Paradais nya ukai baka dunya ke endur kitai diau diatu. Petara nadai kala deka dunya tu penuh enggau penanggul, penusah, pemedis enggau pemerinsa. Jemah ila, Petara deka ngasuh dunya tu nyadi Paradais. Baka ni Paradais nya? Aram kitai meda nama dipadah dalam Bup Kudus:

Orang ti manah. Paradais nya endur bala pangan Petara diau. Sida ngereja utai ti manah ngagai pangan diri. Sida deka idup nitihka jalai Petara ti lurus.—Jaku Dalam 2:21.

Mayuh pemakai. Ba Paradais, nadai lapar pungkang. Bup Kudus madah: “Awakka gandum seruran mayuh di menua.”—Masmur 72:16.

Bisi rumah ti manah sereta pengawa ti ngagaka ati. Ba Paradais, tiap iti ruang bilik bisi rumah kediri empu. Semua orang ulih ngereja pengawa ke meri pengelantang ti bendar.—Isaiah 65:21-23.

 Pemaik di serata dunya. Nadai agi orang deka belaban enggau mati ba perang. Jaku Petara madah: “Iya [Petara] ngasuh perang badu agi nyadi di serata dunya.”—Masmur 46:8, 9.

Bepengerai. Dalam Bup Kudus bisi semaya: “Nadai orang ke diau dalam menua kita deka mutap madahka diri sakit.” (Isaiah 33:24) Pia mega, nadai agi orang timpang, buta, bengal sereta bisu agi.

Nadai agi pemedis, penusah, enggau pemati. Jaku Petara madahka: “Iya deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.”—Pemandang 21:4.

Nadai agi orang jai. Petara besemaya: ‘Orang ke jai. . .deka dichabut ari menua tu baka ke nyabut rumput ari tanah.’—Jaku Dalam 2:22.

Semua orang deka rindu sereta bebasaka pangan diri. Ba dia, nadai agi utai ti enda lurus, beduan, amu, enggau pemenchi. Semua orang deka beserakup enggau idup nitihka jalai Petara ti lurus.—Isaiah 26:9.