1. Orang ke baka ni diasuh Jehovah datai ngagai Iya, lalu nama kebuah sida patut bejaga-jaga ba pengarap?

‘ORANG ke amat nyembah Apai, deka nyembah Iya dalam roh enggau pemendar, laban nya gaya orang ke dikedekaka Apai nyembah Iya,’ ku Jesus. (John 4:23) Lebuh Jehovah tetemuka orang ke baka nya—baka Iya tetemuka nuan—Iya ngasuh sida datai ngagai Iya empu enggau Anak Iya. (John 6:44) Naka meh pemanah peluang tu! Taja pia, orang ke rinduka pemendar ari Bup Kudus patut ngiga “utai ti ngerinduka ati” Tuan, laban Sitan nipu semua orang.—Epesus 5:10; Pemandang 12:9.

2. Terangka baka ni Jehovah meda orang ke nguji nyampurka pengarap ti bendar enggau pelesu.

² Peratika utai ti nyadi semak Bukit Sinai lebuh orang Israel ngasuh Aron ngagaka sida seiku petara. Aron setuju, lalu ngaga anak sapi emas kena ngarika Jehovah. ‘Pagila kitai deka begawai ngemesaika Jehovah,’ ku iya. Kati Jehovah deka meda pengawa nyampurka pengarap ti bendar enggau pelesu? Enggai. Iya munuh kira-kira 3,000 iku orang ke nyembah patung anak sapi emas. (Pemansut 32:1-6, 10, 28) Nama ulih dipelajarka kitai ari cherita tu? Enti kitai deka meruan dalam pengerindu Petara, kitai patut “anang negu utai ti enda tuchi,” lalu nyaga pengarap ngambika tuchi.—Isaiah 52:11; Esekiel 44:23; Galatia 5:9.

3, 4. Nama kebuah kitai patut beratika ajar Bup Kudus pasal adat enggau pengerami?

 ³ Sayau amat, pengudah bala rasul mati, orang ke ngaku diri Kristian belabuh nyampurka pengarap Kristian enggau adat sereta pengerami ari pengarap pelesu. (2 Tesalonika 2:7, 10) Lebuh nuan beratika sekeda pengerami tu, sida ngayanka ulah dunya, ukai ulah ti dikedekaka Petara. Iya ke amat, pengerami ba dunya tu: Ngayanka pengingin tubuh, ngemansangka ajar pengarap pelesu enggau pengawa bemanang—tanda ti nyulut ba ‘Babilon ti Besai.’ * (Pemandang 18:2-4, 23) Kingatka mega, Jehovah empu meda baka ni adat pengarap pelesu dichampurka enggau pengarap ti bendar. Kemaya hari tu, Jehovah mega agi begedika pengerami ke baka nya.—2 John 6, 7.

⁴ Orang Kristian nemu sekeda pengerami enda ngerinduka ati Jehovah. Nya alai, kitai patut nyeliahka pengerami nya. Aram kitai beratika kebuah Jehovah enda rinduka pengerami nya, lalu tu ulih nulung kitai meruan dalam pengerindu Petara.

5. Nama kebuah kitai tau pechaya Jesus ukai ada kena 25 Disember?

⁵ Bup Kudus nadai madah pasal pengerami hari pengada Jesus. Iya ke amat, nadai orang nemu kemaya iya ada. Tang, kitai ulih pechaya iya ukai ada kena 25 Disember, maya nya musin chelap ba sekeda menua. *  Lebuh Jesus ada, Luke madah: “Bala pengibun bedus diau di padang” ngibun bala bedus sida. (Luke 2:8-11) Enti “bala pengibun bedus diau di padang” sepemanjai taun, kitai ulih ngumbai 25 Disember maya Jesus ada. Taja pia, menua Betlehem benung musin chelap sereta bisi ujan enggau seleju maya bulan Disember. Nambahka nya, Josep seduai Maria nuju Betlehem ketegal Raja Besai Augustus meri atur ngasuh ngerejister nama diri. (Luke 2:1-7) Lebuh maya nya, mayuh orang enggai dipegai pemerintah Rome. Nya alai, enda patut Raja Besai deka ngasuh orang datai ngerejister nama diri maya musin chelap benung balat.

6, 7. (a) Ari ni penatai adat ngintu Krismas? (b) Nama bida entara pemeri maya Krismas enggau pemeri ari orang Kristian ti bendar?

⁶ Hari Krismas ukai datai ari Bup Kudus, tang ari pengerami pengarap pelesu, baka Saturnalia orang Rome, pengerami ke dikena ngintu Saturn, petara umai. Pia mega, orang ke nyembah petara mata hari ke dikumbai Mitra, ngintu “hari pengada mata hari ke enda ulih dialahka” kena 25 Disember, ku New Catholic Encyclopedia. “Hari Krismas belabuh diintu maya pengarap nyembah mata hari benung tebilang ba menua Rome,” kira-kira tiga ratus taun pengudah Jesus mati.

⁷ Lebuh pengerami nya, orang betukar pemeri, makai sereta ngirup. Pengawa tu mega digaga maya ngintu Krismas. Taja pia, kemaya hari tu pengawa betukar pemeri maya Krismas enda sejalai enggau 2 Korint 9:7, ke madah: ‘Genap iku kita patut meri nitihka pemutus runding diri, ukai enggau ati ti lembau, tauka ari pejal, laban Petara rinduka orang ke meri enggau ati ti gaga.’ Orang Kristian ti bendar meri ari ati. Sida ukai meri nyelinting hari bulan, lalu sida enda ngarapka orang malas pemeri sida. (Luke 14:12-14; bacha Kereja Rasul  20:35.) Pia mega, sida lantang ati laban enda gagit enggau orang ngintu Krismas sereta ulih nyeliahka diri berutang, ketegal enda ngintu pengerami nya.—Matthew 11:28-30; John 8:32.

8. Kati orang ke pandai pasal bintang amat meri pemeri ngagai Jesus maya hari pengada iya? Terangka.

⁸ Tang, sekeda orang madahka orang ke pandai pasal bintang meri pemeri ngagai Jesus maya hari pengada iya. Sida amat meri pemeri, tang maya nya suba orang selalu meri pemeri ngagai orang ke dipebasa lebuh datai nemuai. (1 Raja 10:1, 2, 10, 13; Matthew 2:2, 11) Iya ke amat, sida ukai datai maya malam Jesus ada. Maya nya Jesus ukai agi anak mit ke baru ada ke diengkah dalam dulang. Tang, iya udah beumur beberapa bulan, lalu iya ba dalam rumah maya sida datai.

9. Nama nyadi maya pengerami hari pengada ke ditulis ba Bup Kudus?

⁹ Taja pan pengada anak mit selalu ngagaka ati, Bup Kudus nadai madahka nembiak Petara ngintu hari pengada. (Masmur 127:3) Kati penulis Bup Kudus enda ingat nulis iya? Enda, laban bisi dua iti pengerami hari pengada ditulis ba Bup Kudus—hari pengada Raja menua Ejip enggau Raja Herod. (Bacha Pemungkal 40:20-22; Mark 6:21-29.) Taja pia, bisi utai ti jai nyadi ba kedua-dua pengerami nya. Kelebih agi, maya pengerami hari pengada Raja Herod, pala John Pemaptisa dipumpung.

10, 11. Nama penemu orang Kristian keterubah pasal ngintu hari pengada, lalu nama kebuah?

 ¹⁰ Nitihka The World Book Encyclopedia: “Orang Kristian keterubah ngumbai ngintu hari pengada nya adat orang ke enda arapka Petara.” Chunto, orang Gerika pechaya bisi roh datai maya mensia ada, lalu nyaga sida sepemanjai sida idup. Roh tu “bisi kaul ti rapat enggau orang ke sama hari pengada enggau iya,” ku bup The Lore of Birthdays. Hari pengada mega lama udah bekaul enggau orang ke pandai pasal bintang sereta horoskop.

¹¹ Endang amat, nembiak Jehovah kelia enda ngintu hari pengada laban iya datai ari orang ke enda arapka Petara, lalu bisi kaul enggau pengawa bemanang. Siti agi kebuah sida enda ngintu hari pengada laban iya ukai utai ti patut dikemeratka. * (Mikah 6:8; Luke 9:48) Tang, sida ngemuliaka sereta beterima kasih ke Jehovah laban udah meri sida pengidup. *—Masmur 8:3, 4; 36:9; Pemandang 4:11.

12. Nama kebuah hari kitai mati nya manah agi ari hari kitai ada?

¹² Jehovah meruan ingatka nembiak Iya ke tetap ati, taja pan sida udah mati. Sida deka diidupka baru. (Jop 14:14, 15) Pengajar 7:1 madah: “Tampak nama nya manah agi ari minyak wangi ti berega, lalu hari nuan mati nya manah agi ari hari nuan ada.” “Tampak nama” reti iya pemanah kitai ba mata Petara ketegal tetap ati ngereja peneka Iya. Iya ke amat, orang Kristian diberi perintah  ngintu hari pemati Jesus, ukai hari pengada iya. Nya alai, “nama” Jesus ulih nyelamatka nyawa kitai.—Hebrew 1:3, 4; Luke 22:17-20.

13, 14. Ari ni penatai adat Ester?

¹³ Pengerami Ester ke dikumbai kena ngintu pengangkat Jesus ari mati, bepun ari pengarap pelesu. Nama Ester bekaul enggau Eostre, petara indu tumu pagi enggau musin bungai orang Anglo-Saxon. Tang, baka ni telu enggau rabbit tau bisi kaul enggau Ester? Telu nya “tanda pengidup baru, diidupka baru,” ku Encyclopædia Britannica. Rabbit udah dikena nyadi tanda pisit beranak. Nya alai, Ester ke dikumbai orang kena ngintu pengangkat Jesus ari mati nya bekaul enggau adat peridi. *

¹⁴ Deka Jehovah ngemendarka orang ngena adat peridi ti kamah kena ngingatka pengangkat Jesus ari mati? Enggai! (2 Korint 6:17, 18) Pia mega, Bup Kudus nadai ngasuh ngintu hari pengangkat Jesus ari mati. Nya alai, enti kitai ngintu Ester kena ngingatka pengangkat Jesus ari mati, kitai enda tetap ati ngagai Jehovah.

15. Nama kebuah orang Kristian ti bendar nyeliahka mayuh adat ti bekaul enggau pemati?

¹⁵ Orang Kristian ti bendar nyeliahka mayuh adat ti bekaul enggau pemati. Chunto, nunu dian, bebai baya, serara bungai, nungkun api, tauka ngetas ulit. Bisi mega adat bukai dikereja beberapa hari, bulan, tauka taun pengudah  orang nya mati. Adat tu dikereja laban orang pechaya orang ke udah mati ulih ngerau. Ketegal orang ke udah mati “nadai nemu utai,” kitai nyeliahka sebarang adat ke bisi kaul enggau ngintu orang mati enti deka meruan dalam pengerindu Petara.—Pengajar 9:5, 10.

16, 17. (a) Nama kebuah orang Kristian ke deka kawin nitihka adat patut beratika ajar Bup Kudus? (b) Nama patut diperundingka orang Kristian pasal bebiau ngena manuk?

¹⁶ Enda lama agi, “munyi nyawa indu enggau nyawa lelaki ke ditikah nadai agi didinga dalam [Babilon ti Besai].” (Pemandang 18:23) Nama kebuah? Babilon ti Besai dipunaska ketegal kereja keramat iya. Nya alai, kereja keramat ulih ngamahka pengerami kawin.—Mark 10:6-9.

¹⁷ Adat ba siti-siti menua enda sebaka. Sekeda adat ke meri ‘tuah’ ngagai orang ke kawin enggau orang ke ngulu pengerami nya baka ke manah, tang adat nya datai ari pengarap pelesu. (Isaiah 65:11) Siti ari adat nya, bebiau ngena manuk. Tuju iya kena merekat orang ke kawin. Tang, orang ke deka meruan dalam pengerindu Petara patut nyeliahka sebarang adat ti enda tuchi.—Bacha 2 Korint 6:14-18.

18. Nama ajar Bup Kudus ke ulih ngiring orang ke deka kawin sereta orang ke datai ngulu pengerami nya?

¹⁸ Nembiak Jehovah mega nyeliahka adat ba dunya ke ulih ngerusak pengerami kawin tauka ngasuh menyadi Kristian enda nyamai ati. Chunto, sida enda bebungah ngena jaku kamah ke ulih ngemaluka orang ke kawin sereta orang ke datai. (Jaku Dalam 26:18, 19; Luke 6:31; 10:27) Sida mega enda ngaga pengerami ti kelalu besai,  ke ngayanka “pengaya.” (1 John 2:16) Enti nuan deka kawin, kingatka Jehovah deka pengerami maya nuan kawin nyadi pengingat ti ngerinduka ati, ukai ngasuh nuan nesal. *

19, 20. Nama dipadahka siti bup pasal penatai adat besatupka gelas, lalu nama kebuah adat tu enda diterima orang Kristian?

¹⁹ Siti pengawa ke selalu digaga ba pengerami kawin sereta begelumu enggau pangan diri iya nya besatupka gelas. Bup International Handbook on Alcohol and Culture ke ditulis ba taun 1995 madahka: “Besatupka gelas sebedau ngirup . . . nya adat kemaya hari tu ke dikena orang meri pemeri ngagai petara . . . kena nukar utai ti dipinta, sampi pandak ngena leka jaku ‘gayu guru!’ tauka ‘gerai nyamai!’”

²⁰ Amat, mayuh orang enda nemu pengawa besatupka gelas nya bisi kaul enggau pengarap tauka adat lama. Taja pia, adat nyaguka gelas ke dikumbai minta tuah ari “serega”—utai ti bekuasa ba atas—enda sejalai enggau ajar Bup Kudus.—John 14:6; 16:23. *

21. Nama pengerami ke patut diseliahka orang Kristian, taja pan pengerami nya engka nadai kaul enggau adat siti-siti pengarap, lalu nama kebuah?

²¹ Ulah orang kemaya hari tu majak jai laban udah ditesatka pengarap pelesu. Sekeda menua melanja pengerami ke diintu ninting taun baka pengerami Mardi Gras. Orang ke enggau pengerami tu betanda enggau gaya ti  kamah. Lalu, bisi mega orang ngintu pengerami ti bekaul enggau gaya pengidup ke enda manah entara lelaki sama lelaki (gay) sereta entara indu sama indu (lesbian). Patut orang ke rinduka Jehovah datai meda pengerami ke baka nya? Kati iya amat begedika utai ti jai enti iya datai ngagai pengerami nya? (Masmur 1:1, 2; 97:10) Kitai patut nitihka teladan pemasmur ke besampi: “Anang ngasuh mata aku merening ngagai utai ti” nadai guna!—Masmur 119:37.

22. Ni maya orang Kristian ngaga pemutus kediri empu, sekalika deka enggau pengerami nya tauka enda?

²² Lebuh bisi pengerami Hari Besai, orang Kristian patut bejimat ngambika ulah iya enda nunjukka iya gagit enggau berami. Paul nulis: ‘Nemuka kita makai tauka ngirup, tauka ngereja sebarang utai, kereja semua utai nya ke mulia Petara.’ (1 Korint 10:31; peda kutak “ Ngaga Pemutus ti Betul.”) Pia mega, enti adat tauka pengerami nadai kaul enggau pengarap pelesu, politik, sereta enda ngelanggar ajar Bup Kudus, orang Kristian patut ngaga pemutus kediri empu, sekalika deka enggau pengerami nya tauka enda. Iya mega patut berundingka ati bala menyadi ke sama pengarap.

23, 24. Baka ni kitai ulih nerangka ukum Jehovah ti lurus enggau manah?

²³ Mayuh orang kemaya hari tu ngumbai pengerami nya peluang begelumu enggau diri sebilik sereta enggau orang bukai. Nya alai, enti orang ngumbai ajar Bup Kudus nya nadai pengerindu tauka enda patut, kitai ulih nerangka enggau manah, bala Saksi-Saksi Jehovah rindu begelumu enggau diri sebilik sereta enggau orang  bukai. (Jaku Dalam 11:25; Pengajar 3:12, 13; 2 Korint 9:7) Kitai rindu begulai enggau orang ti dikesayau sepemanjai taun, tang ketegal pengerindu ngagai Petara enggau ukum Iya ti lurus, kitai enggai enggau pengerami ti ngemediska ati Iya.—Peda kutak “ Sembah ti Bendar Ngenataika Pengelantang ti Besai.”

²⁴ Sekeda Saksi mujur bekunsi penemu ba Pelajar 16 ngena bup Nama Utai ti Bendar Diajar Bup Kudus? * enggau orang bukai. Kingatka, tuju kitai deka narit ati orang, ukai deka bechakah. Nya alai, anang enda bebasa, meruan nelap sereta “awakka jaku kita seruran badas sereta ngenyamaika ati orang.”—Kolosi 4:6.

25, 26. Baka ni apai indai ulih nulung anak sida mansang ba pengarap sereta rinduka Jehovah?

²⁵ Kitai udah diajar nama kebuah kitai pechaya, ngereja sekeda pekara sereta nyeliahka adat enggau pengerami ti enda sejalai enggau ajar Bup Kudus. (Hebrew 5:14) Apai indai, ajar meh anak nuan ngambika ulih nerangka ajar Bup Kudus ngagai orang bukai. Enggau tu, kita ngemansangka pengarap anak. Kita nulung sida meri saut ari Bup Kudus maya orang betanyaka pengarap sida. Kita mega nulung sida nemu Jehovah rinduka sida.—Isaiah 48:17, 18; 1 Peter 3:15.

²⁶ Semua orang ke nyembah Petara ‘dalam roh enggau pemendar’ ukai semina nyeliahka pengerami ti enda sejalai enggau Bup Kudus, tang mega deka lurus ati ba semua pekara dalam pengidup. (John 4:23) Kemaya hari tu, mayuh orang ngumbai pengelurus nya enda beguna. Tang, ba Pelajar 14, kitai deka nemu jalai pengidup ti nitihka peneka Petara, nya jalai pengidup ti pemadu manah.