Sitan enggau bala antu iya enggai meda nuan nyembah Petara. Enti ulih, sida deka ngelimpangka semua orang ari nyembah Petara. Baka ni sida ngereja tu? Siti chara nya, nengah pengarap ti pelesu. (2 Korint 11:13-15) Pengarap nya tau dikumbai pelesu enti iya enda ngajar utai ti bendar ari Bup Kudus. Pengarap ti pelesu nya baka duit pelesu–iya baka duit ti amat tang enda berega. Nya ulih ngemediska nuan.

Utai ke diajar ba pengarap pelesu enda ulih ngenyamaika ati Jehovah, iya nya Petara pemendar. Lebuh Jesus ba dunya, bisi raban pengarap ti deka munuh iya. Sida ngumbai chara sida nyembah Petara nya meh ke betul. Sida madah: ‘Kami bisi apai, Petara meh Apai kami.’ Kati Jesus setuju? Enda! Iya madah ngagai sida: “Kita tu anak Sitan”. (John 8:41, 44) Kemaya hari tu, mayuh orang ngumbai diri nyembah Petara, tang ke bendar iya sida nyembah Sitan enggau bala antu iya!—1 Korint 10:20.

 Baka kayu buruk ke ngeluarka buah ti jai, baka nya mega pengarap ti pelesu ulih ngenataika orang ti jai. Dunya tu penuh enggau penyarut ketegal penyai ke dikereja mensia. Bisi ulah ti enda bemoral, belaya, ngenchuri, enda lurus, pemunuh, enggau masung. Mayuh ari sida ke ngereja tu bisi pengarap, tang pengarap sida enda meransang sida ngereja utai ti manah. Sida enda ulih nyadi pangan Petara enti sida enda ngetu ngereja utai ti jai.—Matthew 7:17, 18.

Pengarap ti pelesu ngajar orang nyembah engkeramba. Petara enda ngasuh kitai besampi ngagai engkeramba. Tu endang patut. Kati nuan deka enti orang semina bejaku ngagai gambar nuan tang enda kala bejaku enggau nuan? Kati orang nya ulih nyadi pangan nuan? Enda ulih. Jehovah deka kitai bejaku ngagai Iya, tang ukai nengah engkeramba tauka gambar, iya ke nadai nyawa.—Pemansut 20:4, 5.

Pengarap ti pelesu ngajar enda salah munuh orang bukai maya beperang. Jesus madahka, pangan Petara bisi pengerindu ba entara pangan diri. Kitai enda munuh orang ke dikesayauka kitai. (John 13:35) Pia mega, kitai enda ulih munuh orang ti jai. Lebuh bala munsuh Jesus datai lalu nangkap iya, Jesus enda ngemendarka bala murid belaban ngarika iya.—Matthew 26:51, 52.

Pengarap ti pelesu ngajar orang ti jai deka diperinsa ba api neraka. Tang, dalam Bup Kudus madahka upah dosa nya pemati. (Rome 6:23) Jehovah nya Petara ti pengerindu. Kati Petara ti pengerindu deka merinsa orang? Tentu meh enda! Ba Paradais, semina siti aja pengarap, iya nya pengarap ti dikemendarka Jehovah. (Pemandang 15:4) Semua pengarap ke datai ari Sitan deka nadai agi.