Utai jai ke nyadi ba dunya kemaya hari tu nunjukka Paradais nyau semak. Dalam Bup Kudus bisi madahka kitai deka meda maya ti amat ngenakutka sebedau Paradais deka datai. Diatu kitai benung idup ba maya nya! Ditu bisi madahka sekeda utai ke deka nyadi baka ti dipadah dalam Bup Kudus:

Perang besai. “Laban bansa siti deka beperang ngelaban bansa siti, lalu menua siti deka beperang ngelaban menua siti”. (Matthew 24:7) Jaku tu udah dikeamatka. Kenyau ari 1914, bisi dua iti perang dunya enggau mayuh agi perang ti mit ke bukai. Bejuta-juta iku orang udah mati dalam perang tu.

Penyakit berampit. “Penyakit deka nyadi ba mayuh bengkah endur”. (Luke 21:11) Kati tu bisi nyadi? Bisi. Penyakit riman, sakit jantung, batuk kering, chelap angat, AIDS, enggau penyakit bukai udah munuh bejuta-juta iku nyawa.

Enda chukup pemakai. Ba serata dunya bisi orang ke enda chukup pemakai. Bejuta-juta iku orang mati keberuran ninting taun. Tu siti da agi tanda ke nunjukka Paradais nya nyau semak. Dalam Bup Kudus madah: “Lapar pungkang deka nyadi.”—Mark 13:8.

 Tanah berenyang. “Tanah berenyang deka nyadi ba mayuh bengkah endur.” (Matthew 24:7) Utai tu mega udah nyadi diatu. Kenyau ari 1914, lebih ari sejuta iku orang udah mati ketegal tanah berenyang.

Orang ti jai. Orang semina “angkunka duit” enggau “berundingka diri empu aja”. Sida ‘semina deka ngelantangka diri lalu enda rinduka Petara’. Bala anak “enda ngasika apai indai”. (2 Timoti 3:1-5) Kati nuan mega setuju endang amat bisi orang ke baka nya kemaya hari tu? Sida enda bebasaka Petara, lalu sida mega deka ngachau orang ke bisi ati belajar pasal Petara.

Penyai. “Laban penyai deka nambah-menambah”. (Matthew 24:12) Nuan empu mega ulih ngasaika penyai nyau majak jai ari dulu suba. Enda ngira ba dini-dini endur semua orang ulih kena rumpak, ditipu, tauka dipediska.

Semua tu nunjukka Perintah Petara nyau semak. Bup Kudus madahka: ‘Lebuh kita meda utai tu nyadi, kita deka nemu Perintah Petara nyau semak.’ (Luke 21:31) Nama reti Perintah Petara nya? Nya Perintah Petara ke ba serega, ti deka nukar dunya tu nyadi Paradais. Perintah Petara deka nganti perintah mensia.—Daniel 2:44.