Pengudah Raja ninga orang Israel udah pansut ari menua Ejip, iya lalu ngubah runding iya. Ku iya ngasuh bala soldadu: ‘Sediaka kerita perang aku, lalu aram kitai begagaika sida! Kitai enda patut ngelepaska sida.’ Iya enggau bala soldadu berengkah begagaika orang Israel.

Jehovah ngiring nembiak Iya ngena remang ba siang hari enggau api ba malam hari. Iya mai sida ngagai Tasik Mirah, lalu ngasuh sida nirika kem.

Udah nya, orang Israel meda Raja enggau bala soldadu iya begagaika sida. Sida tepekul entara tasik enggau soldadu orang Ejip. Sida nyadi takut lalu madah ngagai Moses: ‘Kitai deka mati! Nuan patut ngelakka kami ba menua Ejip.’ Tang, Moses nyaut: ‘Anang takut. Anti lalu peda baka ni Jehovah deka nyelamatka kitai.’ Moses amat arapka Jehovah, enda pia?

Jehovah ngasuh orang Israel berengkah bejalai. Malam nya, Jehovah ngengkahka remang ba entara orang Ejip enggau orang Israel. Ba sepiak orang Ejip semina bisi pemetang, tang ba sepiak orang Israel bisi penampak.

 Jehovah ngasuh Moses nuatka jari iya ngagai tasik. Udah nya, Jehovah ngasuh ribut ti balat muput sepemanjai malam. Tasik nya bebagi dua lalu bisi tanah ti rangkai entara nya. Bejuta iku orang Israel bejalai nengah tanah rangkai entara dinding ai nuju ngagai seberai tasik nya.

Bala soldadu orang Ejip nitih orang Israel nengah tanah rangkai nya. Tang, Jehovah ngasuh bala soldadu nya charut. Kaki kerita perang techabut ari kerita perang. Bala soldadu nyerauh: ‘Aram kitai rari! Jehovah ti beperang ngarika orang Israel.’

Jehovah madah ngagai Moses: ‘Tuatka jari nuan ngagai tasik.’ Tekala nya, dinding ai ngelamun bala soldadu Ejip. Raja enggau soldadu iya mati. Nadai seiku ari sida ulih ngelepaska diri.

Ba seberai tasik, orang Israel muji Petara ngena lagu: ‘Belagu ke Jehovah, laban Iya udah ditinggika. Kuda enggau orang ke nepan kuda udah ditikauka Iya ngagai tasik.’ Lebuh orang belagu, bala indu betanda enggau bemain tamborin. Semua orang gaga ati laban sida udah dilepaska.