Enti deka nyadi pangan Petara, nuan patut belajar pasal Iya. Kati bala pangan nuan, nemu nama nuan lalu ngena iya? Au. Petara mega deka nuan ngena nama Iya. Nama Iya Jehovah. (Masmur 83:18; Matthew 6:9) Nuan mega patut belajar pasal utai ti dikerindu sereta utai ti dipegedika Iya. Nuan patut nemu sapa bala pangan enggau sapa munsuh Iya. Ngelala siku-siku orang nya begunaka awak. Bup Kudus bisi madahka patut ngiga awak kena belajar pasal Jehovah.—Epesus 5:15, 16.

Pangan Petara ngereja utai ti ngelantangka ati Iya. Perundingka pasal bala pangan nuan. Enti nuan enda manah enggau sida lalu ngereja utai ke dipegedika sida, kati sida deka terus nyadi pangan nuan? Tentu enda! Baka nya mega, enti nuan deka nyadi pangan Petara, nuan patut ngereja utai ti ngelantangka ati Iya.—John 4:24.

Ukai semua pengarap nya bisi kaul ti manah enggau Petara. Jesus, iya nya pangan rapat Petara, bisi madahka dua iti jalai. Siti jalai nya besai lalu mayuh orang nengah. Jalai nya nuju ngagai pengerusak. Jalai siti da agi nya sempit lalu mimit aja orang nengah. Nya jalai nuju pengidup. Tu reti iya, enti nuan deka bisi kaul ti manah enggau Petara, nuan patut belajarka chara ti betul kena nyembah Iya.—Matthew 7:13, 14.