Moses enggau Aron betemu enggau Raja menua Ejip mai pesan Petara: ‘Enti nuan enggai ngelepaska nembiak Aku, Aku deka nganjung pitak ngagai menua tu.’ Pitak nya baka lalat besai ti ngigit orang. Sebalung pitak datai nyerang rumah orang Ejip enda ngira ke kaya tauka seranta. Semua menua nya penuh enggau pitak. Tang, ba menua Gosen endur orang Israel diau nadai pitak. Berengkah ari tulah keempat tu, tulah ke ninggang semina ngemediska orang Ejip. Ku Raja: ‘Pinta Jehovah muru semua pitak tu. Kita ulih mupuk.’ Tang lebuh Jehovah muru pitak nya, Raja ngubah runding iya. Kati iya ulih berubah?

Jehovah bejaku: ‘Enti Raja menua Ejip enggai ngelepaska nembiak Aku, semua jelu orang Ejip deka sakit lalu mati.’ Ba hari siti, bala jelu berengkah mati. Tang jelu orang Israel idup magang. Taja pia, Raja agi kieh lalu enggai ngelepaska orang Israel.

Udah nya, Jehovah ngasuh Moses betemu baru enggau Raja lalu muai amau ngagai angin. Amau nya nyadi debu ngachir di serata menua Ejip. Debu nya ngasuh pisa tumbuh ba semua orang Ejip enggau jelu sida. Taja pia, Raja enggai ngelepaska orang Israel.

Jehovah nganjung Moses pulai baru ngagai Raja mai pesan Iya: ‘Kati nuan agi enggai ngelepaska nembiak Aku? Pagila Aku deka ngasuh ujan batu balat nyadi ba menua tu.’ Ba hari siti, Jehovah  ngenataika ujan batu, guntur enggau kilat. Nya hari kudi ti pemadu balat ke kala nyadi ba menua Ejip. Semua pun kayu enggau utai ti ditanam rusak magang, tang enda ba Gosen. Ku Raja: ‘Pinta Jehovah ngetuka tu! Udah nya, kita ulih mupuk.’ Tang, pengudah ujan batu enggau ujan ngetu, Raja ngubah runding iya baru.

Moses lalu bejaku: ‘Diatu buntak deka makai semua utai ti enda dirusak ujan batu.’ Bejuta iku buntak makai semua ke enda dirusak ba umai enggau pun kayu. Ku Raja: ‘Pinta Jehovah muru semua buntak tu.’ Taja pan Jehovah udah muru semua buntak, Raja nya agi kieh.

Jehovah madah ngagai Moses: ‘Tuatka jari nuan ke langit.’ Tekala nya, langit nyadi petang. Pengelama tiga hari, orang Ejip enda ulih meda utai. Semina orang Israel bisi penampak ba rumah sida.

Ku Raja madah ngagai Moses: ‘Nuan enggau orang Israel ulih mupuk. Tinggalka bala jelu kita ditu.’ Saut Moses: ‘Kami enda tau enda mai jelu kami sama mupuk ngambika ulih dijadika pemeri ngagai Petara kami.’ Raja amat ringat. Iya merak: ‘Pansut nuan ari tu! Enti aku meda nuan baru, aku deka munuh nuan.’