1. Nama utai ke dipechaya Paul, Luke enggau Aristarkus, lalu nama kebuah?

 KIRA-KIRA ba taun 59 M., Rasul Paul, Luke enggau Aristarkus nepan siti kapal ti besai. Ba maya nya mega, rasul Paul nyadi orang jil. Sida nepan siti kapal ti besai ke bisi patung “Anak Seus,” ke Besapit. Kapal nya amat besai lalu mai mayuh gandum. Kapal nya belayar ari Malta ke bisi ba Pulau Mediterranean lalu nuju ngagai Itali. (SKR. 27:2) Orang ke kereja ba kapal nya pechaya, anak lelaki petara Seus ke Besapit ke benama Kastor enggau Poluks ulih nyaga sida. Taja pia Paul, Luke enggau Aristarkus enda pechayaka nya. Tu ketegal, sida tiga tu nyembah Jehovah. Lalu Iya udah madahka Paul deka meri saksi ba Rome sereta bediri ba mua raja Rome.—SKR. 23:11; 27:24.

2, 3. Nama jalai ke ditengah kapal ke ditepan Paul, lalu sapa ke udah nyukung Paul kenyau ari pejalai sida berengkah?

² Kapal ke ditepan sida Paul sangkai ba Sairakusa, iya nya siti nengeri ba Sisilia ti nyauka sama besai enggau sama penting baka Atens sereta Rome. Tiga hari pengudah nya, kapal nya belayar ngagai Regium ke bisi ba begian selatan Itali. Ketegal bisi ribut ke bepuput ari selatan, kapal nya ulih belayar penyauh 320 kilometer ngagai siti penyangkai kapal di Itali ba Puteoli. Endur nya semak enggau Naples kemayaharitu. Kapal nya enda ngambi masa ti panjai kena belayar, lalu sida datai ngagai endur nya ba hari ti kedua.—SKR. 28:12, 13.

³ Nyadi, Paul udah datai ba begian ti penudi dalam pejalai iya ngagai Rome. Ba dia, iya deka bediri ba mua Raja Besai Rome. Kenyau ari maya Paul berengkah ba pejalai iya ngena kapal, nyentukka maya iya nyauka datai ba Rome, ‘Petara ti ngelantangka ati dalam semua pekara’ udah nyukung Paul. (2 Kor. 1:3) Baka ke deka dipelajarka kitai pengudah tu, Jehovah enda ngetu meri sukung ngagai Paul. Nya alai, Paul ulih terus nginjil enggau ransing.

4, 5. (a) Baka ni bala menyadi ba Puteoli ngelaluka Paul sereta sida ke enggau iya, lalu nama kebuah Paul bibas agi ari orang jil ke bukai? (b) Taja pan dijil, baka ni bala menyadi Kristian kitai bulih penguntung ketegal ulah sida ti manah?

⁴ Ba Puteoli, Paul sereta sida ke enggau iya “betemu enggau bala menyadi, lalu sida ngumbuk [sida Paul] diau enggau sida pengelama tujuh hari.”  (SKR. 28:14) Bala menyadi ba Puteoli nunjukka teladan ti manah ngelaluka penatai bala menyadi! Sida tentu ngasaika mayuh berekat ketegal nyediaka utai ke diguna sida Paul. Ketegal nya, bala menyadi ba Puteoli tentu nerima mayuh jaku peransang ke negapka pengarap sida. Taja pia, nama kebuah siku orang jil baka Paul bisi mayuh kebebasan? Tu engka ketegal, iya udah nunjukka diri tau dikearapka. Nyadi, bala soldadu Rome pechayaka iya.

⁵ Kemayaharitu, bisi mega nembiak Jehovah ke dijil sereta ditan ba kem alai ngetanka orang tangkap. Taja pia, sida bibas agi enti dibanding enggau orang jil ke bukai, laban sida udah ngayanka ulah Kristian ti manah. Ambika chunto ba Romania, bisi siku lelaki ke dijil pengelama 75 taun ketegal jenayah ngerumpak. Tang, iya berengkah belajarka Bup Kudus lalu ngaga ubah ti besai ba ulah iya. Asil iya, bala pegawai ba jil meri iya pengawa ngagai pasar kena meli barang ke diguna ba jil. Lalu iya ngagai pasar kediri aja, sereta nadai bala jejaga jil ke ngemataka iya. Endang amat, ulah kitai ti manah meri mulia ngagai Petara Jehovah.—1 Pet. 2:12.

6, 7. Baka ni bala menyadi ari Rome nunjukka pengerindu ti besai?

⁶ Ari Puteoli, Paul, Luke enggau Aristarkus bejalai kira-kira 50 kilometer ngagai Capua ke bisi ba jalai Apius. Jalai nya nuju ngagai Rome, lalu jalai nya digaga ari batu lava ti besai sereta rata. Jalai tu amat tebilang laban nengah jalai tu, orang ulih meda pemandangan menua pesisir Itali. Lalu, bisi sekeda endur ba jalai nya nunjukka pemandangan Tasik Mediterranean. Jalai nya mega nuju ngagai siti endur ti bepaya ke dikumbai Pontine Marshes. Endur nya kira-kira 60 kilometer ari Rome enggau pasar Apius. Luke nulis, lebuh bala menyadi ba Rome “ninga pasal kami,” sekeda ari sida sanggup datai ari endur ti amat jauh baka ari pasar. Pia mega, sekeda ari bala menyadi nganti ba Tiga Buah Rumah Numpang,  iya nya kira-kira 50 kilometer ari Rome. Orang ke bejalai suah diau enda lama ba rumah numpang nya ngambika ulih belelak. Nya alai, usaha ke digaga bala menyadi ke sanggup bejalai jauh nunjukka sida amat sayauka Paul!—SKR. 28:15.

⁷ Iya ke amat, pasar Apius ukai endur ti selesa kena orang ke bejalai jauh belelak. Peratika utai ke dipadah Horace, iya nya siku orang ke bepantun sereta penulis ke datai ari Rome. Ku iya madah pasal pasar nya: “Pasar nya amat penuh enggau orang ke belayar sereta bala pekereja ba rumah numpang.” Kesuah iya, orang ke nyaga rumah numpang enda manah ngagai orang bukai. Horace mega nulis, “ai ba endur nya amat kamah” sereta bebau. Nya alai, Horace empu pan enda sanggup makai ba endur nya. Taja pan endur nya enda selesa, tang bala menyadi ari Rome gaga ati nganti penatai sida Paul ba dia. Bala menyadi deka mai sida Paul datai ke Rome enggau selamat.

8. Nama kebuah Paul meri terima kasih ngagai Petara lebuh iya meda bala menyadi?

⁸ Bup Kudus madahka, lebuh Paul meda bala menyadi, iya “meri terima kasih ngagai Petara lalu berasai diperansang.” (SKR. 28:15) Paul amat lantang ati sereta berasai dikeringka pengudah iya meda bala menyadi ke amat dikerinduka iya. Rasul Paul mega amat ngelala sereta rapat enggau sekeda ari bala menyadi nya. Nama kebuah Paul meri terima kasih ngagai Petara? Laban iya nemu pengerindu ke diayanka sida diiring ari kuasa kudus. (Gal. 5:22) Kemayaharitu mega, kuasa kudus meransang orang Kristian ngambika nulung orang bukai, lalu ngelantangka ati sida ke kena penusah.—1 Tes. 5:11, 14.

9. Baka ni kitai ulih neladan bala menyadi ba Rome ke betemu enggau Paul?

⁹ Ambika chunto, kuasa kudus engka meransang bala menyadi ke gerah jari nyediaka utai ke diguna bala tuai ti ngabas, bala pengerintis ke dianjung indu opis sereta bala menyadi ke gawa penuh jam ke Jehovah. Mayuh ari sida udah ngelengkaka mayuh utai ba pengidup. Nya alai, tanya meh diri empu: ‘Kati aku ulih ngereja mayuh agi pengawa kena nyukung penemuai tuai ti ngabas, baka mai sida makai begulai tauka diau ba rumah aku? Kati aku ulih bekerejasama enggau sida ba pengawa nginjil?’ Enti nuan ngereja nya nuan deka nerima mayuh berekat. Chunto iya, gambarka meh pengaga ati bala menyadi ari Rome lebuh sida ninga pengalaman ti meransang ke dipadahka Paul sereta sida ke enggau iya.—SKR. 15:3, 4.

10. Padahka keadaan Paul lebuh iya ba Rome, lalu nama utai ke digaga iya enda lama pengudah iya datai ba dia?

¹⁰ Lebuh Paul sereta sida ke enggau iya datai ba Rome, “Paul dikemendarka diau kediri tang dijaga siku soldadu.” (SKR. 28:16) Ba jeman nya, orang ke ditan ba rumah suah dijaga siku soldadu. Pia mega, iya deka dirantai enggau soldadu nya ngambika iya enda ulih rari. Taja pan Paul ditanchang  ngena rantai, tang iya enda ngetu nginjil. Pengudah datai ba Rome, Paul belelak pengelama 3 hari. Nama nyadi udah nya? Iya ngangauka bala tuai bansa orang Judah ba Rome. Iya mega nguji deka ngelala sida enggau manah agi lalu meri saksi ngagai semua sida.

11, 12. Lebuh bejaku ngagai orang bansa Judah, nama utai ke dipadah Paul ngagai sida ngambika sida deka agi ninga jaku iya?

¹¹ Ku Paul madahka: “Bala menyadi, taja pan aku enda ngelaban bansa kitai tauka adat aki ini kitai, aku dijil ba Jerusalem lalu diserahka ngagai orang Rome. Pengudah aku ditasat, sida deka ngelepaska aku laban sida nadai tetemuka penyalah ke tau ngasuh aku patut diukum bunuh. Tang orang Judah mantah pemutus nya. Nya alai, aku minta diakim raja Rome. Taja pia, aku ngereja nya ukai ketegal aku deka nuduh bansa aku.”—SKR. 28:17-19.

¹² Maya nya, nama kebuah Paul ngumbai orang Judah ba Rome nya “bala menyadi”? Tu ketegal, Paul deka madahka diri sama bansa enggau sida. Lalu, iya deka nulung sida mutarka asai ati ti bepilih mata ke bisi ba ati sida. (1 Kor. 9:20) Pia mega, Paul enggau terang madahka diri datai ke Rome laban iya minta diakim Raja Besai Rome, ukai ketegal deka nyalahka orang bansa Judah. Taja pia, orang Judah ke diau ba Rome nadai kala ninga pasal peminta Paul ke minta diakim Raja Besai. (SKR. 28:21) Enti pia, nama kebuah orang Judah ari Judea nadai madah ngagai orang Judah ba  Rome pasal kes rasul Paul? Siti rujukan madahka: “Kapal ke ditepan Paul engka siti ari kapal ke keterubah kali datai ba Itali pengudah musin chelap. Nya alai, nadai pengari ari orang Judah ba Jerusalem ulih datai kia. Pia mega, sida pan enda ulih nganjung surat pasal kes Paul.”

13, 14. Baka ni chara Paul madahka pesan pasal Perintah Petara, lalu baka ni kitai ulih neladan iya?

¹³ Maya nya, chara Paul ngenataika pesan Perintah Petara udah ngasuh bala orang Judah bisi asai ati deka nemu mayuh agi. Ku Paul: “Nya meh kebuah aku minta diri betemu lalu bejaku enggau kita. Aku ditanchang ngena rantai tu ketegal orang ti dikearapka orang Israel.” (SKR. 28:20) Nya alai, harapan ke disebut Paul tentu bisi kaul enggau Messiah sereta Perintah iya. Kelimpah ari nya, bala menyadi ari raban gempuru Kristian mega nginjil pasal harapan nya ngagai orang bukai. Ketegal nya, bala tuai bansa orang Judah nyaut Paul: “Kami ngasaika kami patut ningaka penemu nuan, laban kami nemu raban pengarap tu disakal orang ba dini-dini endur.”—SKR. 28:22.

¹⁴ Lebuh kitai bisi peluang bekunsika Berita Manah, kitai deka neladan Paul. Baka Paul, kitai deka madahka pekara ti meransang bala peninga kitai berunding. Kitai mega deka ngena tanya ke ulih ngasuh sida bisi minat ngagai pesan Bup Kudus. Kitai ulih tetemuka chara iya ba Bup Kereja Kena Gempuru Pengidup enggau Pengawa Kristian sereta Bup Ngemanahka Agi Chara Macha enggau Ngajar. Kati nuan ngena semua perengka ngajar tu enggau manah?

15. Nama empat iti pekara ke ulih dipelajarka kitai ari chara Paul meri saksi?

¹⁵ Ba hari siti, mayuh agi orang Judah datai ngagai endur Paul diau. Paul nerangka ayat Bup Kudus ngagai sida “ari pagi nyentuk ke malam . . . meri saksi enggau silik pasal Perintah Petara. Iya nerangka pekara nya ngambika sida arapka Jesus.” (SKR. 28:23) Bisi empat iti pekara ke ulih dipelajarka kitai ari chara Paul meri saksi. Kesatu, iya betumpu pasal Perintah Petara. Kedua, iya bejaku enggau chara ti ngasuh bala peninga iya yakin enggau pesan ke dipadah iya. Ketiga, iya ngena ayat Bup Kudus kena nyukung utai ke dipadah iya. Keempat, Paul nunjukka diri enda berundingka diri empu laban iya sanggup meri saksi “ari pagi nyentuk ke malam.” Teladan Paul endang manah ke kitai! Nama asil ari pengawa iya? Bup Kudus madahka: “Bisi nya arapka utai ke disebut iya,” tang bisi sekeda enggai arapka iya. Luke nulis, sekeda ari sida enda setuju enggau utai ke dipadah Paul. Nya alai sida “lalu mupuk.”—SKR. 28:24, 25a.

16-18. Nama kebuah Paul enda tekenyit enggau reaksi ti negatif ke diterima iya ari orang Judah ba Rome, lalu baka ni reaksi kitai enti orang kemayaharitu nulak pesan ke ditusui kitai?

¹⁶ Paul enda tekenyit enggau reaksi ti negatif ari orang Judah ba Rome.  Kebendar iya, utai ke digaga sida sejalai enggau jaku benabi ba Bup Kudus. Pia mega, Paul kala nerima reaksi ti sama ari orang bukai sebedau tu. (SKR. 13:42-47; 18:5, 6; 19:8, 9) Nyadi, tu meh utai ke dipadah Paul ngagai sida ke enggai nerima: “Amat utai ke disebut kuasa kudus Petara nengah Nabi Isaiah ngagai aki ini kita, ‘Mansang ngagai orang ari bansa tu lalu padahka: “Kita amat mending, tang enda mereti, lalu kita amat merening, tang enda meda. Ati orang ari bansa tu udah ditutup.”’” (SKR. 28:25b-27) Jaku asal ke dikena dalam rambai jaku “ditutup” mai reti jantung ke “tesumbat” laban lemak, tauka “penuh laban lemak.” Nya alai, pesan pasal Perintah Petara enda ulih tama ngagai ati sida. (SKR. 28:27) Orang ke nulak pesan Perintah Petara endang rugi besai!

¹⁷ Kepenudi iya, Paul madahka: “Orang bansa bukai . . . tentu deka mendingka nya.” Tu terang nunjukka, orang bansa Judah enda sama enggau orang bansa bukai. (SKR. 28:28; Mas. 67:2; Isa. 11:10) Paul nemu utai ke dipadah iya endang amat. Tu ketegal sebedau tu, iya empu udah meda orang bansa bukai nerima pesan Perintah Petara!—SKR. 13:48; 14:27.

¹⁸ Baka Paul, anang meh kitai ngambi ati enti bisi orang nulak pesan Berita Manah. Kitai nemu semina mimit aja orang deka tetemuka jalai ti nuju ngagai pengidup. (Mat. 7:13, 14) Nambahka nya, lebuh bisi sida ke baruh ati milih deka enggau sembah ti tuchi, kitai deka sama gaga ati lalu ngelaluka sida ngagai raban gempuru kitai enggau ati ti tebuka.—Luk. 15:7.

19. Baka ni Paul ngena masa iya enggau manah lebuh iya ditan ba rumah?

¹⁹ Jaku penudi Luke dalam bup Surat Kereja Rasul amat meransang. Ku iya madah: “Paul diau ba rumah ke disua iya pengelama dua taun, lalu iya nerima semua orang ke datai ngagai iya enggau ati ti gaga. Iya nusui Berita Manah pasal Perintah Petara, lalu ngajar sida pasal Tuan Jesus Kristus enggau berani sereta nadai penanggul.” (SKR. 28:30, 31) Paul teladan ti amat manah nunjukka pengerah jari, pengarap, sereta pengeransing!

20, 21. Padahka sekeda chunto pasal orang ke nerima penguntung ketegal Paul nginjil ba Rome.

²⁰ Siku ari orang ke dikelaluka Paul nya Onesimus. Paul manah enggau iya. Taja pan iya siku ulun ke ngerarika diri ari Kolosi, Paul nulung Onesimus nyadi orang Kristian. Lalu, Onesimus nyadi “menyadi ke tetap ati sereta dikerinduka” Paul. Kebendar iya, Paul ngumbai Onesimus “anak aku.” Lalu Paul “nyadi baka apai iya.” (Kol. 4:9; Plm. 10-12) Onesimus tentu mayuh meransang rasul Paul! a

 ²¹ Orang bukai mega nerima penguntung ari teladan Paul. Ku iya nulis surat ngagai orang Kristian ba Pilipi: “Utai ke nyadi ba aku udah ngasuh Berita Manah majak ngelekai. Semua Jejaga Istana sereta mayuh orang bukai nemu aku dijil ketegal nyadi murid Kristus. Diatu, mayuh bala menyadi ke gawa ke Tuan kitai nyau diperansang ketegal aku dijil. Sida mega nyau enda takut, tang berani agi nusui pesan Petara.”—Plp. 1:12-14.

22. Nama utai bukai ke digaga Paul lebuh iya ditan ba Rome?

²² Taja pan Paul ditan ba rumah lebuh iya ba Rome, tang iya ngena masa nya nulis beberapa iti surat ti penting. Semua surat nya nyadi sebagi ari Bup Kudus Matthew ngagai Pemandang. b Maya nya, Paul nulis surat nya nuju ngagai bala menyadi Kristian ba abad keterubah, lalu sida bulih mayuh penguntung ari surat nya. Kitai mega bulih mayuh penguntung ari surat Paul. Taja pan jaku lalau ke diberi iya udah lama, tang semua jaku lalau nya ulih dititihka kitai kemayaharitu.—2 Tim. 3:16, 17.

23, 24. Baka Paul, baka ni menyadi Kristian kemayaharitu ngetanka pengaga ati sida sereta terus ngereja pengawa nginjil taja pan sida dijil ketegal pengarap?

²³ Paul dijil kira-kira empat taun. Reti iya, dua taun ba Kaisaria lalu dua taun ba Rome. c Pengujung iya, Paul dilepaska. Taja pia, bup Surat Kereja Rasul nadai madahka kemaya Paul dilepaska ari jil. (SKR. 23:35; 24:27) Tang, Paul mengkang gaga ati sereta terus ngereja semua utai ke ulih iya kena gawa mayuh agi ke Jehovah. Kemayaharitu mega, mayuh nembiak Jehovah ke dijil ketegal pengarap sida. Taja pia, sida mengkang gaga ati lalu terus ngereja pengawa nginjil. Peratika teladan Adolfo ke dijil ba Sepanyol laban enggai nyadi soldadu. Siku pegawai madah ngagai iya: “Kami alit ati enggau nuan. Kami udah bebendar  ngemediska nuan. Tang, balat agi kami jai enggau nuan, nuan mayuh agi tuchum sereta bejaku manah ngagai kami.”

²⁴ Nyau kelama, bala pegawai jil amat pechayaka Adolfo, lalu sida enda agi ngunchi bilik jil iya. Kekadang bala soldadu deka datai ngagai bilik jil iya laban deka nanya Adolfo pasal Bup Kudus. Siku ari pegawai jil mega deka ngagai bilik jil Adolfo laban iya deka macha Bup Kudus. Maya nya, Adolfo deka bejaga ngambika orang enda meda pegawai jil nya macha Bup Kudus. Pia mega, bala orang jil ke bukai deka “nyaga” bilik jil ba depan! Arapka teladan manah ari bala saksi ke setia baka Adolfo meransang kitai terus “enda takut, tang berani agi nusui pesan Petara,” taja pan kitai napi mayuh penusah.

25, 26. Jesus kala madahka siti jaku benabi. Kurang ari 30 taun pengudah nya, baka ni rasul Paul meda jaku benabi nya dikeamatka, lalu baka ni kitai meda jaku benabi nya dikeamatka kemayaharitu?

²⁵ Bup Surat Kereja Rasul madahka mayuh cherita ti ngalitka ati pasal orang Kristian ti bebendar nusui Berita Manah. Lalu, bup tu disimpulka enggau teladan rasul Paul ti meransang laban iya terus “nusui Berita Manah pasal Perintah Petara” ngagai semua orang ke ngabas iya lebuh iya ditan ba rumah! Ba pelajar ti keterubah, kitai macha pasal pesan Jesus ke diberi ngagai bala murid iya. Ku Jesus madahka: “Kita deka bulih pengering lebuh kuasa kudus Petara datai ngagai kita, lalu kita deka nyadi saksi aku ba Jerusalem, ba serata Judea enggau Samaria, sereta nyentuk ngagai ujung dunya.” (SKR. 1:8) Kurang ari 30 taun pengudah nya, iya nya maya jeman rasul Paul, pesan pasal Perintah Petara udah “ditusui ngagai semua utai ke udah ditempa ba baruh langit.” d (Kol. 1:23) Semua tu nyadika bukti ti nunjukka kuasa kudus Petara endang amat bekuasa!—Sek. 4:6.

²⁶ Kemayaharitu, kuasa kudus mega nulung bala menyadi ke dipilih ngagai serega enggau “bedus ti bukai,” ngambika sida terus “meri saksi enggau silik pasal Perintah Petara.” Diatu pengawa nginjil udah dikereja ba 240 iti menua! (Jhn. 10:16; SKR. 28:23) Kati nuan bebendar enggau pengawa nginjil?