1-3. Nama utai ti enda dikereja nabi ari menua Judah, lalu nama nyadi? (Peda gambar ba pun artikel.)

RAJA JEROBOAM ari menua Israel udah nirika siti alta ke sembah ti pelesu di nengeri Betel. Jehovah udah nganjung seiku nabi ari menua Judah meri pesan pasal pengawa ngakim ngagai Jeroboam. Nabi ke baruh ati nya ngasika Jehovah lalu ngenataika pesan nya. Raja pedis ati ngagai nabi nya, tang Jehovah nyaga nabi nya.—1 Raj. 13:1-10.

² Jehovah udah nagang nabi nya makai tauka ngirup ba menua Israel, lalu ngasuh iya pulai nengah jalai bukai. Lebuh nabi nya benung dirantau jalai pulai, iya betemu enggau seiku lelaki tuai ke bula ngagai iya, madahka diri bisi mai pesan ari Jehovah. Lelaki ke tuai nya mai nabi nya makai enggau ngirup ba rumah iya. Nabi nya enda ngasika Jehovah lalu nitihka lelaki ke tuai nya. Jehovah enda lantang ati. Lebuh nabi nya bejalai pulai, seiku singa nerekam lalu munuh iya.—1 Raj. 13:11-24.

³ Kitai enda nemu kebuah nabi nya deka mendingka lelaki ke tuai nya ari mendingka Jehovah. Tang kitai nemu, iya enda agi mengkang ‘diau begulai sejalai enggau Petara kitai enggau ati ti baruh.’ (Bacha Mikah 6:8.) Dalam Bup Kudus, diau begulai sejalai enggau Jehovah nyengkaum arapka Jehovah, bepanggai ba iring Iya, sereta ngasika Iya. Orang ke baruh ati nemu, iya patut seruran besampi. Enti nabi nya baruh ati, iya tentu besampi ngagai Jehovah kena nentuka pesan nya udah berubah.  Kekadang kitai mega patut ngaga pemutus ti tusah, lalu kitai engka enda entu nemu utai ti dikedekaka Jehovah kereja kitai. Tang enti kitai baruh ati, kitai deka minta Jehovah ngiring kitai ngambika ulih nyeliah ari ngaga penyalah ti besai.

4. Nama deka dipelajarka kitai ba artikel tu?

⁴ Ba artikel sebedau tu, kitai udah belajarka reti baruh ati sereta kebuah baruh ati nya beguna ke kitai kemaya hari tu. Tang baka ni kitai ulih baruh agi ati? Lalu nama utai ke ulih nguji pemaruh ati kitai, iya nya, ke nunjukka sekalika kitai amat baruh ati tauka enda? Aram kitai diatu berandauka tiga iti utai nya.—J-lam. 11:2.

5, 6. Baka ni Barsilai nunjukka diri baruh ati?

⁵ Utai ti digaga kitai lebuh bisi utai ti nyadi ba kitai tauka pengawa kitai berubah ulih nunjukka sekalika kitai amat baruh ati. Kitai ulih belajar ari teladan Barsilai, pangan Raja David ti taluk. Lebuh Barsilai beumur 80 taun, David mai iya diau ba istana. Taja pan tu basa ti besai, Barsilai madahka manah agi pengawa nya diberi ngagai anak lelaki iya ke benama Kimham.—2 Sam. 19:31-37.

⁶ Nama kebuah Barsilai enggai nerima kangau nya? Kati tu ketegal iya deka nyeliahka diri ari nerima tanggung pengawa tauka deka idup ngelantangka diri? Enda, tu ketegal Barsilai baruh ati. Iya nemu, bisi utai ti udah berubah ba pengidup iya, lalu iya nerima pengurang diri. (Bacha Galatia 6:4, 5.) Baka Barsilai, kitai patut baruh ati. Ari ke semina betumpu ba utai ti dikedekaka kitai tauka mandingka diri empu enggau orang bukai, kitai betumpu ba ngereja utai ti pemadu manah ke Jehovah. Tu beguna agi ari ke ngembuan pengawa ti spesial tauka tebilang. (Gal. 5:26) Enti kitai baruh ati, kitai deka sama bekereja enggau bala menyadi Kristian kitai ngemuliaka Jehovah sereta nulung orang bukai.—1 Kor. 10:31.

7, 8. Baka ni baruh ati ulih nulung kitai enda bepanggai ba diri empu?

⁷ Endang tusah deka mengkang baruh ati enti kitai diberi mayuh tanggung pengawa tauka kuasa. Kitai ulih belajar ari teladan Nehemiah. Lebuh Nehemiah ninga pasal orang di Jerusalem napi mayuh penanggul, iya minta Jehovah nulung sida. (Neh. 1:4, 11) Jehovah nyaut sampi Nehemiah. Raja Artaserses ngeletak Nehemiah nyadi gabenor ba menua Judah. Taja pan Nehemiah bekuasa sereta kaya, tang iya enda kala bepanggai ba diri empu. Iya ngiga iring ari Jehovah sereta macha bup Adat enggau tetap. (Neh. 8:1, 8, 9) Nehemiah bekuasa atas mayuh orang. Tang iya enda kala ngena kuasa iya ke penguntung diri empu tauka kasar enggau orang bukai.—Neh. 5:14-19.

⁸ Baka Nehemiah, enti kitai nerima mayuh tanggung pengawa tauka bisi peluang bulih siti-siti pengawa, kitai deka nentuka diri mengkang baruh ati. Kitai enggai semina bepanggai ba penau tauka peneleba diri. Baka ni orang nyau berengkah bepanggai ba diri empu? Ngambika chunto, tuai gempuru engka enda besampi dulu lebuh mutarka pekara ke bekaul enggau eklisia. Tauka menyadi Kristian lelaki tauka indu engka ngaga pemutus dulu, lalu udah nya baru besampi ngagai Jehovah ngambika merekatka pemutus nya. Tang, orang ke baruh ati enda bepanggai ba diri empu, indah lebuh iya benung ngereja siti-siti utai ke udah suah dikereja iya. Iya seruran ingat, penau iya enda ulih telabanka enggi Jehovah. (Bacha Jaku Dalam 3:5, 6.) Ba dunya kemaya hari tu, mayuh orang berundingka diri empu sereta nguji deka lebih agi ari orang bukai. Tang nembiak Jehovah enda baka nya. Kitai enda ngumbai ngembuan tanggung pengawa ngasuh kitai manah agi ari orang bukai ba ruang bilik tauka eklisia kitai. Kitai nemu  ungkup kitai ba atur Petara sereta sama bekereja enggau bala menyadi Kristian kitai.—1 Tim. 3:15.

9, 10. Baka ni baruh ati nulung kitai lebuh orang nyebut utai ti enda betul pasal kitai?

⁹ Kitai pedis ati enti orang nyebut utai ti enda betul pasal kitai. Tu nyadi ba Hanah. Taja pan laki iya sayau amat ke iya, tang iya enda lantang ati. Peninah, bini kedua Elkanah, selalu ngeleseka iya. Hanah deka bisi anak tang enda ulih. Bisi sekali lebuh Hanah balat tusah ati, iya ngagai langkau sembiang lalu besampi. Imam besai Eli meda iya nyabak lalu ngumbai iya mabuk! Tu tau ngasuh Hanah balat ringat. Tang iya nyaut Eli enggau chara ti bebasa. Udah nya, Hanah nyebut sampi ke nunjukka pengarap sereta pengerindu iya ngagai Jehovah.—1 Sam. 1:5-7, 12-16; 2:1-10.

¹⁰ Baruh ati ulih nulung kitai ‘ngalahka penyai ngena pemadas.’ (Rom. 12:21) Dunya Sitan penuh enggau penyai. Nya alai, kitai enda patut tekenyit enti orang enda manah enggau kitai. Taja pan tu ulih ngasuh kitai pedis ati, kitai patut ngelaban asai ati nya. (Mas. 37:1) Kitai tentu balat agi pedis ati enti kitai bisi penanggul enggau bala menyadi Kristian ba eklisia. Enti tu nyadi, kitai patut neladan Jesus. Bup Kudus madahka: ‘Lebuh iya [Jesus] dikeduan, iya enda malas.’ Tang, ‘iya nyerahka diri ngagai Petara ke ngakim ngena pengelurus.’ (1 Pet. 2:23) Jesus baruh ati sereta nemu Jehovah deka ngemetulka sebarang pengawa ke enda lurus. (Rom. 12:19) Kitai mega deka baruh ati sereta enda “malas penyai ngena penyai.”—1 Pet. 3:8, 9.

11, 12. (a) Baka ni kitai ulih mengkang baruh ati lebuh orang bukai muji tauka ngelangkung kitai? (b) Baka ni kitai ulih nunjukka kitai baruh ati ari ulah sereta chara kitai begari?

¹¹ Pemaruh ati kitai mega kena uji lebuh orang muji tauka ngelangkung kitai. Ester nerima mayuh jaku puji enggau jaku kelangkung. Iya seiku ari indu ti pemadu bajik di menua Persia. Pengelama setaun iya diintu enggau manah lebuh pengawa ngemajikka iya dipejalaika, sama enggau mayuh indu ke  biak ti bukai ke bepekit minta diperatika raja. Udah nya raja milih Ester nyadika kuin iya. Tang semua utai ke manah tu enda ngasuh Ester berubah. Ester enda berundingka diri empu. Iya mengkang baruh ati, manah ati, sereta bisi basa.—Est. 2:9, 12, 15, 17.

¹² Enti kitai baruh ati, kitai deka begari sereta ngembuan ulah ke nunjukka kitai bebasaka orang bukai sereta diri empu. Ari ke bejaku begah tauka nguji ngasuh orang temegahka kitai, kitai patut “nelap sereta imun.” (Bacha 1 Peter 3:3, 4; Jer. 9:23, 24) Runding kitai pasal diri empu ulih dipeda ari jaku enggau pengawa kitai. Ngambika chunto, kitai engka nguji ngasuh orang bukai ngumbai kitai tu spesial ketegal utai ke dikereja kitai, utai ke ditemu kitai, tauka orang ke dikelala kitai. Tauka kitai engka nguji ngumbai diri ngereja utai ti beguna kediri aja, taja pan bisi orang bukai ke nulung kitai. Tang perundingka Jesus. Iya ulih ngasuh orang temegahka iya enggau pemandai ke dikemisi iya. Tang Jesus suah ngambi ayat ari Jaku Petara. Iya enggai orang meri iya mulia. Iya seruran dekaka mulia nya diberi ngagai Jehovah.—Jhn. 8:28.

13, 14. Baka ni baruh ati ulih nulung kitai ngaga pemutus ti manah?

¹³ Kitai patut baruh ati lebuh ngaga pemutus tauka lebuh orang bukai ngaga pemutus ke bekaul enggau kitai. Lebuh rasul Paul diau di menua Siseria, iya deka mupuk ke Jerusalem nembuka pengawa ti udah diberi Jehovah ngagai iya. Tang nabi Agabus madah ngagai Paul enti iya mupuk kin, iya deka ditangkap. Iya mega engka deka dibunuh. Bala menyadi Kristian enda ngasuh Paul mupuk kin. Tang Paul mutuska runding deka mupuk ke Jerusalem. Kati tu ketegal iya bepanggai ba diri empu? Enda, Paul baruh ati sereta arap bendar ke Jehovah. Bala menyadi Kristian nya mega baruh ati. Nya alai sida setuju enggau pemutus Paul lalu ngelakka iya mupuk.—SKR. 21:10-14.

¹⁴ Baruh ati deka nulung kitai ngaga pemutus ti manah indah lebuh kitai enda nemu tauka enda ulih nentuka baka ni siti-siti utai deka nyadi. Ngambika chunto, kitai engka  berunding deka semina gawa ke Jehovah aja. Tang nama deka nyadi enti kitai sakit? Baka ni enti apai indai kitai sakit sereta begunaka bantu? Nama deka digaga kitai enti kitai nyau majak tuai? Kitai enda ulih nyaut semua tanya tu, taja pan kitai besampi tauka berunding pasal tanya tu. (P-jar. 8:16, 17) Tang enti kitai arapka Jehovah, kitai deka nemu sereta nerima pengurang diri. Kitai deka meresa fakta, minta jaku ajar, lalu keberat agi, besampi minta iring. Udah nya kitai patut nitihka iring ari roh kudus Jehovah. (Bacha Pengajar 11:4-6.) Jehovah ulih merekatka pemutus kitai, tauka nulung kitai ngubah utai ke diperambu kitai.—J-lam. 16:3, 9.

15. Baka ni belematika Jehovah nulung kitai mengkang baruh ati?

¹⁵ Baka ni kitai ulih baruh agi ati? Kitai deka berandauka empat iti chara. Kesatu, kitai patut belematika Jehovah, berundingka kualiti Iya enggau dalam. Lebuh kitai mandingka diri empu enggau Jehovah, kitai nemu kitai tu mit amat lalu mimit aja utai ke ditemu kitai. (Isa. 8:13) Anang enda ingat, kitai gawa ke Petara ti Pemadu Bekuasa, ukai gawa ke mensia tauka melikat. Belematika utai tu deka nulung kitai ngemaruhka diri ‘di baruh jari Petara ti bekuasa.’—1 Pet. 5:6.

16. Baka ni belematika pengerindu Petara nulung kitai baruh ati?

¹⁶ Chara kedua kitai ulih baruh agi ati, iya nya belematika penalam pengerindu Jehovah ke kitai. Paul mandingka eklisia enggau tubuh mensia. Semua perengka tubuh ke digaga Jehovah berega magang. (1 Kor. 12:23, 24) Tiap-tiap iku kitai mega berega ba Jehovah. Iya enda mandingka kitai enggau orang bukai, lalu Iya enda badu rinduka kitai taja pan kitai ngereja penyalah. Kitai ulih berasai likun laban nemu Jehovah rinduka kitai.

17. Baka ni kitai deka bulih penguntung enti kitai beratika pemanah ke bisi ba orang bukai?

¹⁷ Ketiga, kitai deka baruh agi ati enti kitai beratika pemanah ke bisi ba orang bukai, baka ke digaga Jehovah. Ari ke seruran deka minta diperatika tauka madah ngagai orang bukai utai ti patut dikereja, kitai deka minta jaku ajar ari sida sereta sanggup nerima penemu sida. (J-lam. 13:10) Kitai gaga ati ke bala menyadi Kristian lebuh sida nerima pengawa ti spesial. Lalu kitai beterima kasih ngagai Jehovah ke ngawakka semua kitai gawa ke Iya.—1 Pet. 5:9.

18. Baka ni ngelatih pengasai ati kitai deka nulung kitai baruh agi ati?

¹⁸ Keempat, kitai deka baruh agi ati enti kitai ngena prinsip Bup Kudus ngelatih pengasai ati kitai. Prinsip nya ngajar kitai pasal asai ati sereta runding Jehovah. Enti kitai belajar meda utai nitihka runding Jehovah, kitai ulih ngaga pemutus ti ngelantangka ati Iya. Seraya kitai belajar, besampi sereta nitihka utai ti dipelajarka kitai, pengasai ati kitai deka tegap agi. (1 Tim. 1:5) Kitai belajar ngenuluka orang bukai. Enti kitai ngereja utai tu, Jehovah besemaya deka nembuka latih kitai, nyengkaum nulung kitai baruh agi ati.—1 Pet. 5:10.

19. Nama deka nulung kitai mengkang baruh ati belama iya?

¹⁹ Kati nuan agi ingatka nabi ari menua Judah ke dikerandauka kitai ba pun artikel tu? Iya lenyau pengidup sereta kaul enggau Jehovah laban iya enda mengkang baruh ati. Tang kitai ulih mengkang baruh ati indah lebuh kitai tusah ngereja iya. Chunto ari mayuh nembiak Jehovah ke tetap ati nunjukka tu ulih. Lama agi kitai gawa ke Jehovah, bendar agi kitai bepanggai ba Iya. (J-lam. 8:13) Enda ngira nama utai ke nyadi ba kitai, kitai agi ulih diau begulai sejalai enggau Jehovah. Tu basa ti pemadu besai ke dikembuan kitai. Nya alai, aram meh kitai enggau naka ulih mengkang baruh ati sereta diau begulai sejalai enggau Jehovah belama iya.