Raja Besai Augustus, pemerintah Perintah Rome, ngasuh semua orang Judah pulai ngagai menua diri empu ngambika direjista. Nya alai, Josep enggau Maria pulai ngagai Betlehem, menua asal Josep. Maya nya nyau chukup bulan alai Maria deka beranak.

Lebuh seduai iya datai ba Betlehem, sida semina tetemuka endur diau ba rumah kuda. Ba dia, Maria ngadaka anak lelaki iya, Jesus. Iya medung anak mit nya ngena kain, lalu ngalika iya dalam dulang.

Malam nya semak Betlehem, sekeda pengibun bedus benung ngibun bedus sida ba luar. Tekala nya, seiku melikat bediri ba mua sida lalu sida dipanchar mulia Jehovah. Sida amat takut, tang ku melikat nya: ‘Anang takut! Aku mai berita ti ngagitka ati. Sehari tu, Messiah udah diadaka ba Betlehem.’ Maya nya, mayuh melikat ayan  ba langit, lalu madah: ‘Muliaka Petara di serega, enggau pemaik di dunya.’ Udah nya, sida lalu nyau. Nama digaga bala pengibun bedus?

Sida madah ngagai pangan diri: ‘Aram kitai mupuk ngagai Betlehem diatu.’ Sida mupuk enggau jampat lalu tetemuka Josep enggau Maria ba rumah kuda enggau anak mit ke baru ada nya.

Semua orang ke ninga utai ke dipadah melikat nya ngagai bala pengibun bedus balat alit ati. Maria berunding enggau dalam utai ku melikat nya lalu seruran ingatka jaku nya. Bala pengibun bedus pulai ngagai bedus sida, beterima kasih ngagai Jehovah ketegal utai ke dipeda enggau didinga sida.