Jehovah ngarapka orang ke jadi melaki-bini meruan tetap ati ngagai pangan diri nitihka semaya. Lebuh ngasuh Adam seduai Hawa jadi melaki-bini, Jehovah madah:  “Lelaki . . . begulai enggau bini iya, lalu seduai iya nyadi siku.” Jesus mega ngulang jaku Petara nya. Ku iya: ‘Nya alai, nadai orang tau nyeraraka utai ti udah ditampilka Petara.’ (Pemungkal 2:24; Matthew 19:3-6) Nya kebuah, ba mata Jehovah enggau Jesus, laki bini patut begulai enggau pangan diri nyentukka seiku ari seduai nadai agi ba dunya tu. (1 Korint 7:39) Ketegal pengawa jadi melaki-bini nya tuchi, sarak ukai pekara ti mit. Iya ke amat, Jehovah begedika pengawa sarak ke enda nitihka ajar ari Bup Kudus.—Malaki 2:15, 16.

Nitihka Bup Kudus, nama ulih ngasuh laki bini sarak? Semina butang aja. Jehovah begedika pengawa butang tauka ulah ti kamah. Nya alai, Iya semina ngemendarka laki bini sarak ketegal butang. * (Pemungkal 39:9; 2 Samuel 11:26, 27; Masmur 51:4) Jehovah meri hak ngagai kaling ke enda salah nya milih, sekalika iya agi deka begulai tauka sarak enggau kaling iya ke udah butang. (Matthew 19:9) Nya alai, enti iya milih deka sarak, iya enda ngereja utai ti salah ba mata Jehovah. Taja pia, kitai enda patut ngansak orang sarak enggau pangan diri. Kekadang, bisi kebuah ke ngasuh iya deka terus begulai enggau kaling iya ke udah butang. Kelebih agi, enti kaling iya nya amat nesal ati. Nya alai, pemutus nya bepanggai ba iya, lalu iya empu betanggungjawap ke pemutus ti udah digaga diri empu.—Galatia 6:5.

Ba sekeda pekara ti berat, orang Kristian ulih milih deka beserara tauka sarak enggau pangan diri, taja pan sida enda butang. Tang, Bup Kudus nangkan sida “enda tau jadi enggau lelaki bukai [tauka indu bukai], tauka iya mulaika diri baru.” (1 Korint 7:11) Nya alai, sida enda ulih kawin enggau orang bukai. (Matthew 5:32) Peratika tiga pekara ke ulih ngasuh laki bini beserara enggau pangan diri.

Enggai melanja anak bini. Diri sebilik deka idup seranta  enti laki enggai nyediaka utai ti diguna anak bini. Bup Kudus madah: “Barang sapa enda ngintu . . . sida sebilik, udah nulak pengarap, lalu jai agi ari orang ke enda arap.” (1 Timoti 5:8) Enti laki enggai ngubah ulah iya, bini ulih milih beserara ngena undang-undang kena nyaga diri enggau anak iya. Enti laki iya orang Kristian, sida tuai gempuru patut mutarka pekara tu enggau manah. Nama kebuah? Laban laki ke enggai melanja diri sebilik ulih dibuai ari gerempung.

Pengawa udu nyamah. Laki tauka bini ke udu nyamah ulih ngerusak pengerai sereta nganu nyawa kaling iya. Enti iya orang Kristian, tuai gempuru patut mansik pekara tu. Orang ke kasar sereta enda tetagangka pemangah diri ulih dibuai ari gerempung.—Galatia 5:19-21.

Enda ulih nyembah Jehovah. Kekadang, laki tauka bini engka balat nyakal kaling sida nyembah tauka ngasika pesan Jehovah. Ba pekara tu, kaling ke nyembah Jehovah patut ‘ngasika Petara, ukai ngasika mensia.’ (Kereja Rasul 5:29) Nya alai, iya ulih milih sekalika iya deka beserara ngena undang-undang tauka enda.

Taja pan pekara ba atas nya bisi nyadi, nadai seiku pan orang ulih ngansak kaling ke enda salah nerima penemu sida sekalika iya patut beserara tauka enda. Taja pan sida tuai gempuru enggau bala menyadi ke sama pengarap ulih meri sukung sereta jaku lalau ari Bup Kudus, sida engka enda nemu semua utai ke nyadi entara laki bini nya. Semina Jehovah aja nemu. Endang amat, laki tauka bini enda tau ngemesaika penanggul ba ruang bilik iya kena ngiga kebuah ngambika ulih beserara enggau kaling iya. Laban tu nunjukka sida enda bebasaka Petara tauka adat melaki-bini. Jehovah ulih nemu enti orang bisi kebuah ti salah deka beserara. Endang amat, “semua deka dikebak lalu diayanka magang di mua Iya. Lalu semua kitai enda tau enda madahka pasal diri empu ngagai Iya.” (Hebrew 4:13) Tang,  enti pekara ke berat nya majak nyadi sereta enda ulih diputarka, nadai orang tau mantah laki tauka bini ke milih deka beserara enggau kaling iya. Pia mega, ‘semua kitai deka bediri di mua Petara, lalu diakim Iya.’—Rome 14:10-12.