Pemati nya belaban enggau pengidup. Pemati nya baka kitai ke tinduk jenak. (John 11:11-14) Orang ke udah mati enda ulih ninga, meda, bejaku, tauka berunding agi. (Pengajar 9:5, 10) Pengarap ti pelesu ngajar semengat orang ke udah mati ngagai dunya siti da agi, lalu begulai enggau aki ini sida ke udah lama mati. Nya ukai ajar ari Bup Kudus.

Sida ke udah mati enda ulih nulung tauka ngemediska kitai. Mayuh orang ngereja pengawa ngintu tauka meri pemeri ngagai orang ke udah mati laban sida ngumbai nya ulih ngelantangka orang ke udah mati. Tu enda ngenyamaika ati Petara laban tu siti ari pemula Sitan. Tu mega enda ulih ngelantangka orang ti udah mati, laban sida enda nemu utai agi. Kitai enda patut takut tauka nyembah orang ke udah mati. Sembah kitai patut diberi ngagai Petara aja.—Matthew 4:10.

Orang ke udah mati deka diangkatka idup baru. Jehovah deka ngerak orang ti udah mati idup baru ba dunya Paradais. Nya meh utai ke deka nyadi jemah ila. (John 5:28, 29; SKR. 24:15) Petara ulih ngerak orang ke udah mati baka nuan ke ulih ngerak orang ti tinduk.—Mark 5:22, 23, 41, 42.

Penemu ke madahka pasal kitai enda mati nya siti ari pemula Sitan. Sitan enggau bala antu iya deka orang berunding semengat orang ke udah mati agi idup lalu ulih ngasuh orang bukai sakit tauka kena penusah ti bukai. Sitan nipu orang nengah mimpi tauka genera. Jehovah deka ngukum orang ke nguji bejaku ngagai orang ti udah mati.—Ulang Adat 18:10-12.