Maya lapar pungkang nyadi ba menua Israel, seiku orang Israel ke benama Naomi pindah ngagai menua Moap enggau laki sereta dua iku anak lelaki iya. Udah nya, laki Naomi mati. Dua iku anak lelaki iya jadi enggau Rut enggau Orpah, indu orang Moap. Sinu amat, betaun udah nya, dua iku anak lelaki Naomi mati.

Lebuh Naomi nemu lapar pungkang nadai agi ba menua Israel, iya mutuska deka pulai baru ke menua asal iya. Rut enggau Orpah sama mupuk enggau iya, tang lebuh sida ba rantau jalai, Naomi madahka seduai: ‘Seduai bini ti manah ke anak aku sereta menantu ti manah ke aku. Aku deka seduai belaki baru. Pulai meh ngagai Moap.’ Ku seduai iya: ‘Kami sayauka nuan! Kami enggai ninggalka nuan.’ Naomi majak ngasuh sida pulai. Pengujung iya, Orpah lalu mupuk tang Rut agi enggau iya. Naomi madahka iya: ‘Orpah udah mupuk pulai ngagai bansa iya, petara iya. Pulai meh enggau iya, ngagai rumah nuan empu.’ Tang ku Rut: ‘Anang ngasuh aku ninggalka nuan! Bansa nuan deka nyadi bansa aku, lalu Petara nuan deka nyadi Petara aku.’ Ba runding nuan, baka ni asai ati Naomi lebuh Rut bejaku munyi nya?

Rut enggau Naomi datai ba Israel lebuh orang berengkah ngetau barli. Bisi sekali, Rut ngumpul tangkai barli ti ditinggalka ba umai seiku lelaki ke benama Boas, anak lelaki Rahap. Iya ninga Rut indu orang Moap ke tetap ati enggau Naomi. Iya ngasuh pekereja iya ninggalka sekeda tangkai barli ke lebih ba umai ngambika bisi digumpul Rut.

 Lemai nya, Naomi nanya Rut: ‘Ba umai sapa nuan gawa saritu?’ Saut Rut: ‘Ba umai orang ke benama Boas.’ Naomi madahka iya: ‘Orang nya kaban belayan laki aku. Manah agi nuan bekereja sama enggau bala indu ke bekereja ba umai Boas, enggai ke nuan dikachau lelaki enti nuan gawa ba umai orang bukai.’

Rut terus bekereja enggau Boas nyentukka maya ngetau abis. Boas meda Rut bebendar gawa sereta seiku indu ti bagas. Ba jeman nya, enti laki mati sereta nadai anak, kaban belayan iya ulih jadi enggau balu iya. Nya alai, Boas jadi enggau Rut. Seduai iya bisi anak lelaki ke benama Obet, ke deka nyadi aki Raja David. Bala pangan Naomi amat gaga ati. Ku sida: ‘Keterubah, Jehovah meri nuan Rut, ke manah amat enggau nuan lalu diatu nuan bisi seiku uchu lelaki. Awakka Jehovah nerima puji.’