•  Jaku Pemuka 2

•   Reta Ari Bup Kudus 3-5

  •  Cheramah 3

  •  Penemu Bup Kudus ti Berega 4

  •  Macha Bup Kudus 5

•  Ngemanahka Agi Chara Kitai Nginjil 6-14

  •  Ngepunka Randau 7

  •  Datai Ngabas 8

  •  Ngaga Orang Nyadi Murid 9

  •  Nerangka Utai ke Dipechaya Nuan 10

  •  Cheramah 11

  •  Isi 12

  •  Atur 13

  •  Ngena Video enggau Litaricha 14

•  Pengidup Kristian 15-16

  •  Gempuru Belajarka Bup Kudus 16

•  Jaku Penutup 17

•  Jaku Puji enggau Jaku Lalau 18

•  Awak 19

•  Penatai Tuai ti Ngabas 20

•  Minggu Gempuru Besai Sehari tauka Konvensyen 21

•  Minggu Ngingatka Pemati Jesus 22

•  Tuai ti Nyaga Gempuru Pengidup enggau Pengawa Kristian 23

•  Chairman Gempuru Pengidup enggau Pengawa Kristian 24

•  Penyaup Meri Jaku Lalau 25

•  Kelas Tambah 26

•  Video 27

1. Iring ke bisi ba dokumen tu deka nulung semua ke bisi begian ba Gempuru Pengidup enggau Pengawa Kristian kitai. Tiap iku menyadi ke bisi begian patut beratika iring ke dipadah ba Bup Kereja Kena Gempuru Pengidup enggau Pengawa Kristian enggau iring ke bisi ba dokumen tu sebedau nyediaka begian sida. Semua penginjil patut diperansang ngambika ulih enggau ngenataika begian pemelajar. Orang ke selalu datai ngagai raban gempuru mega ulih enggau begian tu enti sida nerima ajar ari Bup Kudus sereta chara pengidup sida sejalai enggau prinsip Bup Kudus. Enti sema sesiku orang nya bedau nyadi penginjil, tang iya bisi minat nerima tugas pemelajar, tuai ti nyaga Gempuru Pengidup enggau Pengawa Kristian patut berandauka syarat nyadi pemelajar enggau iya. Lalu udah nya madahka iya, sekalika iya layak tauka enda. Lebuh berandauka pekara tu, pengajar Bup Kudus orang nya patut bisi enggau (tauka ba mua apai indai iya ke sama pengarap). Syarat orang ke deka enggau sekula tu sama enggau syarat orang ke deka nyadi penginjil ke bedau dibaptisa.—od Pel. 8 gent. 8.

2. 1 minit. Ninting minggu, pengudah lagu enggau sampi pemuka, chairman Gempuru Pengidup enggau Pengawa Kristian deka meransang minat bala menyadi ngagai begian ti deka nangkanka nya. Chairman patut beratika poin ke ulih meri penguntung ti besai ngagai raban gempuru.

 3. Cheramah: 10 minit. Tajuk enggau langkar ke bisi dua tauka tiga iti poin penting bisi disediaka dalam Bup Kereja Pengidup enggau Pengawa Kristian. Cheramah tu deka diberi ngagai siku tuai gempuru tauka siku penulung gempuru ke layak. Lebuh betukar ngagai bup baru dalam Bup Kudus ke dibacha ninting minggu, siti video deka dimainka kena madahka pasal bup nya. Pencheramah ulih madahka kaul entara video enggau tema Bup Kudus. Taja pia, iya patut nentuka diri ulih ngenataika poin bukai ke bisi ba bup kereja. Pia mega, enti bisi chukup awak, iya patut ngena gambar ba bup kereja kena nerangka utai ke deka dikerandauka ba begian nya. Iya mega ulih ngena penerang ke bukai enti penerang nya ulih nyukung poin ke bisi ba langkar cheramah nya.

 4. Penemu Bup Kudus ti Berega: 10 minit. Tu begian tanya enggau saut ke enda begunaka jaku pemuka tauka jaku penutup. Begian tu deka diiring siku tuai gempuru tauka penulung gempuru ke layak. Iya patut nanya dua iti tanya ke bisi ba dia. Iya mega ulih milih sekalika ayat ke bisi ba dia patut dibacha tauka enda. Orang ke dikangau patut meri saut dalam 30 sikin tauka kurang.

 5. Macha Bup Kudus: 4 minit. Begian tu diberi ngagai siku menyadi Kristian lelaki. Pemelajar dipinta macha ayat ke udah diberi, tang enda ibuh meri jaku pemuka enggau jaku penutup. Chairman gempuru gaga ati deka nulung pemelajar macha enggau betul, ulih dimeretika, lanchar, ditekanka enggau betul, tiun ti ngena, ngetu ba endur ti betul, sereta enggau chara ti ukai digaga-gaga. Ketegal sekeda begian macha Bup Kudus ngembuan pemanjai ti bebida, tuai ti nyaga Gempuru Pengidup enggau Pengawa Kristian patut berunding pasal penau bala menyadi ke diasuh ngereja begian tu.

6. 15 Minit. Begian tu digaga kena meri peluang ngagai semua, belatihka chara sida nginjil sereta ngemanahka agi chara sida berandau, nginjil enggau ngajar. Tuai gempuru mega ulih enggau ba begian tu. Tiap iku pemelajar patut nitihka poin ke dipadah ba brosur Ngajar tauka brosur Pengerindu Deka Meransang Nuan. Poin tu bisi dipadah ba dalam kurungan ke ba sepiak tugasan ke diberi ngagai pemelajar, ba Bup Kereja Kena Gempuru. Kekadang, bisi maya iya begian tu deka dikerandauka enggau sida ke datai. Enti begian nya patut dikerandau, iya patut diberi ngagai tuai gempuru tauka penulung gempuru ke layak.—Peda  genteran 15 enti deka nemu chara ngenataika begian randau enggau sida ke datai.

 7. Ngepunka Randau: Tu begian pemelajar ke ulih diberi ngagai siku menyadi Kristian lelaki tauka indu. Penulung iya patut siku ari sida sebilik tauka sama jantina. Sida ulih duduk tauka bediri.—Enti deka nemu mayuh agi pasal penerang enggau atur ke tugas tu, peda  genteran 12 enggau  13.

 8. Datai Ngabas: Tu begian pemelajar ke ulih diberi ngagai siku menyadi Kristian lelaki tauka indu. Penulung iya patut sama jantina. (km 5/97 lamb. 2) Penginjil enggau penulung iya ulih duduk tauka bediri. Lebuh datai ngabas, penginjil patut nunjukka chara nyambung randau ke sebedau tu.—Enti deka nemu mayuh agi pasal penerang enggau atur ke tugas tu, peda  genteran 12 enggau  13.

 9. Ngaga Orang Nyadi Murid: Tu begian pemelajar ke ulih diberi ngagai siku menyadi Kristian lelaki tauka indu. Penulung iya patut sama jantina. (km 5/97 lamb. 2) Penginjil enggau penulung iya ulih duduk tauka bediri. Begian tu patut nunjukka maya pengawa belajarka Bup Kudus benung dipejalaika. Enda ibuh ngena jaku pemuka tauka jaku penutup enti poin pelajar ke dikereja pemelajar nadai kaul enggau nya. Pemelajar ulih milih macha semua tauka sekeda genteran lebuh begian tu dikenataika.

 10. Nerangka Utai ke Dipechaya Nuan: Lebuh dikenataika ngena cheramah, begian tu patut diberi ngagai menyadi Kristian lelaki. Lebuh dikenataika ngena chara lakun, begian tu ulih diberi ngagai menyadi lelaki tauka menyadi indu. Penulung iya patut sama jantina tauka diri sebilik. Pemelajar patut meri saut ti terang sereta enggau basa ke tanya ti ditugaska ngagai iya bepelasarka rujukan ke udah disediaka. Pemelajar ulih milih sekalika deka madahka ari ni rujukan nya tauka enda, lebuh iya ngenataika begian nya.

 11. Cheramah: Begian tu diberi ngagai siku menyadi Kristian lelaki, lalu dikenataika ngagai raban gempuru enggau chara cheramah. Enti sema cheramah tu bepelasarka poin ari Appendiks A brosur Pengerindu Deka Meransang Nuan, pemelajar patut nerangka baka ni ayat ke bisi ba dia ulih dikena ba pengawa nginjil. Ambika chunto, iya ulih nerangka ni maya ayat nya ulih dikena, reti ayat nya, sereta baka ni berandauka ayat nya enggau orang bukai. Tang enti cheramah nya bepelasarka poin ba siti ari pelajar ke bisi ba brosur Pengerindu Deka Meransang Nuan, pemelajar nya nya patut nerangka baka ni poin nya ulih dikena ba pengawa nginjil. Iya ulih madahka chunto ke bisi disebut ba poin 1 ari pelajar nya tauka nerangka ayat Bup Kudus bukai ke bisi disediaka ba pelajar nya, enti sema ulih nulung.

   12. Isi: Utai ke dipadah ba genteran tu enggau genteran ke nangkanka tu deka dikena ba tugas “Ngepunka Randau” enggau “Datai Ngabas.” Enti enda dipadah, pemelajar patut bekunsika pemendar ari Bup Kudus ke senang, sereta engkeman enggau orang ke enggau iya berandau, lalu ninggalka tanya ke ulih disaut iya maya bukai. Pemelajar patut milih topik ke ngam sereta ulih dikena ba endur sida nginjil. Iya ulih milih sekalika deka ngena tauka enda litaricha tauka video ari Perengka Kena Ngajar. Ari ke ngafal skrip kena berandau, manah agi enti pemelajar belatihka chara ke ulih ngasuh iya landik bejaku. Ambika chunto, berandauka topik ti diminat orang tauka berandau baka biasa.

   13. Atur: Pemelajar patut nitihka atur nginjil ba endur sida empu. Ambika chunto:

1.  (1) Ari Rumah ke Rumah: Atur nginjil ari rumah ke rumah ke disebut ditu sekalika enggau chara betunga mua, ngena talipun, tauka surat. Tu mega nyengkaum datai ngabas orang ke ditemu lebuh nginjil ari rumah ke rumah.

2.  (2) Nginjil enggau Enda Formal: Atur nginjil tu reti iya nukar randau biasa ngagai randau ke ulih meri saksi. Nuan engka bekunsika penemu ari Bup Kudus enggau orang ke sama enggau nuan kereja, sama sekula, jiran, maya nepan pengangkutan awam, tauka ba dini-dini endur lebuh nuan bejalaika pengawa besehari-sehari.

3.  (3) Nginjil ba Endur Orang Mayuh: Atur nginjil tu nyengkaum nginjil ngena troli, nginjil ba endur bisnes, ba endur orang bejalai kaki, ba taman, ba endur parking, tauka ba dini-dini endur ke bisi orang.

 14. Ngena Video enggau Litaricha: Bepanggai ba situasi, pemelajar ulih milih sekalika deka bekunsika video tauka meri litaricha. Enti pemelajar diasuh ngena video tauka iya milih deka bekunsika video, iya ulih madahka pasal video nya, tang anang mainka video nya.

15. Pengudah lagu, 15 minit ke nangkanka nya, deka bisi siti tauka dua iti begian ke disediaka kena nulung bala ke datai nitihka Jaku Petara. Enti nadai dipadah, begian tu diberi ngagai siku tuai gempuru tauka siku penulung gempuru ke layak. Tang, maya begian utai ti diguna raban gempuru, semina tuai gempuru aja ulih diberi pengawa nya. Lebuh ngenataika begian randau, menyadi ke ngiring ulih meri tanya tambahan kelimpah ari tanya ke udah disediaka ba begian nya. Iya patut ngena jaku pemuka ti pandak ngambika iya chukup awak endur nerangka poin ti penting sereta berandauka begian enggau bala ke datai. Enti bisi interbiu, manah agi menyadi ke diinterbiu niki ke pentas lebuh meri saut, ari ke ba penuduk iya empu.

  16. Gempuru Belajarka Bup Kudus: 30 minit. Tu patut diberi ngagai tuai gempuru ti layak. (Raban gempuru ke enda chukup tuai gempuru ulih mega ngena penulung gempuru ti layak.) Raban tuai gempuru patut milih sapa ke ulih megai begian Gempuru Belajarka Bup Kudus. Menyadi Kristian lelaki ke dipilih patut ngenataika begian tu enggau manah ngambika pengawa belajar tu nitihka jam ti udah ditetapka, ngemeratka ayat kunchi, lalu nulung semua belematika utai ke ulih dipelajar sida. Menyadi Kristian lelaki ke ngiring begian tu deka bulih jaku lalau ti beguna lebuh macha iring pasal chara ngiring begian tanya enggau saut. (w23.04 p. 24, kutak) Pengudah begian ti patut dikerandau ba minggu nya abis, begian tu ulih diketuka tumu agi ari awak ke udah ditetapka. Enti ulih, menyadi Kristian lelaki ke ngiring sereta ke macha patut betukar ninting minggu. Enti chairman Gempuru Pengidup enggau Pengawa Kristian ngasuh begian tu dipandakka, menyadi ke ngenataika begian tu patut mutuska baka ni deka mandakka begian tu. Iya engka ulih milih enda macha sekeda genteran.

17. 3 minit. Chairman Gempuru Pengidup enggau Pengawa Kristian deka ngelansa baru utai ke udah dikerandauka ba gempuru nya, lalu iya mega nyebut utai ti deka dikerandauka ba minggu ti deka datai. Enti agi bisi awak, iya ulih nyebut nama pemelajar ke bisi begian ba minggu ti deka datai. Enti ulih, nama-nama jaku gerah tauka surat ke patut dibacha ke gempuru deka dibacha chairman ba jaku penutup iya. Penerang baka atur pengawa nginjil sereta jadual meresi enda patut dipadah ba pentas, tang patut dipandangka ba papan notis. Enti bisi jaku gerah tauka surat enda ulih dibacha dalam timpuh 3 minit tu, chairman patut minta menyadi ke megai begian Pengidup Kristian ngemandakka agi begian sida. (Peda  genteran 16 enggau  19.) Gempuru deka ditutup ngena lagu enggau sampi.

18.  Pengudah genap iku pemelajar ngenataika begian sida, chairman Gempuru Pengidup enggau Pengawa Kristian bisi kira-kira seminit kena muji sereta meri jaku lalau nitihka poin pelajar ke diberi ngagai pemelajar nya. Lebuh chairman madahka begian pemelajar, iya enda ibuh madahka poin pelajar ke deka dikereja pemelajar nya. Taja pia, pengudah begian pemelajar nya abis, sereta pengudah meri jaku puji, chairman ulih madahka poin pelajar ke dikereja pemelajar nya, lalu madahka kebuah pemelajar nya ngereja poin pelajar enggau manah tauka nerangka kebuah pemelajar nya patut ngemeratka poin nya. Chairman mega ulih madahka sekeda utai ke ulih dipelajarka ari lakun nya, enti iya ngasaika tu ulih mai penguntung ngagai pemelajar nya tauka bala menyadi ke datai. Nitihka utai ti patut diguna tiap iku pemelajar, chairman ulih meri lalau ti meransang nitihka brosur Pengerindu Deka Meransang Nuan, brosur Ngajar tauka bup Ministry School. Jaku lalau nya ulih dipadah maya iya kediri aja pengudah gempuru tauka ba maya ti bukai. Jaku lalau nya ulih bekaul enggau poin pelajar ke dikereja tauka poin pelajar ke bukai.—Enti deka nemu penerang bukai pasal tanggung pengawa Chairman Gempuru Pengidup enggau Pengawa Kristian sereta tanggung pengawa penyaup meri jaku lalau peda  genteran 19,  24, enggau  25.

19. Nadai begian patut ngelui awak ke udah diberi. Tu nyengkaum begian ari chairman Gempuru Pengidup enggau Pengawa Kristian. Taja pan Bup Kereja Kena Gempuru Pengidup enggau Pengawa Kristian bisi madahka awak ke tiap iti begian, tang enti begian nya udah dikerandauka enggau chukup terang, menyadi nya enda ibuh nambahka mayuh penerang ketegal deka ngenyukupka jam. Enti bisi begian ke ngelui jam, chairman Gempuru Pengidup enggau Pengawa Kristian tauka penyaup meri jaku lalau ulih meri jaku lalau maya kediri aja ngagai menyadi nya. (Peda  genteran 24 enggau  25.) Pengelama semua gempuru tu, nyengkaum lagu enggau sampi, iya nya 1 jam 45 minit.

20. Lebuh raban gempuru dilawa tuai ti ngabas, program patut terus dipejalai nitihka Bup Kereja Pengidup enggau Pengawa Kristian, enggau sekeda ubah: Begian Gempuru Belajarka Bup Kudus ba Pengidup Kristian deka diganti enggau cheramah 30 minit ari tuai ti ngabas. Sebedau cheramah tuai ti ngabas, chairman Gempuru Pengidup enggau Pengawa Kristian deka ngelansa program enda lama aja, nyebut program ba minggu ti deka datai, ngenataika jaku gerah ke patut aja, macha surat ke beguna aja, lalu udah nya ngelaluka penatai tuai ti ngabas. Pengudah cheramah, tuai ti ngabas deka nutup gempuru ngena lagu ke dipilih iya. Tuai ti ngabas ulih minta siku menyadi lelaki ke bukai meri sampi penutup. Kelas tambah enda patut dipejalaika ba minggu penatai tuai ti ngabas. Raban gempuru ke mit ulih begempuru taja pan nya minggu tuai ti ngabas ngelawa raban gempuru ke megai sida. Tang, raban tu patut enggau raban gempuru ke megai sida lebuh cheramah tuai ti ngabas.

21. Ba minggu gempuru besai sehari tauka konvensyen, nadai gempuru deka diatur. Semua utai ke dikerandauka ba gempuru dalam minggu nya patut dipelajarka kediri empu tauka enggau diri sebilik.

22. Enti hari Ngingatka Pemati Jesus ba tengan minggu, Gempuru Pengidup enggau Pengawa Kristian nadai dipejalaika.

23. Siku tuai gempuru ke dipilih raban tuai gempuru deka nyadi tuai ti nyaga Gempuru Pengidup enggau Pengawa Kristian. Iya betanggungjawap nentuka gempuru tu diatur enggau manah sereta dipejalai nitihka iring ke udah disediaka ditu. Iya patut senang berandau enggau penyaup meri jaku lalau. Sepengudah raban gempuru nerima Bup Kereja Pengidup enggau Pengawa Kristian, tuai ti nyaga Gempuru Pengidup enggau Pengawa Kristian deka nyediaka jadual ke semua begian ba gempuru tengan minggu dalam timpuh dua bulan. Tu nyengkaum begian ke pemelajar, begian ke ukai pemelajar, sereta chairman ke gempuru tengan minggu. Chairman ke gempuru tengan minggu patut bala menyadi ke udah dikemendarka raban tuai gempuru. (Peda  genteran 3-16 enggau  24.) Lebuh meri tugas ngagai pemelajar, iya patut berunding pasal umur, pengalaman, sereta sekalika pemelajar nya ulih bejaku enggau berani tauka enda pasal topik ke diberi ngagai pemelajar nya. Lebuh meri tugas ba begian bukai, iya mega patut berundingka utai ti sama. Tiap iti begian patut diberi abis laun tiga minggu sebedau begian nya dikenataika. Begian ke pemelajar patut diberi ngena pom (S-89), Begian Gempuru Pengidup enggau Pengawa Kristian Kitai. Tuai ti nyaga Gempuru Pengidup enggau Pengawa Kristian patut nentuka jadual gempuru tengan minggu dilekatka ba papan notis Palan Gempuru. Raban tuai gempuru ulih minta siku tuai gempuru tauka penulung gempuru nulung iya. Taja pia, ba begian ke ukai pemelajar, semina tuai gempuru ulih ngaga jadual ke pengawa nya.

24. Ninting minggu, siku tuai gempuru deka nyadi chairman ba Gempuru Pengidup enggau Pengawa Kristian. (Raban gempuru ke enda chukup tuai gempuru ulih mega ngena penulung gempuru ti layak.) Iya betanggungjawap nyediaka jaku pemuka enggau jaku penutup. Pia mega, iya deka madahka dulu semua begian ke bisi maya nya, lalu bepanggai enggau penyampau tuai gempuru ke bisi, iya engka megai begian ke bukai ba gempuru maya nya kelebih agi ba begian ke semina mainka video, tang nadai berandau. Komen ke diberi entara tiap iti begian ba gempuru patut pandak. Raban tuai gempuru patut nentuka ni bagi tuai gempuru ke ulih megai pengawa tu. Tuai gempuru ti ulih megai pengawa tu deka besilih nyadi chairman. Bepanggai ba endur siti-siti gempuru, tuai ti nyaga Gempuru Pengidup enggau Pengawa Kristian ulih dipilih suah agi nyadi chairman ari tuai gempuru ke bukai. Enti tuai gempuru nya ulih ngiring Gempuru Belajarka Bup Kudus, iya mega ulih dipilih nyadi chairman ba gempuru. Taja pia, kingatka, tuai gempuru ke nyadi chairman patut meri jaku puji sereta jaku lalau ke ulih meransang bala penginjil ke megai begian pemelajar. Chairman mega betanggungjawap nentuka gempuru abis nitihka jam ti patut. (Peda  genteran 17 enggau  19.) Enti chairman deka, sereta pentas chukup pemesai, siti mikrofon bediri ulih disediaka ngambika seraya chairman madahka siti-siti begian, menyadi ke siku da agi ulih nyediaka diri ba mikrofon pencheramah. Pia mega, chairman ulih milih duduk ba pentas lebuh pemelajar ngenataika begian Macha Bup Kudus enggau Ngemanahka Agi Chara Kitai Nginjil. Tu ulih nyeliahka jam ari dibasau.

25. Enti ulih, pilih meh siku tuai gempuru ke lama udah nyadi pencheramah megai tanggungjawap tu. Penyaup meri jaku lalau betanggungjawap meri jaku lalau ngagai bala tuai gempuru enggau penulung gempuru pasal semua pengawa ke dikereja sida, nyengkaum begian ba Gempuru Pengidup enggau Pengawa Kristian, cheramah ke bala mayuh, chara ngiring tauka macha maya belajarka Menara Jaga sereta maya Gempuru Belajarka Bup Kudus. Jaku lalau tu semina diberi maya kediri sereta ba maya ti patut aja. (Peda  genteran 19.) Enti bisi beberapa iku bala tuai gempuru ke landik ngajar sereta landik meri cheramah, sida tau betukar megai tanggungjawap tu ninting taun. Penyaup meri jaku lalau enda ibuh meri jaku lalau tiap kali tuai tauka penulung gempuru ngaga pengawa sida.

26. Bepanggai ba penyampau pemelajar, raban gempuru ulih ngaga kelas tambah enti begunaka iya. Tiap iti kelas tambah patut bisi pemeri jaku lalau ke layak, enti ulih siku tuai gempuru. Enti enda, penulung gempuru ti layak mega tau megai pengawa tu. Raban tuai gempuru patut mutuska sapa ke ulih megai pengawa tu, lalu berunding sekalika orang ti ngiring kelas tu patut betukar tauka enda. Pemeri jaku lalau patut nitihka iring ke dipadah ba  genteran 18. Enti kelas tambah bisi digaga, bala pemelajar patut diasuh mindah ngagai kelas tambah, pengudah begian Penemu Bup Kudus ti Berega, iya nya dalam begian Reta Ari Bup Kudus. Sida patut begulai baru enggau bala ke bukai pengudah begian ari pemelajar ke penudi abis.

27. Sekeda video ke bekaul enggau gempuru tu deka disediaka. Video ke dikena ba gempuru tengan minggu deka disediaka ba aplikasi JW Library lalu ulih dibuka ngena mayuh macham perengka elektronik.

© 2023 Watch Tower Bible and Tract Society of Pennsylvania

S-38-IA 11/23