Jesus Kristus nya Anak Jehovah sereta pangan Iya ti pemadu rapat. Sebedau iya datai nyadi mensia ke dunya, Jesus idup ba serega nyadi mensia roh ti bekuasa. (John 17:5) Udah nya iya datai ke dunya ngajar orang pemendar pasal Petara. (John 18:37) Iya mega meri nyawa mensia iya kena ngelepaska mensia ti ngasi ari dosa enggau pemati. (Rome 6:23) Diatu Jesus nya Raja ba Perintah Petara, perintah ti deka mai dunya Paradais.—Pemandang 19:16.

Bala melikat mega pangan Petara. Pengidup bala melikat ukai bepun enggau pengidup sida ke nyadi mensia ba dunya. Sida udah digaga ba serega sebedau Petara ngaga dunya. (Jop 38:4-7) Bisi bejuta-juta iku melikat. (Daniel 7:10) Bala pangan Petara ke ba serega tu deka ke mensia belajarka pemendar pasal Jehovah.—Pemandang 14:6, 7.

Petara mega bisi pangan ba dunya; Iya ngumbai sida, saksi Iya. Saksi dalam kot deka madahka utai ti ditemu sida pasal seiku orang tauka pasal sekeda utai. Saksi-Saksi Jehovah deka madahka ngagai orang bukai utai ke ditemu sida pasal Jehovah enggau tuju Iya. (Isaiah 43:10) Baka bala melikat, bala Saksi deka nulung nuan belajarka pemendar pasal Jehovah. Sida deka nuan mega nyadi pangan Petara.