1. Nama utai ti sama entara orang Kristian ba abad keterubah enggau Saksi-Saksi Jehovah kemayaharitu?

 BALA menyadi Kristian ba abad keterubah nginjil enggau ransing. Ketegal sida baruh ati, sida nerima tulung sereta iring ari kuasa kudus. Taja pan sida diperinsa tang sida enda ngetu nginjil. Ketegal nya, Petara merekatka pengawa sida. Lalu Saksi-Saksi Jehovah mega ngereja utai ti sama kemayaharitu.

2, 3. Nama utai ti narit ati pasal bup Surat Kereja Rasul?

² Bup Surat Kereja Rasul bisi mayuh cherita ti ngagitka ati. Nuan tentu berasai diperansang, lalu pengarap nuan tentu dikeringka! Bup tu endang narit ati laban semina bup tu aja ke nulis pasal sejarah orang Kristian ba abad keterubah.

³ Bup Surat Kereja Rasul bisi nyebut pasal 95 iku orang ke datai ari 32 buah menua, 54 nengeri sereta 9 iti pulau. Bup tu nyeritaka utai ti ngalitka ati pasal mayuh macham orang. Chunto iya orang biasa, orang ke mangah ke nitihka pengarap pelesu, orang politik ti sumbung, sereta orang ke ngelaban ti ganas. Tang kelebih agi, bup tu bisi madah pasal bala menyadi Kristian kitai ba abad keterubah. Sida mega napi penanggul ba pengidup, tang sida tetap nginjil Berita Manah enggau ransing.

4. Nama kebuah kitai berasai rapat enggau rasul Paul, Tabita, sereta bala menyadi Kristian ba jeman kelia?

⁴ Nyauka 2,000 taun ti udah, rasul Peter enggau rasul Paul ransing nginjil. Pia mega, kitai nemu pasal pengawa Luke ke nyadi lutur ti dikerinduka, Barnabas ti rindu nulung orang bukai, Stepen ti amat berani, Tabita ti manah ati, sereta Lidia ke rindu ngelaluka temuai, enggau mayuh agi bala saksi ke setia ti bukai. Tang, nama kebuah kitai berasai rapat enggau sida tu? Laban kitai bisi diberi pengawa ti sama, iya nya ngaga orang nyadi murid. (Mat. 28:19, 20) Kitai bisi basa ti besai ulih sama ngereja pengawa tu!

5. Ba dini bala murid Jesus ba abad keterubah berengkah nginjil?

⁵ Perundingka meh pengawa ke diberi Jesus ngagai bala murid iya. Ku iya madah: “Kita deka bulih pengering lebuh kuasa kudus Petara datai  ngagai kita, lalu kita deka nyadi saksi aku ba Jerusalem, ba serata Judea enggau Samaria, sereta nyentuk ngagai ujung dunya.” (SKR. 1:8) Keterubah, kuasa kudus nulung bala murid meri saksi “ba Jerusalem.” (SKR. 1:1–8:3) Pengudah nya, kuasa kudus ngiring sida meri saksi “ba serata Judea enggau Samaria.” (SKR. 8:4–13:3) Lalu pengudah nya, sida pan berengkah nusui Berita Manah “nyentuk ngagai ujung dunya.”—SKR. 13:4–28:31.

6, 7. Ba pengawa nginjil, nama utai ke bisi ba kitai tang nadai ba bala menyadi Kristian abad keterubah?

⁶ Bala menyadi Kristian ba abad keterubah nadai Bup Kudus ti lengkap ke ulih dikena sida ba pengawa nginjil. Bup Matthew semina bisi ba taun 41 M. Endang amat, Paul bisi nulis sekeda surat sebedau nembuka bup Surat Kereja Rasul ba taun 61 M. Taja pia, orang Kristian abad keterubah agi nadai Bup Kudus kediri empu ti lengkap. Sida mega nadai litaricha ke ulih diberi ngagai orang ke bisi minat ke ditemu sida ba pengawa nginjil. Sebedau nyadi murid Jesus, orang Kristian ke bebansa Judah udah ninga begian Bup Kudus Sempekat Lama dibacha ba balai gempuru. (2 Kor. 3:14-16) Taja pia, sida patut bagas belajarka Bup Kudus kediri empu. Tu ketegal, enti sida deka bekunsi ayat Bup Kudus enggau orang, sida patut ngafal lalu nandu baru ayat ke didinga sida suba.

⁷ Kemayaharitu, mayuh ari kitai bisi Bup Kudus kediri empu. Kitai mega bisi mayuh litaricha Bup Kudus. Kelimpah ari nya, kitai ngereja pengawa ngaga orang nyadi murid Jesus, lalu ngerembaika Berita Manah ba 240 iti menua sereta dalam mayuh bansa jaku.

8, 9. (a) Kuasa kudus nulung bala murid Jesus ngereja nama? (b) Nama digaga ulun ke tetap ati enggau bantu ari kuasa kudus Petara?

⁸ Lebuh Jesus ngasuh bala murid iya meri saksi, iya madah ke sida: “Kita deka bulih pengering lebuh kuasa kudus Petara datai ngagai kita.” Dibaruh iring kuasa kudus Petara, bala murid Jesus deka nyadi saksi ba serata dunya. Ketegal tulung ari kuasa kudus, Peter enggau Paul ngeraika orang ke sakit, muru melikat ti jai sereta indah ngangkatka orang ari mati! Taja pia, kuasa kudus nulung orang Kristian abad keterubah ngereja pengawa ke penting agi. Kuasa kudus nulung bala rasul enggau bala murid Jesus kebukai ngajar orang pasal pemendar ke mai ngagai pengidup ti meruan belama iya.—Jhn. 17:3.

⁹ Ba Pentikos taun 33 M., bala murid Jesus “ngena bemacham bansa jaku, nitihka iring kuasa kudus nya.” Enggau nya, sida ulih meri saksi pasal “utai ti ngalitka ati ke digaga Petara.” (SKR. 2:1-4, 11) Kemayaharitu, kitai nadai bisi kereja ajih kena nulung kitai bejaku mayuh macham bansa jaku. Taja pia enggau bantu ari kuasa kudus Petara, ulun ke tetap ati ngeluarka litaricha Bup Kudus dalam mayuh bansa jaku. Ambika chunto,  bejuta iti majalah Menara Jaga sereta Peratika! dichelak ninting bulan. Pia mega, ulun ke tetap ati ngasilka laman web jw.org, ngeluarka litaricha Bup Kudus sereta video dalam lebih ari 1,000 iti bansa jaku. Semua perengka tu nulung kitai madahka “utai ti ngalitka ati ke digaga Petara” ngagai semua raban bansa, bansa sereta jaku.—Pem. 7:9.

10. Kenyau ari taun 1989, nama pemansang ke udah nyadi ba pengawa nyalin Bup Kudus?

¹⁰ Kenyau ari taun 1989, ulun ke tetap ati deka fokus ngagai pengawa nyalin Bup Kudus Salin Dunya Baru. Sida deka nyediaka salin Bup Kudus tu dalam mayuh bansa jaku. Naka ke diatu, salin Bup Kudus tu udah disediaka dalam lebih ari 200 bansa jaku, lalu lebih ari 240 juta iti Bup Kudus udah dichelak. Kelimpah ari nya, Bup Kudus salin tu deka terus dichelak enggau mayuh agi. Tu nunjukka, semina Petara enggau kuasa kudus Iya ulih ngemujurka semua pengawa tu.

11. Nama pemansang ke udah nyadi ba pengawa nyalin litaricha Bup Kudus?

¹¹ Pengawa nyalin litaricha Bup Kudus digaga beribu iku bala menyadi ke gawa sukarela ba lebih ari 150 menua sereta nengeri. Nama kebuah kitai enda tekenyit enggau pemansang tu? Tu ketegal, nadai gerempung bukai ba dunya ke diiring kuasa kudus ngambika ulih “meri saksi enggau silik” ngagai serata dunya pasal Petara Jehovah, Jesus ke dipilih nyadi Raja ba Perintah Iya, sereta Perintah Petara ke udah didirika ba serega!—SKR. 28:23.

12. Baka ni Paul enggau orang Kristian kebukai ulih ngereja pengawa nginjil?

¹² Lebuh Paul meri saksi ngagai orang Judah sereta orang bansa bukai ba Antiok di Pisidia, “orang ke bisi pengingin deka nengah jalai ke nuju ngagai pengidup ti meruan belama iya, lalu nyadi murid Jesus.” (SKR. 13:48) Maya Luke nulis jaku penutup bup Surat Kereja Rasul, Paul benung “nusui Berita Manah pasal Perintah Petara . . . enggau berani sereta nadai penanggul.” (SKR. 28:31) Maya nya Paul nginjil ba Rome, iya nya siti perintah ti pemadu bekuasa ba dunya jeman nya! Nya alai, enda ngira sekalika sida nginjil enggau chara meri cheramah tauka chara bukai, bala murid Jesus ba abad keterubah ngereja pengawa nginjil enggau bantu sereta iring ari kuasa kudus.

13. Nama kebuah kitai patut besampi lebuh kitai diperinsa?

¹³ Lebuh bala murid Jesus ba abad keterubah diperinsa, sida besampi minta pemerani ari Jehovah. Nama nyadi udah nya? Sida nerima kuasa kudus. Ketegal nya, sida nerima pengering ngambika ulih nusui jaku Petara enggau berani. (SKR. 4:18-31) Kemayaharitu, kitai mega besampi minta penemu-dalam sereta pengering kena neruska pengawa nginjil taja pan diperinsa. (Jas. 1:2-8) Ketegal kitai bisi berekat Petara sereta tulung ari kuasa kudus Iya, kitai ulih terus nginjil pasal Perintah Petara.  Taja pan kitai balat diperinsa, tang nya enda ulih nagang kitai terus ngereja pengawa meri saksi. Lebuh diperinsa, kitai patut besampi minta kuasa kudus, enggau penemu-dalam sereta pemerani kena ngerembaika Berita Manah.—Luk. 11:13.

14, 15. (a) Nama nyadi “pengudah pemati Stepen”? (b) Ba jeman kitai, baka ni orang ba Siberia nemu pemendar?

¹⁴ Stepen meri saksi enggau berani sebedau iya dibunuh bala munsuh. (SKR. 6:5; 7:54-60) Ketegal nya, semua murid Jesus pambar ngagai serata Judea enggau Samaria ketegal sida “balat diperinsa.” Semina bala rasul aja agi ba Jerusalem. Tang semua pemerinsa nya nadai ulih ngetuka pengawa nginjil sida. Ambika chunto, Philip ngagai Samaria lalu iya “madah ngagai orang ba dia pasal Kristus.” Ketegal nya, iya bulih mayuh asil ti manah ba pengawa nginjil. (SKR. 8:1-8, 14, 15, 25) Bekaul enggau pekara tu, Bup Kudus madahka: “Pengudah pemati Stepen, bala murid Jesus pambar ngagai endur bukai ketegal pemerinsa ke ninggang sida. Sekeda ari sida ngerarika diri ngagai endur ti jauh nyentuk ngagai Finisia, Saiprus, enggau Antiok. Tang sida semina nusui jaku Petara ngagai orang Judah. Taja pia, beberapa iku orang ari bala sida ke datai ari Saiprus enggau Sairin datai ngagai Antiok. Sida nusui Berita Manah pasal Tuan Jesus ngagai orang ke bejaku ngena jaku Gerika.” (SKR. 11:19, 20) Kebendar iya, pengawa nyakal ke nyadi maya nya udah nulung ngerembaika Berita Manah.

¹⁵ Ba jeman kitai, utai ti sama mega nyadi lebuh maya perintah Soviet Union suba. Berengkah ari taun 1950, beribu iku Saksi-Saksi Jehovah ditabanka ngagai Siberia. Maya nya sida pambar, tang sida enda diau ba siti endur aja laban mayuh ari sida pindah ngagai endur bukai ba Siberia. Nya alai, Berita Manah ulih dikerembaika enggau jampat ba din. Enti kitai berundingka tu, bala Saksi tentu tusah deka ngulihka mayuh duit kena bejalai beribu kilometer ngambika ulih nginjil Berita Manah. Tang iya ke amat, perintah meh ke nulung sida pindah ngagai menua bukai. Siku menyadi lelaki madahka: “Asil iya, bala pemerintah empu ke nulung beribu iku orang ba Siberia nemu pasal pemendar.”

16, 17. Baka ni bup Surat Kereja Rasul nunjukka bukti pasal Jehovah merekatka pengawa nginjil?

¹⁶ Jehovah endang merekatka bala menyadi Kristian ba abad keterubah. Paul enggau bala menyadi bukai nanam sereta manjah benih pemendar, “tang Petara ke ngasuh utai nya majak tumbuh.” (1 Kor. 3:5, 6) Bup Surat Kereja Rasul nunjukka, penyampau orang ke nyadi orang Kristian majak nambah ketegal Jehovah merekatka pengawa nginjil. Ambika chunto, “jaku Petara majak ngelekai, lalu penyampau murid Jesus ba Jerusalem ngenyit nambah.” (SKR. 6:7) Ketegal orang Kristian nginjil  ngagai mayuh endur, “raban gempuru ba serata menua Judea, Galili, enggau Samaria ngasaika pengelikun sereta nyadi tegap. Kelimpah ari nya, penyampau murid majak nambah, laban sida seruran [bebasaka] nangika Jehovah sereta idup sejalai enggau peransang ke diterima nengah kuasa kudus Petara.”—SKR. 9:31.

¹⁷ Ba Siria Antiok, orang Judah enggau orang ke ngena bansa jaku Gerika nerima pemendar ari bala menyadi Kristian ke nginjil enggau berani. Bup Kudus madahka: “Jehovah bisi enggau sida, lalu mayuh orang arap sereta nyadi murid Tuan Jesus.” (SKR. 11:21) Bekaul enggau pemansang ke nyadi ba Siria Antiok, Bup Kudus madahka: “Jaku Jehovah majak ngerembai, lalu majak mayuh orang nyadi murid Jesus.” (SKR. 12:24) Ketegal Paul enggau bala menyadi Kristian kebukai bebendar nginjil ngagai orang bansa bukai, nya alai “enggau chara ti ngalitka ati, jaku Jehovah majak ngelekai sereta majak bekuasa.”—SKR. 19:20.

18, 19. (a) Nama kebuah kitai nemu Jehovah bisi enggau kitai? (b) Padahka siti chunto ke nunjukka Jehovah nyukung bala nembiak Iya.

¹⁸ Kemayaharitu, Jehovah mega bisi enggau kitai. Nya meh kebuah iya, mayuh orang nyadi arap lalu nyerahka pengidup diri ngagai Petara sereta dibaptisa. Nambahka nya, kitai ulih tan ngenatka pemerinsa ketegal bisi tulung sereta berekat ari Petara. Ketegal nya mega, kitai ulih mujur ba pengawa nginjil baka Paul enggau bala menyadi Kristian ba abad keterubah suba. (SKR. 14:19-21) Petara Jehovah seruran deka nulung kitai. “Lengan Iya ti meruan” deka nyukung kitai lebuh kitai napi penguji. (U-dat. 33:27, NWT) Ingat meh, ketegal deka ngetanka nama Iya, Jehovah tentu enggai sekali-kali ninggalka bala nembiak Iya.—1 Sam. 12:22; Mas. 94:14.

¹⁹ Tu meh siti chunto ke nunjukka Jehovah nyukung bala nembiak Iya. Ketegal menyadi Harald Abt terus ngereja pengawa nginjil, bala Nazi nganjung iya ngagai kem alai ngetanka orang tangkap ba Sachsenhausen maya Perang Dunya II. Kena Mei 1942, siti unit pegawai polis ti resia ke dikumbai raban Gestapo ngagai rumah bini iya, lalu nabanka anak indu sida ti agi mit. Bala pegawai polis mega nangkap bini iya ke benama Elsa. Elsa dianjung ngagai mayuh kem alai ngetanka orang tangkap. Ku Elsa madahka: “Aku lama ditanka ba kem alai ngetanka orang tangkap ba Jerman. Sekumbang aku ditangkap, aku belajar siti utai ti amat penting. Aku belajar kuasa kudus Jehovah ulih ngeringka nuan lebuh nuan balat diuji! Sebedau aku ditangkap, aku kala macha siti surat ari siku menyadi indu. Iya madahka, kuasa kudus Jehovah ulih nulung nuan berasai tenang lebuh nuan napi penguji ti besai. Aku ngumbai iya semina bejaku belebih-lebih aja. Tang lebuh aku empu ke napi penguji nya, aku ngasaika pengamat jaku iya. Kuasa kudus Jehovah amat nulung aku berasai tenang. Tusah deka ngambarka baka ni asai iya, enti nuan empu bedau kala ngasaika nya. Tang tu meh utai ti amat-amat nyadi ba aku.”

20. Nama digaga Paul lebuh iya ditan ba rumah, lalu baka ni tu ulih meransang sekeda bala menyadi Kristian kitai?

²⁰ Pengujung bup Surat Kereja Rasul madahka, Paul ransing “nusui Berita Manah pasal Perintah Petara.” (SKR. 28:31) Ketegal iya ditan ba rumah, iya enda ulih nginjil ari rumah ke rumah ba Rome. Tang, iya terus meri saksi ngagai semua orang ke datai ngagai rumah iya. Kemayaharitu, sekeda menyadi Kristian enda ulih ninggalka rumah engka ketegal balat sakit nyentukka sida semina ulih gali aja. Tauka sekeda menyadi kebukai diau ba pusat nyaga orang tuai ke sakit. Tang, sida mengkang ngetanka pengerindu ke Petara sereta keran deka nginjil. Nyadi, kitai besampika sida, lalu kitai ulih minta Jehovah nulung sida tetemuka orang ke deka belajar pasal Iya sereta tuju Iya.

21. Nama kebuah kitai patut berumban agi nginjil?

²¹ Mayuh ari kitai ulih nginjil ari rumah ke rumah sereta nginjil ngena chara bukai. Nya alai, aram meh kitai bebendar ngereja pengawa kitai sebagai penginjil Perintah Petara meri saksi “nyentuk ngagai ujung dunya.” Pengawa nginjil patut diperumbanka laban “tanda” penatai Kristus ulih dipeda enggau terang kemayaharitu. (Mat. 24:3-14) Kitai nadai mayuh awak. Diatu meh kitai “seruran ngereja mayuh pengawa ke Tuan kitai.”—1 Kor. 15:58.

22. Nama patut digaga kitai seraya kitai nganti penatai Hari Jehovah?

²² Seraya kitai nganti ‘Hari Jehovah ti besai sereta balat nya datai,’ aram meh kitai terus nginjil enggau berani sereta nunjukka diri tetap ati. (Jol. 2:31) Kitai deka tetemuka mayuh orang baka orang Beria ke “keran agi deka nerima jaku Petara.” (SKR. 17:10, 11) Nya alai, aram meh kitai nembuka pengawa kitai nyentukka kitai baka ke ninga jaku: “Manah nya! Nuan meh ulun ke manah sereta tetap ati!” (Mat. 25:23) Enti kitai ransing ngaga orang nyadi murid kemayaharitu sereta nunjukka diri setia ngagai Jehovah, kitai tentu deka ngasaika pengaga ati ti belama iya laban bisi peluang “meri saksi enggau silik” pasal Perintah Petara!