Munsuh Petara ti pemadu besai nya Sitan. Iya melikat ke ngelaban Petara. Sitan majak ngelaban Petara lalu ngasuh mayuh penyarut nyadi ngagai mensia. Sitan nya jai. Iya pemula enggau pemunuh.—John 8:44.

Roh ti jai ke bukai nitihka Sitan ngelaban Petara. Bup Kudus ngumbai sida bala antu. Baka Sitan, bala antu tu munsuh mensia. Sida rindu ngemediska orang. (Matthew 9:32, 33; 12:22) Jehovah deka ngemunaska Sitan enggau bala antu belama iya. Sida semina bisi timpuh ti pandak aja ngaga penyarut ke mensia.—Pemandang 12:12.

Enti nuan deka nyadi pangan Petara, nuan patut nyeliahka diri ari ngereja pengawa ke diasuh Sitan. Sitan enggau bala antu iya begedika Jehovah. Sida nya munsuh Petara, lalu sida deka nuan mega nyadi munsuh Petara. Nuan patut milih deka ngenyamaika ati sapa–Sitan tauka Jehovah. Enti nuan deka bulih pengidup belama iya, nuan patut milih ngereja peneka Petara. Sitan bisi mayuh akal enggau chara kena nipu orang. Mayuh orang alah ditipu iya.—Pemandang 12:9.