Kitai semua begunaka duit kena nyediaka utai ti diguna diri sebilik. (Jaku Dalam 30:8) Pia mega, duit “meri kitai pengelikun.” (Pengajar 7:12) Laki bini engka tusah berandau pasal ngatur belanja, tang anang ngasuh nya nyadi penanggul ba ruang bilik. (Epesus 4:32) Laki bini patut pechayaka pangan diri, lalu sama nentuka baka ni ngatur belanja.

NAMA DIPADAH BUP KUDUS: “Sapa ari bala kita ke deka ngaga sebuah menara, enda dulu ngira ungkus utai nya, ngambika iya nemu sekalika iya bisi duit kena nembuka pengawa nya?” (Luke 14:28) Seduai patut ngatur baka ni ngena duit. (Amos 3:3) Pikirka nama utai ke patut dibeli, lalu kira penyampau duit ke ulih dikena. (Jaku Dalam 31:16) Taja pan nuan bisi duit kena meli utai, tang ukai reti iya nuan patut bebelika utai nya. Anang berutang. Bejimat ngena duit.​—Jaku Dalam 21:5; 22:7.

NAMA PATUT DIGAGA NUAN:

• Enti seduai bisi duit lebih maya ujung bulan, seduai patut mikirka baka ni ngatur duit nya

• Enti belanja seduai lebih ari gaji, seduai patut ngatur ngurangka belanja. Chunto, seduai patut berapi kediri empu, enda ibuh makai ba kedai

NAMA DIPADAH BUP KUDUS: “Ngereja utai ti ngena, ukai semina di mua Tuhan aja, tang mega di mua mensia.” (2 Korint 8:21) Terus terang enggau kaling nuan pasal penyampau gaji enggau belanja nuan.

Seruran nanya penemu kaling nuan sebedau ngaga pemutus bebelika utai ti begunaka mayuh duit. (Jaku Dalam 13:10) Sama ngatur belanja ulih nulung ruang bilik seduai lantang. Anang ngumbai gaji nuan enggi nuan aja, tang enggi diri sebilik.​—1 Timoti 5:8.

NAMA PATUT DIGAGA NUAN:

• Enti udah setuju enggau penyampau duit ke ulih dikena seiku-seiku, seduai enda ibuh nanya penemu pangan diri agi maya bebelanja

• Anang nganti penanggul datai, nya baru deka ngatur belanja