Orang Judah ngintu pengerami Paska ninting taun kena 14 hari bulan Nisan. Tu kena ngingatka sida baka ni Jehovah udah ngelepaska sida ari nyadi ulun ba menua Ejip lalu mai sida ngagai Menua ti Udah Disemaya. Ba taun 33 M., Jesus enggau bala rasul iya ngintu pengerami Paska ba sadau rumah ba Jerusalem. Ba pengujung pengerami nya, Jesus madah: ‘Seiku ari kita deka nyual aku.’ Bala rasul tekenyit, lalu nanya Jesus: ‘Sapa iya?’ Saut Jesus: ‘Orang nya orang ke nerima ruti ari aku.’ Udah nya iya meri ruti ngagai Judas Iskariot. Tekala nya, Judas angkat lalu pansut ari bilik nya.

Pengudah nya Jesus besampi, mechahka ruti lalu nyuaka ngagai bala rasul iya ke agi tinggal. Ku iya: ‘Empa meh ruti tu. Tu ngambarka tubuh aku, ke deka diberi aku ngagai kita.’ Udah nya, iya besampika wain lalu meri ngagai bala rasul iya. Ku iya: ‘Irup meh wain tu. Tu ngambarka darah aku, ti deka diberi ngambika dosa ulih diampun. Aku besemaya kita deka nyadi raja enggau aku ba serega. Gaga tu ninting taun kena ngingatka aku.’ Ninting taun, bala murid Jesus agi begulai ba hari ti sama. Kemaya hari tu, pengawa tu dikumbai Makai Malam Tuan.

 Pengudah makai, bala rasul bekelikuh pasal sapa ari sida ke pemadu besai. Tang Jesus madah ngagai sida: ‘Orang ke pemadu besai entara kita patut meda diri iya baka orang ke pemadu biak, ke pemadu mit.

‘Kita pangan aku. Aku madah semua utai ke deka dipadah Apai ngagai kita. Enda lama da agi, aku deka pulai ngagai Apai aku ba serega. Kita deka ba ditu, lalu orang deka nemu kita murid aku enti kita rinduka pangan diri. Kita patut rinduka pangan diri baka aku ke udah rinduka kita.’

Ke penudi iya, Jesus besampi minta Jehovah ngelindung semua bala murid iya. Iya minta Jehovah nulung sida gawa begulai enggau pemaik. Iya besampi nama Jehovah dikuduska. Udah nya Jesus enggau bala rasul iya belagu muji Jehovah lalu mupuk. Maya nyau semak alai Jesus deka ditangkap.