1-3. (a) Nama pemansang ke ulih ngachau penyerakup raban gempuru ba abad keterubah? (b) Nama penguntung ke diulih kitai lebuh belajarka utai ke nyadi maya nya?

 PAUL seduai Barnabas amat gaga ati pengudah seduai iya pulai ari Siria Antiok. Seduai iya baru udah nembuka pejalai nginjil ti keterubah. Paul enggau Barnabas gagit ati madahka, Jehovah “udah muka jalai, ngambika orang ari bansa bukai ulih arap.” (SKR. 14:26, 27) Nambahka nya, Berita Manah udah ditusui di serata Antiok. Asil iya, “mayuh orang” ari bansa bukai ba Antiok nyadi orang Kristian.—SKR. 11:20-26.

² Berita Manah pasal pemansang nya ngelekai ngagai Judea. Bala menyadi endang patut gaga ati ke pemansang tu. Tang bisi penanggul ke nyadi bekaul enggau pengawa besunat. Ba senentang tu, baka ni orang Judah enggau orang bansa bukai patut begulai enggau pangan diri? Lalu taja pan orang ari bansa bukai dudi agi nyadi orang Kristian, tang nama runding ke patut bisi ba sida pasal Adat Moses? Isu bekaul enggau pengawa besunat udah ngasuh bala menyadi balat bekelikuh. Penanggul tu ulih ngasuh raban gempuru enda beserakup. Nya alai, baka ni penanggul tu deka diputarka?

³ Seraya kitai belajar pasal cherita tu, kitai deka belajar mayuh utai ti beguna. Kemayaharitu, engka bisi penanggul ke ulih ngachau penyerakup ba raban gempuru. Utai ke deka dipelajarka kitai diatu ulih nulung kitai nemu chara mutarka penanggul nya.

4. Nama runding ti salah ke dikerembaika sekeda menyadi Kristian, nama tanya ke patut disaut ketegal runding salah tu?

⁴ Luke nulis: “Sekeda orang [ngagai Antiok] ari Judea belabuh ngajar bala menyadi ba Antiok. Sida madahka: ‘Kita enda ulih diselamatka enti kita enda disunat nitihka Adat Moses.’” (SKR. 15:1) Kati “sekeda orang ke datai ari Judea” nya kala nyadi orang Parisi sebedau sida  nyadi orang Kristian? Bup Kudus nadai kala madah. Taja pia, sida keran nitihka chara orang Parisi berunding. Pia mega, sida madahka diri ngarika bala rasul sereta bala tuai gempuru ari Jerusalem. Tang nya enda amat. (SKR. 15:23, 24) Perundingka tu, 13 taun sebedau penanggul tu nyadi, rasul Peter ngelaluka orang bansa bukai ke enda besunat ngagai raban gempuru. Lalu maya nya Peter nitihka iring Petara. Nya alai, nama kebuah orang Judah ke udah nyadi orang Kristian agi mejal orang bukai nerima penemu sida pasal pengawa besunat? a—SKR. 10:24-29, 44-48.

5, 6. (a) Nama kebuah sekeda orang Kristian bansa Judah keran amat deka ngetanka pengawa besunat? (b) Kati sempekat pengawa besunat sebagi ari sempekat Abraham? Terangka. (Peda nota kaki.)

⁵ Bisi mayuh kebuah orang Kristian bansa Judah deka ngetanka pengawa besunat. Siti ari kebuah nya Jehovah Empu ke ngepunka pengawa besunat. Lalu pengawa nya nunjukka orang bisi kaul ti spesial enggau Iya. Pengawa besunat berengkah dikereja sebedau bisi Adat Moses. Lalu nyau kelama, pengawa tu nyadi sebagi ari Adat nya. Kebendar iya, pengawa besunat tu berengkah ari jeman Abraham. b (Lew. 12:2, 3) Adat Moses mega madahka, siku orang asing ke deka ngereja pengawa dibaruh Adat nya, baka makai pemakai maya Pengerami Paska patut disunat dulu. (P-sut. 12:43, 44, 48, 49) Nya alai ba runding orang Judah, orang ke enda besunat dikumbai enda tuchi sereta enda patut dipebasa.—Isa. 52:1.

⁶ Nya alai, orang Kristian bansa Judah patut bisi pengarap sereta pemaruh ati kena nerima penemu ke diaduka baru. Sempekat Adat Moses udah diganti enggau sempekat ti baru. Reti iya, taja pan siku orang diadaka nyadi orang Judah, tang iya enda terus nyadi nembiak Petara. Orang Kristian ke bebansa Judah patut berani nerima Jesus sereta bala menyadi ke datai ari bansa bukai ti enda besunat. Tu kelebih agi ngagai sida ke diau berimbai enggau orang Judah baka bala menyadi ba Judea.—Jer. 31:31-33; Luk. 22:20.

7. Nama pemendar ke enda dimeretika “sekeda orang ke datai ari Judea”?

⁷ Kitai nemu standard Petara enda kala berubah, laban prinsip asas ari Adat Moses mega dititihka ba sempekat baru. (Mat. 22:36-40) Bekaul enggau pengawa besunat, Paul nulis: “Utai ke ba dalam ati siku-siku orang ke deka nentuka iya orang Judah ti bendar. Sunat ti  bendar ukai nitihka utai ke dipadahka adat, tang sunat nya, sunat ba ati ke diiring kuasa kudus Petara.” (Rom. 2:29; U-dat. 10:16) Nya alai, “sekeda orang ke datai ari Judea” enda meretika pemendar tu. Tang sida madahka, Petara enda sekali-kali deka muai atur pasal pengawa besunat. Nya alai, kati sida sanggup deka ngubah chara sida berunding?

8. Nama kebuah penanggul pasal besunat dibai ngagai raban ti ngiring ba Jerusalem?

⁸ Luke madahka: “Nya alai, sida [iya nya “sekeda orang”] balat bekelikuh sereta beserekang penemu enggau Paul seduai Barnabas. Udah nya, bala menyadi ngasuh Paul, Barnabas, enggau sekeda ari bala sida, mansang ngagai Jerusalem ngambika ulih berandau pasal pekara nya enggau bala rasul sereta bala tuai gempuru ba din.” c (SKR. 15:2) Raban gempuru ba Antiok enda ulih mutarka pekara tu. Sida “bekelikuh sereta beserekang penemu” laban kedua-dua piak enggai alah enggau pangan diri. Nyadi, ngambika ulih ngetanka pemaik sereta penyerakup, bala menyadi ba Antiok mai pekara tu ngagai ‘bala rasul sereta bala tuai gempuru ba Jerusalem.’ Maya nya, sida meh ke nyadi raban ti ngiring. Nama ulih dipelajarka kitai ari bala tuai gempuru ba Antiok?

9, 10. Baka ni bala menyadi lelaki ba Antiok enggau Paul seduai Barnabas netapka teladan ti manah ngagai kitai kemayaharitu?

⁹ Kitai patut pechayaka gerempung Petara enggau pengabis ati. Ba abad keterubah, semua menyadi lelaki ke nyadi raban ti ngiring bebansa Judah. Lalu, semua bala menyadi ba Antiok nemu pasal utai tu. Tang, bala menyadi ba Antiok pechayaka raban ti ngiring ulih mutarka penanggul tu nitihka Bup Kudus. Nama kebuah bala menyadi ari Antiok pechayaka raban ti ngiring? Laban sida pechaya Jehovah ngena kuasa kudus sereta Jesus Kristus mutarka penanggul pasal pengawa besunat. (Mat. 28:18, 20; Eps. 1:22, 23) Nya alai, enti bisi penanggul ke besai nyadi, aram meh kitai nitihka teladan bala menyadi ba Antiok. Kitai patut pechayaka gerempung Petara, sereta Raban ti Ngiring ke udah dipilih kuasa kudus.

¹⁰ Kitai mega belajar kebuah patut baruh ati sereta sabar. Peratika teladan Paul seduai Barnabas. Seduai iya dipilih kuasa kudus kena  nginjil ngagai semua bansa. Tang, seduai iya enda ngasaika diri bisi hak kena mutarka penanggul besunat tekala nya ba Antiok. (SKR. 13:2, 3) Pengudah penanggul tu nyadi, Paul nulis: “Aku mupuk kin [ngagai Jerusalem] ketegal utai ke udah dipandangka ngagai aku.” Utai ke ditulis Paul nunjukka, iya nitihka iring Jehovah bekaul enggau pekara tu. (Gal. 2:2) Kemayaharitu, penanggul ke tau ngasuh raban gempuru enda beserakup ulih nyadi. Nya alai, bala tuai gempuru ulih neladan Paul seduai Barnabas ngayanka pemaruh ati sereta sabar. Ari ke ngetanka penemu diri empu, bala tuai gempuru ngiga iring Jehovah nengah Bup Kudus. Pia mega, sida pan ngiga iring ari Raban ti Ngiring.—Plp. 2:2, 3.

11, 12. Nama kebuah penting nganti Jehovah?

¹¹ Kadang-kadang, kitai patut nganti Jehovah kena nulung kitai meretika sekeda ajar Bup Kudus. Berapa lama bala menyadi ba abad keterubah patut nganti saut Jehovah pasal pengawa besunat? Peratika, Kornelius dipilih kuasa kudus ba taun 36 M. Penanggul tu diputarka kena taun 49 M. Nya alai, sida patut nganti kira-kira 13 taun. Nama kebuah tu lama amat? Engka Jehovah deka meri awak ngagai orang Judah ke baruh ati kena nerima ubah ti besai tu. Sempekat pengawa besunat udah digaga kenyau ari jeman Abraham, lalu udah digaga pengelama 1900 taun. Nya alai ba orang Judah, ubah tu amat besai!—Jhn. 16:12.

¹² Jehovah amat sabar sereta manah enggau kitai. Kitai bisi basa ti besai ulih diajar Iya! Ajar Iya seruran manah lalu meri penguntung ke kitai empu. (Isa. 48:17, 18; 64:8) Nya alai, anang meh kitai kering enggau penemu diri empu. Tauka lebuh gerempung bisi ngaga ubah pasal sekeda ajar Bup Kudus, anang meh kitai meri reaksi ti enda manah. (P-jar. 7:8) Enti nuan bisi berasai baka nya, nuan ulih besampi minta tulung ari Jehovah,  lalu berunding enggau dalam pasal jaku lalau ke bisi ba Surat Kereja Rasul bagi 15. d

13. Baka ni kitai ulih neladan penyabar Jehovah ba pengawa nginjil kitai?

¹³ Kitai patut sabar lebuh ngajar orang ke tusah deka ninggalka pengarap tauka adat ti enda sejalai enggau ajar Bup Kudus. Ba senentang tu, kitai patut meri masa ngambika kuasa kudus Petara ulih nyapai ati pemelajar kitai. (1 Kor. 3:6, 7) Pia mega, kitai ulih besampika pekara tu ngagai Jehovah. Iya tentu deka nulung kitai nemu utai ke patut digaga. Tauka Iya deka nulung kitai nengah chara bukai ba maya ti ngena.—1 Jhn. 5:14.

14, 15. Baka ni bala menyadi ba raban gempuru Antiok bebasaka Paul, Barnabas, sereta bala menyadi ke enggau seduai iya, lalu nama kebuah sida tu nyadika berekat ngagai bala menyadi ba abad keterubah?

¹⁴ Luke nulis: “Raban gempuru bejalai enggau sida naka setengah jalai aja. Udah nya, sida neruska pejalai nengah Finisia enggau Samaria. Ba din, sida madah enggau silik pasal baka ni orang ari bansa bukai udah nguing lalu nyembah Petara. Nya alai, semua bala menyadi ba din balat gaga ati.” (SKR. 15:3) Raban gempuru ba Antiok nunjukka pengerindu Kristian enggau chara bebasaka Paul, Barnabas, sereta bala menyadi ke enggau seduai iya. Pia mega, bala menyadi ba Antiok ngarapka Jehovah merekatka pengawa semua sida nya. Naka meh pemanah teladan bala menyadi ba Antiok ke kitai! Kati nuan mega bebasaka bala menyadi Kristian, “kelebih agi sida [bala tuai gempuru] ke bebendar nusui sereta ngajar pasal jaku Petara”?—1 Tim. 5:17.

¹⁵ Paul, Barnabas, sereta bala menyadi ke enggau seduai iya sangkai ba Finisia enggau Samaria. Ba endur nya, bisi orang Kristian bebansa Judah ke kala rari kia pengudah Stepen diukum bunuh. Paul sereta semua menyadi ke enggau iya bekunsika pengalaman “enggau silik” pasal pengawa nginjil sida ngagai orang bansa bukai. Nya alai, sida nyadi berekat ngagai bala menyadi ba Finisia enggau Samaria. Kemayaharitu, pengalaman pasal chara Jehovah udah merekatka pengawa nginjil meransang bala menyadi Kristian, kelebih agi sida ke benung napi penanggul. Pengalaman ke baka tu suah dipadah lebuh gempuru Kristian, gempuru besai sereta konvensyen. Pia mega, bisi ditulis ba begian pengalaman sereta siri cherita pengidup ba litaricha kitai enggau laman web kitai. Kati nuan bebendar datai begempuru sereta macha litaricha kitai? Enti nuan ngereja nya, nuan tentu deka bulih mayuh penguntung.

16. Nama utai ke nunjukka pengawa besunat nyadi penanggul ti besai?

 ¹⁶ Pengudah bejalai 550 kilometer, Paul, Barnabas enggau bala menyadi ari Antiok datai ba Jerusalem. Luke nulis: “Lebuh sida datai ba Jerusalem, raban gempuru, bala rasul, enggau bala tuai gempuru, nyambut penatai sida enggau gaga ati. Lalu sida madahka mayuh utai ke udah digaga Petara nengah sida.” (SKR. 15:4) Taja pia nama nyadi pengudah nya? Luke madahka: “Sekeda ari raban pengarap orang Parisi ke udah nyadi murid Jesus bediri lalu bejaku: ‘Sida ke ukai orang Judah ke arapka Jesus mesti disunat lalu patut nitihka Adat Moses.’” (SKR. 15:5) Nya alai, kati orang Kristian ke datai ari bansa bukai patut disunat? Isu tu nyadi penanggul ti amat besai lalu patut diputarka.

17. Sapa ke nyadi raban ti ngiring ba Jerusalem, lalu nama kebuah “bala tuai gempuru” enggau raban nya?

¹⁷ Jaku Dalam 13:10 madahka: “Nuan amat pintar enti nuan nemu minta jaku lalau.” Nya alai sejalai enggau prinsip nya, “bala rasul enggau bala tuai gempuru begelumu berandauka pekara [pengawa besunat].” (SKR. 15:6) Nyadi, “bala rasul enggau bala tuai gempuru” ngaga pemutus ti bekaul enggau pengawa besunat. Sida ngaga pemutus ngarika semua raban gempuru Kristian. Tu meh utai ke digaga Raban ti Ngiring kemayaharitu. Taja pia ba abad keterubah, nama kebuah bisi “bala tuai gempuru” gawa begulai enggau bala rasul ba raban nya? Tu ketegal, rasul James udah diukum bunuh, lalu ba sesiti timpuh rasul Peter mega bisi dijil. Bala rasul ke bukai mega engka deka napi penanggul ti sama baka James enggau Peter. Nya alai maya nya, mesti bisi tuai gempuru ngambika pengawa raban ti ngiring ulih terus dipejalaika.

18, 19. Nama utai ke dipadah Peter, lalu nama ulih dipelajarka bala peninga iya?

¹⁸ Luke nulis: “Pengudah sida bendar amat beserekang penemu, Peter angkat lalu bejaku: ‘Bala menyadi, sebedau tu, semua kita udah nemu, Petara udah milih aku ari bala kita ngambika nengah aku, orang ari bansa bukai ulih ninga ajar pasal Berita Manah lalu arap.  Petara ke nemu utai ke bisi dalam ati, udah nunjukka Diri nerima sida lebuh Iya meri sida kuasa kudus Iya, baka Iya ke udah meri nya ngagai kitai. Ba Iya, kitai enggau sida nadai bida. Tang Iya ngasuh ati sida tuchi laban sida arap.’” (SKR. 15:7-9) Nitihka siti rujukan, lebuh “beserekang penemu” ba ayat 7 disalin ari jaku Gerika, iya nyadi “ngiga,” tauka “betanya.” Tu nunjukka, bala menyadi lelaki ba raban ti ngiring maya nya madahka penemu sida enggau beterus terang.

¹⁹ Peter ngingatka bala peninga iya pasal siti pekara. Iya bisi enggau lebuh Jehovah milih Kornelius enggau ruang bilik iya nengah kuasa kudus ba taun 36 M. Enggau nya, Kornelius nyadi orang Kristian ti keterubah ke datai ari bansa bukai lalu enda disunat. Reti iya, Jehovah enda agi meda bida entara orang Judah enggau orang bansa bukai. Enti pia, mensia nadai hak deka bepilih mata. Sesiku orang ulih dikumbai lurus enti iya arapka Jesus, lalu ukai ketegal nitihka Adat Moses.—Gal. 2:16.

20. Baka ni sida ke kering penemu pasal pengawa besunat “nguji Petara”?

²⁰ Dibaruh iring Jaku Petara enggau kuasa kudus, Peter madahka: “Nya alai, nama kebuah kita ngasuh bala murid tu ngesan utai ti berat kena nguji Petara, enti kitai empu enggau bala aki ini kitai pan enda tesanka utai nya? Tang kitai arap kitai diselamatka ketegal pemanah ati Tuan Jesus ti besai. Sida mega arapka utai ti sama.” (SKR. 15:10, 11) Sida ke kering penemu pasal pengawa besunat kebendar iya “nguji Petara,” tauka ‘nguji penyabar Petara.’ Iya ke amat, orang Judah pan enda ngasika Adat nya enggau seratus peratus. Lalu, sida patut diukum bunuh. Nya alai, sida nadai kebuah deka mejal orang bansa bukai nitihka Adat Moses. (Gal. 3:10) Tang, orang Kristian bebansa Judah patut beterima kasihka pengasih Petara ke enda layak diterima sida nengah Jesus.

21. Nama utai ke dipadah Barnabas enggau Paul ba randau nya?

²¹ Jaku Peter ngasuh “semua orang ba dia enda bemunyi.” Udah nya, Barnabas enggau Paul madahka “tanda enggau kereja ajih ke digaga Petara ba bansa bukai nengah seduai iya.” (SKR. 15:12) Pengujung iya, bala rasul enggau tuai gempuru patut meresa semua bukti. Sida mega patut ngaga pemutus sejalai enggau peneka Petara bekaul enggau pengawa besunat.

22-24. (a) Baka ni Raban ti Ngiring kemayaharitu nitihka teladan raban ti ngiring ba abad keterubah? (b) Baka ni bala tuai gempuru ulih nunjukka basa ngagai atur teokratik?

²² Kemayaharitu, Raban ti Ngiring ngiga iring ari Bup Kudus lebuh berandauka sesiti pekara. Pia mega, sida bebendar besampi minta iring ari kuasa kudus. (Mas. 119:105; Mat. 7:7-11) Baka ni sida ulih ngaga pemutus ti nitihka peneka Petara? Sebedau sida betemu, sida  deka nemu dulu pekara ke deka dikerandauka. Enggau nya, tiap iku sida ulih berunding sereta besampi pasal pekara nya. (J-lam. 15:28) Maya sida betemu, bala menyadi tu deka madahka penemu diri tang enggau chara ti bebasa. Sida mega suah ngena Bup Kudus lebuh sida berandau.

²³ Bala tuai gempuru patut nitihka teladan Raban ti Ngiring. Bisi maya iya, bala tuai gempuru enda ulih mutarka penanggul ti besai. Nya alai, bala tuai gempuru patut nanya ngagai bala menyadi ba pampang opis tauka tuai ti ngabas. Enti agi enda ulih diputarka, menyadi ba pampang opis deka nulis surat ngagai Raban ti Ngiring.

²⁴ Jehovah merekatka sida ti bebasaka atur teokratik. Pia mega, Jehovah merekatka sida ti ngayanka pemaruh ati, penetap ati sereta penyabar. Baka ke deka dipelajarka kitai pengudah tu, Jehovah merekatka orang ti nunjukka sifat baka nya, lalu meri sida pengelantang. Jehovah mega merekatka sida enggau penemu ngambika ulih nitihka iring Iya. Kelimpah ari nya, sida deka ngasaika penyerakup ba raban gempuru.