Jehovah enda ngemendarka orang ti jai ngerusak Paradais. Semina pangan Iya aja deka diau dia. Nama penyadi ngagai orang ti jai? Kena bulih saut nya, peratika cherita ti bendar pasal Noah. Noah idup ba maya beribu taun ti udah. Iya seiku lelaki ti manah ke seruran enggau naka ulih ngereja peneka Jehovah. Tang orang bukai ke ba dunya maya nya ngereja utai ti jai. Nya kebuah Jehovah madahka Noah, Iya deka ngenataika Bah Besai kena ngerusak semua orang ti jai. Iya ngasuh Noah ngaga sebuah bandung ngambika Noah sebilik ulih selamat lebuh Bah Besai nya datai.—Pemungkal 6:9-18.

Noah enggau diri sebilik iya ngaga bandung. Noah udah nangkan orang ke maya nya pasal Bah Besai deka datai, tang sida enggai ningaka iya. Sida majak ngereja utai ti jai. Pengudah bandung nya tembu digaga, Noah mai mayuh bansa jelu, lalu iya enggau sida sebilik mega tama dalam nya. Udah nya, Jehovah ngenataika kabut ti besai. Ujan nyadi pengelama 40 hari enggau 40 malam. Ai nya ngampuhka semua dunya.—Pemungkal 7:7-12.

 Orang ti jai enda ulih selamat, tang Noah sebilik selamat. Jehovah nyelamatka sida maya Bah Besai nya, lalu meri sida dunya ke nadai agi penyai. (Pemungkal 7:22, 23) Dalam Bup Kudus bisi madahka, sekali da agi timpuh deka datai maya Jehovah deka ngerusak sida ke enggai ngereja utai ti betul. Orang ti manah enda dirusak. Sida deka idup belama iya ba dunya Paradais.—2 Peter 2:5, 6, 9.

Kemaya hari tu mayuh orang ngereja utai ti jai. Dunya penuh enggau penyarut. Jehovah udah nganjung bala Saksi Iya nangkan mayuh orang, tang sida agi enggai ningaka jaku Jehovah. Sida enggai ngubah jalai pengidup diri. Sida enggai nerima penemu Petara pasal utai ti betul enggau utai ti salah. Nama penyadi ngagai orang ke baka tu? Kati sida deka berubah jemah ila? Kemayuh agi enda berubah. Maya deka datai lebuh orang ti jai deka dirusak lalu nadai peluang bulih pengidup ti belama iya.—Masmur 92:7.

Dunya enda dirusak; tang deka nyadi Paradais. Orang ke nyadi pangan Petara deka bulih pengidup belama iya ba dunya Paradais.—Masmur 37:29.