PELAJAR 18
‘Ngiga Petara lalu Tetemuka Iya’
Paul ngiga utai ke sama entara iya enggau bala peninga, lalu iya mega nelebaka diri nitihka situasi bala peninga iya
Bepelasarka Surat Kereja Rasul 17:16-34
1-3. (a) Nama kebuah rasul Paul balat tusah ati ba Atens? (b) Nama ulih dipelajarka kitai ari teladan Paul?
PAUL balat tusah ati. Maya nya, iya ba Atens di Gerika. Atens nya pusat sekula tinggi. Ba Atens, bisi mayuh orang ke dikumbai pintar kala belajar ba dia. Ambika chunto, Sokrates, Plato, sereta Aristotle. Kebendar iya, orang ba Atens amat alim. Sebarang alai Paul bejalai, iya meda mayuh engkeramba. Chunto iya, ba rumah sembiang, ba endur orang mayuh, sereta ba jalai. Tu ketegal, orang Atens nyembah mayuh macham petara. Tang, Paul nemu runding Jehovah pasal engkeramba. (P-sut. 20:4, 5) Nya alai, iya bekunsika pekara nya ngagai orang Atens. Jehovah amat begedika engkeramba!
2 Lebuh Paul ngagai pasar, bisi utai ke ngasuh iya amat tekenyit. Iya meda mayuh engkeramba petara Hermis ke bisi ngayanka organ seks lelaki. Engkeramba tu ditusun tunga ke begian barat laut ba Atens, semak enggau pintu penama. Ba pasar, bisi mayuh alta endur orang nyembah engkeramba. Nya alai, baka ni rasul Paul ulih nginjil ba situasi nya? Kati Paul ulih ngawal emosi iya, lalu nguji ngiga utai ti sama entara iya enggau bala peninga iya? Kati Paul deka mujur nulung orang ba Atens ngiga Petara ti bendar, lalu tetemuka Iya?
3 Jaku Paul ngagai orang ke bepelajar ba Atens bisi ba Surat Kereja Rasul 17:22-31. Chara Paul bejaku ngagai orang Atens amat manah laban iya ransing. Taja pia, iya bejaku enggau bejimat, lalu bebendar berundingka situasi bala peninga iya ba Atens. Ari teladan Paul, kitai deka belajar chara ngiga utai ti sama entara kitai, enggau orang ke ditemu kitai ba pengawa nginjil. Pia mega, kitai deka belajar baka ni deka nulung bala peninga kitai meretika ajar Bup Kudus.
Ngajar “ba Pasar” (Surat Kereja Rasul 17:16-21)
4, 5. Ba Atens dini alai Paul nginjil, lalu nama penanggul ke deka ditapi iya enggau bala peninga iya?
4 Paul ngagai Atens ba pengawa nginjil iya ti kedua, kira-kira ba taun 50 M. a Maya nya, iya benung nganti penatai Silas enggau Timoti ari Beria. Lalu baka ke suah digaga Paul, iya “mansang ngagai balai gempuru lalu besilih penemu enggau orang Judah.” Iya mega ngagai siti endur alai iya ulih tetemuka orang ari bansa bukai ke diau ba Atens. Nya alai, “ba pasar” meh Paul ulih betemu enggau sida. (SKR. 17:17) Pasar nya bisi ba begian barat laut di bandar Atens, lalu pemesai pasar nya 12 ikar. Pasar nya ukai semina endur alai orang bejual tauka bebelika barang aja. Tang, pasar nya mega endur alai orang mayuh selalu begelumu. Bekaul enggau Atens, bisi siti rujukan madahka pasar nya “nyadi pusat ekonomi, politik enggau budaya.” Nya alai, orang Atens rindu begelumu ba dia. Ketegal orang Atens orang ke bepelajar, sida mega amat rindu berandauka topik ti dalam ba pasar nya.
5 Ba pasar, Paul napi penanggul enggau bala peninga iya. Tu ketegal, maya nya bisi orang ke ari raban Epikuria enggau raban Stoik mega ningaka Paul. Dua iti raban tu belaban penemu enggau pangan diri. b Raban Epikuria pechaya pengidup nyadi pia aja. Tu meh runding pasal pengidup: “Nadai kebuah nangika Petara; Enda ibuh takutka pemati; Utai ti manah ulih dijapai; Lalu kitai ulih tan ngenatka ulah ti jai.” Sida ke datai ari raban Stoik ngumbai diri pechayaka utai ti logik aja. Tang dua iti raban tu, iya nya raban Epikuria enggau raban Stoik sama enda pechayaka pengangkat ari mati. Endang amat, penemu ari dua iti raban tu enda sejalai enggau ajar orang Kristian ti bendar, lalu nya meh utai ke ditusui Paul ngagai sida.
6, 7. Nama reaksi sekeda orang Gerika ke bepelajar ngagai ajar Paul, lalu nama reaksi ti sama ke diterima kitai kemayaharitu?
6 Nama reaksi orang Gerika ke pintar ngagai utai ke diajar Paul? Sekeda ari sida ngena siti leka jaku ke mai reti “orang ke ka amat bejaku,” tauka “orang ke ngumpulka benih.” (SKR. 17:18) Bekaul enggau rambai jaku nya, siku pakar madahka: “Rambai jaku nya dikena ngambarka siku burung ti mit ke ngumpulka biji benih ti mit. Pengudah nya, bisi orang bukai ngumpul teda pemakai sereta utai bukai ke ditemu iya ba pasar. Reti iya, tu merujuk ngagai orang ke sengapa aja ngulihka penerang ti nyelai ari orang bukai, tang enda ulih meretika penerang nya.” Kebendar iya, sida ke pintar tu madahka Paul siku orang ke semina nusui utai ke didinga iya ari orang bukai, tang iya enda nentuka sekalika penerang nya betul tauka enda. Taja pia, baka ke deka dipelajarka kitai pengudah tu, Paul enda takut taja pan iya balat dikelese sida.
7 Utai ti sama mega nyadi kemayaharitu. Ketegal kitai Saksi-Saksi Jehovah, kitai suah dikelese laban pechayaka ajar Bup Kudus. Ambika chunto, sekeda cikgu ngajar pasal evolusi, lalu sida madahka evolusi nya fakta ti bendar. Sida mega madah, enti nuan amat-amat pintar, nuan patut nerima ajar evolusi. Sida madah, orang ke enggai pechayaka evolusi nya beli. Nya alai, lebuh kitai madahka ajar Bup Kudus, sereta nunjukka bukti ari alam semula jadi, sida ke pintar tu deka ngasuh orang bukai ngumbai kitai tu semina sengapa nusui utai ke didinga ari orang bukai aja. Taja pia, kitai enda takut. Kitai pechaya Petara Jehovah meh ke udah ngaga semua utai ba dunya tu. Nya alai, kitai deka majak agi bejaku enggau yakin lebuh ngetanka pengarap kitai.—Pem. 4:11.
8. (a) Nama reaksi sekeda orang ngagai pesan ke ditusui Paul? (b) Paul dibai ngagai Areopagus, nama reti iya? (Peda nota kaki.)
8 Sekeda orang ke bukai ti ningaka jaku Paul ba pasar nya bisi reaksi ti bebida. Sida madahka: “Iya baka ke bejaku pasal bala petara bukai.” (SKR. 17:18) Kati tu reti iya, Paul ngajar orang Atens pasal petara ti baru? Utai ke digaga Paul ukai pekara ti mit. Kebendar iya beberapa ratus taun sebedau nya, Sokrates kala dipechara sereta diukum bunuh laban iya ngereja utai ti sama. Nya meh kebuah iya, Paul dibai ngagai Areopagus. Ba dia, iya dipinta nerangka ajar ke ditusui iya. Tu ketegal ba orang Atens, ajar nya amat nyelai. c Nya alai, baka ni Paul deka ngetanka pesan iya ba mua sida ke enda nemu pasal ajar Bup Kudus?
“Orang Atens, Aku Beratika” (Surat Kereja Rasul 17:22, 23)
9-11. (a) Baka ni Paul nguji deka ngiga utai ti sama entara iya enggau bala peninga iya? (b) Baka ni kitai ulih neladan Paul ba pengawa nginjil?
9 Kati nuan agi ingat Paul berasai amat tusah ati lebuh meda semua engkeramba ba Atens? Taja pia, iya mengkang tenang. Iya ulih ngawal emosi iya, lalu enda terus madah ngagai orang Atens pasal nyembah engkeramba nya salah. Paul nguji deka narit minat sida ba Atens enggau chara ngiga utai ti sama entara iya sereta sida. Iya bejaku enggau bejimat. Ku iya madahka: “Orang Atens, aku beratika kita alim amat ba semua pekara. Enti dibandingka enggau orang bukai, kita nangi agi ke mayuh petara.” (SKR. 17:22) Enggau chara nya, Paul baka ke benung madah, ‘Aku meda semua kita amat alim.’ Paul ngayanka penemu-dalam lebuh iya muji orang Atens laban ngemeratka pengawa ti bekaul enggau pengarap. Iya sedar sida ke pechayaka pengarap pelesu mega ulih berubah lalu nerima Berita Manah. Pia mega, Paul nemu iya suba pan “enda sedarka pengawa diri lalu enda arap.”—1 Tim. 1:13.
10 Paul bebendar ngiga utai ti sama entara iya sereta bala peninga iya. Iya beratika orang ba Atens amat alim, laban sida nirika siti alta ke dituju ngagai “Petara ti Enda Dikelala.” Siti sumber rujukan madahka, “orang Gerika sereta orang bansa bukai biasa nirika mayuh alta ke ‘petara ti enda dikelala.’ Sida takut pengawa sida engka enda sengaja nulak petara bukai, lalu sida takut petara tu deka pedis ati.” Nya alai enggau chara nirika alta nya, orang Atens nemu bisi siku Petara ke enda dikelala sida. Nyadi, Paul nyadika alta nya siti topik kena mai sida berandauka Berita Manah. Iya madahka: “Aku deka madah ngagai kita pasal Petara nya, iya nya Petara ke disembah kita tang enda dikelala kita.” (SKR. 17:22, 23) Chara Paul nerangka utai tu amat manah, laban enda kelalu ketara nyentukka sida ba Atens enda ulih nerima ubah nya. Taja pia, chara Paul amat bekesan. Sekeda orang sebedau tu ngumbai Paul benung nginjil pasal petara ti baru sereta nyelai. Tang, Paul enda ngereja nya. Paul semina nerangka pasal Petara ke enda dikelala sida, iya nya Petara ti bendar.
11 Baka ni kitai ulih nunda teladan Paul ba pengawa nginjil kitai? Enti kitai bebendar beratika orang, kitai engka tetemuka orang ke ngemeratka pengarap. Ambika chunto, nya ulih dipeda ari gari ke dikena iya, tauka utai ke diayanka iya ba rumah, tauka ba laman rumah iya. Kitai ulih madah: ‘Aku ulih meda nuan siku orang ke amat kuat ba pengarap. Aku amat arap ulih bejaku enggau orang ke baka nuan.’ Enti kitai bejimat milih leka jaku, sereta bebasaka asai ati orang ke kuat ba pengarap nya, kitai ulih ngiga peluang kena ngiga utai ti sama entara kitai empu sereta enggau iya. Ingat meh, tuju kitai nya ukai laban deka ngakim orang bepelasarka pengarap ke dipegai sida. Iya ke amat, bisi menyadi Kristian kitai ke kala bebendar amat bepegai ba pengarap pelesu.
Giga poin ti sama ke ulih dikerembaika
Petara “Enda Jauh ari Kitai Siku-Siku” (Surat Kereja Rasul 17:24-28)
12. Baka ni Paul ngubah chara iya nginjil ngagai sida ba Atens?
12 Paul udah tetemuka utai ti sama entara iya sereta bala peninga iya ba Atens. Tang kati iya ulih terus ngekalka nya lebuh iya meri saksi ngagai sida? Paul nemu, pelajar ke diterima sida ba Atens bepelasarka falsafah orang Gerika. Nya alai, sida enda nemu pasal Bup Kudus. Baka ni Paul ngubah chara iya nginjil ngagai sida ba Atens? (1) Paul madahka ajar Bup Kudus. Tang, iya enda terus madahka ajar nya datai ari Bup Kudus. (2) Paul ngasuh bala peninga nemu iya amat meretika sida, lalu kala nyadi baka sida suba. Kekadang, Paul ngena leka jaku “kitai” lebuh iya bejaku ngagai sida. (3) Paul nandu baru utai ke ditulis ba karya sastera orang Gerika. Paul ngereja tu kena nunjukka, ajar iya mega bisi ditulis dalam bansa jaku ke ditemu orang Atens. Diatu, aram kitai mansik pasal jaku Paul ngagai orang Atens. Nama ajar ti penting ke dipadah iya ngagai orang Atens pasal Petara ti enda dikelala sida?
13. Nama utai ke diterangka Paul pasal pun penatai alam semesta, lalu nama ulih dipelajarka kitai ari jaku iya?
13 Petara ngaga alam semesta. Paul nerangka: “Petara ke ngaga dunya enggau semua utai ba dalam dunya, Iya meh Tuan ke merintah langit enggau dunya. Iya enda diau ba rumah sembiang ke digaga mensia.” d (SKR. 17:24) Nya alai, alam semesta enda nyadi pia aja laban Petara ti bendar udah ngaga semua utai. (Mas. 146:6) Nyadi, kuasa Petara ti bendar ke udah ngaga langit enggau dunya enda bepanggai ba nama-nama rumah sembiang ti digaga mensia empu. (1 Raj. 8:27) Taja pia, kuasa petara indu Atena enggau bala petara ke bukai bepanggai ba rumah sembiang sereta alta. Nama ulih dipelajarka kitai ari jaku Paul? Petara ti bendar nya bekuasa agi ari semua petara bukai ba rumah sembiang.—Isa. 40:18-26.
14. Baka ni chara Paul nunjukka Petara enda ibuh bepanggai ba mensia?
14 Petara enda ibuh bepanggai ba mensia. Orang ke nyembah engkeramba suah mai gari ti mar, lalu masukka gari nya ba engkeramba. Sida mega meri mayuh hadiah ti mar ngagai engkeramba, sereta mai pemakai enggau utai irup. Baka meh semua engkeramba tu begunaka gari, hadiah sereta pemakai kena terus idup! Taja pia maya nya, bisi sekeda ahli falsafah orang Gerika ke ningaka Paul engka pechaya petara enda ibuh bepanggai ba mensia ngintu iya. Enti pia, sida tentu setuju enggau jaku Paul ke madah “Iya ukai nya . . . begunaka mensia ngintu Iya.” Nya alai, mensia enda ibuh meri nama-nama utai ngagai Petara kena nulung Iya beridup! Tang, Iya meh ke meri mensia semua utai ke diguna ba pengidup, nyengkaum “seput sereta semua utai” baka mata panas, ujan, sereta tanah ti mansutka asil. (SKR. 17:25; P-kal. 2:7) Nyadi, Petara ke meri semua utai ngagai mensia. Lalu mensia ke nerima mayuh utai ari Petara. Ketegal nya, Petara enda ibuh bepanggai ba mensia.
15. Orang Atens pechaya sida manah agi ari orang ke ukai bansa Gerika. Baka ni chara Paul nerangka isu tu ngagai sida, lalu nama utai ti penting ke ulih dipelajarka kitai ari teladan Paul?
15 Petara ngaga mensia. Orang Atens pechaya sida manah agi ari orang ke ukai bansa Gerika. Tang, temegahka menua diri sereta bansa diri empu enda sejalai enggau ajar Bup Kudus. (U-dat. 10:17) Nya alai isu tu amat sensitif. Taja pia, Paul nerangka isu tu enggau landik sereta bejimat. Iya madahka, “[Petara] ngaga semua bansa.” Jaku Paul tentu ngasuh bala peninga iya teketu enda lama, lalu berundingka pekara tu. (SKR. 17:26) Paul merujuk ngagai bup Pemungkal pasal Adam, laban Adam nyadi aki ini ngagai semua bansa mensia. (P-kal. 1:26-28) Ketegal nya, semua mensia bisi aki ini ti sama. Nyadi, nadai bansa tauka menua ti manah agi ari pangan diri. Semua peninga Paul tentu meretika poin ke deka dikenataika iya. Nama utai ti penting ke ulih dipelajarka kitai ari teladan Paul? Endang amat, kitai deka bejaku enggau bejimat, sereta berunding enggau manah lebuh nginjil. Kitai mega tentu deka ngasuh ajar Bup Kudus senang diterima orang, tang kitai enggai ngelakka tu nagang kitai madahka pemendar ti beguna ngagai sida.
16. Nama tuju Petara ke mensia?
16 Petara bisi tuju deka ngasuh mensia semak ngagai Iya. Bala ahli falsafah ke ningaka Paul udah lama ngiga saut pasal nama tuju mensia digaga Petara. Taja pia, sida enda ulih tetemuka saut ti ngemuaska ati. Tang, Paul enggau terang madahka tuju Petara ke mensia, iya nya “ngambika sida bebendar ngiga Petara. Enti sida begama ngiga Iya, sida tentu ulih tetemuka Iya, laban kebendar nya, Iya enda jauh ari kitai siku-siku.” (SKR. 17:27) Nya alai, enda mustahil orang Atens ulih ngelala Petara ke enda dikelala sida. Tu ketegal, Petara enda jauh ari sida ke bebendar ngiga sereta belajar pasal Iya. (Mas. 145:18) Peratika mega, Paul ngena leka jaku “kitai.” Tu nunjukka, Paul mega disengkaum dalam orang ke sama ngiga Petara.
17, 18. Nama kebuah mensia patut bisi pengingin deka semak enggau Petara, lalu nama ulih dipelajarka kitai ari chara Paul bejaku enggau bala peninga iya?
17 Mensia patut bisi pengingin deka semak enggau Petara. Nama kebuah? Laban Paul madah, ketegal Petara “kitai idup, engkebut, sereta bisi ba ditu.” Sekeda pakar madahka, Paul nandu baru jaku siku lelaki ke benama Epimenide ke idup ba taun ke-6 S.M. Iya amat tebilang sereta nemu bepantun, lalu iya datai ari Krit. Pia mega, iya “siku orang ke amat penting dalam pengawa sembah orang Atens.” Kelimpah ari nya, Paul meri siti agi kebuah mensia patut bisi pengingin deka semak enggau Petara. Iya madah: “Baka ke dipadah bala penulis pantun kita, ‘Semua kitai anak Iya.’” (SKR. 17:28) Petara udah ngaga Adam, lalu iya nyadi aki ini ngagai semua orang. Nya alai, semua kitai patut ngasaika, Petara nya endang Apai kitai. Kena nyapai ati bala peninga iya, Paul nandu baru pantun orang Gerika ke amat dipebasa semua orang Atens. e Sejalai enggau teladan Paul, kitai mega ulih ngena rujukan ari sumber luar baka penerang pasal sejarah, encyclopedia, tauka rujukan ke bukai. Ambika chunto, penerang ke diambi ari sumber ti dipebasa semua orang pasal pun penatai pengarap pelesu enggau pengawa iya, ulih nulung orang ke ukai Saksi yakin pasal pun pegarap pelesu.
18 Naka tu, Paul udah madahka pemendar ti penting pasal Petara. Paul mega amat landik ngubah chara iya bejaku ngagai peninga iya ba Atens. Nya alai, pengudah nemu pasal penerang ti beguna tu, rasul Paul deka bala peninga iya ngereja utai ti penting. Nama utai nya? Paul terus madah ngagai sida pasal utai ke patut digaga ba jaku iya pengudah tu.
‘Semua Orang ba Serata Endur Patut Nesal Ati’ (Surat Kereja Rasul 17:29-31)
19, 20. (a) Baka ni Paul enggau bejimat nunjukka pengawa nyembah engkeramba nya nadai guna? (b) Nama utai ke patut digaga bala peninga Paul?
19 Paul sedia deka meransang orang Atens ngaga ubah. Nya alai, iya merujuk baru ngagai karya sastera orang Gerika lalu madahka: “Ketegal kitai tu anak Petara, kitai enda tau ngumbai Petara nya baka utai ke digaga ari emas, pirak, tauka batu.” (SKR. 17:29) Nyadi uji perundingka tu: Enti semua mensia digaga Petara, baka ni Petara ulih nyadi engkeramba sedangkan engkeramba nya ke digaga mensia empu? Ba senentang tu, Paul nerangka pekara nya enggau manah sereta bejimat. Iya enggau terang nunjukka pengawa nyembah engkeramba nya nadai guna sereta nadai reti. (Mas. 115:4-8; Isa. 44:9-20) Kelimpah ari nya, Paul nyebut “kitai enda tau . . . . ” Enggau tu, jaku ajar Paul senang agi diterima lalu ngasuh orang bukai enda entu pedis ati.
20 Rasul Paul madahka enggau terang ubah ke patut digaga bala peninga iya. Paul madah: “Sebedau tu, orang enda ngelala Petara, tang Iya enda nyalahka sida [sida ke nyembah engkeramba laban ngumbai pengawa tu ngelantangka ati Petara]. Diatu, Iya madahka ngagai semua orang ba serata endur pasal sida ke patut nesal ati.” (SKR. 17:30) Nya alai, sekeda orang Atens engka tekenyit laban nemu diri patut nesal ati. Tang jaku Paul nunjukka, pengidup sida datai ari Petara, lalu semua sida betanggungjawap ngagai Iya. Sida patut ngiga Petara, belajarka pemendar pasal Iya, sereta ngubah pengidup sida ngambika sejalai enggau peneka Petara. Orang Atens enda tau enda ngaga ubah, lalu badu nyembah engkeramba.
21, 22. Nama utai ke dipadah Paul ba pengujung jaku iya, lalu nama reti jaku Paul ba kitai kemayaharitu?
21 Paul ngujungka jaku iya enggau nyebutka utai tu: “[Petara] udah netapka hari kena ngakim serata dunya enggau lurus nengah siku lelaki ke udah dipilih Iya. Hari nya tentu deka datai, laban Iya udah ngidupka lelaki nya ari mati nyadika jamin ke semua mensia.” (SKR. 17:31) Reti iya, Hari Pechara deka datai. Nya alai, orang ba Atens patut bebendar agi ngiga sapa Petara ti bendar! Taja pia, Paul enda madahka nama Hakim ke dipilih. Tang, iya madahka utai ti ngalitka ati pasal Hakim tu: Hakim tu kala idup nyadi mensia, lalu mati. Udah nya, Petara ngangkatka iya idup baru!
22 Jaku penutup Paul mai reti ti besai ba kitai kemayaharitu. Kitai nemu, Petara udah milih Jesus Kristus nyadi Hakim. (Jhn. 5:22) Kitai mega nemu, timpuh Hari Pechara nya 1,000 taun, lalu hari nya deka jampat datai. (Pem. 20:4, 6) Taja pia, kitai enda ibuh takutka Hari Pechara. Hari nya deka mai mayuh berekat ngagai sida ke setia. Nya alai, pengangkat Jesus Kristus ari pemati nyadika jamin ke harapan kitai ngambika kitai ulih nerima semua berekat ke disemayaka Petara ba jemah ila!
“Sekeda Orang Arap” (Surat Kereja Rasul 17:32-34)
23. Nama sekeda reaksi orang pengudah Paul bejaku?
23 Bisi beberapa reaksi ke diterima pengudah Paul bejaku. “Sekeda ari sida ngeleseka Paul” pengudah sida ningaka ajar pasal pengangkat ari mati. Bisi sekeda orang bebasaka iya, tang sida enggai ngaga pemutus deka nesal ati sereta arap. Sida semina madah: “Kami deka ninga nuan bejaku pasal utai tu baru ba maya bukai.” (SKR. 17:32) Taja pia, bisi sekeda orang meri reaksi ti manah. Bup Kudus madahka: “Sekeda orang arap lalu nitihka iya. Sida tu nyengkaum siku hakim ari kot Areopagus ke benama Dionisius, siku indu ke benama Damaris, enggau sekeda ke bukai.” (SKR. 17:34) Utai ti sama mega nyadi ba pengawa nginjil kitai kemayaharitu. Sekeda orang engka deka ngeleseka kitai. Ke bukai agi deka bebasaka kitai, taja pia sida enggai nerima pesan Berita Manah. Tang enda ngira nama nyadi, kitai tentu berasai gaga ati lebuh sekeda orang nerima pesan Berita Manah, lalu arap.
24. Nama ulih dipelajarka kitai ari jaku Paul maya iya ba Areopagus?
24 Lebuh kitai berunding pasal jaku Paul, kitai ulih belajar mayuh chara deka ngemansangka randau enggau chara ti manah, sereta nulung bala peninga kitai yakin enggau pesan ke ditusui kitai. Pia mega, kitai belajar pasal chara ulih nelebaka diri nitihka situasi bala peninga kitai. Kelimpah ari nya, kitai mega belajarka kebuah patut besabar sereta bejaku enggau bejimat ngagai orang ke benung ditesatka pengarap ti pelesu. Kitai mega ulih belajarka utai ti amat penting tu: Ba pengawa nginjil, kitai endang deka nyaga ati bala peninga kitai. Tang tu ukai reti iya, kitai enda madahka ajar Bup Kudus ti penting ketegal enggai ngasaka ati sida. Nya alai enggau nitihka teladan Paul, semua kitai ulih nyadi pengajar ti landik agi ba pengawa nginjil. Nambahka nya, bala menyadi lelaki ke ngiring ulih nyadi pengajar ti manah agi ba raban gempuru. Enggau nya, semua kitai deka disikap enggau manah ngambika ulih nulung orang bukai ‘ngiga Petara lalu tetemuka Iya.’—SKR. 17:27.
a Peda kutak “ Atens—Pusat Budaya Dunya Kelia Menya.”
c Areopagus bisi ba begian barat laut di Atens. Ba Areopagus, bisi endur alai raban kunsil nengeri Atens baum. Leka jaku “Areopagus” ulih mai 2 iti reti ti bebida, iya nya raban kunsil ba dia tauka siti bukit ke amat-amat bisi ba Atens. Ketegal bisi 2 iti penemu ti enda sama, bala pakar enda entu sepenemu enggau pangan diri. Bisi ke madah Paul amat-amat dibai ngagai siti bukit. Tang bisi ke bukai madahka, Paul dibai baum ba raban kunsil ba endur bukai, iya nya engka di pasar.
d Leka jaku “dunya” dalam jaku Gerika nya koʹsmos. Orang Gerika ngena leka jaku tu kena merujuk ngagai alam semesta. Paul engka ngena leka jaku tu lebuh berandau enggau bala peninga iya. Iya ngereja tu ngambika ulih mengkang ngetanka penemu ti sama entara iya sereta bala peninga iya ke bebansa Gerika.
e Paul nandu baru utai ke ditulis dalam pantun pasal bintang ke betajuk Phaenomena. Pantun nya ditulis siku lelaki ke benama Aratus. Iya nitihka penemu orang Stoik. Jaku ti sama mega ulih ditemu ba penulisan Gerika ke bukai, ti nyengkaum Hymn to Zeus. Tu ditulis siku lelaki ke benama Cleanthes ke mega nitihka penemu Stoik.
