1-3. (a) Baka ni Paul sereta sida ke enggau iya ngasaika iring ari kuasa kudus Petara? (b) Nama sekeda peristiwa ke deka dikerandauka kitai?

 SERABAN orang indu mupuk ari nengeri Pilipi ba Masedonia. Enda lama udah nya, sida datai ba siti sungai ti mit ke benama sungai Gangites. Baka selama, sida duduk ba tebing sungai lalu besampi ngagai Petara orang Israel. Lalu, Jehovah beratika sida.—2 Ban. 16:9; Mas. 65:2.

² Ba maya ti sama, kira-kira lebih 880 kilometer ari endur nya, Paul, Silas enggau Timoti mupuk ari nengeri Listra, ke bisi ba begian selatan nengeri Galatia. Beberapa hari udah nya, sida datai ba jalai besai ba Rome ke nuju ngagai begian barat. Jalai nya nuju ngagai endur ke bisi pemadu mayuh penduduk ba begian Asia. Paul, Silas, enggau Timoti gagit ati deka ngagai Epesus sereta nengeri bukai laban deka madahka berita pasal Kristus. Tang, sebedau sida berengkah bejalai kin, kuasa kudus Petara nagang sida. Sida enda diasuh nginjil ba begian Asia. Nama kebuah? Nengah kuasa kudus, Jesus deka ngiring Paul enggau sida ke bukai nengah jalai ke nuju ngagai begian Asia Minor (kemayaharitu dikumbai menua Turki). Udah nya, sida nujah Tasik Aegea lalu ngagai sungai ti mit ke benama sungai Gangites.

³ Chara Jesus ngiring Paul sereta sida ke enggau iya ngagai Masedonia ngajar kitai mayuh utai ti penting kemayaharitu. Nya alai, aram meh kitai mansik sekeda utai ke nyadi lebuh Paul ngereja pengawa nginjil iya ti kedua ke berengkah kira-kira ba taun 49 M.

4, 5. (a) Nama nyadi ngagai sida Paul lebuh nyauka semak enggau Bitinia? (b) Nama pemutus ke digaga sida Paul, lalu nama asil iya?

⁴ Pengudah enda diasuh nginjil ba begian Asia, Paul enggau sida ke bukai mupuk ngagai Bitinia. Sida patut bejalai beberapa hari ngambika ulih datai ba Bitinia. Sida mega patut nengah jalai ti enda entu manah ke bisi entara Prigia enggau Galatia. Taja pia, lebuh sida nyauka datai ba Bitinia, Jesus sekali agi ngena kuasa kudus nagang sida. (SKR. 16:6, 7) Maya nya, sida enda mereti nama kebuah iya. Sida nemu nama pesan ke deka ditusui sida, sida mega nemu baka ni chara nginjil. Tang,  sida enda nemu ba dini endur sida patut nginjil. Terubah iya, sida baka ke ngetuk pintu deka ngagai Asia, tang peluang nya enda dibuka ngagai sida. Sida mega nguji ngiga peluang nginjil ba Bitinia, tang sekali agi sida enda mujur. Taja pia, Paul keran deka ngiga peluang nginjil nyentukka peluang nya dibuka ngagai iya. Nya alai, Paul enggau sida ke enggau iya ngaga pemutus ke baka ke enda masuk akal. Sida nikal baru ngagai begian barat lalu bejalai penyauh 550 kilometer. Sida enda ngetu bejalai nyentukka sida datai ba siti pelabuhan tauka penyangkai kapal ba Troas. Ari nya, sida belayar ngagai Masedonia. (SKR. 16:8) Paul ngiga peluang nginjil kena kali ti ketiga tu. Pengujung iya, peluang tu dibuka besai ngagai iya!

⁵ Tu meh utai ke ditulis Luke lebuh iya enggau sida Paul ba Troas: “Malam nya, Paul bulih genera. Iya meda siku lelaki ari Masedonia bediri lalu bebendar minta iya datai. Ku lelaki nya: ‘Datai meh ngagai Masedonia lalu tulung meh kami.’ Sepengudah Paul bulih genera nya, kami nguji mupuk ngagai Masedonia laban kami ngumbai Petara udah ngasuh kami ngerembaika Berita Manah ngagai orang ba dia.” a (SKR. 16:9, 10) Pengujung iya, Paul nemu dini endur sida patut nginjil. Naka meh pengaga ati Paul laban enda putus asa ba pejalai nginjil iya! Nya alai, Paul, Silas, Timoti enggau Luke enda masau jam lalu enggau jampat belayar ngagai Masedonia.

6, 7. (a) Nama ulih dipelajarka kitai ari utai ke nyadi ba pejalai Paul? (b) Nama ulih dipechayaka kitai pengudah beratika pengalaman Paul?

⁶ Nama ulih dipelajarka kitai ari cherita tu? Peratika tu: Kuasa kudus Petara semina nagang Paul pengudah iya berengkah nuju ngagai Asia. Pia mega, Jesus ngena kuasa kudus nagang Paul semina pengudah iya nyauka datai ba Bitinia. Lalu semina pengudah Paul udah datai ba Troas, baru iya nerima iring ari Jesus ngambika mansang ngagai Masedonia. Ketegal Jesus nya Tuai raban gempuru, iya mega ngiring kitai ba chara ti sama kemayaharitu. (Kol. 1:18) Ambika chunto, kitai engka udah lama berunding deka nyadi pengerintis, tauka pindah ngagai endur ke begunaka mayuh agi penginjil. Taja pia, Jesus engka ngiring kitai nengah kuasa kudus, semina pengudah kitai dulu agi ngereja utai ke diguna ngambika ulih nyapai juluk ati kitai. Nama kebuah kitai bejaku munyi nya? Pikirka chunto tu: Siku orang ke deriba ulih biluk ke kiba tauka kanan, semina enti kereta iya udah bejalai. Sama mega, Jesus ulih ngiring kitai ngereja mayuh agi ba pengawa nginjil enti kitai empu ke dulu ngereja utai kena nyapai juluk ati.

⁷ Tang baka ni enti utai ke digaga kitai enda ngenataika asil tekala nya? Kati kitai patut putus asa, lalu ngumbai kuasa kudus Petara enda ngiring kitai? Enda. Ingat meh, Paul mega napi mayuh penanggul ba  pengawa nginjil. Tang, iya terus ngiga peluang nginjil nyentukka iya mujur. Baka Paul, kitai enggai jampat putus asa lalu terus ngiga “peluang ti besai alai ngereja pengawa nginjil.” Enti kitai terus ngereja nya, kitai tentu deka diberekat.—1 Kor. 16:9.

8. (a) Padahka gaya nengeri Pilipi. (b) Nama pengaga ati ke diulih Paul ari pengawa nginjil iya ba “endur orang besampi”?

⁸ Pengudah datai ba Masedonia, Paul sereta sida ke enggau iya mupuk ngagai Pilipi. Orang Pilipi temegah ati nyadi peranak menua Rome. Nengeri Pilipi sama enggau menua Rome. Nya alai, soldadu orang Rome ke udah pinchin ke diau ba Pilipi ngasaika diau dia baka ba Rome. Ba luar pintu penama nengeri nya, Paul sereta sida ke enggau iya datai ba siti endur ke dikumbai “endur orang besampi.” Endur nya bisi ba tisi siti sungai ti mit. b Ba Hari Sabat, sida ngagai endur nya lalu betemu enggau beberapa iku indu begelumu nyembah Petara. Sida Paul lalu duduk bejaku enggau bala indu nya. Siku indu ke benama Lidia ‘ningaka Paul bejaku, [lalu] Jehovah muka besai ati iya.’ Ajar ke didinga Lidia ari bala sida Paul negu ati iya. Ketegal nya, Lidia enggau semua sida ke diau serumah enggau iya dibaptisa. Udah nya, iya mega mai sida Paul diau enggau iya. c—SKR. 16:13-15.

9. Baka ni mayuh bala menyadi kemayaharitu nunda teladan Paul, lalu nama berekat ke diulih sida?

 ⁹ Gambarka pengaga ati semua orang lebuh Lidia dibaptisa! Paul gaga ati laban nerima kangau ke madahka ‘datai ngagai Masedonia.’ Lalu Paul gaga ati ketegal Jehovah udah ngena iya sereta sida ke enggau iya nyaut sampi bala indu ba sungai mit nya! Kemayaharitu, mayuh bala menyadi enda ngira tuai biak, bujang dara sereta ke udah kawin pindah ngagai endur ti begunaka mayuh penginjil. Sida tentu napi penanggul, tang nya enda ulih dibandingka enggau pengaga ati ke diulih sida. Sida tentu berasai puas ati lebuh tetemuka orang ke nerima pemendar Bup Kudus baka Lidia. Ulih nuan ngaga ubah ngambika ulih pindah ngagai endur ke mayuh begunaka bantu? Nuan tentu deka bulih mayuh berekat ari Jehovah. Ambika chunto, siku menyadi lelaki ke benama Aaron pindah ngagai Amerika Tengah lebuh iya beumur 20-an. Iya mega berasai gaga ati baka orang bukai ke udah pindah ngagai endur ke begunaka bantu. Ku iya madah: “Pindah ngagai endur bukai nulung aku mansang ba pengarap, sereta semak agi enggau Jehovah. Pengawa nginjil amat ngerinduka ati. Lalu aku pan bisi lapan iku pemelajar Bup Kudus!”

10. Baka ni bala melikat ti jai bisi kaul enggau pengawa sakal ke nyadi ba pengawa nginjil sida Paul?

¹⁰ Maya nya, pengawa Sitan enggau bala melikat ti jai balat ngelekai. Tu ketegal, mayuh orang nitihka pengaruh sida. Nya alai, Sitan berasai ringat lebuh Berita Manah majak ngelekai. Ketegal nya, kitai enda iran laban Sitan enggau bala melikat ti jai bisi kaul enggau pengawa sakal ke nyadi ba pengawa nginjil sida Paul. Bisi sekali lebuh sida mansang ngagai endur orang besampi, sida betemu enggau siku ulun indu ke dirasuk melikat ti jai. Ketegal pengaruh melikat ti jai, indu nya nemu betilitka nasit. Nya alai, bala tuan iya bulih untung ti besai ari pengawa indu nya. Indu nya majak nitihka sida Paul, lalu ku iya bejaku enggau nyawa ti inggar: “Sida tu ulun Petara ti Pemadu Tinggi. Sida madah ngagai kita baka ni kita ulih diselamatka.” Melikat ti jai engka sengaja ngasuh indu nya madahka nya. Tu ketegal, melikat ti jai deka nipu orang. Melikat jai nya deka ngasuh orang saru, lalu pechaya utai ke dipadah indu nya enggau ajar ari Paul datai ari sumber ti sama. Enggau chara nya, mayuh orang deka ditesatka lalu enda ngelala murid Kristus ti bendar. Tang pengujung iya, Paul muru melikat ti jai ari indu nya.—SKR. 16:16-18.

11. Nama nyadi ngagai Paul enggau Silas pengudah muru melikat ti jai ari indu nya?

¹¹ Sebedau nya, bala tuan nya bulih mayuh untung ari pengawa betilit  nasit ke digaga ulun indu nya. Nya alai lebuh penguntung sida udah nadai, sida amat ringat. Sida ngirit Paul enggau Silas ngagai pasar. Ba pasar, bala pemerintah ke ngarika perintah Rome suah begelumu kena ngakim pengawa ke bekaul enggau pengawa dagang. Bala tuan indu nya sengaja meransang ulah bepilih mata enggau semangat patriotik ba bala hakim nya. Bala tuan ke indu nya madahka: “Dua iku orang Judah tu ngasuh nengeri kitai balat charut. Seduai iya ngajar adat ke enda ulih diterima tauka dititihka kitai, laban kitai orang Rome.” Jaku bala tuan nya ngenataika penusah ngagai Paul enggau Silas tekala nya. Bup Kudus madahka: “Orang mayuh [ba pasar] pan lalu angkat ngelaban seduai iya [Paul enggau Silas],” lalu bala pemerintah ngasuh seduai iya “dipalu ngena kayu.” Pengudah nya, Paul enggau Silas diirit ngagai rumah jil. Ketegal nya, seduai iya balat bakal. Jejaga jil ngurung seduai iya ba bilik jil ke pemadu ujung, lalu nganchin kaki seduai iya ngena kanchin kayu. (SKR. 16:19-24) Lebuh pintu jil ditutup, bilik nya amat petang nyentukka Paul enggau Silas enda ulih meda pangan diri. Taja pia, Jehovah beratika utai ke benung nyadi.—Mas. 139:12.

12. (a) Nama runding ke dikembuan bala murid Jesus lebuh disakal, lalu nama kebuah? (b) Nama chara ti sama ke agi dikena Sitan enggau bala melikat ti jai kena merinsaka bala murid Jesus?

¹² Beberapa taun sebedau nya, Jesus madah ngagai bala murid iya: “Sida mega deka merinsaka kita.” (Jhn. 15:20) Nya alai, lebuh Paul sereta sida ke enggau iya ngagai Masedonia, sida udah sedia napi sakal. Lebuh sida disakal, sida enda ngumbai Jehovah enda nerima pengawa sida. Tu nunjukka, Sitan balat ringat ngagai sida. Sitan enggau bala melikat ti jai agi ngena chara ti sama merinsaka nembiak Petara, baka ke kala nyadi ba Pilipi suba. Sida ke ngelaban suah nyebut utai ti enda betul pasal pengarap kitai ba sekula sereta ba endur kereja. Nya alai, ulah sida ngasuh orang nyakal kitai. Ba beberapa menua, tuai pengarap selalu nuduh kitai ba mahkamah lalu madah: ‘Bala Saksi ngasuh charut lalu ngajar utai ke enda ulih diterima kitai, laban kitai “orang ke asal ditu pechayaka adat kitai empu.”’ Ba sekeda endur, bala menyadi kitai dipalu sereta dijil. Tang, Jehovah meda semua utai ke nyadi.—1 Pet. 3:12.

13. Nama kebuah jejaga jil nya nanya: “Nama patut digaga aku ngambika ulih selamat”?

¹³ Paul enggau Silas begunaka awak ngambika ulih gerai ari segi mental enggau fizikal pengudah balat dipalu sereta dijil ba hari nya. Ba tengah malam, sida bulih pengering baru nyentukka sida ulih “besampi sereta belagu muji Petara.” Enda memukai, tanah berenyang ti balat nyadi! Jejaga rumah jil nya tedani. Udah nya, iya meda pintu rumah jil tebuka magang. Lalu iya ngumbai semua orang jil udah ngerarika diri.  Iya nemu diri deka diukum enti orang jil ngelepaska diri. Nya alai, iya “nyintak pedang iya lalu deka munuh diri.” Taja pia, Paul ngangau enggau nyawa ti inggar: “Anang munuh diri. Semua kami agi ba ditu.” Lalu jejaga jil nya nanya: “Tuan, nama patut digaga aku ngambika ulih selamat?” Paul enggau Silas enda ulih nyelamatka iya. Tang semina Jesus aja ulih nyelamatka jejaga jil nya. Nya alai, sida nyaut iya: “Arap meh ke Tuan Jesus, lalu nuan enggau orang ke diau serumah enggau nuan deka selamat.”—SKR. 16:25-31.

14. (a) Baka ni Paul enggau Silas nulung jejaga jil nya? (b) Nama berekat ke diulih Paul enggau Silas ketegal napi sakal enggau gaga ati?

¹⁴ Kati tanya ari jejaga jil nya amat datai ari ati iya? Paul enda kakang ati enggau tuju ati jejaga jil nya. Jejaga nya orang bansa bukai, lalu iya enda nemu pasal Bup Kudus. Nya alai sebedau nyadi orang Kristian, iya patut belajar sereta nerima ajar ari Bup Kudus. Nyadi, Paul enggau Silas ngambi awak kena “nusui jaku Jehovah ngagai iya.” Lebuh ngajar jejaga jil nya, Paul enggau Silas engka enda ingatka pemedis ke diasaika seduai iya lebuh dipalu. Taja pia, jejaga jil nya meda telih ba begian belakang tubuh seduai iya. Lalu telih nya amat dalam. Pengudah nya jejaga jil masu telih seduai iya. Pengujung iya, jejaga nya sereta orang ke diau serumah enggau iya “dibaptisa tekala nya.” Naka meh pemesai berekat ke diterima Paul enggau Silas ketegal napi sakal enggau gaga ati!—SKR. 16:32-34.

15. (a) Baka ni bala Saksi Jehovah kemayaharitu nitihka teladan Paul enggau Silas? (b) Nama kebuah kitai patut terus ngabas orang ba endur kitai nginjil?

¹⁵ Baka Paul enggau Silas, mayuh bala Saksi kemayaharitu dijil ketegal pengarap sida. Taja pia, sida terus madahka Berita Manah ba rumah jil. Lalu sida bulih asil ti manah. Ambika chunto, di menua alai pengawa nginjil kitai ditagang, bisi mayuh orang ke dijil belajarka pemendar lebuh sida ba rumah jil. Ketegal nya ba siti timpuh, bisi 40 peratus ari penyampau bala Saksi ba menua nya belajar pasal Jehovah lebuh sida dijil! (Isa. 54:17) Peratika mega, semina pengudah tanah berenyang nya nyadi, nya baru jejaga jil minta tulung deka nemu pemendar. Sama mega, sekeda orang terubah iya enggai nerima pesan pasal Perintah Petara. Taja pia, sida nerima pemendar pengudah sida dituntung penusah ba pengidup. Lebuh kitai terus ngabas ba endur kitai nginjil, tu nunjukka kitai besedia deka nulung sida.

16. Baka ni situasi Paul enggau Silas berubah enggau jampat sehari pengudah seduai iya dipalu?

¹⁶ Ba pagi siti pengudah seduai iya dipalu, bala pemerintah ngasuh Paul enggau Silas dilepaska. Tang Paul madah: “Sida udah malu kami  duai ba mua orang mayuh. Sida ngejil kami duai taja pan bedau dipechara. Kati diatu sida deka ngasuh kami duai mupuk belalai? Enggai kami duai! Awakka sida empu ke datai lalu mai kami duai pansut.” Pengudah nemu Paul enggau Silas nya orang Rome, bala pemerintah “nyau takut” laban sida udah ngelanggar hak Paul enggau Silas. d Diatu, situasi ba kedua-dua piak nya udah berubah. Sebedau tu, Paul enggau Silas udah dipalu ba mua orang mayuh. Tang diatu, bala pemerintah patut minta ampun ngagai seduai iya ba mua orang mayuh. Nya alai, sida ngasuh Paul enggau Silas ninggalka Pilipi. Lalu seduai iya nitihka utai ke diasuh bala pemerintah nya. Tang sebedau mupuk, seduai iya meransang bala murid ke baru. Udah nya, baru meh seduai iya ninggalka Pilipi.

17. Nama utai ti penting ke dipelajarka bala murid ke baru lebuh meda pengetan ati Paul enggau Silas maya diperinsa?

¹⁷ Enti hak sida ke nyadi orang Rome dipebasa, tentu Paul enggau Silas enda dipalu. (SKR. 22:25, 26) Tang enti nya meh utai ke nyadi, bala murid ba Pilipi tentu ngumbai, Paul enggau Silas ngena penuduk sida ke nyadi orang Rome kena ngelepaska diri ari diperinsa. Baka ni pekara tu ulih ngachau pengarap bala murid ke ukai orang Rome? Undang-undang enda nyaga sida ke ukai orang Rome ari dipalu. Lebuh Paul enggau Silas tan ngenatka pemerinsa, sida nyadi teladan ti manah ngagai bala murid ke baru ngambika mengkang tan lebuh balat disakal. Nambahka nya, lebuh Paul enggau Silas madahka sida orang Rome, bala pemerintah patut ngaku penyalah sida ba mua orang mayuh. Tu ketegal, bala pemerintah udah ngelanggar atur undang-undang. Tu ulih nagang bala pemerintah ngambika enda agi merinsaka orang Kristian. Nambahka nya, tu ulih nyaga orang Kristian ari segi undang-undang ngambika enda diserang bala pemerintah dalam chara ti sama.

18. (a) Baka ni bala menyadi lelaki ke ngiring kemayaritu nitihka teladan Paul? (b) Baka ni kitai “ngulihka hak ari perintah ngambika ulih ngerembaika Berita Manah” kemayaharitu?

¹⁸ Kemayaharitu, bala menyadi lelaki ke ngiring raban gempuru mega nunjukka teladan ti manah. Ambika chunto, sida engka ngarapka bala menyadi ngereja sekeda utai. Enti pia, sida empu pan patut sanggup ngereja utai nya. Baka Paul, kitai mega deka berunding enggau manah pasal baka ni, sereta kemaya kitai patut ngena hak kitai ba undang-undang ngambika ulih bejalaika pengawa Kristian kitai. Enti kitai patut ngiga jaga ari segi undang-undang kena neruska pengawa Kristian, kitai deka minta bantu ari mahkamah ba menua kitai, lalu indah ngagai mahkamah begian entarabansa. Tuju kitai ukai deka ngubah undang-undang ke udah ditetapka perintah, tang “ngulihka hak ari perintah  ngambika ulih ngerembaika Berita Manah.” Tu sejalai enggau utai ke diterangka Paul ba surat iya ngagai bala menyadi ba raban gempuru Pilipi, kira-kira 10 taun pengudah iya dijil ba dia. (Plp. 1:7) Taja pia, enda ngira nama pemutus ke diulih ari mahkamah, aram meh kitai neladan Paul sereta bala ke enggau iya, lalu terus “ngerembaika Berita Manah” nitihka iring kuasa kudus Petara.—SKR. 16:10.