PELAJAR 17
“Iya Besilih Penemu enggau Orang ba Dia Ngena Ayat Bup Kudus”
Chara ngajar ti manah sereta teladan manah orang Beria
Bepelasarka Surat Kereja Rasul 17:1-15
1, 2. Sapa ke bejalai ari Pilipi ngagai Tesalonika, lalu nama engka diperundingka sida?
BISI siti jalai ti manah ke mansa mayuh bukit. Jalai nya digaga injinir orang Rome. Kekadang, bisi ninga bunyi baka bunyi keledai, bunyi kerita kuda, sereta bisi nyawa orang ke belaya. Bunyi tu engka datai ari bala soldadu, bala pedagang tauka bala orang ke betukang. Paul, Silas enggau Timoti benung bejalai nengah jalai tu. Pemanjai jalai tu ari Pilipi ngagai Tesalonika lebih ari 130 kilometer. Tentu pejalai nya enda senang, kelebih agi ngagai Paul enggau Silas ke agi ngasaika pemedis ketegal dipalu ngena kayu lebuh ba Pilipi.—SKR. 16:22, 23.
2 Baka ni sida ulih tan ba pejalai ti jauh tu? Sida tentu mayuh berandau enggau pangan diri. Sida iya tentu agi ingat pasal peneleba ke ngagaka ati, iya nya jejaga jil enggau ruang bilik iya udah nyadi orang Kristian ba Pilipi. Peneleba tu tentu meransang sida keran agi nusui jaku Petara. Taja pia, lebuh sida nyauka datai ba Tesalonika, sida engka berunding baka ni orang Judah deka nerima sida. Kati sida deka diserang tauka dipalu baka ke udah nyadi ba Pilipi?
3. Baka ni teladan Paul ke nginjil enggau berani ulih nulung kitai kemayaharitu?
3 Paul madahka asai ati iya dalam surat iya ngagai orang Kristian ba Tesalonika: “Kami udah merinsa sereta dikeleseka lebuh ba Pilipi. Tang Petara nulung kami nyadi berani ngambika ulih nusui Berita Manah pasal Iya ngagai kita, taja pan balat disakal.” (1 Tes. 2:2) Sebedau nya, Paul balat dipalu ba Pilipi. Nya alai, iya engka irau deka ngagai Tesalonika. Ulih nuan meretika asai ati Paul? Kala nuan berasai tusah deka nginjil? Paul bepanggai ba Jehovah, lalu Iya ngeringka Paul ngambika ulih nginjil enggau berani. Enti kitai belajar ari teladan Paul, kitai pan ulih nginjil enggau berani.—1 Kor. 4:16.
“Iya Besilih Penemu . . . Ngena Ayat Bup Kudus” (Surat Kereja Rasul 17:1-3)
4. Nama kebuah kitai ngumbai Paul diau ba Tesalonika lebih ari tiga minggu?
4 Surat Kereja Rasul 17 madahka, ba Tesalonika, Paul nginjil ba balai gempuru pengelama tiga Hari Sabat bejurut. Nyadi, kati tu reti iya Paul diau dia pengelama tiga minggu aja? Enda. Kitai enda nemu kemaya Paul ngagai balai gempuru sepengudah iya datai ba Tesalonika. Pia mega, surat ari Paul nunjukka, iya sereta sida ke enggau iya kereja ba Tesalonika kena ngidupka diri empu. (1 Tes. 2:9; 2 Tes. 3:7, 8) Kelimpah ari nya, lebuh Paul agi diau ba Tesalonika, iya dua kali nerima pemeri bala menyadi ari Pilipi. (Plp. 4:16) Nya alai, tu nunjukka iya diau ba Tesalonika lebih ari tiga minggu.
5. Baka ni chara Paul narit minat orang lebuh iya nginjil?
5 Paul nginjil enggau berani ngagai orang mayuh ba balai gempuru. Baka selama, “iya besilih penemu enggau orang ba dia ngena ayat Bup Kudus. Iya nerangka ngagai sida sereta meri bukti ari ayat Bup Kudus kena nunjukka Kristus patut merinsa lalu diidupka baru ari mati. Paul madah ngagai sida: ‘Jesus ke ditusui aku ngagai kita nya, Kristus.’” (SKR. 17:2, 3) Peratika, Paul enda ngasuh bala peninga iya berasai ringat. Tang, iya narit minat sida. Paul nemu, sida ba balai gempuru nemu sereta bebasaka Bup Kudus. Taja pia, sida enda meretika ajar Bup Kudus. Nya alai, Paul nerangka sereta nunjukka bukti bepelasarka Bup Kudus ke madahka Jesus nya Kristus sereta Messiah ti Disemaya.
6. Baka ni Jesus nerangka ayat Bup Kudus, lalu nama asil iya?
6 Paul nitihka teladan Jesus ti ngajar bepelasarka ayat Bup Kudus. Lebuh ba pengawa nginjil, Jesus madah ngagai bala murid iya pasal ayat Bup Kudus ke nerangka, Anak Mensia enda tau enda merinsa, mati lalu diangkatka idup baru. (Mat. 16:21) Pengudah diangkatka ari mati, Jesus pegari ba mua bala murid iya. Pengangkat Jesus ari mati nunjukka, iya madahka utai ti bendar. Taja pia, bisi agi utai bukai ke digaga Jesus. Ambika chunto, iya nerangka sekeda utai ngagai dua iku murid iya. Ba senentang tu, Bup Kudus madahka: “Udah nya, Jesus nerangka ngagai seduai iya semua utai ke bekaul enggau iya empu dalam Bup Kudus, belabuh ari bup ke ditulis Moses enggau semua Ajar Sida Nabi.” Nama asil iya? Dua iku murid Jesus madahka: “Lebuh kitai ba rantau jalai tadi, endaka ati tua balat diperansang lebuh iya bejaku sereta nerangka ayat Bup Kudus enggau silik ngagai tua?”—Luk. 24:13, 27, 32.
7. Nama kebuah penting kitai ngajar bepelasarka Bup Kudus?
7 Pesan ari Bup Kudus amat bekuasa. (Heb. 4:12) Baka Jesus, Paul, sereta bala rasul ke bukai, orang Kristian kemayaharitu ngajar bepelasarka Bup Kudus. Kitai mega besilih penemu enggau orang sereta nerangka reti ayat Bup Kudus ngagai sida. Nambahka nya mega, kitai macha ayat Bup Kudus kena nunjukka ajar kitai endang bepelasarka Bup Kudus. Lebuh kitai suah ngena Bup Kudus, kitai nunjukka, pesan ti dikenataika enda datai ari penemu kitai, tang ari Petara. Endang amat, Berita Manah ari Bup Kudus ulih dipechaya. Nya alai, endaka tu ngasuh nuan yakin sereta berani agi deka nginjil ngagai orang, baka ke digaga Paul?
“Sekeda ari Bala Sida . . . Arap” (Surat Kereja Rasul 17:4-9)
8-10. (a) Nama sekeda reaksi orang Tesalonika pasal Berita Manah? (b) Nama kebuah sekeda orang Judah chemburu enggau Paul? (c) Orang Judah ke ngelaban ngereja nama?
8 Paul empu udah ngasaika pengamat jaku Jesus ke madahka: “Nadai ulun ke besai agi ari tuan iya. Enti sida udah nitihka ajar aku, sida mega deka nitihka ajar kita. Enti sida udah merinsaka aku, sida mega deka merinsaka kita.” (Jhn. 15:20) Nama sekeda reaksi orang Tesalonika pasal Berita Manah ke ditusui Paul? Sekeda orang nerima Berita Manah, tang bisi mega nulak pesan nya. Bekaul enggau orang ke deka nerima Berita Manah, Luke nulis: “Sekeda ari bala sida [orang Judah], mayuh orang Gerika ke nyembah Petara, enggau mayuh bala indu ke tinggi pangkat, arap [nyadi orang Kristian] lalu begulai enggau Paul seduai Silas.” (SKR. 17:4) Nya alai, bala murid ke baru ba Tesalonika tentu gaga ati laban udah meretika Bup Kudus.
9 Taja pan bisi sekeda orang deka nerima pesan ke dibai Paul, tang bisi orang bukai ringat enggau Paul. Beberapa iku orang Judah ba Tesalonika chemburu enggau Paul laban iya udah mujur ngambi ati “mayuh orang Gerika.” Kebendar iya, orang Judah ba Tesalonika kepapaska Paul. Tu ketegal, sida bisi tuju deka ngasuh orang Gerika megai pengarap Judah. Nya alai, sida ngajar orang Gerika pasal ajar Bup Kudus ari Sempekat Lama. Ba orang Judah nya, orang Gerika ba Tesalonika enggi sida aja. Tang enda memukai, Paul baka ke ngerampas orang Gerika tu ari sida. Lalu Paul terang-terang ngajar orang Gerika ba balai gempuru. Nya meh kebuah iya, orang Judah ba Tesalonika balat pedis ati.
“Sida . . . deka mai Paul enggau Silas ngagai orang ke begelumu nya.”—Surat Kereja Rasul 17:5
10 Luke madahka utai ti nyadi pengudah nya: “Tang orang Judah chemburu. Nya alai, sida ngempuruka bala orang jai ke segau-segau ba sebelah pasar. Pengudah sida ngasuh chukup mayuh orang begelumu, sida ngaga penyarut ba nengeri nya. Sida nyerang rumah Jason, laban deka mai Paul enggau Silas ngagai orang ke begelumu nya. Lebuh sida enda tetemuka Paul enggau Silas, sida ngirit Jason enggau beberapa iku menyadi ngagai bala pemerintah nengeri nya lalu manjung: ‘Dua iku lelaki ke ngaga pengachau ba serata endur udah datai kitu, lalu Jason udah nerima seduai iya nyadi temuai. Semua sida tu ngelaban perintah raja Rome. Sida madahka bisi siku da agi raja, iya nya Jesus.’” (SKR. 17:5-7) Nya alai, baka ni serang ari orang mayuh nya deka ngachau pengawa Paul sereta sida ke enggau iya?
11. Nama jaku tuduh ke dikena ngelaban sida Paul, lalu bala penuduh nya nyangka sida Paul deka diukum enggau chara ke baka ni? (Peda nota kaki.)
11 Orang mayuh ke ngelaban amat ringat, mangah sereta enda ulih ditagang. Tu meh chara orang Judah nguji deka munuh Paul enggau Silas. Nya alai, orang Judah ba Tesalonika “ngaga penyarut” ba dia. Pengudah nya, sida madahka ngagai bala pemerintah pasal jaku tuduh sida ngagai Paul. Sida nguji ngasuh bala pemerintah pechaya, penyalah Paul amat besai. Jaku tuduh ti keterubah nya, Paul sereta bala ke enggau iya udah “ngaga pengachau ba serata endur.” Sida ke ngelaban nuduh Paul taja pan iya nadai ngaga nama-nama penyarut ba Tesalonika! Jaku tuduh ti kedua nya balat agi. Orang Judah madahka, sida Paul nusui pasal raja ke bukai, iya nya Jesus. Nitihka perintah ari Raja Besai Rome, pengawa nusui pasal raja bukai nya amat salah. a
12. Nama kebuah jaku tuduh ngagai orang Kristian ba Tesalonika ulih ngenataika penusah?
12 Suba, bala tuai pengarap pan madahka jaku tuduh ti sama kena ngelaban Jesus. Ku sida madah ngagai Pilate: “Lelaki tu ditemu kami nesatka bansa kami . . . lalu ngumbai diri Kristus sereta raja.” (Luk. 23:2) Pilate takut Raja Besai Rome deka ngumbai iya enda setia ngagai perintah Rome. Nya alai, iya ngukum bunuh Jesus. Pia mega, jaku tuduh ngagai orang Kristian ba Tesalonika ulih ngenataika penusah ti amat balat. Siti rujukan madahka: “Tusah deka madahka pemesai penusah ke deka nyadi ngagai orang Kristian ba Tesalonika. ‘Kesuah iya, orang ke besalah laban enda setia ngagai Raja Besai Rome deka diukum bunuh.’” Tang, kati bala munsuh deka mujur enggau chara tu?
13, 14. (a) Nama kebuah orang mayuh enda mujur nyerang sida Paul? (b) Baka ni Paul nunjukka diri bejimat baka Kristus, lalu baka ni kitai ulih nunda teladan Paul?
13 Nama kebuah serang ari orang mayuh enda mujur ngetuka pengawa nginjil ba Tesalonika? Tu ketegal, sida enda tetemuka Paul enggau Silas. Nambahka nya, pemerintah Rome enda entu yakin enggau jaku tuduh ke dipadahka orang mayuh. Pengudah “mayar duit jamin,” bala pemesai nya ngelepaska Jason enggau bala menyadi ke bukai ari jil. (SKR. 17:8, 9) Paul nitihka jaku lalau ke diberi Jesus ke madahka “bejaga baka ular, tang nelap baka burung achang.” Nya alai enggau bejimat, Paul ngagai endur ke selamat agi ngambika iya ulih nginjil ba endur nya. (Mat. 10:16) Pemerani ke diayanka Paul nunjukka, iya bejimat ngereja pengawa iya. Nyadi, baka ni orang Kristian kemayaharitu nitihka teladan iya?
14 Kemayaharitu, bala tuai pengarap gerija seruran mai orang mayuh nyerang Saksi-Saksi Jehovah. Enggau chara nuduh sereta betenahka bala Saksi, sida udah ngasut bala pemerintah ngambika ngachau Saksi-Saksi Jehovah. Baka sida ke nyerang bala menyadi ba abad keterubah, orang ke ngelaban Saksi-Saksi Jehovah kemayaharitu mega ngereja nya ketegal chemburu. Tang enda ngira nama utai ke nyadi, kitai sebagai orang Kristian ti bendar enggai ngaga penanggul. Kitai deka nyeliah ari bekelikuh enggau orang ke ringat, tauka enggau orang ke berunding enggau enda masuk akal. Tu ketegal, kitai deka neruska pengawa nginjil enggau tenang. Lalu enti orang ba endur nya udah badu ringat, kita engka ulih pulai baru nginjil dia.
Orang ba Dia ‘Tebuka Agi Runding’ (Surat Kereja Rasul 17:10-15)
15. Nama reaksi orang Beria ngagai Berita Manah?
15 Paul enggau Silas diajung ngagai Beria ngambika seduai iya ulih selamat. Beria nya kira-kira 65 kilometer ari Tesalonika. Pengudah seduai datai dia, Paul ngagai balai gempuru lalu berandau enggau orang ba dia. Paul tentu gaga ati laban orang Beria deka nerima Berita Manah! Luke madah, orang Judah ba Beria “tebuka agi ari runding orang ba Tesalonika, laban sida keran agi deka nerima jaku Petara. Tiap hari, sida bejimat mansik ayat Bup Kudus kena nentuka utai ke didinga sida nya amat tauka enda.” (SKR. 17:10, 11) Kati tu reti iya, orang Tesalonika ke udah nerima Berita Manah enda semanah orang Beria? Enda. Tu ketegal, Paul nuliska tu ngagai sida ba Tesalonika: “Kami enda ngetu-ngetu meri terima kasih ngagai Petara, laban lebuh kita nerima jaku Petara ke didinga kita ari kami, kita enda ngumbai nya jaku ari mensia, tang ari Petara. Jaku nya amat ari Petara lalu jaku nya nulung kita ke arap.” (1 Tes. 2:13) Tang, nama ke ngasuh orang Judah ba Beria tebuka agi runding?
16. Nama kebuah orang Beria dikumbai ‘tebuka agi runding’?
16 Taja pan pesan Berita Manah nya utai ti baru ba orang Beria, tang sida enda kakang ati tauka nyebut utai ti enda manah pasal pesan nya. Taja pia, ba maya ti sama, sida pan enda terus pechayaka pesan Berita Manah pia aja. Keterubah, sida ninga enggau manah pesan ke dipadah Paul. Udah nya, sida mansik sekalika penerang Paul amat datai ari Bup Kudus tauka enda. Nambahka nya, sida mega ninting hari bagas belajarka Bup Kudus, ukai semina maya Hari Sabat aja. Sida mansik enggau ati ti keran deka ngiga penemu ari Bup Kudus bekaul enggau utai ke baru dipelajarka sida. Udah nya sida nunjukka diri baruh ati ngaga ubah, laban Bup Kudus madahka ‘mayuh ari sida arap.’ (SKR. 17:12) Nya meh kebuah iya, Luke ngumbai orang Beria “tebuka agi runding”!
17. Nama kebuah teladan orang Beria patut dipuji, lalu baka ni kitai ulih terus neladan sida enda ngira berapa lama kitai dalam pemendar?
17 Orang Beria tentu enda nyangka chara sida nerima Berita Manah deka dipadah dalam Bup Kudus. Cherita sida nyadika teladan ke kitai kemayaharitu. Sida ngereja utai nitihka utai ti dikearapka Paul enggau Petara Jehovah. Sama mega, kitai meransang orang meresa Bup Kudus enggau silik ngambika pengarap sida bepelasarka Bup Kudus. Taja pan kitai udah nemu pemendar Bup Kudus, tang kitai patut terus ngelakka runding kitai tebuka. Kitai patut majak ransing belajar ari Jehovah lalu jampat nitihka utai ti dipelajar. Enggau chara nya, kitai nejuka Jehovah ngiring sereta ngelatih kitai sejalai enggau peneka Iya. (Isa. 64:8) Pia mega, kitai ulih terus ngelantangka ati Jehovah, lalu Iya deka terus ngena kitai ba pengawa ke Iya.
18, 19. (a) Nama kebuah Paul ninggalka Beria, lalu baka ni iya nunjukka pengetan ati ke tau ditunda kitai? (b) Paul deka nginjil ngagai sapa pengudah tu, lalu ba dini?
18 Paul diau ba Beria enda lama. Bup Kudus madahka: “Lebuh orang Judah ari Tesalonika nemu Paul ngerembaika jaku Petara ba Beria, sida mansang kin ngasut orang lalu ngaga pengachau. Nya alai, bala menyadi ba dia beguai nganjung Paul ngagai tebing tasik. Tang Silas enggau Timoti mengkang ba Beria. Bala menyadi ke enggau Paul mai iya nyentuk ngagai Atens. Lebuh sida udah nerima pesan ari Paul ngasuh Silas seduai Timoti datai ngagai iya ba Atens enggau naka pengelengkas, sida iya pan lalu mupuk.” (SKR. 17:13-15) Tu nunjukka bala munsuh enda nemu putus asa! Taja pan sida udah muru Paul ari Tesalonika, nya bedau ngasuh sida puas ati. Nya alai, sida ngagai Beria lalu ngaga pengachau ti sama ba Tesalonika. Taja pia pengawa sida enda mujur. Paul nemu iya ulih nginjil ba sebarang endur. Nya alai, iya ngagai endur bukai kena nginjil. Kemayaharitu, orang ke ngelaban deka terus bebendar ngetuka pengawa nginjil kitai. Tang, aram meh kitai terus neladan Paul enggau enda ngelakka pengawa sida ngachau pengawa nginjil kitai!
19 Pengudah meri saksi enggau silik ngagai orang Judah ba Tesalonika enggau Beria, Paul tentu belajar mayuh utai ti beguna. Paul belajar kebuah patut nginjil enggau berani, sereta ngajar orang ngena Bup Kudus. Kitai pan patut ngereja utai ti sama. Taja pia pengudah tu, Paul deka nginjil ngagai orang ari bansa bukai ba Atens. Nama deka nyadi ngagai Paul ba Atens? Aram meh kitai meda ba pelajar pengudah tu.
a Nitihka siku pakar sejarah, maya nya bisi siti perintah ke datai ari Raja Besai Rome. Iya nagang orang ngaga ramalan “pasal penatai raja tauka perintah ti baru, kelebih agi enti nyebut pasal orang ke deka nganti penuduk Raja Besai ke benung merintah maya nya.” Bala munsuh Paul engka mutar belitka pesan ti dikenataika sida Paul. Enggau nya, sida ulih dituduh ngelanggar atur Raja Besai. Peda kutak “ Bala Raja Besai enggau Bup Surat Kereja Rasul.”
