja nya, orang Judah bisi peluang nentuka enti utai ke dipadah Paul nya amat tauka enda. Ambika chunto, Paul kala belajar enggau siku pengajar ti tebilang, iya nya Gamaliel. Pia mega, iya kala merinsaka bala murid Kristus, lalu sekeda orang Judah ke bisi ba dia mega nemu utai tu. Taja pia, lebuh Paul ba pejalai iya ngagai Damaskus, iya nerima siti genera ari Jesus ke udah diangkatka idup baru. Maya nya Jesus bejaku ngagai iya. Orang ke sama bejalai enggau Paul mega bisi meda penampak nya, lalu sida bisi ninga siti nyawa. Taja pia, sida enda meretika utai ke disebut nyawa nya. (SKR. 9:7; 22:9) Pengudah nya, Paul nyadi buta ketegal penampak nya. Nya alai, sida ke enggau iya patut ngiring iya ngagai Damaskus. Ba dia, siku lelaki ke benama Ananias ngeraika baru mata Paul nengah kereja ajih. Ananias dikelala orang Judah ba Damaskus.

 ¹⁵ Paul mega madahka pengudah iya pulai ke Jerusalem, Jesus pegari ngagai iya nengah siti genera ba Rumah Sembiang. Ketegal nya, orang Judah berasai amat ringat lalu manjung madahka: “Bunuh iya! Iya enda patut idup ba dunya tu.” (SKR. 22:22) Ngambika ulih nyelamatka Paul, ketuai soldadu mai iya ngagai endur soldadu diau. Ketuai soldadu nya keran deka nemu kebuah orang Judah amat ringat ngagai Paul. Nyadi iya deka nasat Paul. Tang iya mega ngasuh bala soldadu malu Paul ngambika iya madah utai ke udah digaga iya. Taja pia, lebuh bala soldadu nyauka malu iya, Paul madah ngagai sida, iya orang peranak Rome. Iya nanya bala soldadu nya sekalika undang-undang Rome ngemendarka sida malu iya. Kemayaharitu mega, Saksi-Saksi Jehovah ngena undang-undang ngelindung sida ngambika ulih ngetanka pengarap. (Peda dua iti kotak “ Undang-Undang sereta Peranak Rome,” enggau “ Ngulihka Hak ari Segi Undang-Undang Ngambika Ulih Nginjil Berita Manah Kemayaharitu.”) Ketegal ketuai soldadu nya ninga Paul orang peranak Rome, iya ngiga chara bukai kena ngulihka penerang ari Paul. Ba hari siti, iya minta semua orang ke nyadi sebagi ari Raban Kunsil Orang Judah baum sama. Maya nya, Raban Kunsil Orang Judah nyadi Mahkamah Tinggi Orang Judah. Nya alai, Paul dibai kia ngambika sida ulih nemu utai ke udah digaga iya ke udah ngasuh orang Judah balat ringat.

16, 17. (a) Padahka utai ke nyadi lebuh Paul bejaku ba mua Raban Kunsil Orang Judah. (b) Lebuh iya ditampar, baka ni Paul nunjukka teladan bekaul enggau ngayanka pemaruh ati?

¹⁶ Kena ngetanka diri ba mua Raban Kunsil Orang Judah, Paul ngepunka jaku iya enggau madahka: “Bala menyadi, nyentuk ngagai seharitu, aku ngereja semua utai enggau ati ti beresi ba mua Petara.” (SKR. 23:1) Iya nadai nyebut nama-nama agi. Nama nyadi pengudah nya? Bup Kudus madahka: “Imam Besai Ananias ngasuh orang ke  bediri semak Paul nampar mulut Paul.” (SKR. 23:2) Ulah imam besai nya balat ngemaluka Paul. Pia mega, ulah imam besai nya nunjukka iya bepilih mata. Iya ngumbai Paul benung bebula taja pan Paul bedau agi sempat ngetanka diri. Nya meh kebuah Paul madah ngagai imam besai nya: “Petara deka ngukum nuan, nuan ke pura-pura ngapa! Kati nuan duduk deka ngakim aku nitihka Adat, tang ba maya ti sama, nuan ngasuh orang malu aku lalu ngelanggar Adat nya?”—SKR. 23:3.

¹⁷ Sekeda orang ba dia tekenyit laban Paul bejaku munyi nya. Sida madah ngagai iya: “Berani amat nuan nyebut utai ti jai ngagai imam besai Petara!” Lebuh maya nya, Paul nyaut sida enggau baruh ati sereta nunjukka basa ngagai Adat. Enggau nya, Paul nunjukka teladan ke ulih dipelajarka sida ari iya. Lalu ku iya madah ngagai sida: “Bala menyadi, aku enda nemu iya imam besai. Endang udah ditulis, ‘Anang bejaku jai pasal pemerintah bansa kita.’” d (SKR. 23:4, 5; P-sut. 22:28) Nyadi, Paul ulih ngena chara bukai kena ngetanka diri empu. Ketegal iya nemu orang Parisi enggau orang Saduki ke nyadi Raban  Kunsil Orang Judah, nya alai iya madah ngagai sida: “Bala menyadi, aku tu orang Parisi, lalu aki ini aku mega orang Parisi. Aku dipechara laban aku pechaya orang mati deka diidupka baru.”—SKR. 23:6.

18. Nama kebuah Paul madahka diri orang Parisi, lalu baka ni kitai ulih ngena chara ti sama dalam sekeda situasi kemayaharitu?

¹⁸ Nama kebuah Paul madahka diri orang Parisi? Tu ketegal, Paul datai ari ruang bilik ke nitihka jalai pengarap orang Parisi. Nya alai, mayuh orang agi ngumbai iya orang Parisi. e Taja pia, orang Parisi bisi penemu ti salah pasal pengangkat ari mati. Nyadi baka ni Paul tau ngumbai diri orang Parisi? Orang Parisi pechaya pengudah siku orang mati, semengat iya deka terus idup. Lalu sida mega pechaya enti orang manah mati, semengat iya deka pindah sereta idup baru ba tubuh bukai. Tang Paul enda pechayaka ajar nya, laban iya arapka utai ke udah diajar Jesus pasal pengangkat ari mati. (Jhn. 5:25-29) Tang baka orang Parisi, Paul mega setuju kitai ulih idup baru jemah ila. Taja pia orang Saduki enda pechayaka nya. Kemayaharitu, kitai mega ulih ngiga utai ti sama entara kitai enggau orang ke megai pengarap ti bebida ke ditemu kitai ba pengawa nginjil. Endang amat, sida pechayaka petara sida empu, lalu kitai pechayaka Petara ke bisi dipadah dalam Bup Kudus. Tang baka sida, kitai mega pechaya Petara sigi endang bisi.

19. Nama kebuah aum ba Raban Kunsil Orang Judah enda mujur?

¹⁹ Jaku Paul ngasuh Raban Kunsil Orang Judah bepechah. Bup Kudus madahka: “Sida balat amat charut ba dia. Sekeda bala penulis Adat ke ari raban orang Parisi angkat lalu balat mantah. Ku sida bejaku: “Kami nadai tetemuka nama-nama penyalah ba orang tu. Tang enti bisi utai ti idup ke enda ulih dipeda tauka melikat bejaku enggau iya.’” (SKR. 23:9) Lebuh orang madah siku melikat engka udah bejaku ngagai Paul, raban orang Saduki enda ulih nerima nya laban sida enda pechaya melikat bisi. (Peda kutak “ Orang Saduki enggau Orang Parisi.”) Nya alai, sida ba Raban Kunsil Orang Judah balat amat charut nyentukka ketuai soldadu Rome nya patut nyelamatka rasul Paul sekali agi. (SKR. 23:10) Taja pia, Paul bedau agi selamat. Nama deka nyadi ngagai iya? Aram meh kitai meda ba pelajar pengudah tu.