Nuju Ngagai Penginjil Perintah Petara ti Dikerinduka Kami:

Gambarka enti nuan siku ari bala rasul ke bediri ba Bukit Kana. Maya nya, Jesus ngayanka diri ba mua nuan. Sebedau iya niki ke serega, iya madah: “Kita deka bulih pengering lebuh kuasa kudus Petara datai ngagai kita, lalu kita deka nyadi saksi aku ba Jerusalem, ba serata Judea enggau Samaria, sereta nyentuk ngagai ujung dunya.” (SKR. 1:8) Baka ni reaksi nuan?

Engka nuan ngasaika pengawa nya kelalu berat. Nuan engka berunding, ‘Baka ni kitai ulih nginjil “nyentuk ngagai ujung dunya”? Kitai tu raban ti mimit aja.’ Nuan mega engka agi ingat jaku tangkan ke diberi Jesus ba malam sebedau iya mati. Ku iya: “Nadai ulun ke besai agi ari tuan iya. Enti sida udah nitihka ajar aku, sida mega deka nitihka ajar kita. Enti sida udah merinsaka aku, sida mega deka merinsaka kita. Sida deka ngereja semua tu ngagai kita ketegal nama aku, laban sida enda ngelala Iya ke ngirumka aku.” (Jhn. 15:20, 21) Ketegal nya, nuan engka nanya diri empu, ‘Taja pan aku disakal sereta kena perinsa, baka ni aku ulih meri saksi enggau silik?’

Kemayaharitu, kitai mega bisi berundingka tanya ti sama. Ketegal kitai Saksi-Saksi Jehovah, kitai bisi pengawa meri saksi enggau silik “nyentuk ngagai ujung dunya,” ngagai “semua bansa.” (Mat. 28:19, 20) Baka ni pengawa tu ulih ditembuka, kelebih agi ketegal kitai nemu, kitai deka disakal?

Bup Surat Kereja Rasul nunjukka chara bala rasul sereta menyadi Kristian ba abad keterubah mujur ngereja pengawa sida enggau saup ari Jehovah. Bup tu digaga kena nulung nuan meresa peristiwa ke nyadi ba Bup Surat Kereja Rasul, lalu ngasaika pengagit ati enggau utai ti nyadi dalam bup tu. Nuan deka alit ati, laban bisi mayuh utai ti sama entara nembiak Petara ba abad keterubah enggau nembiak Petara kemayaharitu. Utai ti sama ukai semina pengawa kitai aja. Tang mega, chara kitai diatur ngereja pengawa nya. Lebuh nuan berunding enggau dalam pasal semua tu, nuan deka pechaya agi, Petara Jehovah seruran ngiring gerempung Iya ba dunya.

Kami ngarapka sereta besampi, enggau meresa bup Surat Kereja Rasul, nuan deka yakin agi, Jehovah deka nulung nuan sereta kuasa kudus Iya deka nyukung nuan. Arapka nuan diperansang terus “meri saksi enggau silik” pasal Perintah Petara, lalu nulung orang bukai ngambika sida ulih selamat.—SKR. 28:23; 1 Tim. 4:16.