Orang Asiria ba nengeri Nineweh amat jai. Jehovah ngasuh nabi Iya Jonah mansang ngagai Nineweh lalu nangkan orang din ngubah ulah diri. Tang Jonah ngerarika diri ngagai endur bukai. Iya ngena kapal belayar ngagai menua Tarsis.

Lebuh kapal nya ba tasik, kabut balat nyadi, lalu bala kelasi amat takut. Sida besampi ngagai petara sida lalu nanya: ‘Nama kebuah utai tu nyadi?’ Udah nya, Jonah madahka sida: ‘Tu salah aku. Aku ngerarika diri ari ngereja pengawa ke diasuh Jehovah. Buai aku ke tasik, nya baru tasik deka teduh.’ Bala kelasi enggai muai Jonah ke tasik, tang iya bebendar ngasuh sida muai iya. Lebuh iya dibuai ngagai tasik, kabut lalu ngetu.

Jonah ngumbai diri deka mati. Lebuh iya tengelam dalam-sedalam ngagai tasik, iya besampi ngagai Jehovah. Jehovah lalu ngasuh seiku ikan ti besai nelan Jonah, tang ikan nya enda munuh iya. Dalam perut ikan, Jonah besampi: ‘Aku besemaya deka seruran nangika Nuan.’ Jehovah nyaga Jonah dalam perut ikan pengelama tiga hari lalu udah nya ngasuh ikan nya ngeluaka Jonah ngagai tanah ti rangkai.

Taja pan Jehovah udah nyelamatka Jonah, kati tu reti iya Jonah enda ibuh mansang ngagai Nineweh agi? Enda. Sekali agi, Jehovah ngasuh Jonah mansang ngagai Nineweh. Kali tu Jonah nangika Petara. Iya mansang ngagai nengeri nya lalu madah ngagai sida:  ‘Dalam 40 hari, nengeri Nineweh deka dirusak!’ Tang bisi utai ti enda disangka nyadi—orang Nineweh mending lalu berubah. Raja menua Nineweh madah ngagai rayat iya: ‘Besampi ngagai Petara lalu nesal ati. Engka udah nya Iya deka ngubah runding lalu enda munuh kitai.’ Lebuh Jehovah meda sida nesal ati, Iya enda ngerusak Nineweh.

Jonah ringat ketegal nengeri nya enda dirusak. Pikirka tu: Jehovah sabar sereta kasihka Jonah, tang Jonah enda kasihka orang Nineweh. Iya pansut ari nengeri nya lalu duduk ba baruh pun labu. Udah nya, pun labu nya mati, Jonah lalu ringat. Jehovah madahka iya: ‘Nuan beberatka agi pasal pun tu ari orang Nineweh. Aku ngayanka kasih ngagai sida, lalu sida idup.’ Nama utai ke dipelajar ari tu? Orang Nineweh beguna agi ari sebarang utai ti tumbuh.