Uji gambarka: Lebuh Julia meda cheremin, semua utai ti dipeda iya gemu. “Aku patut kurus,” ku iya, taja pan apai indai sereta bala kawan iya madahka iya kurus kering

Baru-baru tu, Julia berunding deka nguruska diri beberapa kilo enggau jampat. Chara iya, enggau enda makai beberapa hari . . .

Enti sema nuan nya Julia, nama deka digaga nuan?

Enda salah irau ke gamal enggau tubuh diri. Iya ke amat, Bup Kudus bisi muji Sarah, Rachel, Abigail, Josep, enggau David ke ngembuan gamal enggau tubuh ti manah dipeda. Bup Kudus mega madahka, seiku indu ke benama Abisak “bajik amat gamal.”—1 Raja 1:4.

Taja pia, mayuh nembiak kelalu beberatka gamal enggau tubuh diri. Tu ulih ngujungka penanggul ti besai. Peratika:

• Nitihka siti pansik, 58 peratus nembiak indu ngumbai diri gemu. Tang ke bendar, semina 17 peratus aja ke amat gemu.

• Nitihka siti agi pansik, 45 peratus bala indu ke kurang berat tubuh ngumbai diri kelalu gemu!

• Ketegal deka kurus, sekeda nembiak kena penyakit anoreksia, iya nya sebengkah penyakit enggai makai ke ulih ngachau pengerai.

 Enti nuan bisi tanda kena penyakit anoreksia tauka penyakit enggai makai ke bukai, jampat-jampat ngiga bantu. Padah ngagai apai indai tauka orang besai tuai ke bukai ti tau dikearapka. Bup Kudus madahka: “Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?”—Jaku Dalam 17:17.

Ke amat, utai ke bisi dalam ati orang nya ke ulih ngasuh iya manah dipeda tauka enda. Peratika anak Raja David, Absalom. Bup Kudus madahka:

“Nadai orang di menua Israel ke balat agi dipuji ari Absalom ketegal penyigat gamal iya. Iya nadai penimpang.”—2 Samuel 14:25.

Tang, iya kelalu sumbung, bisi juluk ati ti tinggi sereta enda taluk! Nya alai Bup Kudus nadai nyebut utai ti manah pasal Absalom. Bup Kudus ngambarka iya orang ke enda nemu malu, enda taluk, sereta bedendam. Iya mega pemunuh.

Nya alai, Bup Kudus meri kitai jaku ajar tu:

“Nyadi mensia ti baru.”—Kolosi 3:10.

“Pemajik kitai ukai datai ari utai ti ulih dipeda . . . , tang awakka pemajik [kitai] datai ari ati [kitai] ti bendar.”—1 Peter 3:3, 4.

Taja pan enda salah deka manah dipeda, tang utai ti beguna agi ari gamal enggau tubuh nuan, iya nya personaliti nuan. Nyau kelama, kualiti manah nuan ke ulih ngasuh nuan manah agi dipeda orang bukai, enti dibandingka enggau tubuh ti tegap tauka raras tubuh ti manah! Ku seiku nembiak indu benama Phylicia madahka: “Pemajik ulih jampat narit ati orang, tang utai ke bisi dalam ati nuan sereta kualiti manah nuan ke deka dikingatka orang.”

Kati nuan suah enda puas ati enggau gamal sereta tubuh diri?

Kala nuan berunding deka balat nagang diri enda makai ngambika tubuh manah dipeda?

Nama deka diubah nuan ba gamal tauka ba tubuh diri enti ulih? (Pilih semua ti dikedeka.)

• PENINGGI

• PEMERAT

• BUK

• RARAS TUBUH

• MUA

• CHURA KULIT.

Enti nuan nyaut ya ngagai dua iti tanya ti keterubah sereta pilih tiga tauka lebih pekara ba tanya ketiga, peratika tu: Orang bukai meda utai ti manah ba nuan tang nuan enda. Kitai jampat kelalu irau ke gamal enggau tubuh diri.—1 Samuel 16:7.