Nuan ulih belajar pasal Petara ari macha Bup Kudus. Kelia menya Petara milih sekeda mensia nulis pasal runding Iya. Utai ke ditulis nya dikumbai Bup Kudus. Sehari tu kitai belajar pasal Petara ari macha Bup Kudus. Laban Bup Kudus ngembuan jaku Jehovah, tauka pesan Iya, nya alai, iya dikumbai Jaku Petara. Kitai ulih pechayaka utai ti dipadah dalam Bup Kudus laban Jehovah enda kala bula. ‘Petara nunjukka diri enda bula.’ (Hebrew 6:18) Jaku Petara ngembuan pemendar.—John 17:17.

Bup Kudus nya siti ari pemeri Petara ti berega ke kitai. Nya baka siti surat ari seiku apai ti bepengerindu ngagai anak iya. Dia bisi madahka pasal semaya Petara deka ngubah dunya tu nyadi siti endur ti manah endur diau–dunya paradais. Iya madahka ke kitai utai ti udah digaga Iya dulu menya, utai ti benung dikereja Iya diatu, enggau utai ti deka dikereja Iya jemah ila ngagai bala anak Iya ke taluk. Tu mega ulih nulung kitai mutarka penanggul  sereta bulih pengelantang.—2 Timoti 3:16, 17.

Saksi-Saksi Jehovah nya pangan Petara; sida deka nulung nuan meretika ajar ari Bup Kudus. Padah aja ngagai sida, nuan deka belajarka Bup Kudus. Sida enda minta bayar ke pengawa tu. (Matthew 10:8) Pia mega, nuan ulih datai begempuru. Endur kitai meri sembah ngagai Petara nya dikumbai Palan Gempuru. Enti nuan datai begempuru, nuan deka jampat agi mansang ba penemu pasal Petara.

Nuan ulih belajar pasal Petara ari utai ti udah digaga Iya. Chunto, Bup Kudus madah: ‘Petara berengkah ngaga langit enggau dunya’. (Pemungkal 1:1) Lebuh Jehovah ngaga “langit”, Iya mega ngaga mata panas. Nama utai ke deka dipadahka pasal Petara ari tu? Tu madahka kitai Jehovah nya amat bekuasa. Semina Iya ulih ngaga utai ti amat bekuasa baka mata panas. Tu mega madahka kitai Petara nya pintar, laban begunaka pengelandik kena ngaga mata panas, ti ulih meri kitai pengangkat enggau penampak tang enda nganguska utai.

Ari utai ke ditempa nya nunjukka Jehovah rinduka kitai. Perundingka pemayuh macham bansa buah ba dunya. Jehovah ulih semina nyediaka siti bansa buah aja ke kitai—tauka nadai. Tang, Jehovah meri kitai mayuh macham bansa buah enggau mayuh macham gamal, sais, kala sereta asai. Tu nunjukka Jehovah nya Petara ti ukai aja bepengerindu tang mega amat gerah jari enggau nemu berunding sereta manah ati.—Masmur 104:24.