1, 2. Nama bida pejalai Paul kali tu enggau pejalai iya ke suba, lalu nama sekeda utai ke engka ngasuh Paul irau?

 KU GABENOR Festus madah ngagai Paul: “Raja Rome meh ke deka ngakim nuan.” Nya alai, Paul enda ngetu berundingka jaku Festus laban nya ulih meri kesan ti besai ngagai pengidup iya ila. Pengelama dua taun Paul dijil, iya enda ulih kini-kini. Tang pengujung iya lebuh Paul dianjung ngagai Rome, iya ulih meda mayuh utai ba luar. (SKR. 25:12) Taja pia, Paul udah nepan kapal mayuh kali, tang ukai semua pejalai iya nyadika pengingat ti manah. Kali tu, Paul nepan kapal laban deka betemu enggau Raja Besai Rome lalu bisi sekeda utai ke ngasuh Paul irau.

² Paul udah mayuh kali ‘nyauka bebadi ba tasik.’ Sebedau tu, Paul kala ditabanka kapal karam tiga kali, indah iya kala anyut ba tasik sehari semalam. (2 Kor. 11:25, 26) Kelimpah ari nya, pejalai iya kali tu bebida enggau pejalai nginjil iya suba. Suba iya orang ke bibas, tang kali tu Paul nyadi siku orang jil. Kali tu, pejalai Paul ari Kaisaria ngagai Rome amat jauh iya nya, kira-kira 3,000 kilometer. Kati iya deka selamat sepemanjai pejalai iya ngagai Rome? Enti iya selamat, kati iya deka diukum mati ba Rome? Ingat meh, maya nya Paul deka diakim siku pemerintah ti pemadu bekuasa maya jeman nya.

3. Paul keran deka ngereja nama, lalu nama deka dikerandauka kitai ba pelajar tu?

³ Nama runding nuan pengudah nuan macha pasal Paul? Kati nuan ngumbai iya deka putus asa, tauka balat tusah ati enggau utai ke deka nyadi ngagai iya? Enda! Iya nemu diri deka napi mayuh macham pemerinsa, tang iya enda nemu baka ni semua nya deka nyadi. Paul enda ulih ngawal semua utai ke nyadi. Nya alai iya nemu, iya enda patut ngelakka semua pengirau nya ngasuh iya lenyau pengaga ati ke diulih ari pengawa nginjil. (Mat. 6:27, 34) Paul nemu peneka Jehovah ngagai iya. Jehovah deka iya ngena tiap iti peluang kena nginjil Berita Manah pasal Perintah Petara, indah nginjil ngagai bala pemerintah. (SKR. 9:15) Enda ngira nama utai ke deka nyadi, Paul keran deka ngereja pengawa ke udah diberi ngagai iya. Endaka kitai bisi pengeran ti sama baka Paul? Aram meh kitai meda  cherita pasal pejalai Paul ke ngena kapal ngagai Rome, lalu belajar baka ni kitai ulih nunda iya.

4. Nama jenis kapal ke ditepan Paul ngagai Rome, lalu sapa ke enggau iya maya nya?

⁴ Maya nya, Paul enggau sekeda orang jil dibaruh jaga siku pegawai Rome ke benama Julius. Iya milih deka nepan siti kapal dagang ke datai ba Kaisaria. Kapal nya datai ari Adramitium, iya nya siti penyangkai kapal ke bisi ba begian pantai barat Asia, pia mega ba seberai nengeri Mitilin ke bisi ba Pulau Lesbos. Kapal nya deka belayar nuju ngagai utara, lalu udah nya ngagai selatan. Kapal tu deka sangkai ba mayuh endur kena nganjung barang, lalu ngambi barang dagang ke bukai. Kapal ke baka tu enda sesuai kena mai orang laban enda selesa. Kelimpah ari nya, kapal dagang ke baka tu enda dikena mai orang jil. (Peda kutak “ Chara Pejalai Nengah Tasik sereta Jalai Tasik ke Ditengah Orang ke Bedagang.”) Tang baik meh, maya nya ukai Paul siku aja orang Kristian dalam raban orang jil nya. Maya nya mega, bisi 2 iku menyadi Kristian enggau iya, iya nya Aristarkus enggau Luke. Nyadi, Luke meh ke nulis cherita tu. Tang kitai enda nemu sekalika Aristarkus enggau Luke mayar ungkus pejalai diri empu ngagai Rome, tauka ngaga diri nyadi ulun Paul ba kapal nya.—SKR. 27:1, 2.

5. Paul betemu enggau sapa ba Sidon, lalu nama ulih dipelajarka kitai ari tu?

⁵ Pengudah belayar sehari kira-kira 110 kilometer tunga ke utara, kapal nya sangkai ba Sidon ke bisi ba tebing tasik Siria. Julius enda ngelayan Paul baka penjenayah. Tu engka ketegal Paul orang peranak Rome lalu iya bedau dituduh besalah. (SKR. 22:27, 28; 26:31, 32) Julius ngemendarka Paul turun ari kapal ngambika ulih betemu enggau bala menyadi Kristian iya. Bala menyadi ba Sidon tentu gaga ati ulih nyaga Paul pengudah iya lama amat dijil! Kati nuan ulih berundingka chara nunjukka pengerindu ti sama baka bala menyadi ba Sidon, lalu ngayanka pengerah jari ngagai bala menyadi? Enti nuan ngereja nya, nuan mega deka berasai diperansang.—SKR. 27:3.

6-8. Kini tunga pejalai sida pengudah ninggalka Sidon, lalu nama peluang nginjil ke dibuka ngagai Paul maya nya?

⁶ Pengudah sida ninggalka Sidon, kapal nya terus belayar ba sepemanjai tebing tasik, lalu mansa Silisia. Endur nya enda jauh ari Tarsus, iya nya menua asal Paul. Nambahka nya, Luke bisi nulis penerang bukai ke nunjukka sida deka napi situasi ke bahaya ba pejalai sida ke belayar ba tasik. Luke madahka, bisi “ribut ke bepuput nunga ngagai kami.” Tang Luke nadai nulis pasal kapal sida sangkai ba endur bukai. (SKR. 27:4, 5) Taja pia, kitai nemu Paul tentu ngena tiap iti peluang kena nginjil. Iya tentu meri saksi ngagai orang jil ke bukai, sereta orang bukai ba kapal nya nyengkaum bala pekereja enggau bala soldadu. Pia mega lebuh kapal nya sangkai, Paul tentu bisi nginjil ba penyangkai kapal alai sida sangkai.  Baka Paul, kitai mega ulih ngena tiap iti peluang ke bisi ngambika ulih nginjil ngagai orang bukai.

⁷ Nyau kelama, kapal nya datai ba Mira, iya nya siti penyangkai kapal ba begian selatan tebing tasik Asia. Ba dia, Paul enggau sida ke bukai mindah ngagai siti agi kapal ke belayar nuju ngagai Rome. (SKR. 27:6) Ba jeman nya, Rome nerima mayuh stok gandum ari Ejip. Lalu ba maya nya mega, kapal ke mai gandum ari Ejip ngam-ngam sangkai ba Mira. Ketegal Julius tetemuka kapal nya, iya enggau bala soldadu sereta orang jil ke bukai nepan kapal nya. Kapal nya tentu jauh besai agi ari kapal dagang ke sebedau tu. Kapal ari Ejip tu mai mayuh gandum. Nambahka nya, bisi 276 iku orang nepan kapal nya. Tu nyengkaum bala pekereja kapal, bala soldadu, bala orang ke dijil sereta bala orang bukai ke deka ngagai Rome. Ketegal sida mindah ngagai kapal bukai, Paul tentu ulih nginjil ngagai mayuh agi orang. Lalu kitai yakin Paul tentu ngena tiap iti peluang nya enggau manah.

⁸ Pengudah nya, kapal nya belayar ngagai Knidus, iya nya ba begian selatan Asia. Gaya angin maya nya manah. Nya alai, kapal sida ulih belayar ari Mira ngagai Knidus dalam sehari aja. Tang, Luke madahka: “Pengelama beberapa hari, kapal kami lubah belayar. Taja pan pejalai kami enda senang, tang pengujung iya, kami datai ba Knidus.” (SKR. 27:7a) Taja pia, gaya angin maya nya jampat berubah. Nya alai, gaya hari enda manah. (Peda kutak “ Pemalat Ribut ba Tasik Mediterranean.”) Kati nuan ulih ngambarka keadaan sida ba kapal nya ke ngelaban ai ti begelumbang sereta ribut ti balat?

9, 10. Nama sekeda penanggul ke ditapi sida lebuh kapal nyauka datai ba Krit?

⁹ Ari Knidus, kapten kapal nya deka terus belayar ngagai begian barat. Tang Luke madahka “ribut bepuput nunga ngagai  kami.” (SKR. 27:7b) Lebuh kapal nya udah jauh ari darat, kapal nya enda ulih dikawal. Tu ketegal, bisi ribut bepuput ari begian utara lalu nulak kapal nya ngagai begian selatan. Ketegal ribut nya, kapal belayar enggau amat laju. Sebedau tu, Pulau Saiprus udah nagang ribut lalu kapal sida ulih belayar enggau selamat. Kali tu, Pulau Krit nagang ribut ngambika kapal sida enda dipuput ribut ti balat. Pengudah kapal sida mansa Salmoni ke bisi ba begian ujung timur Krit, keadaan sida ba kapal majak manah. Udah nya, kapal pan datai ba begian selatan Pulau Krit. Nya alai, ribut ba dia enda entu kuat agi. Sida ba kapal nya tentu berasai lega laban enda agi dipuput ke ribut ti balat! Tang bala kelasi nemu, musin chelap deka datai enda lama da agi. Lalu, belayar ba maya nya amat bahaya.

¹⁰ Ku Luke madah enggau silik: “Kami belayar ba sepemanjai tebing tasik, lalu datai ba siti endur ke dikumbai Penyangkai ti Manah. Pejalai kami kia mega enda senang.” Taja pan sida dilindung ari ribut ketegal sida udah semak enggau darat, tang sida agi tusah deka ngawal kapal. Pengujung iya, sida sangkai ba siti teluk ti mit alai sida ulih nurunka sauh. Teluk nya engka semak enggau tebing tasik sebedau sida belok ngagai begian utara. Nyadi berapa lama sida sangkai ba teluk nya? Kena nerangka timpuh sida ba dia, Luke nulis leka jaku “nyau kelama.” Tang majak lama sida sangkai ba dia, reti iya, majak bahaya agi ke sida enti sida deka neruska pejalai ngena kapal. Kelimpah ari nya, belayar ba bulan 9 tauka 10 sigi amat bahaya.—SKR. 27:8, 9.

11. Nama cadangan ke diberi Paul ngagai sida ba kapal, tang nama pemutus ke digaga sida?

¹¹ Sekeda orang ba kapal nya minta cadangan ari Paul laban iya bisi pengalaman belayar ba Mediterranean. Nya alai, iya madahka manah agi sida enda belayar dulu. Enti sida deka terus belayar, nya “ukai aja deka mai penusah, tang mega pengerugi ti besai.” Semua sida engka ulih lenyau nyawa. Taja pia, kapten enggau orang ke bempu kapal nya deka terus belayar. Sida engka ngumbai, sida patut sangkai ba endur ke selamat agi. Nyadi, sida deka belayar ngagai Finiks, iya nya siti penyangkai kapal ba tebing tasik. Nya alai kapten enggau orang ke bempu kapal nya madahka cadangan nya ngagai Julius, sereta orang ba kapal ngambika semua sida setuju. Finiks engka endur ti besai agi sereta selamat kena diau lebuh maya musin chelap. Pia mega, maya nya ribut enda balat bepuput ari selatan. Nya alai sida ngumbai keadaan maya nya udah selamat. Nyadi, sida pan mupuk belayar ngagai Finiks.—SKR. 27:10-13.

12. Pengudah mupuk ari Krit, nama penusah ke ditapi sida, lalu baka ni bala kelasi nguji mutarka penanggul nya?

¹² Bisi penanggul ti besai agi nyadi laban “ribut ti balat” bepuput ari begian timur laut. Tang, sida belindung enda lama ba belakang “siti pulau ti mit ke dikumbai Kauda.” Endur nya 65 kilometer ari Penyangkai ti Manah. Tang keadaan maya nya agi bahaya, laban kapal ulih ditulak ribut ngagai begian selatan. Enti tu nyadi, kapal nya ulih karam ba tebing pasir di  tebing tasik Afrika. Kena nyeliahka tu, bala kelasi nguji narit perau ti mit ba belakang kapal. Tang sida tusah deka ngereja nya laban perau ti mit nya penuh enggau ai. Pengudah nya, sida belabuh ngerapitka papan ba begian baruh kapal nya ngena tali tauka rantai ngambika kapal nya ulih tan. Pia mega, sida muka tali kena nurunka layar lalu nejuka kapal sida anyut dibai ribut. Nya pengalaman ti chukup ngenakutka sida! Taja pia, semua utai ke digaga sida enda chukup laban kapal sida agi “balat begilik ketegal dipangkaka kabut.” Ba hari ketiga, sida muai sekeda barang ba kapal ngambika kapal sida ulih terapung.—SKR. 27:14-19.

13. Baka ni gaya orang bukai ba kapal maya napi penusah ketegal ribut ti balat nya?

¹³ Orang bukai ba kapal nya tentu amat takut. Tang Paul enggau bala kaban iya amat berani. Sebedau tu, Tuan Jesus udah besemaya Paul deka meri saksi ba Rome. Lalu udah nya, siku melikat datai kena negapka Paul ngambika iya yakin agi enggau semaya nya. (SKR. 19:21; 23:11) Taja pia pengelama dua minggu, ribut nya enda ngetu bepuput enggau balat. Maya nya, balat amat ujan lalu remang ti tebal ngelindung mata panas enggau bintang. Nyadi, kapten enda nemu dini alai kapal nya, sereta tunga pejalai kapal nya pengudah anyut dibai ribut. Ketegal nya, sida ba kapal tentu enda ulih berunding pasal makai. Baka ni sida ulih berunding deka makai sedangkan maya nya sida amat chelap, kena ujan, mabuk ketegal nepan kapal, sereta berasai balat takut?

14, 15. (a) Lebuh bejaku enggau sida, nama kebuah Paul nyebut baru pasal jaku tangkan ke diberi iya sebedau nya? (b) Nama dipelajarka kitai ari pesan ke dipadahka Paul ngagai sida?

¹⁴ Paul bediri lalu nyebut baru pasal jaku tangkan ke dipadah iya sebedau nya. Tang iya enda ngutuk bala kelasi enggau chara madahka: ‘Kan aku udah madah tadi.’ Taja pia, penusah ke nyadi nunjukka sida patut ningaka jaku tangkan ke diberi Paul sebedau nya. Lalu udah nya Paul madahka: “Anang irau. Laban nadai siku pan ari kita ke deka lenyau nyawa. Semina kapal tu aja ke deka karam.” (SKR. 27:21, 22) Jaku tu tentu ngelantangka ati bala peninga iya! Kelimpah ari nya, Paul mega berasai amat gaga ati laban Jehovah udah madah ngagai iya pasal pesan ke meri harapan ngagai semua ba kapal nya. Kitai mega patut ingat, nyawa tiap iku orang amat berega ba Jehovah. Ku rasul Peter madahka: “Jehovah . . . enggai siku pan ari kita dipunaska. Iya deka semua orang nesal ati.” (2 Pet. 3:9) Nya alai, amat penting kitai bebendar bekunsika pesan ari Jehovah ke ulih meri harapan ngagai semua orang! Tu ketegal, nyawa tiap iku orang kemayaharitu mega dalam bahaya enti sida enda nemu pesan tu.

¹⁵ Paul engka meri saksi ngagai mayuh orang ba kapal pasal “semaya ke diberi Petara.” (SKR. 26:6; Kol. 1:5) Maya nya, sida benung nganti kapal nya karam. Lalu Paul bisi peluang madahka pesan ti meri harapan ngagai semua orang. Ku iya madah: “Malam tadi, Petara ke disembah sereta dipetuaika aku nganjung melikat Iya, lalu melikat nya bediri ba sepiak aku. Ku melikat nya: ‘Anang takut, Paul. Nuan patut bediri ba mua raja Rome.  Peda nuan! Ketegal pemanah ati Petara, semua orang ke belayar enggau nuan deka diselamatka.’” Nyadi, Paul madah ke sida: “Nya alai, anang irau bala kaban. Laban aku pechaya Petara deka ngereja utai baka ke dipadah melikat nya ngagai aku. Taja pia, kapal kitai deka karam semak enggau siti pulau.”—SKR. 27:23-26.

16, 17. (a) Ni maya Paul besampi, lalu nama asil iya? (b) Baka ni jaku Paul dikeamatka?

¹⁶ Pengudah dua minggu, kapal nya anyut dibai ribut penyauh kira-kira 870 kilometer. Maya nya, bala kelasi ulih ninga umbak ke mangka tebing ba darat. Nya alai, sida ngulurka sauh ari kemudi ngambika kapal enda anyut. Lalu sida nguji ngawal begian luan kapal nuju ngagai darat ngambika ulih datai ba tebing tasik. Tang maya nya, bala kelasi nguji deka ninggalka kapal. Taja pia, bala soldadu nagang sida ngereja nya. Ku Paul madah ngagai pegawai soldadu enggau bala soldadu: “Kita enda ulih diselamatka enti bala kelasi nadai ba kapal.” Ketegal kapal nya ulih belayar enggau manah agi, Paul pan ngasuh semua sida makai. Pia mega, sekali agi iya ngasuh sida andal, semua sida tentu deka selamat. Pengudah nya, Paul “besampi meri terima kasih ngagai Petara ba mua semua sida.”  (SKR. 27:31, 35) Ba senentang tu, Paul netapka teladan ti manah ngagai Luke, Aristarkus, enggau orang Kristian kemayaharitu. Lebuh nuan bisi pengawa ngenataika sampi ba mua orang mayuh, kati sampi nuan meransang sereta ngelantangka ati orang bukai?

¹⁷ Pengudah Paul besampi, “semua sida pan badu agi irau lalu makai.” (SKR. 27:36) Pengudah nya, sida muai gandum ke dibai kapal nya. Enggau nya, kapal sida ulih terus melepung ba tasik lalu ulih selamat datai ke tebing. Lebuh hari udah siang, bala pekereja ba kapal netak tali sauh lalu sida mega muka tali ngambika uling kapal merurut ke tasik. Udah nya, sida muka layar ti mit ba luan kapal ngambika ulih ngawal kapal nya datai ke tebing. Tang, sida enda ulih ngawal kapal nya seratus peratus. Taja pia, kapal nya ngelantak tebing pasir, lalu kemudi kapal pechah ketegal balat dipangkaka umbak. Sekeda bala soldadu deka munuh orang jil laban enggai ngelakka sida ngerarika diri. Tang Julius nagang bala soldadu nya. Nya alai, Julius ngasuh sida ke nemu nyemerai terejun ke tasik, lalu sida ke bukai bepegai ba papan tauka repik kapal ke udah pechah ngambika ulih datai ba tebing. Enggau tu, semua utai ke dipadah Paul sebedau tu dikeamatka. Semua 276 iku orang ba kapal nya selamat. Bup Kudus madahka: “Semua orang selamat datai ba tebing.” Tang dini sida?—SKR. 27:44.

18-20. Baka ni orang ba Malta nunjukka diri “amat manah” ngagai sida ke kena kapal karam, lalu nama kereja ajih ke ditunjukka Petara nengah Paul?

¹⁸ Kapal sida karam ba pulau Malta, ke bisi ba begian selatan Sisilia. (Peda kutak “ Dini Malta?”) Orang Malta bejaku ngena bansa jaku bukai. Pia mega, sida nunjukka diri “amat manah” ngagai sida ke kena kapal karam. (SKR. 28:2) Orang Malta enda ngelala semua mansa kapal karam nya. Tang sida nungkunka api ke semua sida ke kena kapal karam nya. Api nya ngangatka tubuh bala mansa ke berasai chelap sereta kena ujan. Ketegal api nya mega, peluang dibuka ngambika siti kereja ajih tau nyadi.

 ¹⁹ Paul mega nulung orang bukai ke nyadi mansa kapal karam. Iya ngumpul rangkang kayu lalu nabakka kayu nya ngagai api. Tang enda memukai, bisi siku ular ti bisa pansut lalu mantuk jari Paul. Ular nya kekitang ba jari iya. Nya alai, orang Malta ngumbai nya siti ukum ari Petara. a

²⁰ Orang Malta ngumbai jari Paul “deka kembai.” Siti rujukan madahka, jaku asal ke dikena ba ayat tu dikumbai “rambai jaku ke dikena dalam bidang perubatan.” Leka jaku ke baka nya tentu diperundingka “Luke, lutur ke dikerinduka” lebuh iya nulis ayat nya. (SKR. 28:6; Kol. 4:14) Tang, Paul ngetikka ular nya ngagai api, lalu iya nadai nama-nama ketegal ular nya.

21. (a) Nama penerang bukai ke ditulis Luke enggau silik? (b) Nama kereja ajih bukai ke digaga Paul, lalu nama reaksi orang Malta pasal nya?

²¹ Bisi siku lelaki ke benama Publius diau ba pulau Malta. Iya kaya lalu bisi ngempu tanah ba dia. Kelimpah ari nya, iya engka siku pegawai Rome ti tinggi pangkat ke diau ba Malta. Luke ngumbai iya “ketuai ba pulau nya.” Bekaul enggau gelar nya, bisi 2 iti bukti arkeologi ti ditemu ba Malta ke nyebut pasal gelar ti sama. Publius gerah jari ngelaluka penatai Paul sereta bala kaban iya. Nya alai, sida diau enggau Publius pengelama 3 hari. Taja pia, apai Publius sakit. Sekali agi, Luke nerangka gaya pengerai pesakit enggau silik. Luke nulis, apai Publius “benung gali ba katil ketegal chelap angat sereta balat pedis perut.” Iya nerangka tanda-tanda penyakit nya ngena chara ke dikena ba bidang perubatan. Lebuh maya nya, Paul besampi lalu ngengkahka jari iya ba atas apai Publius. Ketegal nya, apai Publius pan gerai. Orang ba Malta amat alit ati enggau kereja ajih nya. Pengudah nya, sida mai orang ke sakit ngagai Paul ngambika ulih digeraika. Kelimpah ari nya, sida mega meri mayuh hadiah kena nyediaka utai ke diguna Paul enggau bala kaban iya.—SKR. 28:7-10.

22. (a) Baka ni siku profesor muji utai ke ditulis Luke pasal pejalai sida ngena kapal ngagai Rome? (b) Nama deka dikerandauka kitai ba pelajar pengudah tu?

²² Utai ke ditulis Luke pasal pejalai sida ngena kapal ngagai Rome amat terang sereta silik. Siku profesor madahka: “Kebendar iya, bup Surat Kereja Rasul ke ditulis Luke nyadi siti ari bup ke tampak agi enti dibanding enggau bup bukai dalam Bup Kudus. Tu ketegal, semua cherita sereta penerang dalam bup tu dipadahka enggau silik. Luke nulis penerang ti amat silik pasal gaya orang ke kereja ba kapal maya abad keterubah, enggau keadaan ba begian timur Mediterranean suba.” Luke engka nulis semua penerang tu engka bepelasarka diari ke ditulis iya ninting hari. Luke engka nulis diari maya iya bejalai enggau rasul Paul. Enti pia, iya tentu nulis mayuh agi cherita pasal pejalai sida pengudah nya. Nama deka nyadi ngagai Paul pengudah sida datai ba Rome? Aram meh kitai meda.