Sitan deka nuan ngereja engkeramat. Mayuh orang meri piring ngagai aki ini tauka roh ngambika ulih nyaga sida ari utai ti tau ngemedis. Sida ngereja tu laban sida takutka kuasa ari dunya roh. Sida ngena tinchin tauka gelang ti bisi engkeramat. Sida ngirup tauka ngunsutka tubuh sida enggau “ubat” ke bisi engkeramat. Ba dalam rumah tauka ba dalam tanah, sekeda orang ngelalaika bup ke bisi ngembuan engkeramat. Bisi mega ngena “ubat” engkeramat laban sida pechaya nya ulih ngemujurka pengawa bisnis, peresa sekula, tauka maya bedating.

Chara ti pemadu manah kena nyaga diri ari Sitan, iya nya nyadi pangan Jehovah. Petara Jehovah enggau melikat Iya lebih bekuasa agi ari Sitan enggau bala antu. (James 2:19; Pemandang 12:9) Jehovah deka ngayanka pengering Iya ngarika bala pangan Iya–orang ke amat tetap ati ngagai Iya.—2 Bansa Israel 16:9.

Jaku Petara madah: “Anang betilitka nasit tauka bemanang.” Jehovah deka ngukum orang ke ngereja engkeramat enggau bemanang laban semua utai nya ulih ngujungka sida ba baruh kuasa Sitan.—Adat Lewi 19:26.